خرابيط ( للضحك فقط )

[ولد غابي]

خرابيط وشخابيط أبو طلال القديمه ( للضحك وسعة الخاطر فقط ) ولا أعتبرها قصيده أبداً ... آمل أن تعجبكم وتسليكم وهي شيْ خارج عن المألوف ،،،

[poem=font="Simplified Arabic,6,black,bold,normal" bkcolor="transparent" bkimage="backgrounds/40.gif" border="outset,6,gray" type=0 line=0 align=center use=ex num="0,black"]
بسم الله اللي نزّل آيات الأنفال = اللي جعل للنجم منزال عالي
كافل جميع الرزق علاّم الآجال = ياربنا المعبود ياذا الجلالي
عندي مثل يسمع معا طيب فنجال = برّيّةٍ تنقى لصفر الدلالي
ودّي أعبّر ماحصلي بالأعطال = في عطلة الأعياد عقب الخيالي
نصيتلي سبعه وستين رجّال = يوم الدّهر ميّل عليّه ومالي
نصيتهم طلاّب حاجه من المال = سلفه لوجّه الله وإله الكمالي
وطلبتهم موتر بحضّره وبآجال = ماابغاه عاريّه من ابن الحلالي
ياقعيّد أسمع قصتي قصّ تفّصال = بعطيك عنهم موجزٍ في مثالي
أول رجل جيته تعذّرلي وقال = ماعندي الا لقمة أم العيالي
وثاني رجل جيناه منصاب بهبال = الله يكفينا شرور الهبالي
وثالث رجل منصاب فالعقل بخبال = الله ياقانا من أهل الخبالي
ورابع رجل جيته يبا ريال بريال = ماخاف ربه عقب يوم الزوالي
وخامس رجل كذاب ياخوك دجّال= يقول مافي جيبه الا ريالي
وسادس رجل عنده قصيرات وطوال= نوبٍ ايسنّد غرب ونوبٍ شمالي
وسابع رجل جيته حداني على الجال = ويقول مانعّرفّك ياابن الرجالي
وثامن رجل جيته وأعرف إنه انعال = ماودّك الا تدّهكه بالنعالي
وتاسع رجل معروف نصاب محتال = ياكل حلال الناس لا ما يبالي
وعاشر رجل من قوم يالال يالال = يرقص مع العبدات دايم يلالي
وإحدا عشر ممشاه من دون سروال = ماينّتوصّف عقب واديه سالي
وأثنا عشر في وسط رجليه خلخال= ويش الذي يجري وأنا وش جرالي
وثالث عشر حرّمه ولانجّبه خال= ياكل ويشرب ماحسب لـليالي
ورابع عشر ورعٍ ولاصار رجّال= في وسط بيته ملتهن بالتسالي
وخامس عشر رجلٍ لفيناه جمّال= ويقول خرجه مابه الا الرمالي
وسادس عشر ما عنده الا التولوال= يشكي وماله كثر سود الجبالي
وسابع عشر محروم يمناه ما تطال= ما يقرب قروشه ويشحذ ريالي
وثامن عشر مغرور بالنفس يختال= قليل عِرْف ولا يعرف الوصالي
وتاسع عشر جيته وأنا شايل أثقال= عنّي قحصّ ثم حاصّ لا ما أرتكالي
وعشرين بسّه بين حجّاه بتفال= ابن الحرام اللي نسى ما مضالي
ورجلٍ نصيته مير ملعون نشّال= يسرق حلال الناس في كل حالي
ورجلٍ نصيته مير شدّاد نزّال= وإن جيت قال أكثر حلالي غدالي
ورجلٍ نصيته عقب ماشفت الأهوال= ياما صفيناله واهو ماصفالي
ورجلٍ نصيته ذاك في الغيّ مازال= يصرف معاشه يدّفعه للغزالي
ورجلٍ نصيته بسّ للحمل ماشال= خرفاش لاش ولا يشيل الثقالي
ورجلٍ نصيته مار طرّاد عمال= ويقول إلي ياشيخ مابه مجالي
ورجلٍ نصيته مير للعذّر فتّال= ايقدم الأعذار قبل السؤالي
ورجلٍ نصيته مار في الجوّ رحّال= يشعب إعماره يحسب إنه اهلالي
وتغلوقه الحّسبه ثلاثين دلاّل= حقه من العشره انصيص الريالي
ورجلٍ نصيته والده قيل زبّـال= يكنس قشاش الناس ماله خوالي
ورجلٍ نصيته في يده عرق قمّال= يفلي عباد الله على حيد صالي
ورجلٍ نصيته قيل بالضلع نحّال= يبيع ما يأكل من أحلى الحلالي
