حمـــــــــــلة يلا نكون شباب وبنات فله

[شيطونه]

:11612_1210249319:


حملة نبغى نكون شباب وبنات فلة




أنا شاب زي أي شاب تاني من شباب جدة..

اسمع اغاني وألبس ماركات أطلع كباين أروح كفيهات عندي لكزس وعندي جيرل فريند

ربنا عالم وعارف إني كنت صادق في حبي وعشقي للبنوتة هذه... وكانت نيتي الزواج

جلسنا مع بعض 4 سنين... وبعدها

ربنا فرقنا... جاها ولد الحلال ووافقوا أهلها واتزوجت

وبعدها وأنا حياتي كلها انقلبت سرت بس ابكي .. ( ايوة رجال وابكي.. اعترف)

طلعت الكورنيش قعدت لحالي.. وحطيت النضارة عشان لحد يشوف دموعي

سألت ربي كتير ليش؟؟ ليش أخدتها مني يا رب؟؟ ليييييش؟ ليش فرقتنا؟؟

الين وصلت لمرحلة حسيت نفسي خلاص مكتوم ومخنوق... مني قادر اتنفس

البحر قدامي والدنيا ظلام وسكون.... البحر قدامي

ارمي نفسي في البحر؟؟ ارمي نفسي في البحر وارتاح من حياتي وهمي

الهم والوجع اللي في قلبي ما بيروح... نفسي اخرج قلبي وارميه.. او أرمي نفسي

قربت شوية وطلعت على صخرة كبيرة..

طالعت في البحر تحتي..أسود وعمييييييق وأمواج..

رفعت عيني فوق للسما... طالعت للنجوم والقمر.. ونزلت دمعة من عيني

سامحني يا رب... استغفرك يا ربي... استغفرك يا رب من فكرة الإنتحار

استغفرك يا رب ساااااامحني...

قمت جريت رجعت عالسيارة... فكيت ازارير القميص لأني من جد كنت مكتوم

دورت في الدرج على حاجة... من زمان كنت حاططها.. امي قالت لي حطها في السيارة عشان البركة

خرجتو... فتحت أول صفحة..

(بسم الله الرحمن الرحيم... الحمد لله رب العالمين.. الرحمن الرحيم.. مالك يوم الدين.. إياك نعبد وإياك نستعين..

اهدنا الصراط المستقيم.. صراط الذين أنعمت عليهم.. غير المغضوب عليهم ولا الضآلين)



وبعدها قريت سورة البقرة... قريتها كلها

انا اللي ما أختم القرآن غير في رمضان... قريت 3 أجزاء كاملة في وقت قصير في السيارة

والله العظيم حسيت براااااحة... راااااااحة عجيبة

بعدها ما ادري ايش اللي خلاني لا شعوريا.... أدور على سي دي

سي دي أغاني كان من ريهام مكتوب عليه... إلى حبيبي أحبك...

أخدت السي دي... نزلت من السيارة.. طلعت على الصخرة تاني.. رفعت يدي بكل قوتي ورميت السي دي

رميتو في البحر بعييييييييييييييييييييييييييييد...

بعدها رجعت للبيت.. دخلت لغرفتي قمت أدور على السجادة زي المجنون.. فين السجادة؟ مين شالها؟ انت متى آخر مرة صليت يا محمود؟؟؟

قمت رحت أخدت سجادة من غرفة المجلس.. قفلت على نفسي الباب.. وصليت العشا وبعدها قعدت مع ربي

سامحني يا رب... سامحني اغفر لي ذنوبي يا ربي



ربي انت بتعاقبني... انت بتعاقبني على كل ذنوبي اللي عملتها

عشان كدا أخدتها مني... ما كنت أصلي ما أصوم ما أتصدق كل همي أغاني وجوالات وخرجات ومسخرة وقلة حيا

ما عمري وقفت ودعيتك يا رب.. ما عمري طلبتك تزوجني ريهام... عشان كدا اخدتها مني

اغفر لي ذنوبي... اغفر لي يارب... واسعدها واغفر لها

يا رب انا راضي بقسمتك... راضي بنصيبي يارب .. لا اعتراض لدي يا رب

عوضني بإنسانة أحسن منها... وعوضها بإنسان أحسن مني

يا رب اني كنت من الظالمين..... لا إله إلا أنت سبحانك إني كنت من الظالمين





اليوم اللي بعده... قمت حسيت إني إنسان جديد

من اليوم...... راح اكون أقرب لربي

راح أصلي الصلوات في وقتها.. وفي المسجد إنشاءالله...

