فكره حلوووووووووووووه ويعطيكم العافيه
اتهبووون مخي ضرب فيوز وانا اقرا
انا بعطيكم اللي عندي :
الجذيبه او الزريبه : المكان المرتفع واللذي يحتوي على حجر متراكم بعضه فوق البعض أو الجبل بس الجذيبه تكون اصغر من الجبل شوي
الرقعه = قطعة القماش
العزبه ( وهي صندوق يحتوي على اغراض الرحلات ويكون مجهز في كل لحظه ومزود بجميع الأغراض اللتي تخص رحلات الصيد ورحلات التنزه والسفر ) وبس
العشه = <== والله مايمديني اشرحها لكم بس تراني اعرفها <== عاش مصرف . المهم انها غرفه مصنوعه من الخشب او من الخيمه
التيزار :D : وهي القطعه اللتي تتكون منها اطراف الخيمه :D <== والله مدري انا جبتها والا اعميتكم معي
عساك بالساحق الماحق : كح كح
مثلاً : انت تهاوشت مع واحد ودعي عليك وقال عساك بالساحق الماحق <== تكفون اللي يعرفها زين يجي يفسرها تراني من جنبها :p
النباطه = النبيطه ، النبّيله مع دغم الباء : وهي عباره عن خشبه تكون على شكل رقم 7 ويقومون بقصها من اغصان الشجره اللتي تكون على شكل ( 7 ) ويضعون ثم يقومون بقص قطعتين من لستك السياره او السيكل :D ويضعون في كل شعبه من شعب النباطه قطعة لستك وتكون مؤخرة اللستك عريضه شوي <= مانيب مكثر ومتعبٍ نفسي لأني لو شرحت قعدت للصبح اشرح 
افهموها مثل ماتفهموها :D
نجي لألوان الاغنام
العنز الربدا : يكون لونها ابيض واسود
العنز الخضرا : يكون لونها مائل للرمادي
العنز الحوا : هذا اللون يكون اسود مع اللون المائل للأحمر والبرتكاني :D
العنز الصبحا : وهي العنز اللتي يكون اعلى راسها ابيض وبقية جسمها مختلف
العنز الحجلا : تكوت مؤخرة يديها ورجليها بيضاء وباقي جسمها لون مختلف
نروح للأمراض اللتي تصيب الاغنام وبعطيكم منها اللي اعرفه او الي يطري على بالي
الجدري : او الجرب : المرض ذا يسلب جلد العنز سلب ويطير شعرها ويخليها اربع وعشرين ساعه تحك جسمها على الشجر والجدران والحضيره ويالله مشي حالك الله يعينها ويكفينا شره
ابو سعيبيله : سعيبيله يعني سعابيل يعععع ادري فيه ناس تلوعهم كبوده الحين وابو سعيبيله يخلي العنز سعابيلها تشختر ( تصب ) اربع وعشرين ساعه وساايله على شفايفها وفمها
ابو ركب : يصيب الغنم في ركبها ويخليها ماتمشي على رجولها ويدينها بس تحبي على ركبها
ابو رمح : المرض ذا اذا صاب الغنم خلااص اغسل يدك منها الا اذا ربك لطف بحالها
ـــــــ
الشحيمي :D :: <== نوع من انواع الطيور صغيرر جدا <== استرر على ايام زمان كنت كل يوم تحت الشجر واصيد في الشحيميات بالنبيطه :D . وهاااااااتك كبساااات وشوي :D ويطلق عليه طوار <== طوار هو الطير صغير الحجم
السمينيه : :D نوم من انواع العصافير ايضا بس السمينيه تنقسم الا قسمين
سمينه يكون بطنها اصفر وضهرها اسود : وهذي نطلق عليها سمينية المعزا لأنها داايم تكون في حظيرة المعزا وفي مراحها :D
سمينيه يكون بطنها ابيض وضهرها مشخط اسود وابيض <== استرر على اللون يذكرني بنادي يوفنتوس . هذي نطلق عليها سمينية الضان ودايم تكون في مراح الضان وماتقرب المعزا بينهم عداوه :D
أشتف = أشول . تطلق على الشخص اللذي يستخدم يده ورجله اليسار في كل شي مثل لعب الكوره ، رمي الحجر ..... الخ
اخصرك منه : اتركه عنك ، لاتفكر فيه .
مثلا جاك واحد قال لك فلان يقول انه البارح حصل مطر على الديره الفلانيه . وانت عارف ان فلان تسذوب ومايجيب علم . ترد على اللي جاك وتقول له اخصرك منه :D <=== امممممحق تفسير
ـــــــــ
نروح للأمثال
( من اكل في بطنه ومن قعد واغبنه ) <== :D المثل ذا يقولونه للي يترك الأكل . يعني يعني يعني جاك ابوك والا امك والا اخوك وقال لك قم تغد والا قم تعش :D وانت مسوي زعلان وتتغلى عليهم يردون عليك ويقولون لك هالمثل عشان يحروووونك :D ان اكلت في بطنك مو في بطن غيرك وانت بكيفك وان قعدت او ان مااكلت واغبنك يعني انت الخسران وانت اللي بتندم وانت الي ضريت نفسك بنفسك <== الكلمه ذي تحرررني بقووه مادانيها :D
( يامن شراله من حلاله علـّــه ) : اللي يقدر يفسرها احسن مني يجي شباب وصبايا :D
انا بقول لكم اللي اقدر عليه وبعطيكم مثال : مثلاً انت رحت تبيلك شي من واحد غثــه وبلشه وعلة نحر ولزززقه ومايصدق على الله احد يعطيه وجه والغثيث ذا عطاك الشي اللي تبيه وماقصر معك <== هالغثيث ذبحك وكل يوم مسير عليك وكل يوم يشرب القهوه عندك واكله وشربه عندك ومسوي نفسه يمون <== انت عشانك عطيته وجه وانت اللي جبت الغثا لنفسك بتقول هالمثل ======> ( يامن شراله من حلاله عله ) <= ادري طولت عليكم على بالي فاهم ومسوي ذكي وادري انكم تعرفون معناها . بس يالله هذا انا اذا قعدت اشرح لك قرب المخده بس واسحبها نوومه
:D
ــــــــــــ
فيه شي ابيكم تقولون وش معناه
( قم تغد عساك بالغده ) او ( قم تعش عساك بالعشه )
المعذره اذا احد فسر هالكلمات قبلي انا لأني بصراحه ماقريت موضوعكم كاامل
و انشاء الله ماطولت عليكم ولااخذتو في خطــّركم علي :D
سي يوووووووووووووو