أجل ماركة بلاي بوي هاه ( وجه يغمز )

[مامثلي أحد]

-



حنا شعب مثل حاطب الليل اللي يقش الغث والسمين .. مايدري وين الله حاطه فيه ..
زمان كنا مدرعمين على الملابس اللي كلها كتابات أنجليزية ماندري وش نوحها ؟ و ألا وش
تعني ؟ نتزهلق و نتكشخ بملابس ملطخه بكلمات أنجليزية يعنّنا مواكبين للموضة ..
مادرينا أن العالم تضحك علينا من هالكلام المخيس اللي لو نعرف معناه و سماجته مالبسناه ..

بالفترة الأخيرة طالعين بشعار الأرنب على التيشرتات و أكسسورات الجولات و يستخدمونها
البنات على الأكسسورات و الخواتم والشنط والملابس .. مايدرون وش معناه ؟ أو وش المغزى
من هالشعار !

أول ماهبّ فيه صغار السن و اللي ينجذبون للصور الكارتونية و لصور الأرنب بشكل خاص
على كفرات الجوالات و التعليقات و الملابس و الآن يباع كأستكر يلصق بأي مكان تبيه
على الجسم .. على المقتنيات كالسيارات .. والعالم مدرعمه ومع الموضه ياشقراء ..


الشعار ياطويلين الأعمار هذي صورته





وهو شعار لمجلة " بلاي بوي " الامريكيه من أكبر المجلات الإباحية توزيعاً في العالم
تصدر في 30 دوله بالعالم منها أحدى الدول المسلمة اندونيسيا رغم المظاهرات التي قامت
هناك لمنعها فظهرت بشكل أكثر حشمة من الأصدار الغربي ..

بعد ذلك قامت بأنتاج ماركة تدعم مجلتها من ملابس وحلي وساعات واكسسوارات
و هي للترويج عن نواديها والأفلام الجنسية بشكل رسمي وتبيع منتجاتها لدعم نشاطها الأساسي ..











وانتشر هالشعار بدول الخليج من سنتين تقريبا ودخل السعودية آبوهم من تسبلاب يبون يخربون عيالنا



هالوجه المخيس هو مؤسس هالمجلة





( هيو هيفنر ) .. طبعا ماودي أدخل بتفاصيل أكثر عنه لأنه مايستاهل نحتسي عنه .. هو و وجهه المتعفط تقول ملابس ماسبّحت بكمفورت



بنهاية الموضوع
بعد ماعرفنا أن هالشركة علومها مخيسة ونشوف مسلمين لا بسينها و يستعملونها
هذا شيء يجب أن لا نرضاه أو نسكت عنه .. طبعاً السبب معروف .. تخيل عمرك و أنت كاشخ
بهالشعار على ملابسك أو على سيارتك أو جوالك .. شعار أكبر شركة مروجه للدعارة ..
أقل ماراح يقال عنك أنك مؤيد وداعم للنشاط الأساسي لهالشركه

المفترض أن لاننجرف خلف الموضة و تقليد كل من هب ودب ..
يجب أن نفكر وش هي من لحية ؟ و وش تعني ؟
هل تليق بنا كمسلمين ؟
قطّعنا بطون الغرب علينا من الضحك .. على سذاجتنا و تخلفنا ..
ليش دايم ينلعب علينا .. مدرعمين ... موضه و هاي كلاس وخنبدزة مالها تالي


نصيحة كبر قريح : لا رحت للسوق خلك ذهين ومهب أي شيء تخمطه وتحطه بالكيس
و أنت ماتعرف عنه شيء




-

[عبدالله المرشدي]

ههه

حنا شعب مثل حاطب الليل اللي يقش الغث والسمين .. مايدري وين الله حاطه فيه ..


الله لايهينك والله انك لحية غانمه جد

بيض الله وجهك على هالموضوع

تيحيتي لك

[مامثلي أحد]

-

المشاركة الأصلية كتبت بواسطة عبدالله المرشدي ههه حنا شعب مثل حاطب الليل اللي يقش الغث والسمين .. مايدري وين الله حاطه فيه .. الله لايهينك والله انك لحية غانمه جد بيض الله وجهك على هالموضوع تيحيتي لك

لاهان غاليك ومغليك أبو بدر
وجهك أبيض ياحيّي
شرفتني كثير و أنبسطت كثير لحضورك

تحيتي العسكرية ياطويل العمر ( وجه يدقّ تحيّه )


-

[وجودك يكفي]

