منتديات عتيبه - جماله طبيعي ما شرا بودر أهل السـوق=عليه ألف بإسم الله من عيـون عدوانـي

مساكم الله بالخير وكل عام والجميع بخير

ألا يالهواوي جر صوتك كفيـت العـوق
تسمعت صوتك يـوم غنّيـت وأشقانـي

مع السلك صوتك حل في داخل المعلـوق
دخيلك ترد الصوت لو كان مـن شانـي

دخيلك ترد الصـوت ذكرتنـي مخلـوق
عليه أتوّجـد وأضـرب القـاع ولهانـي

وليفن ولفت القرب منه وشوفـه بـوق
مقاريـد ربعـه كـل ماجيـت تنحانـي

جميع البني عندي تحت . والحبيّب فوق
تعـلاّ درجتـن مامعـه حولهـا ثانـي

حوى الزين كلّه. والذرابه مع المنطـوق
حما سيرته من هرجـة فـلان وفلانـي

جماله طبيعي ما شرا بودر أهل السـوق
عليه ألف بإسم الله من عيون عدوانـي

تضامر حشاها. والنحر بارقـه شاعـوق
وإلا لد شبحه قلت موت العـرب جانـي

جديله على حـد الكرانيـف لـه دانـوق
ضحك له غضيض صباه .والعود ريّانـي

أرى سلبة العاتق على جيدهـا المنتـوق
كما سلبة العرجـون . قالـه سليمانـي

خذا خدها لونن خذانـي وخيـذ الشـوق
تكيشافي برقن لاح فـي غـر الأمزانـي

تدامت شفاياهـا وكـن البـرد مشبـوق
برّمة حسين الـدل . سحّـاب الأردانـي

كفخ له فوادي يوم لـوّح وتـل سبـوق
معاليق جوفـي تلّـة الطيـر شقرانـي

عسا تعترض درب النحاوي مع الطاروق
على شان أبو غانم يجي فيه مـا جانـي

أبيها تسوق العود صوب المحبه سـوق
ترده علـى عصـرن تقضّـا لسلطانـي

يبّيح خفاه العود ثـم يظهـر المفهـوق
من أشعار أبو غانـم ثمينـات الأثمانـي

أنا يالنحاوي عقبها خاطـري ممحـوق
تبرّيت من قاصـي المخاليـق والدانـي

يقولون خف من أشقر الكنت وأنح شروق
وأنا يمتـي غربـن علـى دار خلاّنـي

ويا لايمن (بارود) جالي عليـك حقـوق
أنا ما جرالي يـا إبـن الأجـواد كفّانـي

الشـــــــاعر بارووود

نعتذر عن التنسيق بس خلل نظام المنتدى بعد اللوك الرمضاني الجديد :)