زواج الشيخ تـركي بن عمربن ربيعان

[otaiby]

بسم الله الرحمن الرحيم

الشيخ تركي بن عمر بن ربيعان امير الفوج العاشر بالحرس الوطني

احتفلت قبائل عتيبة في محافظة عفيف وضواحيها في 18 /6 1430/هـ بزواج الشيخ تركي بن عمر بن ربيعان على ابنة ابراهيم بن شامان الجذع معرف هجرة الشامانية التابعة لمحافظة عفيف رحمه الله وقد حضر الحفل جمع غفير من قبيلة عتيبة ومن جميع قبائل وأسر المملكة وقد احيا الحفل عدد من شعراء النظم والمحاورة وكانت البدايه قصيدة للشاعرالكبيرشقيربن عقيل الجذع عباره عن عرضه قام بألقاءها صفين شارك فيها الشاعرين شقيربن عقيل الجذع وسعدون الهرس :

[poem=font="Simplified Arabic,5,black,bold,normal" bkcolor="white" bkimage="" border="double,10,green" type=2 line=0 align=center use=ex num="0,black""]
مرحبا ترحيبة شانها شان ٍ كبير=بسم شيخان القبيله وبسم اعيانها
مرحبا باللي حضرمن كبيرومن صغير=من قبيلتناعتيبة ومن جيرانها
عند ربع ٍ بالمواقف تشير وتستشير= من قديم الوقت تاريخها عنوانها
يكرمون الضيف والهم على الهيجا مسير=لاسمك عج الرمك واشتبك دخانها
لاتنادوا للمواقف وجا اليوم العسير= يحتمون اللي تكاسرعلى حيرانها
مرحبا فالبيت الاول وفالبيت الاخير=والقبائل كلبوها رفيع ٍ شانها[/poem]

ثم قصائد منبريه وكانت القصيدة الاولى للشاعر خالد بن مشرع الوهاب الدماسي والقصيدة الثانية للشاعرخالد بن عبدالله المهيدلي والقصيدة الثالثة للشاعرنايف بن مبارك الدماسي وبعدها اقيمة الامسية وشعرائها هم الشاعرالكبيرشقير بن عقيل الجذع والشاعرالكبيرمتعب بن مضيان السليس والشاعرالمبدع خالد بن عبدالله المهيدلي والشاعرالباحث سعدون بن فهدالهرس الذي قام بتقديم الحفل وإدارة الامسية ومن قصائد الأمسية التي حصلنا عليها

هذه القصيدة العملاقة للشاعرالعملاق شقيربن عقيل الجذع العتيبي , تحتوي على بعض معارك قبائل عتيبة التاريخيه مع القبائل الاخراء بقيادة الرباعين شيوخ شمل قبائل عتيبة وهي موجهه للاميرنايف بن فيحان بن تركي بن فيحان بن ربيعان وكيل الفوج التاسع بالحرس الوطني والتي القاها الشاعر بنفسه

