[°• قرنقش •°]

- العنود: السلااااام يالقطوع ..
- بدر: وعليكم السلاام ..
- العنود: وينك .. والله النت مايسوى بدونك << خقت معها ..
- بدر: ترا انا مو صاحب الايميل ..
- العنود: اجل ؟؟
- بدر: انا خويه ..
- العنود: خويه .. طيب ليش داخل بايميله ..
- بدر: لانه هو طلب مني خدمه ..
- العنود: وليه هو وينه ..
- بدر: لحظه انتي العنود والا ؟؟
- العنود: هاه .. ايه .. ليه تسأل ..
- بدر: لا بس هو قالي افضي الايميل واذا في رسايل منك ماامسحها ويبي اخبارك .. هاه طمنينا عليك .؟؟
- العنود: ايش وينه فهد ؟؟..
- بدر: فهد .. ليش انتي ماتدرين ..
- العنود: وش ادري .. وش فيه ؟؟..
- بدر: فهد مرقد بالمستشفى .. يكسر الخاطر المسكين ..
- العنود: نعم ..؟؟ ايش .. مستشفى ..
- بدر: ايه مستشفى .. ماقالك ..
- العنود: لا ..
- بدر: اها طيب توصين شيء بطلع ..
- العنود: ايه ..
- بدر: وش ..
- العنود: ابيك تسلمني عليه بليزز .. ابيك توصل سلامي له وبلغني وش الجديد ..
- بدر: انشالله ..
- العنود: راح ادخل اليوم ابي اعرف كل شيء ..
- بدر: اوف بس انا مقدر ..
- العنود: ليه ..
- بدر: فهد محتاجني ..
- العنود: في ايش ..
- بدر: انا اليوم لازم اروح لفهد لان فهد بيدخل العمليات اليوم عشان الحادث اللي صار له من كم اسبوع ..
- العنود: لحظه .. اي حادث .. فهد صار له حادث ؟؟..
- بدر: ايه ياحليلك .. مع هندي .. تاكسي ..
- العنود: فهد ..
- بدر: لابدر ..
- العنود: مايستاهل ..
- بدر: اه .. ايه << على باله تناديه ..>> المهم راح ادخل السبت نتقابل السبت انشالله ..
- العنود: السبت مقدر ..
- بدر: خلاص الاحد ..
- العنود: حتى ..مقدر ..
- بدر: ليه ..
- العنود: بسافر ..
- بدر: اخس وين ..
- العنود: امريكا..
- بدر: اكشخي امريكا مره وحده ..
- العنود: تكفى سلم على فهد ..
- بدر: انشالله .. تروحين وترجعين بالسلامة ..
- العنود: الله يسلمك مشكور ..
- بدر: مع السلامة ..
- العنود: مع السلامة ..

صكت العنود واللي كانت تبكي ليتها ولد كان راحت لفهد وماتركته ليتها تعرف مكانه بس عشان تتطمن ..
صاحت العنود وقعدت تبكي .. وتتذمر ..

-**************************************-

دخل بدر على فهد بالغرفه ..
- فهد: هلا بدر ..
- بدر: هلاوين ابو الشباب .. لا اليوم انت ماشالله عليك نشيط وصحتك زينه ..
- فهد: اقول بدر ورى ماتذلف توني ماسويت العمليه ترى ..
- بدر: حزر فزر وش صار اليوم معي ..؟؟
- فهد: وش ..
- بدر: لا انت فكر .. من لقيت بماسنجرك ..
- فهد: فتحت الماسنجر ..؟؟
- بدر: ايه ..
- فهد: من سمح لك ..
- بدر: انت قلت ..
- فهد: لاانا قلت بس الايميل ..
- بدر: لا انت ماحددت ..
- فهد: طيب من لقيت ..
- بدر: يالله حزر ..
- فهد: اكيد حـ ،،، العنود ..
- بدر: ايش ..
- فهد: العنود ..
- بدر: لا اللي قبلها ..
- فهد: وش اللي قبلها ..
- بدر: هههههههه حبيبتي .. والله وطحت بدباديبها وانا اشهد هههههههههههههههه..
- فهد: بدر عن الطنازة وش صار ..
- بدر: وش صار وش صار .. ماصار شيء ..
- فهد: يالله .. يالله عاد ..
- بدر: تبي تعرف وش صار ..
- فهد: ايه ..
- بدر: اول مادخلت قالت .. وينك .. والله النت مايسوى بدونك << خقت معها .. ههه اعجبتني خقت معها ..

ارتسمت على شفايف فهد البسمه وكأنه يستعيد قواه تنهد وقال ..

