ياصاحبي مالي مع الناس ماسوق , غيرك ولا لي من حلال(ن) يساقا
انت الحلال وغايت القصد والشوق , خل المحبه ياعشيري تساقـا
خطوه بها تمشي على الحب والذوق , وخطوه بها نمشي وننسى الفراقا
وعرف ترى بالدرب مانته بمسبوق , انته وانا بالدرب لبن انتلاقا
هاذا عشيرن ساقني بالهوا سوق , سوق الركايب وحملهن مايطاقا
اقفابي الغالي ولهوب ملحوق , وانا احسب ان المهتوي مايساقا
ماشفت في برقا ولا شفت في روق , مثله عشيرن في حياتي ولاقا
العنق عنق الريم لاشرفت فوق , يطري علي ليا تبين وواقا
عنق زهاه الماس ياعارف السوق , هاذا كلام الصدق ماهو نفاقا
والعين عين اللي على الكف بسبوق , حر(ن) يدرب في حدود العراقا
والخد مزن(ن) ولعت وسطه بروق , يرهب عسا الرحمن يرفق وياقا
والصدر بدر(ن) يقبل العقد والطوق , بدر(ن) بنوره عم سبع(ن) طباقا
والردف شط حوير يرضع النوق , ينهل من امه كل مشفق وفاقا
في حاجر(ن) نبته من الوسم زملوق , بين النفود ام العبل والطراقا
وحلو الكلام اللي لك الله منطوق , مثل العسل معروف حلو المذاقا
وسلامتكم .....
للشاعر / رويفع بن دبسي العتيبي ..
| 
|
07-11-2010, 05:55 AM
ماشفت في برقا ولا شفت في روق , مثله عشيرن في حياتي ولاقا
العرض المتطور