ورجلٍ نصيته صانعٍ قيل عسّال= يبيع معسول الشيش بالتلالي
ورجلٍ نصيته محترف قيل هيّال= يبيع كيف امزبّنت كل جالي
ورجلٍ نصيته بأول الوقت بقّال= يبيع جبن وزيت زيتون غالي
ونصيتلي عار ولد عار بغّال= راعي حمير ولايردّ التوالي
ثم رحت يم اللي بالأذكار نعّال= خراز نعّلٍ عنده أطّيب نعالي
ثم عدتّ يم اللي مجانيه نخّال= ينّخل دقيق البرّ يملا الشّوالي
والأربعين البشّت يزّهاه وعقال= نصوب والمخبا من المال خالي
ونصيت رجلٍ للجلاليب عقّال= يرّضع بهم والا يخيط الشمالي
ونصيت منهو للصنانيع عتّال= كرّوة نهاره غيرها ماينالي
ونصيت عبدٍ للمساكين قتّال= يقطع ارقاب الناس بأمر الموالي
وروّحت للي وسط الأسواق شيّال= يشيل غرضان الربايع متالي
وأرسلت مندوبي على كمّ قلاّل= يبيع كيس التمر من التمر خالي
وأرسلت عبّدلّي على عبّد ملاّل= يمشي ورا الناقه ويجمع ادمالي
وآخر ابوسط السوق جيناه كيّال= يشيل ميزانه ولاله حلالي
ونصيتلي ملعونن العام ختّال= يمشي ورا الأجواد كنّه ظلالي
وعوّدت يم فنيس عصّاد الأقوال= بيّاع هرج وكل هرجه اهزالي
وتغلوقه الخمسين يشّدي لزرّوال= اللي حكم وسط الجزاير ومالي
ونصيت رجلٍ مير مافيه مثقال= ذرّه من اللي شفّ بالك وبالي
وواحد طلبت الربّ يعطيه سلال= يبّراه لينّنّه يعاف العيالي
ونصيت رجلٍ قال يامال يامال= هذا كلامه ليت لـ قبره ايشالي
وأرسلت عبدي يم سكيّر طبّال= ما يستويلك لا وأنا مااستوالي
ونصيت رجلٍ صاحبلي وهذّال= مير البلا مايبهّرون الدلالي
ثم رحت يمّ اللي قريبٍ لنا خال= عذّره سريعٍ لي ولابه خمالي
ونصيتلي ثرثار يسردلك أمثال= مايعرف الجزلات يعط السمالي
وعرّجت يم امفلفل الرأس غسّال= يغسل هدوم الناس زين الخصالي
وعوّدت للي جعل ماطاب إله فال= ماهوب سفر الوجّه ماهوب فالي
وتغلوقه الستين خبيثين الأفعال= تقصر سواعدهم بسود الليالي
وروّحت للي لبس للذّل سربال= يلبس شماغ الذّل هي والعقالي
ونصيتلي رجلٍ ذليلٍ به جفال= مايقدر الصعبات صابه جفالي
ونصيت أنا إرجالٍ قليّلت الأقبال= بأقفايهم عجلين عكس الأقبالي
ونصيت ناسٍ قيل جماعة أموال= خايب وخاسر من نصاهم ايهالي
والست والستين ممشاه بطّال= ما أمشي معه لوّ قال زين المقالي
وآخر رجل قيل إنه الموت جلاّل= ياليتني ماسقت يمّه اجمالي
واليوم أنا بنصاك يوم أنت رجّال= حيثك صميدع ترتكي للثقالي
وأنت الذي لصعابها اليوم حلاّل= أشكي عليك وكمّ رجلٍ شكالي
ياللي غذيت لذروة العزّ الأشبال= يبّرون غلّك بالليال الطوالي
ياجعلهم يشّدون لّليث ريبال= ويزيد فعل أمعربين الخوالي
وختامها لا يخّدعك كثر الأزوال= يامسندي غير المثل ما طرالي
والمعذره لن كان حرف المثل طال= منك السموحه يا كريم السبالي
وصلاة ربي عدّ ماهل همّال= على النبي وآله وصحبه كمالي

أبو طلال[/poem]

[اخو من طاع الله]

هههههههههههههه
حلوووووووووه اخووووووووووي
يعطيك العافيه وتسلم يمينك
تحياتي

[إبن ثعلي]

خرابيط حلوه يابوطلال
تحياتي

[طالع]

صح لسانك ياولد غابي

[ابوسـعد]

ايامال العافيه على هالحكم ياولد غابي وهذه حال كثير من الناس من قديم الزمان..

[النـايــــــف]

صح لسانك اخوي ابو طلال


تحياتي لك ،،،،،

[المملوحه]

الله يقويك ولايحوجك لاحد

صح لسانك على القصيدة