الشاعر فرح بن هلال العضياني العتيبي

[ابـو سعـود]

السلام عليكم ورحمة الله وبركاته

يسعدني أن أعود إليكم مجددا والمشاركه بموضوع عن الشاعر

المبدع فرح بن هلال العضياني العتيبي .......

http://www.otaiby.com/special/farah.jpg



وفي هذا الموضوع سنستعرض بعض قصائده واللتي توفرت لدي

وسأحاول أن أوافيكم بقصائد أخرى لاحقا...





هذه القصيده في الامير خالد بن مشعل بن سعود بن عبدالعزيز



يامير لك مني سلام وتحيات = والك احترامي كل ما حل طاريك

يامير جعل أعيادكم كل الأوقات = ونزفلك فيها تهاني وتبريك

يامير شوفتكم علينا مسرات = الك الولاء منا وبالود نغليك

ياسيدي فيك المعاني الجزيلات = والك المشاعر بأصدق القول تنبيك

ياسيدي طيبك على مر الأوقات = تشهد بفعل الخير مدات أياديك

حيثك يابو منصور شيخ المهمات = دايم على درب المعزة مساعيك

يثبتلك التاريخ صولة وجولات = المجد يشهدلك وبالطيب يعطيك

طيب كسبته غصب ما هوب بيعات = والك الفخر غصب على اللي معاديك

خالد ولد مشعل زبون الصعيبات = وسعود جده معتقين المماليك

آل السعود الهم مكانة وهيبات = والهم مع التاريخ حنكة وتكتيك

وقفاتهم مثل الجبال المنيفات = وفزعاتهم وقت البلاوي تنجيك

يا جعلهم فالخلد حيين وأموات = عيال من لم الشمل عقب تفكيك

شبه الجزيرة وحده وأمن الذات = يالله تغفره له نسالك ونرجيك

وارجع واقول بسيدي كل ما فات = وهذي هديه من خوي مخاويك

ويامير مني لك سلام وتحيات = والك احترامي كل ما حل طاريك








هذه القصيده ايضا في صاحب السمو الملكي

الأمير خالد بن مشعل بن سعود بن عبدالعزيز عند عودته من الخارج



هلا يامرحبا باللي حضر وألفين ترحيبه ** تراحيبٍ تزيد ومن حسبها تتعب الحسّاب

تراحيبٍ تنصّى راعي الوقفات والهيبه ** بعد غيبه حضر واليوم عنا الشر كلّه غاب

أمير في العلوم الطيبه موفٍ مواجيبه ** وأمير دون من ينصاه ماقالوا يصك الباب

وأميرٍ حر في الشدّات عطبات مضاريبه ** وامير في الكرم واللين مازولٍ لفاه وخاب

عسى الدنيا تطيب لسيّدي والطيب من طيبه ** يطيب بطيبه اللي من زمانه جاير ومنصاب

عليه إليا اشتكى جور الزمن يرسل مكاتيبه ** يقدم ماجراله من زمانه للامير كتاب

ابومنصور زبن اللي يبا تقضى مطاليبه ** وابومنصور فزعة من يبا الفزعه وحظه طاب

انا في سيدي ماأسمع كلام الشك والريبه ** وأنا في سيدي خالد ولد مشعل ازيد اعجاب

فعوله طيبه والطيب بين الناس تحكيبه ** يقولون العرب ماينبني بيتٍ بليا أطناب

وبيت معزبي تسبح بوسط العز أطانيبه ** أنا اقوله وغيري من يقوله وانشدوا ياأصحاب

ترى قولٍ بليّا اثبات عيب الرجل يبديبه ** وانا قبل اتكلم لازم احسب للكلام حساب

كلامٍ يوم اجيبه يثبت الواقع تجاريبه ** ضمانه في بيانه مايبا شاهد ولاكتّاب

وترى عقبك رجال تحتمي الميقاف والغيبه ** تسد الك اللزوم اليا بدالك لازمٍ غصّاب

رسمت النا الطريق اللي بعد غيبتك نمشيبه ** وحنا مع طريقك ياولد مشعل لنا مضراب

وجودك مثل نور في الظلام الناس تسريبه ** وعلى شوفك حمدنا اللي بفضله يحضر الغيّاب

وهلا يامرحبا ياأميرنا وألفين ترحيبه ** تراحيبٍ تزيد ومن حسبها تتعب الحسّاب

مشاعر شاعرٍ صادق يعبّر عن معازيبه ** وعسى من سيدي خالد ولد مشعل تنال إعجاب


========





وهذه القصيده أرسلها إلى ابن عمه جميل بن حوال عندما كان

هناك خلاف بسيط بينهم أدّى الى الانقطاع بينهم مدّه في السابق

وارسل له هذه القصيده ...

أما الان عادت المياه إلى مجاريها ...




ياجميل القرم طوّلت المغيبه = وأنت من عادتك في وصل القرابه
ياعسى ماباس وعلومٍ غريبه = تجعل الرجال يبطي في غيابه
خابرك حرٍّ بدا راس النجيبه = تكتسي بالطيب وتفصل ثيابه
إن عوالك ذيب تقنب مع قنيبه = وان سريت الليل خاوتك الذيابه
أحتزم بك فالمواقيف الصعيبه = وافتخر بك بين روق وفي شبابه
ماعليك أرضى تخاليف وغليبه = ولاعليك أرضى الزمان يحد نابه
الزمان الله يكافينا لهيبه = والقدر ماقدّر المعبود جابه
القدر عند الولي مكتوب غيبه = ماعرفنا ويش مضمون الكتابه
كل واحد مايجيه الاّ نصيبه = لو يجمّع له حزابات وعصابه
والفتى يرزق ورزقه ساس طيبه = قسمة الارزاق ماصارت نهابه
ياجميل العلم دوّر من يجيبه = وانتبه للعلم وارسل لي جوابه
السيوف اللي مضاربها عطيبه = كيف تدقمها عواصيف السحابه
أحسبن السيف مايخط الضريبه = وأثر سيف القوم عيبه من نصابه
من مشى درب الشجاعه مانعيبه = ومن يعرف الدرب ماظن يغوابه
في السلوم الماضيه حكمه عجيبه = أكرم الضيفان لو كانوا طلابه
ياجميل الذيب ماياكل قريبه = لو بوجهه تقفل الايام بابه
وأنت عقب إنك تزعّمت الكتيبه = مشها قدّام والطيب تهقابه
الزعامه ودها غصب وغصيبه = ماتبى اللي ينكسر فأول حرابه
دوّر مع القوم يالصاحب صحيبه = واعرف أنّا في لزومك مانهابه
وآخر المشوار قولٍ نبتديبه = بأحسن القيفان ولحون الربابه
أحتزمبك فالمواقيف الصعيبه = وأفتخر بك بين روق وفي شبابه



===============


وهذه قصيده غزليه




يا عاذلين القلب لا تعذلونه = ما ينعذل قلبٍ عشق كل مزيون
قلبٍ عشق غروٍ وساعٍ عيونه = أمسى بحبه وأصبح اليوم مفتون
غروٍ صغير السن صفّت سنونه = صفّت جواهر ماس في عقد مكنون
لا سلهمت عينه تبيّن فنونه = وليا نظر كنّي من الرمح مطعون
وليا ضحك قلبي تزايد شجونه = من ضحكته مبغى هل الحسد يدرون
العود عود الموز تنعم غصونه = ريّانةٍ بالعمر ما هيب بالون
رد السلام وقلت ما تعرفونه = قالوا نعرفه مير لو قلت وشلون !
قلت اسمعوني هيه ياللي تجونه = قولو ترى ( أبوفيصل) اليوم مجنون
في حبها والله تزايد جنونه = حب الغزال اللي عن الشين مصيون
زوروه في داره وزورو ضعونه = ثم اطلبولي غض الأنهاد تكفون
ما همكم بالمال لو تازنونه = نعطيه لو يطلب ثمانين مليون
روحي ومالي كلّها سوق دونه = غروٍ سلب قلبي وأنا فيه مرهون
قربه علاجلّي وبعده مهونه = حيثه ادواي وداي وأفراح وحزون
ما شفت في وصفه ولا فيه لونه = مير ارحموني يا هله لا تعيّون
وان كان عيّيتوا ترى تظلمونه = والظلم ظلمه وأنتم اللي تعرفون
أنتم هل الطالات وأهل المعونه = وأنتم على حاض المنيّات تردون
وأنتم ذرى العذرى بستر ومصونه = وأنتم رجالٍ فالمواقيف تثنون
مطلوبنا جاكم ولا ترخصونه = يا جعلكم يوم الملاقا تفوزون


==========




والسلام عليكم

[ابـو سعـود]

وقريبا سأحاول أن أوافيكم بالمزيد من قصائد الشاعر فرح بن هلال

وتحياتي مره اخرى لزوار شبكة عتيبه

[طلال الثعلي]

يابو سعود


لاهنت يالقرم


وصح لسان فرح


عز الله انه شاعر


وقصيده جزل الله يعطيه العافيه



تحياتي,,,

[ابـو سعـود]

الله لايهينك يابن ثعلي ... وشاكر لك مرورك

:)

[النـايــــــف]

لا هنت يا ابو سعود


وبيض الله وجهك


على هذا الإختيار طال عمرك


وصح لسان الشاعر فرح

[ابـو سعـود]

الله لايهينك اخوي النايف

ونبي منك قصائد للشاعر معجب بن فرج المغيري ;)

ودمتم

[ابـو سعـود]

تمت اضافة الصوره للموضوع :cool:

[ابـو سعـود]

وهذه القصيده للشاعر فرح عندما ذهبت معه لجاكرتا قبل اربع سنوات

ولم نرى هذه الدوله كما سمعنا عنها انها دوله اسلاميه ملتزمه

وايضا ذكر ابو فيصل مدى اشتياقه لدولته ksa :)



قم يا محمد وأكّـد الحجز بالحال =نبغى السعودية ديار الجدودي
ما عاد إلي في ديرة الشرق منزال= سلم العجم ما هوب سلم السعودي
قضيت عشر أيام ما ارتاح لي بال= لا عاد يومٍ فيه طفت الحدودي
تركت دار العم والجد والخال= دارٍ بها الطيـّـب يبين ويزودي
ونزلت في دارٍ على ألوان وأشكال = مدري من الإسلام ولا يهودي
عيني بها شافت خرافات وأهوال = لعل ما شافت لها ما يعودي
في وسط جاكرتا بلا ثوب وعقال =أمشي وكنّـي حابستني قيودي
قلت السلام وقالوا الناس وش قال = قلت أتـّبع سلمي ونرقى سنودي
قالوا تكيف قلت للكيف فنجال =كيفٍ على هيلٍ وبنٍ وعودي
ما هوب كيف مغنية كل موال=اللي تجيب الهرج بيضن وسودي
قالوا هبيل وقلت صاحي ورجال= أحرص على ديني ولجله نذودي
قالوا تمتع وأنعش الحال بالمال = قلت اسمحوا لي ما نبيح السدودي
حنا السعودية على مر الأجيال = طبعٍ لأهلنا حافظين العهودي
وقم يا محمد وأكد الحجز بالحال =نبغى السعودية ودار السعودي

[ابـو سعـود]

وهذه القصيده تتحدث عن نفسها




يقول من نفسه تحثه على الطيب =وتنهاه عن درب الردى والفسادي
نفسٍ عزيزه ما مشت مسلك العيب= تتبع طريق اهل السعد والرشادي
ولا تتبع اللي يعشقون الخراعيب = صحيح لو الزين غاية مرادي
لا شك زين البر والصيد والجيب= والدار ريف وفي نهار البرادي
والنار والدله وربع شواريب = وأيام بيضن ما غشاها السوادي
يا ليت لو أطلب تجي بالمطاليب = لطلب ليال الناس دايم عيادي
لا فيه لا فرقا ولا به مصاويب = ولا فيه يومن فيه لبس الحدادي
ولا فيه لا غشن ولا فيه تخريب = ولا فيه بين الناس يحصل معادي
لا شك تجري بأمر من يعلم الغيب = الواحد المعبود رب العبادي

[ابـو سعـود]

http://www.otaiby.com/special/gift.jpg





خيّلت سحب المشاعر وأمطرت جزل القصيد = والقصايد من معانيها تشع أنوارها
كل ماحضّرت بيت قامت هجوسي تزيد = فاضت بحور المشاعر وأزهرت بأزهارها
كل بيتٍ جاب أخوه وقالّه هل من مزيد = وقمت أدوّر فالبيوت الطيّبه واختارها
يوم أجيب البيت مصيوغ كما العقد الفريد = زاهيٍ لبّة هنوفٍ يوم طار خمارها
العياد اثنين واليومه لنا عيدٍ جديد = ترقية راع الجزايل عقب جات أخبارها
احمد الله واشكره والحمد للوالي يزيد = يوم يعطون الرجال أهل الوفاء مقدارها
ياطويل العمر مبروك وعسى عمرك مديد = بالسعادة والقيادة وأنت عز إشعارها
انته إلها ياطويل العمر ماغيرك عميد = يوم غيرك نزّلوه وراح يطلب غارها
قالوا اتركها تراها حظها حظٍّ سعيد = كبّت سنين الظلام وتو شبت نارها
كابدت بضع سنوات مثل أسيرٍ فيه قيد = لايسير ولايطير وشوشته باغبارها
كل يوم وكل ليله ترتجي رب العبيد = ومن يصدقني لو أنّي قلت اشوف اعبارها
والله اللي يلتجيبه مايخيب امر وكيد = سجلوها وارسلوها للصحف واخبارها
طيبة للطيبين وفالها فالٍ رشيد = يوم جابلها الامير وخصها واختارها
نعم ياخالد ولد مشعل ومنكم نستفيد = فالاداره بالصداره والجداره كارها
صيرميٍ من صيارم باسها باسٍ شديد = يستجير بها المجير ودوم ينعم جارها
ليتني يوم اتمنى مثلكم عندي وليد = كان مااحسب للدعاوي وردها ومصدارها
واحمد الله واشكره والحمد للوالي يزيد = يوم يعطون الرجال أهل الوفاء مقدارها