[poem=font="Simplified Arabic,5,black,bold,normal" bkcolor="white" bkimage="" border="double,10,green" type=2 line=0 align=center use=ex num="0,black""]
يابدرنايف وجه الجيب قده=شيخ ٍ قباله يابدر يشرح البال
لنايف ولد فيحان يابدرعده =نبالنا عنده مع الظهرمقيال
في مجلس ٍ تلقى مراكيه اشده=مداخن ٍ فيها ازرق العود ودلال
عليه عكفان الشوارب مرده=بابه مشرع مايقفل بالاقفال
تلقى صماطن لـ الصيانا يمده=حيل ٍ يقدمها مع العبد عمال
شيخ ٍ نشا من نشوته من ّ قده=الطيب بيّن والنذاله للا نذال
نايف لياعدوهل الفعل عده=وانشرله البيضاء على كل ماطال
سيف ٍ جفيره كل جنب ٍ يحده=بين الشيوخ اللي يفوقون الاقوال
مايلحقه عرق ٍ ردي ٍ يرده=شيخ ٍ ولد شيخ ٍ له الحق ينقال
تركي ولد فيحان وعمر جده=نعم الجدود ونعم الاسماء والافعال
في نجد ماجاء مثل جده وجده=وهوه بعد من نشوته ماله امثال
شوخ دوراس فعلهم مستجده=تفنى بها اجيال ٍ وتنشي بها اجيال
عبدالعزيزمولن الامرجده=ويسندعليه الراي في كل الاحوال
ماينفذامره لين يبديه سده=لياقال قال عمرشوفوه وش قال
مر ٍ يوافقله ومر ٍ يرده=لين خضعتله نجد رجلي وخيال
وتركي عتيبة ماقفه ماتسده=مدونه بندربجزلات الامثال
ومدونه تاريخ جده وعده=سربة رباعين ٍ يفكون الابهال
سقم المعادي مطلقين الاحده= معدلة ميل القبيلة ليامال
وزبن الدخيل ليالجاعقب ضده=لياصكته سود الليالي على الجال
شيخان قوم ٍ للطلب مستعده=هيلا ً يهولك جمعها حين ينهال
الريع لو أنه وسيع ٍ تسده=عتيبة الهيلا على مثل ماقال
فاضت من الزيمه على حد جده=ثم حولت في نجد ياوي محوال
جمع ٍ توجهبه وتقلع مصده=وجمع ٍ تلقيه الخلا واشهب الال
لسلافهم في نجد قامه وشده=لين نزلوا في ماسطة نجد منزال
ماجاتهم مثناة نجد بموده=الابضرب السيف قصاف الامهال
ولال احد ٍ فضل ٍ عليهم يمده= ولاعوضوا ملاكهاقرش وريال
يشهد لهم في نجد ضلعه وعده=وتشهدلهم كل الموارد والاقذال
قرنين والثالث بقي منه عده=باقي شهور وعدة ايام وليال
تعرف زعامتهم لياجات شده=لياخيلت من يمة القوم بخيال
مثل تغوث اللي ورى حضن قده=على محصن يوم في الجبل مال
جتهم جموع ٍ بالبعض مستمده=وقف لهم بجموع وسلاح ورجال
وكيد العدى بنحورالاخصام رده=وخلى طريح القوم من دون شيال
وبقيت جنايزهم على القاع مده=حطت عليهاولبة الضلع مدهال
والمحدث اللي فــ ايسر البرث عده=سبلاخذوها واحمرالدم وشّـال
وبـ ام الجواعر جت جموع ٍ مسده=خيل ٍ تضد الخيل والجمع هيال
سلطان قال الذيب عشه وغده=ولاراح منهم غير رجلي وزمال
والمستوي للي جهل فيه عده=يوم ٍ على العدوان مخلاص ونكال
ونهارعرجاء اللي شمالي مصده= ويوم الطراد ووقعة وضاخ والضال
والاسوده فالعبله المجرهده=يوم ٍ يخلي صاحي الفكريهتال
والموقع اللي شرق حليت عده=بشبيرمه جاء للشهب الملح زلزال
جمع ٍ يحشدونه وجمع ٍ يضده=لين ادبحو لباسة الدرع والشال
ويوم الهييشه كم هنوف ٍ محده=من ضرب فرسان الرباعين الابطال
ومثل طلال وماحصل في مهده=يوم اشتبك عج الرمك والحمرسال
كم شيخ قوم ٍ عقبوه الاشده=ويامارموا لـ الذيب من روس الاشبال
الهم على الحكام صوله ورده=واد ٍ مسيله من يرده لياسال
صغيرهم غايب سلفهم يسده=مثل الدفينه بين زبدان والخال
لعيون من شقر الجدايل تكده=وعفر ٍ تبي من حد ركبه ليا الخال
تتل الرحول وتلتفت للموده=ولاجراسها لجه لياجات زرفال
مرباعها الحد الكويتي يحده=ومصيافها من لبة العرق وشمال
ومقياضها عد ٍ مايحتاج عده=ترعى نبات الصيف في دمث الاسهال
في نمرا ٍ للعدى مستعده=سربة رباعين ٍ لهم نجد مدهال
بمصقل ٍ يصطي على العضم حده=وماس ٍ يخلي طبلة الراس فنجال
ماهيب كلمة بس هاته ووده=ماورخنه ماض الايام دلال
قلته وقول الصدق صعب ٍ مشده=ولانيب من يكذب بقول ٍ ليا قال
وكل ٍ يانايف يفتخر بسم جده= غير النذول اللي مناسبها الانذال
عود الندى يندى ويعجبك نده=ولاحد ٍ ذكرفالحنظله في وضلال
احد ٍ يبيض فعل يمناه خده=واحد ٍ ترده للردى شينة الفال
وعزي لمن تقصر عن الجود يده=ياكود ماله حيلة ٍ فيه يحتال
نصيتها نايف بجوده وجده=ولاتسند القاله على كل رجال
وتمت وخير الهرج قصره ومده=وصلاة ربي عد ماهل همال
على رسول ٍ كرم الله خده=شفيعنا وقت المحاشر والاهوال[/poem]

