حبيب العازمي وعبدالله العلاوه (محاوره قويه)

[صقر قحطان]

عــبـــدالله الــعـــلاوه
-
بينـي وبينـك ياحبيـب مواعيـد
فيها اتفاقيـه مـن العيـد للعيـد
واليوم حان الوعد والزايـد يزيـد
والصبر زين وكل مطرود ملحـوق
-
انا بيني وبيـن العازمـي ميعـاد ** ولاحد(ن) يضمن المحضار والغيبه
-
من لاحسب للواقعـه قبـل تاقـع
ينسى طموحاته وينسى المطامـع
ما يقدر الهوشـه لوانـه تفـارع
والصبرزين وكل مطرود ملحـوق
-
مادامت صحبتك من غير ملح وزاد ** اجل هذي تراها صحبـت الخيبـه

-

حـبــيــب الـعــازمــي
-
مانـي بخابـر وعـد لكـن هيـا
نبـي نقـرر وعدنـا مـن هنيـا
يااللي تثاري ليـش ياابـا ثريـا
والصبر زين وكل مطرود ملحـوق
-
لاتسرع ياالعـلاوه تقطـع العـداد ** ولا يبقـى معـك عـداد تمشيبـه
-
يامل قلبـن مايبـى الشعـر كلـه
لولا العصيمي كـان يمديـه ملـه
عقدن عسى رب الخلايـق يحلـه
والصبر زين وكل مطرود ملحـوق
-
يازين الصوره اللي جات من بغداد ** رسمها واحد(ن) يفتل فـا شانيبـه
-

عــبـــدالله الــعـــلاوه
-
قرر وانا اقـرر عسـاك بمصيبـه
ماهي غريبه منك ماهـي غريبـه
تمسي وتصبح مع شباب(ن) وشيبه
والصبر زين وكل مطرود ملحـوق
-
ماتسكت لين تونس ضربة المسجاد ** وتستعرف بعلمن ماانتـه داريبـه
-
ياشين صـوره فالجرايـد بدتلـك
بارك وبالامراس مشـدود حملـك
مستور يبكيلك وملفـي ضحكلـك
والصبر زين وكل مطرود ملحـوق
-
انـا رجـال لاشامـت ولا حسـاد ** لوانه صابك من ايامـك مصيبـه
-

حـبــيــب الـعــازمــي
-
اول مصيبه يوم غنيت انـا وانـت
واخر مصيبه يوم اردك كما كنـت
مادام هذي منك انا عنـك هونـت
والصبر زين وكل مطرود ملحـوق
-
ابا الهرجه وابا الدله ماابا البـراد ** لكن الوقـت ماتصفـي مشاريبـه
-
الشعـر ياعبـدالله ابـن العـلاوه
لاتحسبنـه ياالـعـلاوه حــلاوه
والصنف يحسب للموظف عـلاوه
والصبر زين وكل مطرود ملحـوق
-
انا رجـال وادرى كلمـة النقـاد ** ومن لاله بصيره ويـش اسويبـه


عــبـــدالله الــعـــلاوه
-
شاعركـم اللـي ياعتيبـه لقيتـه
ظلا شبح مـار انقلـب بسكليتـه
وانا برجلي في طريقـي وطيتـه
والصبرزين وكل مطرود ملحـوق
-
تبى الدله وتبغالك سيـوف حـداد ** تصبحلك بسيف وسيـف تمسيبـه
-
يااللي حصلك تالي الوقـت قصـه
الشعـر لوانـه حـلاوه تمـصـه
وانته متكي فـوق ذيـك المنصـه
والصبر زين وكل مطرود ملحـوق
-
أبا ازيدك مادام انك تبـى تـزداد ** لكن انصحك خل التمـر فاالعيبـه
-

حـبــيــب الـعــازمــي
-
شاعر بني الحارث نعرفه بالأشناب
ولا هذا ورع(ن) لاودى ولا جـاب
في برحة القـزاز سـواق دبـاب
والصبر زين وكل مطرود ملحـوق
-
انا في ذمتي لقضبلـه المرصـاد ** واطقه بالعصا واكسـر عراقيبـه
-
مادام طبعـك يالعـلاوه كـذا روح
لا باب متقفـل ولا بـاب مفتـوح
واختامها يا جار مسمار فااللـوح
والصبر زين وكل مطرود ملحـوق
انا ابنيها وانا احميها مع الأجـواد ** واكب اللـي خبيثاتـن عناديبـه-
-

عــبـــدالله الــعـــلاوه
-
الورع صاعك يا حبيـب وراعـك
في برحة القـزاز لزمـك وباعـك
وصلك مشوارك وطيـر شراعـك
والصبر زين وكل مطرود ملحـوق
-
تهددنـي والاقدتـك تجـي منقـاد ** لكن الحارثي كافتـك فـي جيبـه
-
اقضب عصاتك في عفيف وتجمـل
وان زانت الحملات قـرب وحمـل
مره بـلا شملـه ومـره مشمـل
والصبر زين وكل مطرود ملحـوق
-
تطرطع ما تطرطع جاك قدح زنـاد ** وجالك حمل تالي الليل تسريبـه-
-

حـبــيــب الـعــازمــي
-
الورع طول في الجدايل وخنفـس
والورع كثـر فـالازره ودنفـس
حنا نـرده للسنـع مـار ينكـس
والصبر زين وكل مطرود ملحـوق
-
حاداني يمك المحـدار و المسنـاد ** كريـم وكـل طرقـي(ن) تجيبـه
-
ماني بجاهل واستمع في الجهاهيل
رجـال وادور كـلام الرياجـيـل
واللي يعير ما يحصـل محاصيـل
والصبر زين وكل مطرود ملحـوق
-
مسامح روح وصلها لابـن عيـاد ** وابن عياد مـا تطفـي مشاهيبـه
-

عــبـــدالله الــعـــلاوه
-
خنفست لجل اصيد بعض الخنافس
اللي على طول الجدايـل تنافـس
واللي تربـط بالحبـل مايرافـس
والصبر زين وكل مطرود ملحـوق
-
انا برقبـك فالمـرواح والمعـواد ** لوان المسجـد الأقصـى تصليبـه

[ناصر بن سعدي]

الغالي


صقر قحطان ,,


نقل مميز ,,


ومحاوره رائعه بين الشاعر الكبير/حبيب العازمي ..

والشاعر /عبدالله العلاوه ..


محاوره مثيره ,,ورائعه ’’


لاهنت وبيض الله وجهك ,,,,

وتقبل خالص تحياتي ,,

[عبدالله المرشدي]

صقر قحطان

لاهنت على النقل


وصح لسان الشاعرين


تحيتي لك

[أحـمـد الـروقـي]

الأخ / صـقـر قحطان .. السلام عليكم ..

بيـض الله وجهك على هذا النقل الرائع والمحاوره الرائعه

تحياتي لك يا الغالي .. تقبل مروري

[إبن ثعلي]

لاهنت ياصقر قحطان على تزويدنا بهذه المحاورات الجزله لشعراء قديرين
تحياتي لك