راح استغفر ربي.. كل وقت.. من لزم الاستغفار يجعل الله من كل ضيق مخرجا.. ويفرج همه

راح أدوام على الأذكار والمعوذات..

راح أتصدق على الفقراء

راح أخفف أسمع أغاني...

راح أقرب من ربي

ما اقول اني حأسير مطوع أو ملتزم..

لا... راح أكون إنسان صالح زي أحمد الشقيري

لا متشدد... ولا مفلت

يا مقلب القلوب... ثبت قلبي على دينك











ندائي لكل الشباب والبنات...........

خلونا نبدأ يا شباب من اليوم... خلونا نبدأ يا صبايا

كلنا عندنا أحلام.. كلنا عندنا طموحات ونبغاها تتحقق

واحد حلمه.. تعدي الاختبارت على خير وينجح فيها

واحد حلمه... ربنا يشفيه أو يشفي أبوه من المرض اللي فيه

واحد حلمه.. يشتري سيارة أو اي حاجة معينة

واحد حلمه... يبطل من التدخين او حتى من المخدرات والبنات

واحد حلمه... انه يسافر ويلف الدنيا

وحده حلمها... تدخل الكليه اللي تتمناها

وحده حلمها... ربنا يهديها ويستر عليها من الشباب

وحده حلمها.. تتزوج رجل صالح أو حتى تتزوج حبيبها



كلنا عندنا أحلام... وما بتتحقق

عارفين ليش ما بتتحقق؟؟؟ لأننا بعيدين عن ربنا

خلونا نقرب من ربنا شوية

ما اقول نسير مطوعين.... خلونا نقرب من ربنا

خلونا نرجع لربنا









الأغاني تجيب الهم والاكتئاب.... هذي الأيام كثرت العلاقات بين الشباب والبنات

هذا يحب هذه... وهذه تحب هذا...

يمكن يكون يحبو بعض من جد ويكون قصدهم ونيتهم الزواج ما أظلمهم

لكن.... أيام كثيرة يجي الفراق وما يسير نصيب

تلاقي المفارقين ايش يسووا؟؟؟

يلجئوا للأغاني ويهيموا في اجوائها ويعيشوا زي الأفلام في جو حزن وكئيب ودموع...

اشتأتلك... واشتأت لكل حاجة فييييك.. وبحن لك

أنا حبعد عنك وأنا وياك ألبي... حتحمل تعبي.. في بعدك الله يعينني..

الأماكن كلها مشتاقة لك... حتى ضحكتي لك فيها شي

الأغاني هذه الأيام كلها هم وفراق.... ما تزيد همك غير هم

محا تملأ عيونك غير دمووووع.. وتخلي الدنيا سودا كئيبة

اسألوني انا مجرب

ما فكرت أنك تلجأ او تلجأي للقرآن؟؟؟ اسمعوا واقرأو قرآن

صدقوني راح تحسوا برااااااااااااااااااااااحة وطمأنينة

وامكن سبحان الله ربنا يرجعكم لبعض تاني ويجمعكم في زواج









دحين الدنيا اختبارات..

فجأة لقينا الشباب والبنات كلهم ساروا يدعوا ويصلوا ويروحوا الحرم...

نزل الدين فجأة... وبطلنا نسمع أغاني... ما يسير نسمع اغاني بعدين ربنا ما يوفقنا

وبعد ما نستلم النتيجة... نرجع لحالنا الأولاني

ليش؟؟ يعني ما نذكر ربنا غير في وقت الشدة؟

صدقوني أنا ندمان...كنت لاهي عن ربي وضيعت حب حياتي..