ثم القا الشاعر الكبير متعب بن قعيد بن مضيان السليس العطاوي هذه القصيدة الرائعه في صاحب السمو الملكي الامير نايف بن عبد العزيز النائب الثاني ووزير الداخلية

[poem=font="Simplified Arabic,5,black,bold,normal" bkcolor="white" bkimage="" border="double,10,green" type=2 line=0 align=center use=ex num="0,black""]

اذكر الله واشكره جل وعلى مكرم عباده=واتكلم والخواطر حافله والبال هايد
ياهجوس الشعر غنينا على أنغام السعاده=الوطن غنا سعاده والفرح شامل وسايد
انفتح للشعر باب وجا بجده واجتهاده=شاعرٍ يصدق بمنطوقه وذوقه مايحايد
ياشعور الشاعريه في رويه في ركاده=لين اعلق جوهر المعنى على شما القصايد
كل بيت من الوفا يلبس مثل لبس القلاده=فوق جيدٍ من جماله زاهين كل القلايد
نايفهة شم القصايد سادت المعنى سياده=في مزايا سيدي نايف تجود بكل جايد
ياعبارات الوفا قدر ووفا جودي زياده= وانثري عطر التهاني عبر الاشعار الفرايد
جيت اهني سيدي واثني واكرر في هواده= سيدي مبروك جعل اليوم والتبريك عايد
يوم صرت النايب الثاني زعيمٍ في شداده= انت نايف وانت نايف بالرخا ولا الشدايد
والقرار اللي صدر فعلاً جديرًٍ بالاشاده= صرحي به ياقنوات الفضاء قبل الجرايد
الثقه من قايد الدوله تعد اعلى شهاده= يوم جت من راس ابو متعب عسى ايامه مدايد
عيّد الشعب السعودي فرحتلك ياعياده=المشاعر صادقه والكار والمقدار زايد
الوفا يالنايب الثاني نقدم لك وكاده=والله انا نرفع التبريك من حسن العقايد
ياوزير الداخليه ياجديرٍ بالقياده= قايد الامن السعودي واشهد انك خير قايد
يامهندس حنكة امن الدار يامنجز عتاده= يامضيع هقوة الحساد واصحاب المكايد
انت من يقضي على الكايد وكيده في مهاده= منك الاريا محكمه وابليس ياقع فالمصايد
كم حقودٍ يزرع الفتنه ولاحقق مراده= خاينٍ دينه وحكامه وداره والعوايد
تاركٍ درب الرشاد وسالكٍ درب النقاده= مايبي عيش الكرام هوايته عيش النكايد
مثل منجومٍ سرا ليله ونسنس له براده= واشرقت شمس الضحى والياه في حر الوقايد
ودّعه ليلٍ سرابه ماعطاه الا سواده =واكتسى باللون الاسود ماجنا منه الفوايد
سيدي ما اوفيك بالتعبير لو طال امتداده=منجزات ومعجزاتٍ عدّها بالحصر كايد
لو يسوي باحث التاريخ وقفه واستعاده= ضاع بين ابعاد سبق امجاد وامجادٍ جدايد
والكلام ايجاز واختامه عسى ايامك سعاده= الوطن غنا سعاده والفرح شامل وسايد[/poem]

