مأذون شرعي وتسعين ألف وشهود .. أنهت مواصيل الغرام ومحتها :(

[مامثلي أحد]

-




بعض الأحيان تندبل كبدي من بعض التصرفات مدري الظواهر اللي ماهيب صاحية في مجتمعنا
ودي صراحة أسوي شيء حيالها يسجل في تاريخ البشرية المشرق
ولا أدري صراحة وشلون

أمس رحت مع خويي يخطب ويرزون في وجهه طلبات مدري وش تبي من الحياة
( المهر 80 ألف - مؤخر الصداق 150 ألف - بيت مستقل - سواق وشغالة - الملكة بقاعة أفراح والزواج بفندق )
لا وأبوها اللي ماهناش دبره يقول هذي طلبات الحريم
خويي يوم شاف الطلبات وجهه أنعفط و أنا فكيت خشتي وفهيت من جدهم ذولاء ؟


هالحين خويي راتبه 7 الآف وش تبد فيه وش تخلي ؟
عليه قسط سيارة 2000
وإذا أخذ قرض من بنك التسليف بيعطونه 45 ألف يبقى له 35 عشان يكمل المهر
طيب و القاعة والفندق كم بتكلف .. غير العشاء والذبايح ؟!
هذا إذا قلنا أن البيت جاهز اللي بيسكن فيه
وشلون عاد بيكمل باقي الطلبات
هل هي تصريفه و ودهم يكرشونه باسلوب حلو وإلا من جدهم هالتعجيزات

ليه الأهل يطالبون بمهور غالية غير مصاريف ليله العرس اللي تهد الحيل
شاب في بدايات عمره قي ظل وقتنا المشعلل نار من وين بيكمل نصف دينه معه ؟!
زواج ..و بيت.. وأثاث .. و شهر عسل.. ليه آخذ قروض و ديون وأقضي بقية حياتي غارق في بحر الدين ؟
الواحد يتزوج عشان يستقر ويرتاح و إلا عشان يتبهذل مع شركات التقسيط و الديون !

ليه هالطلبات التعجيزية والغير منطقية و المهر المبالغ فيه خصوصاً بمجتمعنا البدوي .. وكأن البنت سلعة تباع وتشرى ؟َ
غير القاعة و البوفيه و الشعراء و الطقاقة ( طق الله راس العدو )
ليه مايكون مهر معتدل و زواج عائلي و عشاء ذبيحتين و أخذ مودامك و توكل << جد والله

العانسات وصلن واحد ونص مليون ويشار في آخر الأحصائيات إنها سـ تتجاوز لـ الأربعة مليون
وترا إذا فاتهن القطار ماعاد هو بمعود ولا عاد بيلقن قطار فاضي يركبهن معه
الغلاء في المهور خطأ فادح يرتكبه الأهل في حق بناتهم وسيضل في أعناقهم إلى يوم الدين


والوكاد الوكاد بعيش طول عمري عزابي .. ما أبغا أتزوج كذا مرتاح

[ثغَــــرْ]

.

.

.





السلام عليكم
على العكس تماما رخصت كثير عن اول الاهالي يبون الستر لبنيآتهم , مادري اي ناس اللي طاح عليهم خويك لكن قله ينحاششش وينفذ بجلده

لان استحاله شاب
وفي اول حياته يقدر يدبر كل الطلبات زين ان كمل البيت ودفع المهر ..



مامثلي / اقعد عزابي ولا تزعل يـ خيي ^_^

[مامثلي أحد]

-

المشاركة الأصلية كتبت بواسطة خفايا إنسانه السلام عليكم

وعليكم السلام

المشاركة الأصلية كتبت بواسطة خفايا إنسانه على العكس تماما رخصت كثير عن اول الاهالي يبون الستر لبنيآتهم ,

سيارات على غفلة هههههههه
مادري عن منطقتكم لكن عندنا بنجد المهور مبالع جدا فيها

المشاركة الأصلية كتبت بواسطة خفايا إنسانه مادري اي ناس اللي طاح عليهم خويك لكن قله ينحاششش وينفذ بجلده

كأنك سمعتيني وش قلت له
لكن المسيكين من عقب شاف البنيّه يوم يسيرون عليهم هو وأمه ذاك اليوم
وهو لاهوب حي ولا ميْت و لا غير قلبه يقول :
طربق طربق .. مايبي إلا هي

المشاركة الأصلية كتبت بواسطة خفايا إنسانه لان استحاله شاب وفي اول حياته يقدر يدبر كل الطلبات زين ان كمل البيت ودفع المهر ..

كلام ماعليه أي ذرة غبار

المشاركة الأصلية كتبت بواسطة خفايا إنسانه مامثلي / اقعد عزابي ولا تزعل يـ خيي ^_^[/size]

يزينها الله ياخيه
حياك خفايا

[ماني مثل غيري]

الله يعينه المسكين :(
كان طيح وجه ابوها وقال بطلت ×_×
وبعدين الملكه على اهل البنت ’ الرجال مهوب ملزوم فيها ..

