قصيدة اجتماعية للوالدين - خالد العتيبي

ياللي ورى ركنك تلوذ المساكين
..................واسجد لمرضاتك واذلّل جبيني

عبدك على عهدك ومدك بلا حين
........................وأنا على بابك وتعلم كنيني

أزريت لا اعدل كفوف الموازين
..............وازريت أسدّ الربع من عشر ديني

لبيه ثم لبيه مرحب وسهلين
......................ياعز وجهين ثمرها سنيني

واجلّ واغلى من تحلّت به العين
.................واعز وابرك من اجيه ويجيني

وأهلا ولو أهلا توقف مع اسمين
....................وقفتها مابين الأسماء وبيني

واثنين مافرق في الغلا ومتساوين
................إلا إني افرق بين عيني وعيني

ليت إنهم في الصدر حرز عن البين
...................والموت قبل يمرهم يحتويني

وبواهج الرمضاء ضلوعي بساتين
..................وليا وطوها فرشهم راحتيني

اطيب وامرض واغضب العمر وازين
...........وانصى المجافي واجفي اللي يبيني

وأحب واكره وأحشم إنسان واهين
.................في ذاتهم واقرب بهم مبعديني

واصل على رجوى رضاهم للأقصين
................واقطع بمبعدهم ولو هي يميني

معهم بلى كم ومتى وشهو ووين
.................لا ليه كيف ودينهم في وتيني

ولو إن عمري يصرف أيام وسنين
.............قسمت عمري عدل مع غالييني

وليا نزلت اقبل كفوفهم لين
.............أوصلت راسي مطلع الفرقديني

وأنا فدى ماطى قدم رجل الأثنين
...........من دون أقول اللي تحوشه يديني

ما دامي أسبرهم على الأرض حيين
....................يا ثالث الأعياد لاتحترينِي

استبدل الدنيا بضحكة حجاجين
.............وابهم عن اللي كنت ابيه ويبيني

وآمين من جودك ومن جودك آمين
..............يالله عسى الجنه جزى والديني

[وجودك يكفي]

صح لسان الشاعر خالد ولاهنت على النقل يالباسل

احترامي

صح الله بدنك

وشكرا لمرورك وتشريفك