وكذلك القا متعب بن مضيان هذه القصيدة المميزة

[poem=font="Simplified Arabic,5,black,bold,normal" bkcolor="white" bkimage="" border="double,10,green" type=2 line=0 align=center use=ex num="0,black""]
انا في مجالي وارتجالي بميداني=رصيدي ذهب مثل الذهب في عياراته
رقيت الشموخ اللي عرفني وحياني=عطاني مكان سيادتي بين ساداته
على ارض الفخر ومن البشر من تناساني=خذيني على احضان الفضاء ياقنواته
إذا كان وجه الارض ماعاد ياساني=لعل الفضاء تاسع وجودي مساحاته
ورا داعي الغيّاب الاغراب ينساني=وانا في محاذات النضر وفق نضراته
ارّوض بنات الفكر والفكر ينخاني=وش اسباب سجن الغيد في غيهبت ذاته
دفعني طموحي واعتزازي تبناني=وعذب القوافي شاف حسنه بمرءاته
ودرربي عليه اشباح ياسن تحداني=تسلطن وسلطانه فرق بانتصاراته
لكني قوي اعزوم وازبن العاني=قصيدي قصيدي ماتثنا طموحاته
اقاوم عبوس الياس ماضاع برهاني=وادّور على وجه الأمل وابتساماته
انا الاول اللي حال من دونه الثاني=وانا اللي تحرا للعداله ولاجاته
ولازلت اجي واروح مجروح واعاني=ولا ادري سواتي وين يشكي معاناته
ابا الحق حيث الحق يوخذ من الجاني=لو الحق بعض احيان يجحد علاماته
غبينه بكل ذخيرتي واسرج حصاني= طويل الحبال اللي تورث سلالاته
وراع الكديش ايمرني ويتعداني=وصفق له الجمهور واعلن بطولاته
ماضاق المجال بصفقةٍ جات مجاني=وعوّد يرق الصوت ويعيد نبراته
هذا مختصر موضوع بعدي وحرماني=وكبح الطموح اللي ثباته مواساته
كسرت الغمور بسلة الفكر ولساني=وغنابي الابداع جل اعترافاته
لكن السبب معلوم مجهول بالعاني= رسول المواهب خان ما ادى رسالاته
اقوله بعد كلٍ بدوره تناساني =خذيني على احضان الفضاء ياقنواته
[/poem]

كما القا الشاعرسعدون الهرس مرثية الشاعر الكبير سويلم بن هندي بن عيسان رحمه الله في الامير عمر بن عبدالرحمن بن ربيعان امير شمل قبائل عتيبة رحمه الله

