ويش الذي من غير.. باب وشبابيك
بيتن على مبناه .. محدن سكن فيه طقيت انا جدره وإلى هو سيراميك والكل يبغى يشوف ويش الذي فيه |
الله على الِّي رفّ لي حاجبه رف
سمح المحيا .. لا بدالك محيَّاه بتقايته ماشوف غير أربع أحرف أربع حروفن يشبه الثاني أتلاه وليا انتصف عمره تبيَّن وشرَّف أقبل بوجهن.. لايقن به مسماه |
ويش بنتن.. زهْرًها يقطر نداه
في حشاها .. كنه اللُّول النثير من شذاها رايح المزن وشذاه لاكساها ... زاهي اللون المثير منتهى عوْدن .. وصل لامنتهاه زيْنةٍ .... لوِّك تشاهدها تحير حرفها الأخير .. من يقلع مداه لا حذفته .. يعني الشي الكثير ✍🖎 |
ويش بنت اعيالها اللي يحضرون
لا نخيت البنت ... جوك اعيالها العيال اربع ... على ما يذكرون سِعد منهم .... يفعلون أفعالها |
ياللي تعس الأرض والأرض خضرا
ما شفتها .. في نجد .. ولاَّ تهاما ان قلت وشهي قلت لك بنت عذرا ما فوقها غيمه .... ولا تحتها ما في عكسها .. تِكتَب وبالعكس تِقرا لاشك. ما اشوف لْها .. عينن تهاما |
بنتن منحنيه حنية الباكور
تبغا الذي يكشف معانيها ميقافها عند آخر الطابور من شكلها تعرف مواريها |
ياويش رجلن يِنعرف بسم وْلده
والولد لاشك هو من صلْب ابوه لكنْ قوي الباس .. من شد بْلده الحل منه يشاف لكن ما اكتبوْه |
ويش رجلن ، ، أوله اسم وْلده
لأنحذف حرفين ،، بيَّنت الولد من قديم الوقت وهذاك بْلده ما عرفته ،، غير من ذاك البلد |
انشدك عن رجّال يسكن برجّال
تلقى مقامه ، ، يا رفيع المقاما أول حروفه لو تشيله،، وينزال يبقى،، مكان اللي عليه الكلاما |
ويش الي معروفن نسبها ياعرب
ترثة عرب،، يوم العصور الفانيه بنتن ليا حطيت لْها راس وذنب يطلع لك غير البنت ، بنتن ثانيه والبنت من حرفين والله ما تغب تلقونها ،، في بطن البنت الثانيه |
رجلن ، له سلطنه وحكم وراي
يجود بعض أحيان ويشاطرك خلك معه بالراي ،، رايح جاي لو ما يساير بالرضا ،، خاطرك |
ياويش رجلن لاحذفت أوله صار
ضد المخاوف ،، بالديار وحماها وليا حذفت اثنين بنهايته ،، دار دارن ،،، يعين الله على ما بلاها هذا الذي في نصرةالدين مغوار ما همه الأخصام ،،، حزت لقاها |
وشهو اللي في حدودك تملكه
بالعوايد ، ، ، والسلوم العامره تملكه وقتن قصير ، ، وتتركه للطويله ، ، والقصير الشامره ذي علوم ، اللي سلكنا مسلكه مانخالف لأمر ،، ضمن أوامره وكل حدن دون حدك ، تدركه غير لاجات المسفَّه ،،، طامره |
لغزنا مضرب مثل،، ماله شبيه
العوارف في حلوله ،، ماتضيع ويش بنتن ،،،، لا بِلي بها نبيه جات بأخواتن لها تضلع ضليع والبنيَّه ،، ما يباها ،،، لو تجيه مير هي وأخواتها معها جميع يوم صارن حِسبَة أصابع يديه ماله في مردِّهن،، قدر وصنيع |
بنشدك عن بنتن في واقعها خـطـر
بنتن علـى الفاعـل ،، لها ردّة فـعـل كله هناديب ،، اللي حـط لْهـا مقـر صارت له نكبةٍ ،، يِضرب بها المثـل |
انشدك ويش الذي اسمه جميل وزان
