طير من العتبان مو طير شلوى

[فـهـد العتيبي]

الطيب رفعه لكن العز تقوى
والستر كافي والتبختر زوايد

وليا ملكت المال حذراك تغوى
واياك ثم اياك كسبَ الزهايد

هاك القصيد الي وزني و شروى
من هو على كفيه حل الشدايد

شيخٍ تطيب بكلمته كل شكوى
صفحات عمره عِذر بيضٍ جدايد

ما حسِّفت يوم المطاليب نخوى
ولا حسِّبت في الحق لوم النقايد

من يقنع الخصمين في كل دعوى
الا النبيه الي بتفكير قايد

شهمٍ كريمٍ في مباديهِ سلوى
والجود طبعه لو غدا الشح كايد

و لو حدِّته عن مدِّته كل بلوى
في نفس حِرٍّ ما تموت العوايد

يفخر به ابنه والبنيه ويسوى
لو هو فخرهم في معاليه زايد

بنته تمناها فتى القوم رجوى
وما يفتن الفرسان ألا الفرايد

سميتها في الزين حوراء حوى
تستاهل الاشعار فيها مدايد

فيها نظمت الشعر والشعر نجوى
تحمل رسايل حلمنا والتعايد

يا كامله فيك التفاصيل نقوى
ما جاملك في النقد رأي المحايد

قلته وانا من هو على الصعب يقوى
واسوق عمري في سبيل المجايد

طيرٍ من العتبان مو طير شلوى
ما يقنص ألا النادرات الخرايد

لا من قصد يكِسب هل الشعر نشوى
ويميـــــز الشعار جزل القصايد

فهد العتيبي

[النجم الأصيل]

صح لسانك وبيض الله وجهك

[اصايل]

جزله


صح لسانك مدد

[{ أبوفيصل }]

الله الله الله

صح لسسسانك وعلااا شاااانك

مبدع وكلمة ابداع ماتوفيك

رائعه جداً واشهدنها جزله وراقت لي

هاك القصيد الي وزني و شروى
من هو على كفيه حل الشدايد

شوف هالبيت هذا يافهد ترى الشوف عندي شجر :)

[فـهـد العتيبي]

المشاركة الأصلية كتبت بواسطة خليجي نت الله الله الله صح لسسسانك وعلااا شاااانك مبدع وكلمة ابداع ماتوفيك رائعه جداً واشهدنها جزله وراقت لي هاك القصيد الي وزني و شروى من هو على كفيه حل الشدايد شوف هالبيت هذا يافهد ترى الشوف عندي شجر :)

هلا اخوي واستسمح الاخوة في الاعلى على ردي عليك قبلهم لكن
لم افهم ماتقصده
لا عله ولاكسر في البيت اخي ان كان قصدك ذلك
وان كان في المعنى فاجده واضح

محبتي وتقديري

[{ أبوفيصل }]

لا بالله انا ما اترك العجله دايم

والبيت المذكور كنت اظن فيه خلل فني من حيث الوزن

لكن اتضحت الرؤية انه سليم وبكامل صحته وعافيته

وشكرا لك

[فـهـد العتيبي]

يعني خطا طبي
هههه
حياك الله ياغالي

محبتي

[عبدالله المرشدي]

صح لسانك وعلى شانك يافهد العتيبي

قصيده جميله جدا

وقافيه حلوه

عندي ملاحظه بسيطه على قافية سلوى في هذا الشطر اشوف انها ماهي محلها ولو جبت غيرها كلمة اقرب للمعى كان افضل
شهمٍ كريمٍ في مباديهِ سلوى
وهذا مجرد راي وطبعا لايعيب جمال القصيده
صح لسانك لين ترضى

[فـهـد العتيبي]

المشاركة الأصلية كتبت بواسطة عبدالله المرشدي صح لسانك وعلى شانك يافهد العتيبي قصيده جميله جدا وقافيه حلوه عندي ملاحظه بسيطه على قافية سلوى في هذا الشطر اشوف انها ماهي محلها ولو جبت غيرها كلمة اقرب للمعى كان افضل شهمٍ كريمٍ في مباديهِ سلوى وهذا مجرد راي وطبعا لايعيب جمال القصيده صح لسانك لين ترضى

صح بدنك اخوي عبدالله
ليس كل مافي الشعريكتب بصيغة المباشرة والا لفقد الشعر شاعريته ورونقه حقيقة
انا اجد ان البيت يستوفي اشياء كثيرة بكلمة سلوى
وخصوصا بمجمل الكلمة مباديه اي كل مابدا لك ولو لم يكن وجهه بالتحديد
فانت تسلو من كثير اشياء وب كثير اشياء
وسلوى هي من تسلو وتسليني
وعلى قول البيت الي يقول راعيه نظرة عيونك تسليني
فالسلوى ترتبط برؤيا الشخص دائما
فمابالك ان كانت بمجرد ان يطل عليك
وتأكد انني حين قلت في العجز والجود طبعه بينت ان
مبدا سلوانا فيه وبه لانه كريم الطباع
وليس الامر هوى وعشق في الغزل:)
سعدت بنقاشك وشكرا لمرورك الكريم

[عذب السجايا]

والنعم ياشويش العتبان
طيور شلوى :
شويش وعدامه و هيشان زبون الملاييش
هأولائي طيور شلوى من شمر
وأنت فهد العتبان
قالو شويش وقلت لالا عدامه==وان قيل هيشان زبون الملاييش

والنعم فيهم وفيك يافهد عتيبه وفي شعرك الوافي الراقي
وبيض الله وجهك