هذه القصيدة الرائعة للشاعر المبدع : ناصر الفراعنة موجهة لصديقه خالد مدعث لدوسري :
الله من قلب على مرتع الخور
كنه هشيم دمدم العود بالي
كني عضيض اللي مع الخبت مسعور
باقي من المده ثلاثة ليالي
يكفخ بلاريش وينفخ بلازور
ويكفيه عن رد الجواب السؤالي
دنياك ياخالد على السرج والكور
ماتفجع الا من زحول الرجالي
تجبر عراوي الكلب والبوم والثور
وتكسر عراوي طيبين العيالي
تنزل مقام مخرجة كل طابور
وترفع مقام مخرزين النعالي
شاخت بها الأذناب لحاسة السور
سود الوجيه مبيعين الشيالي
فيها وليد اللاش عالم ودكتور
ولقيطة الحجاج حضرة معالي
وسلالة الجزار مطوة وساطور
تامر علينا في العصور التوالي
فإن كان ياخالد معنى ومنجور
ماحدٍ يابن مدعث من االوقت سالي
وانته عريب وافي الجد مخيور
ياصلب زايد ياكريم السبالي
أما معي تقطع من العرق مشبور
والا قطعت العرق كله لحالي
روحي مثل روحك على سبق مطيور
مابين قولة لاتجين وتعالي
فكان الزمان بحدة البدو مامور
يالوم قلبي يوم ينحاس بالي
ترى ياخالد ماورى الشوف مذخور
ولا أحد يهد الطير والقاع خالي
من عقب ماحنا ذرى كل مظهور
على سروج الصافنات المتالي
تنتف شواربنا على غير مبرور
ونشرب مرار ويشرب الغير حالي
ياطى الثعل هامة ثمانين منعور
والذيب عود فرسة للرخالي
وولد الردي لاجا على راس عنقور
يبلاك في نفسه لوإنك مثالي
صيده لياجابه زريطي وعصفور
يوم النشامى ماتصيد الهزالي
بالهرج عدة نابية كل عثمور
والفعل ماملى صغار السحالي
يوم إن كل إله حيله ومقدور
جداه كشخة غترته والعقالي
ولدة حرام بارد الخد مقصور
هيس يكبر موخره بالسمالي
سبو جبو قدره مع الناس محقور
وش عاد لوعدى الرجوم العوالي
خبل يدور مع قفا الناس ثغرور
والقفو مانوخ ظهور الجمالي
والعنز لوربي رزقها بزمور
مايحتميها من ذياب السهالي
ومن لايحوش الطيب والعمر ميسور
مايدركه لاماغشاه الثفالي
فياللي تعذربنا هبيل ومطيور
أجل البداوه عيب لا يالخمالي
كان البداوه عيب ماني بمصغور
ياطيب عيب معطرين السلالي
حنا البدو أحرار وأسود ونمور
سيف يقص مروبعات الحبالي
حنا البدو حنا عمى كل مغرور
ماحن عيال مضببين الدلالي
يشهد لنا من حدر الألحاد مقبور
ويشهد لنا في القاع من لا يزالي
حنا البدو سيف بالإيمان مشهور
وتشهد عليه قصارها والطوالي
لانقطع الذمه ولا نشهد الزور
ولانتلب العاني ليا جاك جالي
ولانقلب المله ولانطرد العور
ولانسهج الشينات وسط المفالي
ولاننقل العجرا ولانطلب الغور
ولانلحق الكف اليمين الشمالي
ولانذبح العجفا ولانسبق الدور
ولانطرد المقفي لشد الرحالي
ولانزرع الصبخا ولانحفر القور
ولانطرح الا من السمان الجزالي
ولانعبد الرتبه ولو هو امبراطور
ولانهاب الاعزيز الجلالي
ولانخلف الهقوه ولانطلق الحور
الا على طيب وحافظ ووالي
مانقطع الساقه ولا نبعج الشور
ولاندغر القاله بقيل وقالي
ولانبخس الكيله ولانجحد النور
ولاحن من اللي يكنزون الريالي
ولانشعب الذله ولانخاوي البور
زرق العيون ضراب شرد السحالي
ولانضرب الطبله ولانشحذ الكور
فضلة عبيد للأكابر موالي
ولاندهل العيله ولو طورها طور
والرزق في يد من عليه إتكالي
حنا البدو يوم أكثر الناس طرطور
ناطى صما صما صميم الجبالي
عشة ولا قصرعلى الذل معمور
نلعب عليها الهملا هملالي
عشة تدوم ولو على سبعة بحور
ولا قصر لامالت الريح مالي
حنا البدو يوم أشهب الملح منثور
ياما خزمنا روسها مانبالي
رجالنا في حومة الحرب مسطور
ورضيعنا مع ضرب الأشهب يلالي
حنا على كبد العدو مر ممرور
وعلى الخوي مي قراح زلالي
ماقد وخذ من حقناكبر الأظفور
مير الدهر خلى الخفايف ثقالي
من خلقة الدنيا إلى نفخة الصور
والبدو أخير الناس بأول وتالي
ذباحة يوم اول الوقت مذعور
حماية المركي نهار القتالي
فحول وسادات حصى كل شنظور
ولحافنا بيض النجوم المدالي
مانبدي الشكوى لخاطر ومخطور
الا على الواحد أحد ذو الجلالي
ولانغبط الحاكم على حكمة الدور
اليا رعينا في الفياض الخوالي
ياماحلا سوق المعاشير بقفور
ونجم السويبع مثل قرن الغزالي
في خايع توه من الوسم ممطور
نوار عشبه مثل نقش الزوالي
إبل رعوها البدو مع كل دعثور
تسوى شَبحات الوجيه المكالي
روحك يابن مدعث على ريشة كرور
احذر بها صفر العراقيب تالي
وان عذربوها باشقر الكنت معذور
غاديه يذهب عن حشا الجوف صالي
وان عذربك من سلحة الناس مسمور
اشرب وطق مشقره لاتبالي
قبلك شربه الجهرناصر ومنصور
وعضيب وعقاب عنزه والهلالي
وشرب أزرق الدخان ماهوب محظور
العيب زرع الهافيه عند غالي
ابشر ياخالد دام لي دم يفور
ماني بمن هو قال دور بدالي
أماخذينا حقنا واقبل النور
والاترانا من بنات الحلالي
ماني وانا ناصر بهور ولد هور
وانا الذي من راس عمي وخالي
فيالله في كون مثل كون جمعور
هشهاش باروده سوات الخيالي
يصبح بها الهافي عن العز مكسور
ويصبح بها الطيب على راس عالي
ناخذ به خفاف الموازين بالدور
وكم راس نذل عن كتوفه يشالي
والنصر الى قالوا على الضد منصور
ماهو على زعلة خوي قبالي
وماقل دل وزبدة الروض حمرور
والا كثير الهرج ماله ومالي
صح لسان أبو فارس ، وافي 0
| 
|
09-07-2008, 11:05 PM
العرض المتطور