امصغَّرن،، ما حقرت اسمه وتصغيره رجلن سِمِيّه له عند الناس قدر وشان كذا الوفا والشرف، مع طيّب السيره اليا حذفت أوله ،،، هنا السؤال يبان هات الجواب الذي يكفي ،،، بتعبيره |
رجلن سميّه ،،، مِد شوفك وتلقاه
مابين ضلع وعِرق سهل وطماني لاشلت راسه عيب بالشين تشناه له في زمان اهل الموازين شاني ياما مضى له ،، بين ذولا وذولاه لاشك عهده ،،، من قديم الزماني |
رجلن خبر موته ،،، قبل مماته
سبب غلطه شاع الخبر وذاعي تجاهلوا عطاه ،،،، ومنجزاته نسيو بعَد معها ذيك المساعي قرر يِهْدي على العالم ،، فتاته بنتن تمناها ،، كل رجل واعي |
اللغز جاكم، بأكمل وجه ومحتوى
ما كلّ رماعن ،،، كشف عنه الغطا قبل امس إتطيِّره نسانيس الهوى سِوات الريش يروح مرواح القطا واليوم، جاله وزن وثقل ومستوى حتى لقى مجالن، بين أخْذ وعطا |
انشدك عن بنتين والمعنى خطير
الكل منهن نفس الكلمه ،، تحمله ببطونهن نوايا ،، شرّن مستطير وفعول صاحبهن ما هي بمجمّله تلَقَّاهن رجلن ما يخفاه المصير لولا ذهانته ،،، ما حرَّك ،، أنمله |
اللغز ،،، ما هو للسوالف ،، فلسفه
لغزي،، مثل سهمن عليه إمضاربه اللي يجي ،،، للمنتدى ،، ويشرّفه قلنا هلا ،،، والله يحيّي ،، شاربه للفكر والموروث ،، عِرف ومعرفه أطلق حصانه ،،، والعنان ،، بغاربه رجلٍ على وجهه سرح من موقفه غرب اللي ،، غربي الدِّيَر ،، تغاربه طال وقصر ،، وراه ودونه ،، لفلفه من حيث ما وقَّف ،، رست ركايبه والعصر روَّح شرق والمشرق شِفه نوَّخ رِكابه ،،، وأمه ،، ماهي غايبه لكن يسايرها ،،،، وهي مستشرِفه أقفت ،،، ولِيا لِفت ،،، تَعَقَّب غاربه |
بنتن لها وجهين ،،، و بْها قساوه
وجهين فيها عنف وايضا مشدي وجهن يرد اللي يروح ،،، بهداوه والوجه الاخر في طريقه، يودي |
..السلام عليكم..
رجلن سِمِيّه رجلن آخر مذمومٍ ما شاله محبك والآخر ما له بالمفاخر اليا عكسته ،،عند ربك |
يا ويش بنتن بإسمها حي مع حي
تشابكوا ،، مثل السيامي ،،، تواما اللي عن دارنا ،، ورى الحد وشوي جيره ،، وديره ،، من ديار النشاما انا ما قلت وشهي، إلاَّ ، على شي أنقل ،،، تحيات أهْلَها ،،، والسلاما .. |
عذراً تعلَّت في ظهَرها عيْطموس
أبطالها زيد ، وشرف ، وابو رهف أيام الطيبين ،، وانظاف النفوس كلّن بكامل طاقته ،،، عنده شغف أصغرهم اللي لا بناها ،،مايحوس يحطها ،، وهو له مقصود وهدف |
رجلن،، يسابق كل خيرن يجابي
وأظن مامن خير ،، يسبق مجيِّه ان جبت عكسه يا عزيز الجنابي يخفي على جرة خطانا،، خطيه |
انـا عنـدي لكـم لغـزٍ بيوتـه مـن ذهـب ونظـاف
بعَـد جَـت فكْرتـه ياهاجـس الأفـكـار سطّـرهـا علَـيْ طرحـه وبوهليـل عليـه الحـل والاِشـراف وعلـى العـرّاف حـلـه والأِجـابـه مــن فكايـرهـا ياوش خمسة خوات يقابلن خمسٍ لهن محراف بــدأ مفعولـهـن عـقْـب أربــع اِرجــالٍ تـقـدّرهـا وزاد الموقـف المحسـوم بنـتٍ تنهـي الميـقـاف بعّـد وقـتٍ مضـى مابـيـن ناظـرهـا وحاضـرهـا |
ويش الثلاثه اللي فالموقع اخوان