[poem=font="Simplified Arabic,5,black,bold,normal" bkcolor="white" bkimage="" border="double,10,green" type=2 line=0 align=center use=ex num="0,black""]
مرحـوم ياشيـخ القبيلـه والاجنـاب=ابيض وجه ماخان عهـد المعازيـب
يهفي له ارقابٍ ويعتـق لـه ارقـاب=ويقعد بحد السيف روس الاصاعيب
على النقاء ماهم في جـار الاطنـاب=معش الطيور الجايعه من عشا الذيب
والخيل من حسـه يروحـن هـراب=ضلـع البتيـراء يسهجنـه جناديـب
يكفخ بجنحان السعـد مثـل حطـاب=حر ٍ شهـر مـن نايفـات المراقـيـب
راسي صفا من صافي الدمع ماثـاب=على ابو ماجد جايـزه شقـة الجيـب
ابكـي و يبكو نـه شبـابٍ وشـيـاب=واللي يبا عن شو فـه السجـن تجنيـب
وتبكيه قطعـان ٍ تبـي نبـت الادعـاب=حرز ٍ لهـا فـي حاميـات اللواهيـب
دنيا ودين وكمـل العمـر ماعـاب=وش فيه يلقو ن العرب مـن عذاريـب
ياما عطا من سبـّق الخيـل واركـاب=وعشـايـر ٍ تملا كـبـار المحالـيـب
وحمر الفروت مقربـّة دار الاحباب=و يو في عن المطلو ب كـل المطاليـب
واملاك يعطيهـا بـلا مـن و حسـاب=من ضمنها مـران والحفـر ومغيـب
وواد الرشا كل قضب فيه مقضـاب=ماقالها بالمتر اشترو مـنقـع الطيـب
سهيل غاب وعندنا الجـدي ماغـاب=تركي عليه ارسوم عطب المضاريـب
واخوانه الخمسه عريبيـن الانسـاب=ذخر لنا في جاه مـن يعلـم الغيـب
الله يجنبهـم صـواديـف الاسـبـاب=ويرفع لهم جاب على الناس ومجيـب
مانيب اقوله قضب خاطـر و نصـاب=يطلع صميم القلـب زيـن الهناديـب
انها العريدي ماطراله وماطاب=ابيات فيهايسمعون اللواعيب
ماهو ب جاحدها ولاهوب كذّاب =بالشيخ ابو ماجدعريب المجاذيب
ناس ٍتبي مثله على كل هنداب=مير الفعو ل مسكته و التجاريب
ومسلط (1) و تركي (2) يوم جاحزم كلاب=والجمع سار وعقلو شمّخ النيب
و ردوكماميراد ابوزيد وذياب=لين اهزمو عنا الجموع المراقيب
وردوبربع ٍشوفهم عزواعجاب=عيال جد ولا بهم خلط اجانيب
ورد القطيع اللي ورد عقب معزاب=حاديته الكنه وحام اللواهيب
يتلون حر ٍضرب كفه لياصاب =يفرالنحرمضراب روس المخاليب
ماله عن الجدان منهج و مجناب=شيخة ملك ماهيب شيخة مناصيب[/poem]

كما القا الشاعر سعدون بن فهد الهرس قصيدته التي وجهها للشاعر الكبير محماس بن شميسان العضياني

