الهنوف اللي تربت في عفيف

[رائد المرشدي]

هذه القصيده للشاعر بوابة عفيف
مشعل حسين المرشدي الروقي ( المحنك )


امس العصر ساقتني الذكرى على الضلع المنيف
وجهتلـه يـوم النحايـا وجهـت بـي يمتـه

عديت به والصدر متضايق وانا حالـي كسيـف
وهيجنت بأعلا الصوت حين اني رقيـت لقمتـه

وقامت بيوت الشعر تطري كل بيتً لـه رديـف
لين اكتمـل منظـوم لولـو والقصيـده لمتـه

كله على شان الهنوف اللي تربت فـي عفيـف
اللي على القلب اركت الميسـم بعـد ماحمتـه

ام الحلا وام الدلع والجيـد والخصـر النحيـف
ام العيـون اللـي هدبهـا يشتبـك لاضمـتـه

كانت تقابلني وقابلها علـى الحـب الشريـف
ودلـو المحبـه بيننـا محـدن يعكـر جمتـه

ولا يفرقنـا شـتـاء ولا يفرقـنـا خـريـف
وعلى اللقاء كـلً مـن اللهفـه يجـدد همتـه

انا وهي طول الزمان الرقـم الأول والوصيـف
اقطف لها ورد الغـلا ويفـوح لامـن شمتـه

واليوم فرقنـا الزمـان وراح لطفـك يالطيـف
عقب الصغير اللي وهبها الله وبسمـي سمتـه

لوكان ابومشعل درى والله مايقفـي باالوليـف
مار النصيب الشيـن خدرنـا وجـاب مطمتـه

هاذي مقاسيم الحياه وغلطـة العقـل النظيـف
اللي تمادى ليـن عسـرات الدعـاوي خمتـه

ودك ليامنه جمعـك الحـب باالغـض العفيـف
تغانـم الفرصـه مـدام العـود بـأول زمتـه

هذا هو اللي جابني لمعانـق الضلـع المنيـف
واسرار قلبي جعلها مـن ذمتـي فـي ذمتـه


مشعل المرشدي

((المحنك))

[الأدميرال]

لاهنت يارائد على نقل القصيده

[وجودك يكفي]

صح لسان الشاعر مشعل المرشدي وتسلم يمينك على النقل

احترامي

[رائد المرشدي]

المشاركة الأصلية كتبت بواسطة الأدميرال لاهنت يارائد على نقل القصيده

الله لايهينك وجعلك سالم طال عمرك

محبتي وتقديري

[رائد المرشدي]

المشاركة الأصلية كتبت بواسطة وجودك يكفي صح لسان الشاعر مشعل المرشدي وتسلم يمينك على النقل احترامي

الله يسلمك يابطل
وشكراً لك طال عمرك

محبتي وتقديري

[إبن ثعلي]

مشكور يارائد على اتحافنا بهذه القصيدة الرائعه وصح السان شاعرها

[رائد المرشدي]

المشاركة الأصلية كتبت بواسطة إبن ثعلي مشكور يارائد على اتحافنا بهذه القصيدة الرائعه وصح السان شاعرها

العفو طال عمرك
واروع منها طلتك يابطل

محبتي وتقديري

[بنت امير]

ابدااااااااااااااااااااااااااع
يعطيك الف عافيه
ننتظر جديدك
دمت بحفظ الرحمن

[الطرف الحنون]

قصيدة من الوزن الثقيل

راااقت لي

صح لسان شاعرها

ولاهنت اخوي ع النقل الموفق


بارك الله فيك

[علي حسين اليمان]

يعطيك العافية اخ رأيد
دائما تأتي بكل رائع ومؤثر