فــي مـوقـعٍ ماغيـرهـم ساكنيـنـه ماشفتهم بالعين ولاشافت أعيان غير اللـي متمكّـن شهَدْهـم بعينـه في عز وقفتهم علـى مـر الأزمـان ميقـافـهـم بـالـجـوف ومثبّتـيـنـه ثـلاثـةٍ مايختـلـف فيـهـم اثـنــان الاســم واحــد كـلـكـم عارفـيـنـه |
انشدك عن رجال يضعف ويهزل
ولْيا مضى له عام.. يرجع بِقوه ياطا ثلاث ويِكْرِم النَّزْل ويَجزِل و بهيبته لا مر....... قام يْتموّه ماهوب في مهْجر ومنئَآ ومعزل لو كان عمره.. قبل عصر النبوّه |
ياويش رجلن لاحذفت أوله صار
ضد المخاوف ،، بالديار وحماها وليا حذفت اثنين بنهايته ،، دار دارن يعين الله ،،، على ما بلاها هذا الذي في نصرةالدين مغوار ما همه الأخصام ،،، حزت لقاها |
ياويش رجلن،، له بناتن خفايف
تلاَوَحن ،، فوقه ثلاثن ،،، سِوِيَّا ولْهن برجلن غيرأبوهن وصايف إليا بدن ،،، يبدنّ ،،، مبدا الثريا لكن ابوهن بالثرى وانت شايف وسط النثايل ،، ما يِغَطا كِذياّ |
انشدك عن رجال ،، لاشلت عينه
ما بحت به ،،،، لمبيِّحين الكنيني حالن يحول بحال ،،، بيني وبينه مثل الحجاز اللي ثبت من سنيني لكن انا،، المقصود ما شفت شينه هو غايتي،، ومشاهد أحباب عيني |
فكره ،،، وصِغت لْها بالأبيات ،،، بيتين
مضرب مثل لأهل المثل ضمن الامثال بنتن ،،، بلا مشهات ،،، ما تقبل الزين ولا همها ،،، من زادها ،، فال وعقال مزاجها ،، من دون مشهاتها ،،، شين لدت ،، ملَدّ اللي مِعِيفِن ،، من الحال |
ياويش بنتن في آخر وقت
وقتن ،، يجي بآخره ، قفله لن جات في وقتها مافقت تاليك ،، قفله على ،، غفله وان كان يا صاحبي وِفِّقت طيبن على طيب ،، تحتفله |
رجلن ،، ما سايَر بالرضا، خاطرك
يِخلِف روابع ،،، عالمن ،،، تِشتط إليا خالفك الراي ،،،، ما شاطرك غيرك لوكنت أنت النشيط أنشط (( اللغز مثل شعبي )) |
يا ويش بنتٍٍ بيَّحت سر موضوع
وَعَلَّمت به قوم تشكي تعبها قومٍٍ على سير العمل وسط مشروع توقَّفوا بعد الشكوك بْسببها |
المثل باللغز ،،، عن رجلٍِ ،، بتوع
زامي النبنوب ،، في حد الطويل بنته اللي ،،، عن مشاهَدها منوع لو يِلِد العين ،، فيها ،،، مستحيل شابَهَت في ميْلها حدب الضلوع ما يشيل الهم ،، منها ،،، لو تميل |
ياويش رجلن،، طايلٍِ سبله
صعبٍِ عليْ وعندكم صعبي لا بد من رجلن ،، يناسب له شعبيِّته ،،، فيها مثل شعبي |
ويش رجلٍِ لانطقت إسمه، صحيح
آخره ،،، شبه أوله ،،،، وجه وقفا مير ،، كل حرفٍِ لِحاله ،،، مستريح وبين كل اِحروفه،، أَبعاد ، وجفا وحرفه اللي بأوْسط حروفه يطيح كلّ ماجيت ، أكتب إسمه ،، إختفا |
ويش رجلٍِ، لون بدرٍِ في تمامه
أسعد الأوقات ،، وقته ياحليله هيئته،، لاعارضك مثل الحمامه مير عمره،، لاقضى بالوقت ليله |
جميع الأوقات بتوقيت GMT. الساعة الآن 01:42 PM. |
Powered by vBulletin® Version 3.8.7
Copyright ©2000 - 2024, Jelsoft Enterprises Ltd.
جميع المواضيع والتعليقات على الأخبار والردود المطروحة لا تعبّر عن رأي ( منتديات قبيلة عتيبه ) بل تعبّر عن رأي كاتبها