[poem=font="Simplified Arabic,5,black,bold,normal" bkcolor="white" bkimage="" border="double,10,green" type=2 line=0 align=center use=ex num="0,black""]
الله يامحماس من حال الاتعاس=اطيح من جور الليالي واقومي
اللي جرالي ماجرا لابن دواس=وعزي لمن كثرت عليه الهمومي
جربت في دنيا الورى بعض الاجناس=ولقيت ناس ٍ ماتعرف السلومي
اخذت معهم بالتجاريب مرواس=وميزتهم مابين ليل ٍ ويومي
ناس ٍ يحسبون المضهاه نوماس=والكل منهم مايعرف اليمومي
مع كل وسواس ٍ ومع كل خناس=على النفاق معقدين الكمومي
تسمع سوالفهم بها اخماس واسداس=وينداش راسك من كبار العلومي
بالحكي واحدهم لدي ٍ لجساس=ويضيع لاوصلت لفرك الخشومي
صديقهم منهم حري بالافلاس=وعدوهم فيهم يبيع ويسومي
الطيب عنهم بعد نجد عن الاوراس=والاالردى لبسوه لبس الهدومي
رجاي فيهم حال من دونه الياس=واخترت فرقاهم بقلب ٍ عزومي
باسباهم ياماتحملت الاوناس =وتجيك بالاخبار قومك وقومي
اقضي لوازمهم بتقديروقياس=ولاواحد ٍ منهم قضالي لزومي
قنعت منهم يوم الارياق يباس=في ماقف ٍ فيه الرعيب مخدومي
الله يابو مشعل يقنعهم الباس=لين الدهرفيهم يجيله وسومي
وعندك خبر عن سالفة طابخ الفاس=وهذي سوات مصدقين الحلومي
وابن سند قدقال قول ٍ على ساس=قدامي الحربي رسمله رسومي
سبيل قوله فيه قدوة ومقياس =كنه لمخطين الدواليل يومي
قال الحضيض اللي غني ٍ عن الناس=عن مدحة الطيب وذم الرخومي
وانا على وضح النقا مارخي الراس=واعف عن بعض الدعاوي واشومي
وان جتني العوجا من الربع الانجاس=لي وقفة ماهيب وقفة بذومي
تلقح وتنجب غيض وتضيق الانفاس=ماهمني فالقيض لفح السمومي
رد الجزاء مشروع والوضع حساس=ونفسي تهقويني لحد النجومي
لومطلبي تقطعت عنه الارماس=يوم الحقايق يبعدن الوهومي
فالدرب من دونه حوادي ولولاس=مايا صله كود الصبورالجزومي
والشراله يابن شميسان مقباس=والخيرفي بعض الرجال معدومي
واللي على غرات الاجواد بلاس=وليانصحته قام قدمك يزومي
يمشي ورى المقفي ويقرع بالاجراس=هذاك من كسب الجميل محرومي
واللي على منهاج الاخيار يقتاس =من طيبهم قسمة خيار القسومي
عجف الهزال يحطها بين الاقواس=ويخلي الحاقد يعض البهومي
واسلم ودم واللي له الكار نبراس=شرواك من قول الوشاه محشومي[/poem]

وقام بألقا رد الشاعر الكبير محماس بن شميسان العضياني

[poem=font="Simplified Arabic,5,black,bold,normal" bkcolor="white" bkimage="" border="double,10,green" type=2 line=0 align=center use=ex num="0,black""]
يامشتكي من ظيم الاتعاس لاباس=وراك في روس المشاريف تومي
كنك على الدنيا جديد ٍ بالاحساس=مع علمي انك في بحرها تعومي
خابرك قار ٍ في ضياها والادماس=بالمعرفه لك من دررها قسومي
مادمت للمرجان واللول غطاس=فداك من خلا عليه الثلومي
والا الحكيم اللي لماعاب ماداس=ماهوب لادنى مايعيبه زهومي
اللي يقيس لصادراته لياقاس=مايقبل العيله وعنها يشومي
وراع الردا اللي للردا فيه مغراس=يم الردا دايم سلاحه زمومي
اللي على العوجا يحدد للاضراس=هذاك لوشن الهجوم مهزومي
ومن صارلاعراض المخاليق نساس=مذنب وذنبه مايعم العمومي
وبيت ٍ حجاه عن المواجيب هساس=مادام مايذري ذراه مهدومي
ولاحد ٍ تسلحه فالقسا جذم الامواس=واللين ماينجيك وقت الزحومي
ولاينجزي في هفوة التبع قرناس=ولاينتقارن بالصحيح مهيومي
وانت تعرف فرق النحاس عن الالماس=ولياجمعت رقوم يطلع رقومي
واعرف ترى من صارللكارلباس=الموقف اللي يحتويه محسومي
وان رحت قدام المناعيرعساس=خل الكهوم وهات علم القدومي
مايختفي درب الحيا عقب نسناس=والصيف ماينبت نبات الوسومي
من العبرناخذ جدايد ودراس=مايختفن عن الوجود الرسومي
وعندك خبر ماقاله العود لدباس=يقول يوم اجحف عليه الجهومي
المدح لويشرى شريناه باكياس=عزيزلوهوفالحقوق مهضومي
والعرق ياسعدون قد قيل دساس=من صاربوم يدق به عرق بومي
لوهوعنزنفسه على روس الارواس=دربه تياسرعن دروب القرومي
والحذفه اللي فالقفى تمرس امراس =حذافهالايامن ادنى السهومي
واعرف ترى مايودع البال ينحاس=الا الطمان وشرهته فالرجومي
مادمت تفعل طيب ويقابله ياس=لاتلتفت لاهل الردى يالفهومي
من شانهم لاتصغي الراس لعماس =اقطع مواصل معفنات اللحومي
لايعتريك لفقد الانذال وسواس =اطو الرجا فيهم وقل يارحومي
البس لعيد افراقهم بيض الالباس=مالك خروج عن الطريق العمومي
دربك جلي ماعرقله غرس غراس=وراع الجموم يدل درب الجمومي
واصبر وصر للغيض يالهرس حباس =ترى العواقب يفرحن الكتومي
وانا ادري انك لك فالامجاد مجلاس=احشم جنابك عن ردي العزومي
وصلاة ربي عد ماهب نسناس=على شفيع الخلق يوم اللمومي[/poem]