- فهد: وبعدين ..
- بدر: وبعدين سالت عنك .. وقلت لها انك بالمستشفى واظاهر انها انصدمت وتلخبطت وحاولت تعرف وش فيك علمتها وش فيك ..
- فهد: علمتتتتتتتتتهاااااااااااا ..
- بدر: ايه ليه بسم الله ..
- فهد: وش صار ..
- بدر: اكيد ضاق خلقها قالت لي سلم لي عليه وقلت لها بروح اليوم عنده وقالت بدخل الليله وانتظرك بس انا قلتلها اني بقعد معك لانك بتسوي عمليه .. رجعت تسال مره ثانيه .. واعدتها بكره راح ادخل بس هي قالت ماتقدر .. وقلت لها بعده قالت ماتقدر سالتها ليه قالت انها بتسافر امريكا ..

تنهد فهد وقلبه بدا يعوره وقال ..
- فهد: بدر لاعاد تقابلها بالماسنجر ..
- بدر: ليه ..
- فهد: بس ماابيك تكلمها ..
- بدر: وش فيك ..
- فهد: بس يااخي ماابيك تكلمها دور وحده غير العنود ..
- بدر: أها تغار يابو الشباب ..
- فهد: اخ يابدر ايه اغار واغار واغار عندك شيء ..
- بدر: اخس اخس اخس .. لا ماعندي شيء .. هدي ابوي ..

سرح فهد وحس انه يبي يطلع مافيه الا العافيه حس انه مكبل .. ضاق خلقه انا بسوي العمليه ويمكن اطلع بعد اسبوع لا ليتك يا عنود ماتسافرين أبيك أبي أسولف معك ليش تروحين .. حس فهد بضيقه وان مابيده شيء يسويه ..

- فهد: بدر ..
- بدر: هلا ..
- فهد: ماقالت لك كم بتقعد هناك ..؟؟
- بدر: لا والله ..
- فهد: ليه ..

استغرب بدر وقال ..

- بدر: طيب اسمع انا جوعان بروح اشتري لي اي شيء من البقاله اللي تحت ..
- فهد: مو بقاله ياالدلخ ..
- بدر: اللي هو ..
- فهد: طيب ..

طلع بدر .. وقعد فهد يفكر .. ياربي شلون بنتظر لين ترجع من السفر .. كيف بصبر .. لااله الا الله ..
- آه ..

دخل الدكتور على فهد ..

- الدكتور: هلا فهد ..
- فهد: هلا دكتور ..
- الدكتور: كيفك اليوم .. انشالله زين ..
- فهد: ايه الحمدلله ..
- الدكتور: طيب فهد عمليتك اليوم بعد صلاة العشاء اوكي ..
- فهد: ايه انشالله ..
- الدكتور: تطمن يافهد .. بسيطه انشالله ..
- فهد: انشالله ..
- الدكتور: طيب اتركك ..


راح الدكتور وترك فهد اللي ماامداه يزين قعدته الا واهله واصلين ..وجت امه وبسرعة مسكت يد ولدها فهد ..

- أم ياسر: يمه شلونك ..؟؟
- فهد: الحمدلله بخير ..
- أم ياسر: هاه ماقالولك متى العمليه ..
- فهد: اليوم بعد صلاة العشاء ..
- أم ياسر: الله يهونها ..
- فهد: يمه خايف ..

تدخل ابو ياسر ..

- أبو ياسر: الحمدلله وش منه كلها كم قزازة بتطلع وانتهينا ..
- أم ياسر: ايش قزاز ..
- أبو ياسر: ايه هي العمليه كلها عشان يطلعون القزاز ..
- أم ياسر: وين القزاز فيه .. يمه فهد يعورك شيء ..

فهد اللي سكت يمه مايعورني شيء قلبي اللي يعورني ..

- فهد: لايمه مايعورني شيء ..
- أم ياسر: فهد يمه شدحيلك وزي ماقال ابوك بسيطه انشالله ..
- فهد: انشالله ..

-************************************************** ********-

العنود كانت طايحه على سريرها وضايق خلقها .. طق الباب ..

- العنود: نعم ..
- أم تركي:عنود ..
- العنود: يمه ادخلي ..

دخلت أم تركي وقعدت قبالها ..

- أم تركي:عنود يمه فيك شيء ..
- العنود: لا بس راسي يعورني من امس وانا اشتغل ,, تعبت ..
- أم تركي: خلاص يمه اذا خلصتي تعالي تغدي ونامي ..
- العنود: انشالله يمه ..

طلعت ام العنود .. ومر الوقت وودخلوا فهد غرفة العمليات وبدر قاعد فالانتظار .. الكل كان مرتاح لان العملية بسيطة كم قزازة .. الا فهد كان خايف .. دخل فهد وقعد اربع ساعات ..طلع فهد من غرفة العمليات وهو مخدر مايحس بشي .. بس يسمع ازعاج وصوت مشي النرس اللي يخرق الاذن .. وصوت اللفت وصوت الطنطنه آآه حس براسه يعوره .. بس مايقدر يمسك راسه .. دخلوا فهد غرفته ومنعوا عنه الزيارة لانه بحاجه لراحة تامة ..

-************************************************** ****************-