السلام عليكم
الشاعر عبيد بن محيا المرشدي العتيبي احد الشعراء الكبار المظلومين اعلامياً وهذا يدل على قصور اعلامنا حيث انهم لم يبحثوا عن الشعر الحقيقي والشعراء المبدعين امثال شاعرنا ..
لا اطيل عليكم وسوف اترككم مع احدى قصائد شاعرنا لتستمتعوا بالشعر الاصيل...
[poem=font="Simplified Arabic,5,blue,normal,normal" bkcolor="transparent" bkimage="" border="groove,5,blue" type=0 line=0 align=center use=ex num="1,darkblue"]
يالي تبي تبني مجالس وجلسات= بعض المجالس مابقي له رياجيل
جيل المجالس منصرم وأكثره مات= راح الكثير ولا بقي غير اقاليل
راحوا رجال المعرفة والمروات= لطامة العيال ذباحة الحيل
اللي لهم سلم وطبايع وعادات= بالصدق فالميعاد والعدل بالكيل
وقت مضى تلقى مجالس وضولات= على الكرم بين الرجال المشاكيل
ضولات رفقه من قلوب نظيفات= على الشحم والطيب والبن والهيل
ربع لهم شيمة وقيمة وقالات= بالراي لعقود النشايب حلاحيل
في مجلس معهم طراوه ولذات= وتسمع لمصدوق الخبر بالتفاصيل
سوالف يخضع لها سمع واسكات= يحظى بها المجلس سعادة وتجميل
منها فوايد للقلوب الفطينات= ماسج عنها الا القلوب المهابيل
تنبي حقايق عن فعولٍ قيدمات= عن ماضي أجيال على الجيش والخيل
لاقوا صعوبة في ليال صعيبات= مرت على الأجيال جيل بأثر جيل
أجدادهم وابوانهم ذيك الأوقات= عاشوا على مرالدهر والغرابيل
خوف وكثر فقر وحرايب وغزوات= وقت الشتا والقيض والحط والشيل
جوع وضماء مع طول قطع المسافات= على القدم والا الركايب زرافيل
عبر الدجى مابه كهارب ولمبات= غير القمر والجرمن الجدي وسهيل
حياتهم مرت عليهم بحالات= تثبت لهم صبر وشجاعه وتجليل
واليوم ماللشيب قدر ومهابات= ولا عاد للشايب معزه وتفضيل
جيل فنى والوقت خلاهم اشتات= واهل المنازل غادروها رواحيل
اللي يعاني من بلاوي وعاهات= واللي مرض واللي على المقبره شيل
لوجودهم ماعاد فيه اعتبارات= واللي بقي حصل من الوقت تنكيل
واليا تذكر ما مضاله من اوقات= يزهد بنفسه من حياة البهاذيل
يلقى من الوحده بلاوي ولوعات= ومذلله فقدان غاليه تذليل
جيل الحداثه يعتبرهم مخفات= متخلفين عقول بالحيل بالحيل
شافوا حياة ما وراها مسرات= حتى بوضع عيالهم شافوا الويل
دنيا زمان العولمه والحضارات= باسبابها ضاعت سلوم ومفاعيل
ماعاد به رفقه ولا به قرابات= ولا عاد للعاني من الوصل توصيل
جيل عن العادات عاشوا بغفلات= وايضا بعد زودهم الوقت تغفيل
ثأثروا عبر الفضاء بالقنوات= والنوم طول اليوم والسهر بالليل
سوالف المجلس رسايل ونغمات= جوال وانترنت وافلام تحويل
راحت طبايعهم طبايع خواجات= باللبس والمنطق وكل التماثيل
وطيب المجالس بينهم حذف الابكات= ولثاني اكسيد السجاير تجاويل
تكره مجالسهم ويدخلك شكات= اليا عرفت اللي بها من محاصيل
تغيروا الله عليم الخفيات= ما اقول كل الجيل بس اكثر الجيل
والحق حق يقال والظلم ظلمات= والصدق للعراف مثل القناديل
فيهم رجال ينطحون المهمات= وردوا من العليا قراح المناهيل
وتزودوا من علمهم كسب طالات= خير على خير وعن النقص تكميل
العلم خير ويتبع الخير خيرات= من حفظ دين وحفظ سلم ومعاديل
سلايل الأجواد نعم السلالات= والعلم زودهم من الطيب تأهيل
الله يوفقهم بكل المسارات= ويجعل لهم مع باب فضله مداخيل
لكن كثير الجيل صاروا بغرات= واصبح لهم عكس الطبايع مواويل
عشوا مع احداث الدهير في متاهات= وعن غيهم مايسمعون العواذيل
يارب ترشدهم طريق الهدايات= للدين والدنيا طريق بتسهيل
يامعطي ارضك من سماك البركات= تصلح الأحوال وتعدل الميل
ماقلت اخص فلان وفلان بالذات= هذا ولا هذا ولا أقول لي قيل
شوف العيون اكبر براهين واثبات= ويقطعك ياهرج يكذب ليا قيل
انشد هل العرف وتجيك الاجابات= واخذا الخبر موثوق جملة وتفصيل
وقت تغير في جميع المجالات= مافيه وضع ما حصل فيه تبديل
حتى الاذاعة والصحف والمجلات= تبغى مشاكلها دراسة وتحليل
هيهات يادورات الأفلاك هيهات= ولسر غيبك عند واليه تاويل
ولو جيت اعدد ماحصل من غيارات= جف القلم واحترت بين الاقاويل
ماعاد به داعلي لكثر المقالات= خير الكلام المختصر دون تطويل
والخاتمة ويش نكي له بما فات= سبحان علام الليال المقابيل
من بعدها يا حافظين الصلوات= قولوا معي امين يارب دمر اسرائيل
ياللي جعلت لزاير البيت ميقات= وحميت مكة يوم غزوت هل الفيل
سلط على الكفار من كل الافات= وانزل عليهم من عقوبتك تنزيل
يارب تجعل شملهم شت وافوات= كما ابرهة كيده جعلته بتظليل
وانزلت فوقه من سماك العقوبات= وايضاً عليه ارسلت طيراً ابابيل
وعلى رسول افضل صحيح الديانات= صلوا معي في كل فرض وتنافيل
الصادق المصدوق أمين الرسالات= خاتم جميع الأنبياء والمراسيل[/poem]
| 
|
04-27-2008, 08:04 PM
احد روائع الشاعر الكبير// عبيد بن محيا المرشدي
العرض المتطور