لاهنت على التوضيح مامثلك احد والله يعطيك العافيه


احترامي

[مامثلي أحد]

-

المشاركة الأصلية كتبت بواسطة وجودك يكفي لاهنت على التوضيح مامثلك احد والله يعطيك العافيه احترامي

ولد ثابت
سين سوعال : قريت الموضوع وألا ألقيت نظره عامة عليه هههههه << يامصلك

لاهان غاليك ومغليك مراقبنا الغالي
يعافيك ويخليك لعين ترجيك
احتراماتي



-

[الجوهرة]

يا أخي أي ماركات وأي زفت .. كلها تقليد .. إذا طلعت برى وسألت عن فرعهم اللي بالسعودية قالوا مالنا فروع بدول الخليج ..

والحال اللي نشوفه مصداق لقول الرسول صلى الله عليه وسلم : ( لو دخلوا جحر ضب لدخلتموه )
السعوديين أغلبهم ماشين على مثل : ألبس ما يعجب الناس .. حتى لو كان مخالف للشريعة ..

الله يعطيك العافية على هالطرح ..

[مامثلي أحد]

-

المشاركة الأصلية كتبت بواسطة الجوهرة يا أخي أي ماركات وأي زفت .. كلها تقليد .. إذا طلعت برى وسألت عن فرعهم اللي بالسعودية قالوا مالنا فروع بدول الخليج .. والحال اللي نشوفه مصداق لقول الرسول صلى الله عليه وسلم : ( لو دخلوا جحر ضب لدخلتموه ) السعوديين أغلبهم ماشين على مثل : ألبس ما يعجب الناس .. حتى لو كان مخالف للشريعة .. الله يعطيك العافية على هالطرح ..

أختي حصة تطلب شنط من برا .. تقول اللي هنا جودتها مختلفة أكثر مالها تقليد ولاهيب أصلي
هذي بخصوص الشنط .. ومرتن من المراير طلبت بلايز من برا .. و يوم رحت أنا و أياها للسوق
شافت محل نفس اللي طالبه منه من برا .. يوم دخلت خمطت وحدتن من البلايز وقامت تشاهق
أكثر مالها تبتسي من تحت الغشوة منب أشوفها زين .. المهم تقول نفسها بس اللي
جابت لها من برا مدّبلة عليها السعر من غير قيمة الشحن والجمارك وهالعلوم اللي مهيب لم سنع
لو نفسي تطاوعني علّمت رجلها عليها اللي نايم بالعسل وفلوسه سرداد مرداد برا السعودية ههههه


ماعليه نلبس على الموضة بس بدون مخالفة للإسلام و تعرّض للرب وحش بالحكومة

يعافيك شاعرتنا الجوهرة
منورة يابعدي




-

[اصايل]

قطع ياوجهه

ياكرهي للي يتبع الموضه على الفاضي والمليان تناسبه والا ماتناسبه

ياذاك اني فاااهم :)

/

حنا كذا يالعرب ماناخذ من الغرب الا السخافات والشي الخايب

حتى يوم نروح ندرس عندهم ليتنا نجي فالحين في العلم والدراسه نجي فالحين في العلوم الخايبه

تسلم ياامثلك احد

لاهنت

[مامثلي أحد]

-

المشاركة الأصلية كتبت بواسطة اصايل قطع ياوجهه ياكرهي للي يتبع الموضه على الفاضي والمليان تناسبه والا ماتناسبه ياذاك اني فاااهم :) / حنا كذا يالعرب ماناخذ من الغرب الا السخافات والشي الخايب حتى يوم نروح ندرس عندهم ليتنا نجي فالحين في العلم والدراسه نجي فالحين في العلوم الخايبه تسلم ياامثلك احد لاهنت

هو جهل بحقيقة الحضارة الغربية شبابنا يجهل أن الإنسان عندهم فقد قيمته وصارت حياتهم
للمادة والمتعة واللذة فقط .. فباتوا في انحطاط أخلاقي لامثيل له ..
حتى يعون تلك الحقيقة حينها سيسقط الإعجاب والانبهار وما يتبعهما بعد ذلك من تقليد وانصهار ..

سلمتِ أصايل
لاهنتِ



-

[الـمـلـكـي]

هههههههههههه

مآمثلي أحد أعجبتني حآطب آلليل .. شرهتك على آللي يعرفهآ وآلشعآر هذآ أول مره أشوفه

ويآزين آلزي آلسعودي مآمثله

يعطيك آلعآفية وهآلموضوع خطير جداً ويحتآج للنشر آلعآجل

لك آلتحيه,’,’,