الليل .... والدرب قدام!!!!!

[طلال الثعلي]

اللي في راسه حبا ماطحن:D

يكمل

معكم::::::



يامرحبا ترحيبةًتفرق خشوماً عن خشوم= اخشوم عزاً عزها وخشوم عزاً ذلًها
واللي يكمل فاللزوم يقوم في وقت اللزوم=واليا طلع نطلع لها واليا نزل ننزلًها

[صنيتان]

هلا اخوي طلال

انا توي جديد ومعليش ماقريت شروط المحاوره

وهل يبي يرد عليك أحد ام ان لي الفرصه لاتعلم معك ؟؟

[طلال الثعلي]

اولا: اخوي صنيتان كل عام وانت بخير

ثانيا: نعم يحق لك الرد والله يحييك

تحياتي...

[صنيتان]

وأنت بخير اخوي طلال

ولك الشكر



حيّيت يالثعلي هلا عدّ الكواكب والنجوم *** ياذخر قوم نعزهّا والعز مكتوبٍ لها

سجّ القدم ياصاحبي واحذر من كبار العلوم*** اللي تخيّل للعرب والناس تخطي دلّها

[طلال الثعلي]

يوما جمعنا معك يصنيتان يوم اعز يوم** واوصل سلامي يم ربعك وانت امانه قلها
الليله الليله نبا المعنى لحانية الرقوم**وامسح دموع اعيالها واحسن لنا واحسن لها

[صنيتان]

الله الله


وصل سلامك ياعميل الخير يانسل القروم ** خل المعاني عاليه وليا علت افطن لها



اباانصحك ياصاحبي حذرى وزرقات السهوم ** يمكن يصيبك مشكله ماينعرف وش حلّها

[طلال الثعلي]

التاجر اللي في يده سلعه وجاه اللي يسوم*اما تركها كلها والا شراها كلها
عينن تحب الكحل نكحلها وتذبحها الهموم*وان كان ماعندك حصانه يدك فالما بلها

[صنيتان]

الله الله


احدن تصعّطها بخشمه وأحد يلهمها لهوم ** واحدن قعد خلف العرب والكبد لامابلها

الفرس مايقدر لها ياصاحبي ياكود روم ** تعرف سوالفها وترطن مثل ماترطن لها

[طلال الثعلي]

ان كان تونس عافيه ترى العوافي ماتدوم*ياكم وكم كبدا مثل كبدك تموت ابغلها
حنا حضرنا للقسوم وقسمنا خير القسوم*وانته معك سبحه لكنك ماقدرت اتفلها

[صنيتان]

طار المحاني من قديم الوقت فالخظرا يحوم ** يعاين الصيده بعينه مار ماياصل لها


اليا بغانا الجن الازرق نحظره وانت مخدوم ** كم ديرتن ياصاحبي في القايله نحتلها

[طلال الثعلي]

طير المحاني بان فعله في مطير وفالبقوم*لاتظلم العربان والتاريج قد سجلها
واليوم ياصنيتان وقت فيه حاكم ومحكوم*الله يعز الشجره اللي ظللتك بظلها

[صنيتان]

اي والله ونعم يابن ثعلي والله يعز ابن سعود ودولتنا

سعدت باللعب أمامك وانت شاعر كبير في غنى عن شهادتي وأتمنى لك

التوفيق واعذرني في القصور فأنا مبتدىء مثل ماقلت لك

والى محاورات قادمه إن شاءالله

أنا أشهد أنّك يالولد صادق وتمشي بالسلوم ** قبيلتك ياصاحبي في ذالبلد مامثلها

اقول نعم بهالقبيله ماتجي فيها العلوم ** نرجي من الله مزنة(ن) على النجيل يعلّها

[طلال الثعلي]

اخوي صنيتان

والنعم فيك انته..

ماقصرت ومشكور على هالاطراء

والله يعطيك العافيه

وانا والله ماعاد اشوف من النوم

والمقبلات اطيب ان شاء الله

خلك قريب

انت اللعب معك ينومس

سلاااااااااام

[النـايــــــف]

صح لسانك يا طلال الثعلي ويا صنيتان


وبيض الله وجيهكم


وهذا اللي نبيه في الموقع