ونعتذر من الشعراء الذين شاركو ولم تصل لنا قصائدهم

ثم بعد الامسية ابدة المحاورة وفرسانها هم الشاعرالكبيرمستوربن تركي العصيمي والشاعر الكبير حبيب بن دغيم العازمي والشاعرالكبير بخيت السناني الجهني

والأن مع بعض صورالحفل

من اليمين الشيخ رباح بن طعيميس بن مريخان شيخ شمل الجملا من قبيلة حرب والشيخ تركي بن عمر بن ربيعان امير الفوج العاشر بالحرس الوطني وعلى يمينه الشيخ سلطن بن بدر الدويش



....... والشيخ غالب بن مناحي بن زريبة وسعد بن نايف بن عون الرويس



من اليمين قاعد بن قعدان الوهاب احد اعيان القبيله والشيخ مناحي بن عمر بن ربيعان رئيس مركز عنز , الشيخ رباح بن طعيميس بن مريخان شيخ شمل الجملا من قبيلة حرب والشيخ تركي بن عمر بن ربيعان امير الفوج العاشر بالحرس الوطني

[الحصان]

الف الف مبروك لـ ابو عمر وبالرفاه والبنين أن شاء الله

[ابوسـعد]

مبروك والدعاء لهما بحياة سعيدة وعقبال الذرية الصالحه إن شاء الله وياهلاااوغلاااااااااا

[ناصر بن سعدي]

نبارك لـ إبو عمــر ..

وحياه زوجيـه سعيــده ..


والله يرزقه الذريه الصالحه ..

وشكراً لك يـا عتيبي على التغطيه الجميله ..


وبالتوفيق لـ الجميــع ..

[أم العتبان]

مبـــــــــــروووووكـ ل أبــــــو عمـــــر ,,,
و يــــــــوفقهـــــــــــم جميعــــــــــآ ,,,,
مشكــــــــور على الخبــــــــــر .....

[شيخ الشيوخـ]

مبروك للامير

وعسى الله يوفقه

وبيض الله وجيه المنضمين والشعار والمعازيب


بارك الله لهما وبارك عليهما وجمع بينهما في خير

ومشكور ياعتيبي على التغطيه المميزه

[الطارق]

الف الف مبروك للشيخ تركي بن عمر بن ربيعان وحياه زوجيه سعيده ان شاءالله وكل الشكر لك ياعتيبي على هذه التغطيه الجميله

وتحياتي للكل

[رغدالشيباني]

نبارك للأمير ابوعمر

وبارك الله لهما وجمع بينهما في خير

وبالرفاه والبنين..

تحياتي

[نجم سهيـل]

مبارك لهما
وجمع الله بينهما في خير
مشكور عتيبي على الخبر السار

[مطلق السيحاني]

مبرووووووووووووك لبن ربيعان وعسى الله يوفقه انشاءالله