هذه المساجلة بين الشعراء الكبار
سلطان بن وسام الهاجري
ومحمد بن الذيب المري
سلطان الهاجري
الاوله سلام كيف الحال ومن العايدين
كذا كذا الاصحاب ما تنسى حقوق اصاحبها
والثانيه يا محمد بن الذيب يا العقل الفطين
قدام لا تزعل علي وتقول ليش ابطى بها
توجتها بأغلى الثمن والماس والمعنى الثمين
لين اصحبت مترامية الاطراف وانت أولى بها
نجـّبتها واخفيت معناها عن المتطفلين
اللي قبل تعرف معانيها تنال اعجابها
معزوفة ضمنتها التقدير والعذر السمين
وسيلة ينجى بها احد واحد ما ينجى بها
وثق تماما ً ان العذر بالنسبه للمتعذرين
من باب تقدير النشاما واللحّى واشنابها
ولا الردي ما اسمع منه هرجه ولا اشوفه بعين
وانا ما ألبسها الثياب اللي ما هيب ثيابها
نوعية ٍ ما اعدهم حضّار ولا غايبين
ترضى علي ولا ما ترضى ما حسبت حسابها
يعني كذا ولا كذا ولا في كل الحالتين
ما عاد يفرق عندنا حضورها وغيابها
شذ ّابة المقفين واكالة عروض الغافلين
شرذمّة ٍ لا بوها شرذمّه لا ابو من جابها
حطيت في ذي طين يا محمد وفي هذي عجين
وخليتها تموت العقارب سمها بأذنابها
وانا ليا بارزت بارزت الاسد ليث العرين
وليا ضربت اضرب وأمكّن في النحر مضرابها
وليا افتخرت بما لدي احفظ حقوق الآخرين
اعطي الرجال حقوقها وان دبرّت ما اغتابها
ما يهضم حقوق الرجال الا ردي ذمه ودين
سود الظلايم سوّدالله وجه من يسعى بها
ولا تفرح ان الله تعالى لا يحب الفارحين
لا تضحكك بلوى ٍ على الاجواد ثم تبلى بها
والعلم الآخر يا محمد وانت سيد العارفين
ترى الشعوب اليعربيه ما يثير اعصابها
الا ليا وصل المسّاس مقدسات المسلمين
ما عاد تقبل عذر راعيها ولا ترضى بها
وانته ما تخفاك الاشاره يا لبيب ويا فطين
وسمحه معلّق في غزال اشدادها مشعابها
واسمع كلامي واذكره ذلحين ولا بعد حين
ذيـابة الغابة على الشاوي تحد انيابها
والصبر مفتاح الفرج والله يعين الصابرين
والميته دمدم عليها قبرها بترابها
واثبت لا قدم ولا ورى ولا يسار ولا يمين
ما لك ومال بيوت خلق الله تطق ابوابها
.
.
. رد محمد بن الذيب المري
حي الله ابو محمد اللي من سنه ولا سنتين
وهو وكيل للمشاكل ما يجيك الا بها
مترامية الاطراف دار ملوك ارض الحرمين
ما هي قصيده قالها هاجوسه وغنى بها
صح الله لسانه من اول ما استقاد القاف لين
افهم رموز الخطباء اللي حوت فـ أخطابها
فن كانها صبحى وبنت رجال جعله ما يهين
وان كان ولا كان ولا كان قد يشقى بها
وانا رفيقه ضربتي توجع ولي نفس ٍ تشين
لكن احن الطيبين اللي لا طيب ألا بها
وانا لو ان ما نيب اعرف الهاجري سلطان زين
اما حثل مشلابها ولا صفى مشلابها
سلطان ما لك في رقاب الناس يا سلطان دين
والضربه اللي ما هي بـ ضربتك لا تعبى بها
الناس مثلك كل واحد ينظر لروحه بعين
تستعظمه على جبال أبها وروس اهضابها
لذلك انا لو سألتك عن خبر غزوة حنين
من حقك تقول الهواجر هم عمود اطنابها
والنار والجنه بأمر الله والمخلوق بين
النار والجنه ولا له حيلة ٍ يسعى بها
فان كان لك وجهة نظر مع الحسن ولا الحسين
سم ّ الرياجيل بأساميها وعلمنا بها
واطعن نحر واظهر بوجهك وانت في تين
وألى أخربت والله ما يشكل علي خرّابها
بعض العرب كنه قناة العربيه ما تزين
الا على صوت المعارك لا احتمى مشهّابها
وانا ملقم بندقي وحزامها ما هو يلين
والصيده الهزله ما نيب اتعب على صوّابها
لا تعلم المؤمن بما يجرح شعور المؤمنين
الآيات حافظها وحافظ شرحها فـ اكتابها
والمسلم اللي يوم صلى العصر صلى ركعتين
وهو مقيم في دار ما بل الثرى سحابها
ان كان ساهي يكمل الناقص ويسجد سجدتين
ولا فلا يصلى صلاة ٍ ما حدن صلّى بها
وانا على سنة نبي الله اعيّد مرتين
لكن اعياد النصارى عارفين احزابها
واهل البشوت اللي لها وقفه ومضراب ٍ مكين
اعزها واعز قبل بشوتها جلبابها
وذيابة الوادي ما ترهب غير ابو قلب ٍ وهين
اللي ليا السمع التفق عينه ترف اهدابها
واللي قضى عمره على حب الخشوم او اليدين
لا يعارض اللي يدعس الحيه ويكسر نابها
والدله اللي ما لها فنجال لو فاحت يا زين
اجفايها على مقهويها قبل شرّابها
ولا انت ابن وسّام مقدم قوم ومذرّى زبين
واعرف مدراء المدارس واعرف طلاّبها
الانسان من عاده في بطن امه يا ابو محمد جنين
واللقمه اللي ما هيب لقمته ما يحضى بها
لكن مدري وش راي الشيخ مسلط ابو ثنين
قبل الاوادم تنزعج منها وتزعجنا به
صوتية
http://www.youtube.com/watch?v=HGIkI...layer_embedded
| 
|
12-10-2009, 12:24 AM
+ 
العرض المتطور