[مامثلي أحد]

-

المشاركة الأصلية كتبت بواسطة ماني مثل غيري الله يعينه المسكين :( كان طيح وجه ابوها وقال بطلت ×_×

جايين مترززين وش زينا و نخطب وعقب نقول مانبي .. ليه ؟ قاعدين نلعب حبشة حنا
وأبوها لولا أبوحميد كان مردست ركبتي على خشته ههههههه
هالظالم اللي كسر قلب خويي وحطم مشاعره الرهيفة

المشاركة الأصلية كتبت بواسطة ماني مثل غيري وبعدين الملكه على اهل البنت ’ الرجال مهوب ملزوم فيها ..

هذولاء الحضر
وإلا بـ مجتمعنا البدوي جميع الخنابيدز من طقطق لـ السلام عليكم
على راس الفقير لله ( المعرس )


حياك ماني

[تباريح الروقي]

انت قلت المجتمع البدوي ماعندهم شئ حفلة ملكة,,عندهم عقد قران بحضرون الاخوان والاعمام,,, واللي يعز,,,ثاني شئ,, اغلب القبائل حددة المهر,, وانا بتكلم عنى مهور البنات ماتزيد عن 60,000
وبالعكس انا اشووف ان البنات ماعاد يطلبون طلبات خااصة اذا كان(الرجال يستاهل)وخويك الله يعينه
طاح بانساب مايشترون الستر لبنيتهم,,,واصاابع اليد ماهيب سوا,,,,تقبلوا مروري,,دومتم بصحة وعاافية’’

[مامثلي أحد]

-

المشاركة الأصلية كتبت بواسطة تباريح الروقي انت قلت المجتمع البدوي ماعندهم شئ حفلة ملكة,,عندهم عقد قران بحضرون الاخوان والاعمام,,, واللي يعز,,,

ماقلت

المشاركة الأصلية كتبت بواسطة تباريح الروقي ثاني شئ,, اغلب القبائل حددة المهر,, وانا بتكلم عنى مهور البنات ماتزيد عن 60,000

ستين ألف حاجة جميلة مقارنة بعندنا في نجد مهور تكسر الظهر لا و مهور أهل الجنوب أكثر مبالغة ..
و تحديد المهور قالوا يبا الفيت نبي نسويه لكن ماتم هالشيء .. كل عايلة تبي لبنتها حفل لا صار
ولا استوى وماهي أقل من بنت فلان اللي جاها مهر وقدره .. وسوت عرس مدري وشلونه ..
ومن هالحتسي اللي مال أمه سنع

المشاركة الأصلية كتبت بواسطة تباريح الروقي وبالعكس انا اشووف ان البنات ماعاد يطلبون طلبات خااصة اذا كان(الرجال يستاهل)

البنيات لو الود ودهم تزوجوا بدون مهور كله ولا يفوتهن القطار ويقعدن بها
لأنه ماراح يخسر بهالدعوة كلها الا هن

المشاركة الأصلية كتبت بواسطة تباريح الروقي وخويك الله يعينه طاح بانساب مايشترون الستر لبنيتهم,,,واصاابع اليد ماهيب سوا,,,,تقبلوا مروري,,دومتم بصحة وعاافية’’

الله يعينه ويكتب له اللي فيه الخير
حياك تباريح

[اصايل]

الناس الان يشترون الرجال وماعليهم من الدراهم :)

كثير من الاسر ماتتشرط وصاروا يتنازلون كثير ..!!

وكان من المفترض اول ماجيتوا تخطبون تعلمون الاب بوضعكم عشان يكون على بينه :)

الله يكتب لكم الخيره ..

[مامثلي أحد]

-

المشاركة الأصلية كتبت بواسطة اصايل الناس الان يشترون الرجال وماعليهم من الدراهم :) كثير من الاسر ماتتشرط وصاروا يتنازلون كثير ..!!

أتمنى هيك
أتوقع أن هالفئة قلة اللي تدرك مصلحة بناتها و تفكر على هالأساس
لأن الغالبية غرتهم المظاهر وطغت على فكرهم ورؤيتهم للأمور من حولهم كان الله بالعون

المشاركة الأصلية كتبت بواسطة اصايل وكان من المفترض اول ماجيتوا تخطبون تعلمون الاب بوضعكم عشان يكون على بينه :)

الأب رازن الورقة بوجيهنا قبل لا يسألنا عن وضعنا
و يقول العلم عند الربايع .. وهو وش موقعه من الإعراب في عائلته الكريمة .. أنا إلى الآن ما أدري
والله ياكم مرة راودتني نفسي أن أصمخ بالفنجال على جبهته عشان يعرف وش معنى العلم عند
الحريم وهو ماعنده شيء

المشاركة الأصلية كتبت بواسطة اصايل الله يكتب لكم الخيره ..

اللهم آمين
حياك أصايل

[وجودك يكفي]

الله يكون بالعون

مامثلك احد لاهنت على الموضوع والله يعطيك العافيه


احترامي