وصحيح إني ما رجعت لربي غير وقت الشدة

لكني حأستمر في طريقي هدا... من الييوم راح أذكر ربنا على طول وقت الشدة ووقت الفرح

خلونا نستمر... وإنشاءالله ربنا يوفقنا في حياتنا كلها.. مو بس في الامتحانات..









واحد من الشلة... كان يحب بنت عمه وهي تحبه

لكن أهلها ما كانو راضين.. بصراحة لأنه الولد سمعته سيئة

بعد ما رفضوه أهلها.. انهاااااار وحالو سار زي حالي

اخدتو على جنب قلت له... مالك غير ربك ادعيه انه يرقق قلب أهلها ويوافقو

قال لااااااااااا خلاااااص كل شي انتهى.. انتهيت خلاص مستحيل اهلها يوافقوا

قلت مافي شي مستحيل على ربنا

استغفر ربك وصلي وادعي... خلي أملك بربنا كبير

لا تغلط نفس غلطتي... انا ما طلبت ريهام من ربنا كنت بعيد عنه واخدها مني

ارجع لربك وانشاءالله ييسر أمورك

وصدقوووووووووووووووووووني

اللي خلاني اكتب الإيميل هدا واكتب قصتي.... انه الواد هدا اتصل علي قبل يومين وقال:

هيا بارك لي يا محمود.... قلت ليش خير انشاءالله... قال قول مبرووووك يا مان

قلت له مبروك بس ليش؟؟ قال: خطبت.. قلت: والله مبررروك مين؟ قال: بنت عمي







واحد يقربلنا... أمه معاها برين كانسر ( سرطان في المخ)

وكانت داخلة على عملية كبيرة

ونسبة نجاحها ضئيلة جدا.... الولد ما كان راضي امه تدخل العملية لكن أبوه وأمه قرروا

كان حاسس انه خلاص حيخسر أمه

قلت له: صلي وادعي انه تنجح العملية

قال: نسبة نجاح العملية ضئييييييل

قلت له: ارجع لربك يا زياد.. لا تيأس لا تفقد الأمل خلي أملك بربنا كبير.. قوم امشي معايا دحين بيأدن المغرب خلينا نروح نصلي في المسجد..

قال: انا ما ادري متى آخر صليت... وتبغاني اروح المسجد؟؟؟ كيف اقابل ربي

قلت له: إن ربك غفور رحيم... ارجع لربك يا زياد واطلبو يشفي امك

كانت العملية بعد شهر.... وفي الشهر هذا زياد اتغير.. سار اقرب لربه

وبعدها........ نجحت العملية وعاشت أمو

كنت معاه في المستفى لما خرجت أمه من العملية... وقالو له نجحت العملية

قدام الناس... قدام الدكاترة والممرضين... سجد زياد على الأرض وسار يبكي

ويقول الحمدلله لك يا رب الحمدلله... سامحني يا رب اغفر لي ذنوبي.. سأكون لك عبدا شاكرا يا رب

موقف هز كل الناس اللي هناك







خلونا من اليوم نبدأ بداية جديدة.... نبدأ صفحة جديدة

مع ربنا

عشان تتحقق أحلامنا...

عشان نحقق طموحنا...

عشان ننعم بحياة سعيدة مطمئنة

عشان تدخل الراحة في حياتنا الكئيبة

عشان يهدينا ربنا ويكون راضي علينا..

عشان ندخل الجنة











مشاريعنا من اليوم:



1- أول خطوة... متى آخر مرة قرينا قرآن؟؟؟

توجه لأقرب مصحف.. وأحضنه.. وبوسه... وأسأل ربك أنه يجعله قرة عينك.. واقرأ سورة قصيرة منه.



