سالفة ( الرجل وإن طاب طيبه من خواله ) ورد القصيدة

محماس بن عبيد · 09-07-2008, 07:56 PM

الشاعر راشد بن حسن العجمي الملقب ( بخر الذيب ) كان يشتغل سوّاق في ارامكو وكانت انظمة ارامكو تمنع السائقين ان يشيلو الطرقيه اللي يوقفون السواقين ويطلبونهم توصيلهم على طريقهم .. والشاعر راشد الله يرحمه كان يخالف التعليمات وكل هذا حيا فيه ومرجله يوم من الايام أشرت له عجوز ومعها غنم قالت وصلني يا الأجودي قدام شوي قال ابشيلك بس الغنم .لا قالت له خلاص روح الله يستر عليك بيجي خر الذيب ويشيلني انشاْ الله تقصد راشد العجمي .. قال لها يا خاله انا راشد الذيب .. اركبي وابشري بالخير .. وقيل انه توفي عام 1986م وهو في نجران وكان شايل معه شخص موصله الى قرية في نجران وحصل عليهم حادث رحمه الله .. وله في ذلك ابيات جميلة منها :

اشـرب الفنجـال واخلـي البيالـه
طيـب و احـب سلـوم الطيبـيـن
والصبي وان طاب قالوا من خوالـه
وان تردى فـادروا انهـم خايبينـي
لالقيت اللـي علـى السكـه لحالـه
يلتفـت ويقـول ويـن المستحينـي
أوقف الموتر حيـا وابغـا الجمالـه
يوم ولد اللاش وجهـه مـا يلينـي
حالف ما اخذ على الطرقـي ريالـه
والثلاثه حالـف انهـا مـا تجينـي
الطمع في كـروة الرجلـي رزالـة
خص وان جابـه مجـال الغانمينـي
والردي فـي حالـة ماهـي بحالـه
واعوينـه مـن كـلام الطيبيـنـي
الـردي لـو بـان مايذكـر عمالـه
مايعـد الـلاش مقصـور اليمينـي
أركبـه لعيـون مـن زيـنٍ دلالـه
ماتحاكـوا فـي قفـاه الرامسينـي
مابغى غيـري وانـا مابغـى بدالـه
قاعـدٍ لـي بالرجـا مـدة سنينـي
ولاقعدنـا بالعمـل بنـا الـرزالـة
ناخـذ العليـا طريـق الفايزيـنـي
قال خر الذيب مـن هاجـوس بالـه
كلمـة يلعـب بهـا والبـال زينـي
قالهـا يومـه طرالـه ماطـرالـه
من هواجيـسٍ تشيـب المرضعينـي
غرني بعض الرجـال بكثـر مالـه
مادرى ان الموت في حبل الوتينـي
كيف ينفعنـي وابـا(......) خالـه
مايقوم البيـت دام السـاس طينـي
ناس ويـن اللـي عوايـده الجمالـة
مثل ابن ظافر حمـد ليتـه يجينـي
الثنـا والجـود دايـم فـي خيالـه
علمـه ظافـر سـلـوم الطيبيـنـي
جـوّد العليـا ولزمّـهـا عيـالـه
وادركوا مـن علمتـه دنيـا ودينـي
واهني من باع حظه واشتـرى لـه
وسار في درب النبي وأخزى اللعيني
موقفـه مـاكـل رجَــال ينـالـه
مـن بغـى ممشـاه يقعـد مرتينـي
كم ذبح من حايـل مـن حـر مالـه
وعادتـه لطمـة خشـوم العايلينـي

ورد عليه الشاعر الكبير : مسعود بن عنبر الدوسري حيث كان مسعود في احد الأيام يبي يركب مع أهل السيارت المتجهين للرياض ومر عليه شخص معه سياره ومعه ركاب فسأله مسعود ان يركب معهم فقال السواق مالك درب معنا ثم نزل السواق في ظل شجره ونزل برّاد الشاهي وصب لنفسه وترك أخوياه الركاب ما قهواهم معه. بعدها بلحظات مر على مسعود رجل من أهل الهدار بالأفلاج يقال له ابن حسين من قبيلة زعب ، ووقف ابن حسين لمسعود ثم انزل واحد من ابنائه- كان راكب معه في الغماره- واركبه في الحوض وحلف ان يركب مسعود مكانه ، ولم يكتفي بهذا فقط بل إنه أوقف سيارته ونزل معاميله وزين القهوة وقهوى مسعود والركاب اللي معه وذبح لهم ذبيحة ، وأوصلهم بالمجان ( وكان هذا الكرم من طبعه ) فقال مسعود قصيده طويلة في مدح ابن حسين وذم ذلك الرجل البخيل ، يقول مسعود في قصيدة طويلة لا أحفظ منها إلا أبيات قليلة :

