دنياك هــذي كلهــا هَــزِّ قــاروق= ما تعرف الصاحــب من اللـي معاديـك
واكثــر كلام الناس بالمكــر والبـوق= يهـرج معــك واليا تِقَفَّيـت يرميــك
المـال دايــم صاحبــه مرتفــع فوق= والقـل خايــب لو تَرَفَّعْــت يرْخِيـك
عزِّي لمــن دَوَّرْ لها عنــد مخلــوق =إما بخــل ولاّ مَنَــن يـوم يعطيـك
أوصيــك بالطيِّــب إذا كان لـك ذوق =إرمــه وراك ولازمٍ إنــه يلاقيـــك
يا العبــد هوِّن كل مطـرُود ملحُــوق =لا تِشْتَحِــن لك رَب ما هُـو مخليــك
اللي جعــل لك رُوح جاعلــك مرزُوق =كما تَكفَّــل بك مـن الخلــق كافيــك
يعطــي وباب الرِّزق ما هُو بمغلــوق =واليا طلبتــه وانـت محتـاج يعطيــك
الـرِّزق له حبســه وله وقت مطلُــوق =وإن مــت ظل عند قبــرك يناديــك
والموت جايــك لو تقع جوف صنـدُوق =دع عنـك ما بك من حــذر لا يعنيــك
لا تشتغــل بالمال ترى المال ممحُــوق =مـا مالــك إلاّ ما تمـــده أياديــك
إن كان مالــك يا فتــى ضيق السـوق= تـراه عند المــوت ما هـو منجيــك
الجــار والعانــي لهُم شرط وحقُـوق= والضيــف واجب تكرمه يوم يلاقيــك
وان كان تبــي تأخذ المـدح مطبُـوق =خلك مشمــر دُون ضيفـك وعانيــك
صُـون الأمانه واظهر الهرج بصــدُوق =ولا تعاشــر صاحب البـوق يعديــك
لا تصحــب الخايـن ولا تامن النُّــوق =وان لاح بـراق الحيــا عَذَّرَت فيــك
والـدرب لا تامنــه لو كنت مرفُــوق= إلا بِحـــدٍّ في يمينـــك يباريـــك
أترك طريقــة كل عاشِـق ومعشُــوق =ترمي برُوحــك في الشرك ثُم يرميــك
والكلب ما يتبعــك لو تلبسـه طــوق =ولا خلاخيــل الذهــب ما يراعيـك
وبالصبر تغلب صاحب العزم يا شــوق =والعزم طيــب مَيْـر حزات يرميــك
وافــرح ليا منك عن الشـر مــدروق= واحذر صديقــك واحذار اللي يُواليــك
هذا كـلام الصــدق ما هُو بمســروق =وابيــات يا قلبــي بِناَهَــا يسَلِّيــك
من هاجسٍ يطمــي كما بحر صافــوق =احذر على القلب الشقـي يوم يِطْريِــك
يا رَبِّ تجعلنــي من النــار معتــوق=واجعــل ختامــي طيباً يوم الاقيــك
بـــــديوي الوقــدانــــــي
إنشاد: سمير البشيري
| 
|
09-25-2009, 08:59 PM
دنيـاك هـذي كلهـا هَـزِّ قـاروق
العرض المتطور