2- الصلاة... الصلاة... كل حاجة سويها... إلا صلاتك لا تتهاون فيها أهم شي الصلاة

خلونا شباب وبنات فلة...نطلع نروح نجي نستمتع نلعب... لكن وقت الصلاة نترك كل شي ونصلي



3- كل ما حسيت أن فيه مؤثر ممكن يجرّك للمعاصي استغفر ربك وقول استغفر الله



4- اذا حسيت في أغنية جديدة ضاربة ونفسك تسمعها... ايش تسوي؟؟

اول قول استغفر الله... واذا حسيت انك مرررررة تبغى تسمعها ومنت قادر

استبدلها بشي تاني..... استبدلها بالقرآن.. بكلام الله العظيم

بدل ما تسمع اغنية... قوم اقرأ سورة من القرآن او اسمع مقطع من القرآن من جوالك



5- نزل في جوالك برنامج القرآن... اقرأ منو لمن تكون فاضي وقبل ما تنام صدقني راح تجس براحة عجيبة



6- وإنت دحين أونلاين.... نزل كم مقطع او سورة من القرآن وحطها بجوالك واسمعها كل ما تحس انك بترجع تسمع اغنية





7- من اليوم... ما اقول احذف كل الاغاني في جهازك او جوالك... لكن كل يوم احذف اغنية.. كل يوم احذف مقطع فيديو...كل يوم احذف صورة وسخة... الين ما يبقى شي في جوالك



8- لمن تكون قاعد تتفرج تلفزيون ومافي شي حلو... تروح على مزيكا وميلودي طبعا.. جرب انك تدور على قناة المجد او اقرأ... اسمع فيها سورة او اسمع محاضرة.... صدقوني فيها مواضيع حلوة





9- للشباب.... ما اقول ارمو الأشرطة والسيديهات اللي في سياراتكم... لكن مثلا اول ما تخرج لجامعتك او عملك في الصباح.. لا تشغل اغاني.. واذا مررررة ما تقدر تسوق بدون اغاني خفف شوية مثلا اذا انت رايح للجامعة.. لا تشغل المسجل من اول ما تركب السيارة.. قول لنفسك مثلا لمن أوصل عند الحمرا أو حي النسيم اشغل المسجل... وهكذا الين ما تتعود انك تخفف...



10-اول ما تركب السيارة.. اقرأ المعوذات والأذكار.. وحصن نفسك



11- للبنات... وقت ما تكوني فاضية وقاعدة عالنت... وتكوني مشغلة نانسي عجرم وألا افريل لافين... قفلي الأغاني شوية... مو لازم كل ما تقعدي النت تسمعي اغاني.. جربي تقرأي في أمور دينك





12- جرب تدخل في النت على مواقع دينية او منتديات



13- لما نفتح ايميلنا... نلاقي ايميلات كتيرة.. منها الوسخة ومنها الدينية.. بنفتح الوسخة واللي مكتوب جنبها 18+ على طوووووول... وبنحذف الدينية

خلونا من اليوم.. انا شاب وأدري انه صعبة انه ما نفتح الايميلات هذه.. بعضها امكن تكون نكت وسخة او صور كرتون وسخة وبعضها تكون اشياء خفيفة.. اوكي افتحوها مو مشكلة لكن لا ترجعوا تعملوا لها فوروورد وتنشروها...



14- الرسايل الوسخة في ايميلاتنا.. خلونا كل يوم نحذف منها فيلم.. كل يوم نحذف منها ايميل..



15- الشباب والبنات اللي في جدة ومكة والطائف... حددوا يوم في الشهر تجتمع فيه الشلة وبدل ما تروحو الكوفي والكباين.. روحو الحرم مع بعض..





16-الأستغفار شي عجييييييب لو أقول من هنا لبكرهـ ماوفيت حقهـ أنصحكم فيهـ والتسبيح... قولو لا حول ولا قوة إلا بالله



17- لما ينزل الراتب والمكافأة.... خصص جزء منها و أتصدق بيه كل شهر



18- ابدأو صلو السنة... كلها ركعتين بعد المغرب وبعد العشا وركعتين قبل الفجر.. صلو الوتر... صلوا قيام الليل وادعو ربكم لأنه ربنا ينزل في التلت الأخير من الليل يقول ادعوني استجب لكم



19- ادعوا واستغفروا ربكم في الاوقات والاماكن التي يستجاب فيها الدعاء









أبواب الخير كتيييييييرة يا شباب وكلنا عارفينها...

القيامة قريييبة... صدقوني القيامة قريبة

البراكين والزلازل اللي في المدينة اكبر برهان

من علامات القيامة الكبرى... خروج نار من ارض الحجاز,, اللي هي البراكين

من علامات القيامة... قتل الخنازير.. وشوفو انفلونزا الخنازير كيف منتشرة

خلونا نرجع لربنا

عشان تتحقق أحلامنا ونفوز بالجنة














في نهاية الحملة:
كل الشباب والبنات... خلونا نبدأ مع بعض

ما نبى نكون مطوعين.. لكن نبى نكون قريبين من ربنا

نبغى نكون شباب وبنات فلة... لكن قريبين من ربنا



صحيح نلبس ماركات.. لكن نتصدق على الفقراء

صحيح نسمع أغاني.. لكن حنخفف منها ونسمع ونقرأ قرآن

صحيح نروح كفيهات... لكن بنروح الحرم كمان

صحيح بنركب جيت سكي.. لكن وقت ما يأدن نقوم نصلي

صحيح نشرب معسل... لكن انشاءالله نبطل

صحيح نتفرج تلفزيون.. لكن وقت الأذان نقفل الصوت

صحيح نروح مولات.. لكن ما نرقم بنات

صحيح بنضيع وقت عالنت... لكن بنسوي شي مفيد

صحيح بنعمل ذنوب... لكن نرجع نستغفر ربنا

صحيح احنا مو مطوعين... لكن قريبين من ربنا




هذا ايميل جاني ومن كثر ماتـاثرت فيه نقلته لكم لاننا كلنا محتاجين نكون قريبين من الله





اسال الله ان يجزي من قام بكتابه هذه الكلمات خير الجزاء وتحقيق أحلامه..




تحياتي للجميع

[نظره خجوله]

الله يجزاك بالخير على التذكير وان شاء الله ان شبابنا وبناتنا فيهم الخير والبركه

\

تحياتي ..

[شيطونه]

المشاركة الأصلية كتبت بواسطة عتيبية اصيلة الله يجزاك بالخير على التذكير وان شاء الله ان شبابنا وبناتنا فيهم الخير والبركه \ تحياتي ..

شكرا اختي عتيبيه على المرور والرد

وجزاكي الله خير

[البّدر]

صحيح نشرب معسل... لكن انشاءالله نبطل صحيح نروح مولات.. لكن ما نرقم بنات صحيح احنا مو مطوعين... لكن قريبين من ربنا

[align=center]

مو مطوعين ههههه
الله يجزاه كل خير .. ذا الجداوي .. والله يكتب له الاجر في رسالته العفوية ..
يالله .. خلونـا شباب وبنات فلـًة ..

[/align]

[شيطونه]

المشاركة الأصلية كتبت بواسطة البّدر [align=center] مو مطوعين ههههه الله يجزاه كل خير .. ذا الجداوي .. والله يكتب له الاجر في رسالته العفوية .. يالله .. خلونـا شباب وبنات فلـًة .. [/align]

اهلا اخوي البدر منور الصفحه

الاسلوب العفوي يخش القلب بسرعه لانه يكون مفهوم لناس كثيره من جميع الاعماروالمستويات الفكريه

شكرا لك اخوي على المرور والرد

[.. شِيخَ إلِمرِآجّ ـلُ ~]

قصيدتهِ جِّ ـزلهَ :)

وِاللهِ يجزإ1كّّ إنتيِ وهوِ خيرِرِ .. لإ1هنتُيِ

[البارق]

موضوع مهم وقيم يستحق التمعن كثيرا واخذ اللفوائد الجمه منه

ربى يعافيك شيطونه

[ރالزيــاديރ]

أتمنى أنه مايكون كتبها بوقت الأختبارات

يجزاه خير

ويعطيك الف عافيه شيطونه

تحياتي

[عادل العصيمي]

جزاك الله خير شيطونه

[نظره خجوله]

شيطونه

\

يعطيك العافيه على اختيار الموفق للموضوع وسيتم تثبيته وتقييمه للفائده المُترجاه من خلاله ..

\

شكرا لك وواصلي في اختياراتك الجيده..