السلام عليكم ورحمة الله وبركاته
مصافحه اولى امل ان تحوز على رضاكم واستحسانكم
7
7
7
[poem=font="Traditional Arabic,6,black,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
ياوجودي وجد من زاد الريال=في يدينه والخلايق خادمينه
والذهب عنده بحبات الرمال=والخدم حوله وفي عصمة يدينه
كل ماصفق يجي يمه عدال=واحدٍ يسعى لكسب معزبينه
والبشر عنده وكلٍ له مجال=يطلب الحسنى ويطمع بالسمينه
يامر وينها ولا يسمع جدال=تمشي رياحه على كيف السفينه
وعنده أربع كاملاتٍ بالجمال=بالحلال وفوق ماتملك يمينه
قصره أعلى من منيفات الجبال=مع رصيد البنك يتعب حاسبينه
بالكرم والجود يضربه مثال=وبالشهامه والشجاعة خابرينه
كل هذا حلم واثرالحلم طال=وانتهى حلمه على إزعاج المدينه
فز من نومه على قرع النعال=أثره السجان معـه معاونينه
وانتخى من فجعته أخو العيال=كل هذا حلم ياشين الغبينه
قام يضرب كفه اليمنى بشمال=يعرف إنه لامحاله ذابحينه
مندهش تقول صايبه اختلال=فالسجن من دونه أسياجٍ متينه
فزعه صوتٍ ينوه بإرتحال=خمسة إجنودٍ خبرهم سايقينه
قالوا الصبح انجلى يابن الحلال=أكتب أوصاتك ترى الاقدار شينه
وإلتوى وجهه وسرهد بالخيال=يذكر أم وزوجته وبنيتينه
مالهن غيره بعد رب الجلال=ولاذكر من عصبته أحدٍ يعينه
فوق ظهره حمل وديونه إثقال=قاتلٍ نفس وبها نفسه رهينه
ثم تمتم وانهمر دمعه اوسال=ثم سجد لين ادمت السجدة جبينه
قام مكتوفٍ مقيد بالحبال=خطوته ترسم على اللي وسط عينه
يقصر الخطوة وحاله شر حال=وثوبه أسود بالقيود مكبلينه
فالصفاة مبركٍ مثل الجمال=يحتري دوره وينخي سامعينه
وآخر الكلمات قوله يارجال=يبكي الجلاد واللي حاضرينه
وصرخة إمه تقطع القلب الجلال=أفقدت كل الامل في مسعفينه
وشالوا الجثة وقاموا في عجال=ساعةٍ بعد القصاص ودافنينه
والسبب بنتٍ تقول الحب زال=انتهى عصر الغرام وتابعينه
وصلها ياعزوتي أصبح محال=باب وصلي بالحديد مقفلينه
كيف مال الظل عني واستمال=تكتب الايام حظ قابلينه
ما على من الملام وما يقال=قوة السجان في ولية سجينه
انتي البلسم وتجديد الأمال=وانت ادوى القلب واللي تنعشينه
وأنت إلي الروح وأنت الراس مال=شوفتك تشفي الجروح المستكينه
نسنس الغربي وجاوبها الشمال=كل عرقٍ وسط جوفي تسكنينه
والله إنك يوم شديتي الرحال=كن قلبي مع طريقك تسحبينه
والله إنك يوم كنتي لي ظلال=كل أمري في يديك تصرفينه
طب قلبي قرب زينات الدلال=غيرهن قلبي يرد معالجينه
الجمال اللي على حد الكمال=كيف ابا اوصف ليا غنيت زينه
ريقه أحلى من ينابيع الزلال=من حلاه الناس والله حاسدينه
آخر اسمه ينتهي بحروف ال=آخذ من اسمه صفاة له حسينه
ياقمر نصف الشهر منتي هلال=البدر إنتي او إنك تشبهينه
انتظر وصلك أبي لو اتصال=ليه وقت الوصل غيبتي سنينه
كل ماقلت أقربي صابك إجفال=في سلومك من يحبك تبعدينه
ماعرفتي قدر حبي يادلال=ولاعرفتي طيب قلب تجرحينه
أهتني بالنوم في كل الليال=ماسهرتي ليلي اللي تسهرينه
أشهد إن الحب يقتل من ينال=يضني المحبوب في فرقى ضنينه
من فقدته صار في قلبي اجتوال=بين هم وبين شوقٍ كاتمينه
واتعس الأيام ترديد السؤال=كم بقى ياعين من دمعه حزينه
وإشهدي يانفس لو الوقت مال=بنتخي بكل حرف تكتبينه
مابقالي لا دقاق ولاجلال=غير أشيل القلب في كفٍ تهينه
أزعج الاصوات ياروحي تعال=الرجا صوت المتيم تسمعينه
بحر حبك يلتطم مع كل جال=والهوى والحب شيء تجهلينه
قلبي اللي من التعسه شال شال=والغلا مع كل هذا شايلينه
كنت أظن الحب باقي لايزال=لين شافتك بالتمادي تقتلينه
مابقالي في هواها من مجال=غير حبٍ وسط قلبي حافظينه
والبقاء لله ماباقي وصال=انتهي كل الأمل يامدعينه
والرجاء بالله في باقـ العمال=وياعسى الخيرة بشي تكرهينه[/poem]
.
| 
|
07-11-2008, 02:14 AM
العرض المتطور