راكب اللي لا مشى تومي حباله

لا نوى له ديرة (ن) جاها بحيني

انص خر الذيب عندي له رساله

عـندنا مثله ربوع (ن) طيبيني

عندنا ابن حسين يفعل ما طرى له

يركب الطرقي وهيف(ن) له سميني

كم نقل له خبرة (ن) من حرّ ماله

لا لقاهم في الخـلا متعـطـلـيني

ضَـوّهم ضوّه ودلتهم ادلاله

شوف عيني واشهدوا يا حاضريني

جعل يفداه الردي راعي البياله

شارب الشاهي وربعه قاعديني

وسلامتكم

ملاحظة : نقلت الموضوع من منتدى ( العبادل ) وكاتب المقال هو : حاجب

م ا ج د · 09-07-2008, 08:25 PM

يعطيك العافيه اخوي محماس وبارك الله فيك على النقل
والله صحيح الايام ذي قليل ماتلقى زي شاعرنا راشد وطيبه
الله يرحمه ويرحم اموات المسلمين

محماس بن عبيد · 09-07-2008, 08:42 PM

الأخ الكريم : م ا ج د ، الله يعافيك ، وتسلم على مرورك 0

**إبن ثعلي** · 09-07-2008, 08:45 PM

مشكور يااخ محماس على حسن الاختيار والقصيدة موجوده مسبقا
http://www.otaiby.com/vb/showthread....ED%C7%E1%DC%E5
وتحياتي لك

محماس بن عبيد · 09-07-2008, 08:53 PM

ابن ثعلي ، لك جزيل الشكر على التنبيه وعلى جهودك في الموقع ، والمعذرة لم أكن أعلم بوجود الموضوع ، تقبل فائق تحياتي 0

**إبن ثعلي** · 09-07-2008, 09:22 PM

لاشكر على واجب وجزاك الله خيرا ومشاركتك فيها تفصيل وقصيدة مجاراة اخرى ولاينطبق عليها التكرار لكني ووددت اعلامك بوجود القصيدة في المنتدى واعود واكرر لك شكري الجزيل

**ابوسـعد** · 09-07-2008, 09:25 PM

[poem= font="Simplified Arabic,4,crimson,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black"]

والصبي وان طاب قالوا من خوالـه=وان تردى فـادروا انهـم خايبينـي[/poem]

[poem= font="Simplified Arabic,4,orangered,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black"]
الولد وإن طاب قالوا : من خواله=بالخوال يسـال قبـل الوالدينـي[/poem]

ايهما الصح ام هي روايات وياهلاااوغلااااا

محماس بن عبيد · 09-07-2008, 11:10 PM

أكرر شكري لك يا بن ثعلي على ردك الذي يدل على خلقك ، وما هو بغريب منك الطيب ولا من ربعك 0

محماس بن عبيد · 09-07-2008, 11:16 PM

Abo Saad / شكرا لمرورك ، والقصائد المشهورة أحيانا يختلف الرواة في بعض أبياتها ، وحسب معرفتي أنها :
والولد وأن طاب طيبه من خواله *** وإن تردى فادروا أنهم خايبيني

وأظن الرواة عدلوا عجز البيت ، لأن عجز البيت معناه غير صحيح كما يراه الكثير ، فاستبدلوا العجز بـقولهم:
بالخوال يسأل قبل الوالديني
والله أعلم 0

**ابوسـعد** · 09-08-2008, 05:38 AM

هذا صحيح...وشكرا على الايضاح...وياهلااوغلاااا يامحماس

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع	تقييم هذا الموضوع
العرض العادي الانتقال إلى العرض المتطور الانتقال إلى العرض الشجري	تقييم هذا الموضوع: