الهموم الثقيله ..

[خالد السبيعي]

عزي لقلبٍ فيه هم وغرابيل
يمسي ويصبح بالهموم الثقيله

تلعب به الأفكار بالحط والشيل
هاذي يوديها وهاذي تجيله

بنات فكرٍ جوّدن له محابيل
وحده تجيب الهم وأخرى تكيله

همٍ لجا فالقلب جاله مداهيل
أسرف بحالي والمواري دليله

لظلم سواد الليل شفت البهاذيل
أركى على كبدي سواة المليله

أونس بقلبي مثل فوح المعاميل
ليا إنقضى فوحٍ تجدّد مثيله

راح وترك لي صورة الحزن والليل
حزنٍ تشرّبني ويا طول ليله

في غيبته شفت العنا والبهاذيل
ومن غيبته هالقلب واعزتيله

ليت العمر يشرى وأسوق المحاصيل
والله لسوق النفس دونه بديله

مير القدر يا قلب ما فيه تبديل
وأنشهد إنه صدق ما فيه حيله

كم لايع العربان جيلٍ بأثر جيل
وكم شيخ قومٍ حوّله من طويله

وكم شال في كمه نوادر مشاكيل
زحول الرجال اللي تهز القبيله

وأنا سقاني من دلاله فناجيل
خذني عميله لو ماني عميله

ميت مع الحيين حي المعاليل
وعزي لمن عايش ونفسه عليله

منقوول

الشاعر / خالد بن عبدالله السبيعي

[شهامه]

الله الله ..
صح لسسآن شآعرهآ وتسلم يمنى نآقلهآ ..
.
.
آحتـرآمـى

[وجودك يكفي]

صح لسان الشاعر خالد السبيعي وبيض الله وجهك على النقل

[زهره اللافندر]

اختيار جميل يدل على ذوق رفيع
كل الشكر اخي خالد
سلمت يمينك

[وجدان شمر]

صح لسانك
ومشكور ننتظر جديدك

[إبن ثعلي]

اختيار موفق ياياخالد السبيعي وصح السان شاعر القصيدة

[صمت السنين]

ليت العمر يشرى وأسوق المحاصيل
والله لسوق النفس دونه بديله

مير القدر يا قلب ما فيه تبديل
وأنشهد إنه صدق ما فيه حيله

صح لسانك يالسبيعي ع هذه الابيات الجميله

[النآيفة]

صح لسآن الشآعر خالد السبيعي ,,

ولآهان ناقل القصيــدة,,


أبيآت عــذبة ,,وجميلة..