لغز..شديد باس وينطلق مثل السهم(محلول)من خليجي صح لسانه وبيض الله وجهه

[وجودك يكفي]

السلام عليكم


اليكم هذا الإنتاج الجديد وأرجوا أن يحوز على رضاكم:




ياويش رجالٍ عدو(ن)لسروق = شديد باس وينطلق مثل السهم
جماد مايشعر ولايملك عروق = بعد المهمه صار من ضمن العدم
مشهود في حد السماء والحل فوق = مكتوب فالمصحف ومخطوط بقلم



لتوضيح تم إضافة البيت الأخير ‏

[{ أبوفيصل }]

صح لسانك
الله يعطيك ألف عافيه
تسلم لنا على هذا العطاء المستمِر والأِمدادالمنهمِر
والتواصل المعتَبَر بكل ماتمتعنا به من جديد وشيق
ومع هذا اللغز الرائع وش تقول في مايكروفست سكيورتي
او برنامج الحماية في مجال القرصنه وسرقة البيانات
ان كان له علاقه في جهاز الحاسوب

[وجودك يكفي]

صح بدنك ياخليجي والله يعافيك يالغالي


الرمعه مالك لوا يالعطاوي

[نايف تراحيب]

ممكن يكون السيف


< - - - يقول يعنني ابي احل اللغز : )


لاهنت يالقرم


/


،

[وجودك يكفي]

حياك الله يابو تراحيب وبارك الله في اللغز إللي جابك ونورت قسم الألغاز يالغالي

اما بخصوص الرمعه مالك لوا يالقرم

[{ أبوفيصل }]

جهاز الأِنذار ،، أو

دعاءالمظلوم

[وجودك يكفي]

مالك لوا يالعطاوي

[{ أبوفيصل }]

كلّت محافيري ياوجودك عطنا شي تقريبي
هل السروق يتمثل بوصفه انسان حقيقي وعدوه شي ملموس
وهذي رمعات اخرى وش رايك بالكمين او الحس الأمني

[وجودك يكفي]

مالك لوا ياخليجي

بدري على التوضيح وانا اخوك مع العلم إن اللغز وصفه واضح ولايحتاج توضيح

زين إنه عصلق معك فحط ياخليجي هههههههههههههههههه

[{ أبوفيصل }]

هههههههه

الظاهر بفحط واخمّس واسحب جلنطات
وانا ماعرفت عدو السروق والسروق ،،
وشتقول بالتشهير أو ،، الندم وتأنيب الضمير

[الأدميرال]

السلام عليكم ورحمة الله وبركاته

البصمه

[وجودك يكفي]

هههههههه

الظاهر بفحط واخمّس واسحب جلنطات
وانا ماعرفت عدو السروق والسروق ،،
وشتقول بالتشهير أو ،، الندم وتأنيب الضمير
مالك لوا ياخليجي

[وجودك يكفي]

السلام عليكم ورحمة الله وبركاته

البصمه


عليكم السلام ورحمة الله وبركاته

هلابك يالادميرال وحياك الله ومالك لوا بالرمعه

[الأدميرال]

اللغم ؟؟

[وجودك يكفي]

مالك لوا باللغم

[الأدميرال]

ويش رجالٍ عدو(ن)لسروق
شديد باس وينطلق مثل السهم
جمـاد مايشـعـر ولايمـلـك عــروق
بعد المهمه صار من ضمـن العـدم

جاري التفكير

[وجودك يكفي]

بنتظارك يالادميرال وفالك التوفيق

[{ أبوفيصل }]

المشعاب


هههههههههههه

[{ أبوفيصل }]

وش رايك في برنامج الرقيب او مايسمى بحاسوب الرقيب اللي
يقوم بعرض الصور وتسجيل الحدث تلقائي بالكمبيوتر في غيابك


كذلك وش تقول ياوجودك في الكاشف الحراري اللي يتم به اكتشاف
المتسلل بسرعه هائله من خلال حرارة جسمه .

أخيراً ( المخيول ) اللي يركزونه البدو قدّام حلالهم هههه

[وجودك يكفي]

ههههههههههههههه مالك لوا يالعطاوي

[الأدميرال]

وش رايك ياولد ثابت بالرمعه ذي

السيف

[وجودك يكفي]

مالك لوا يالادميرال

[الجـوهـره]

يمكن تكون الاجهزه الي في المجمعات تكشف السارق

[الأدميرال]

والله لغزك هذا مجنون ياوجودك احب الصعب

وش رايك فالزرفيله حقت الباب وقفلها

[مهـرة مـطير]

يمكن رصاص المسدس

[وجودك يكفي]

يمكن تكون الاجهزه الي في المجمعات تكشف السارق

مالك لوا يالجوهره

[وجودك يكفي]

والله لغزك هذا مجنون ياوجودك احب الصعب

وش رايك فالزرفيله حقت الباب وقفلها

مالك لوا يالادميرال

[وجودك يكفي]

يمكن رصاص المسدس

هلابك وحياك الله يامهرة مطير

مالك لوا في رصاص المسدس يامهره<<رصاص هههههههه حرف الصاد ذكرني موضوع كلمه بدون نقاط

[{ أبوفيصل }]

بما انه جماد مايشعر اعتقد بما لاشك فيه بتاتاّ البتّه :18:

(( الصولجان )) اللي يُعطف طرفه ويساط به
شديد وسريع السياط اذا انضرب به السروق

:)

[وجودك يكفي]

مالك لوا ياخليجي بالصولجان

[{ أبوفيصل }]

اجل دام ماهو بالصولجان

لييه مايكون صرير الباب أو صفير الشبابيك

:)

[وجودك يكفي]

شديد باس ياخليجي

مالك لوا بالصفير وبالصرير

[{ أبوفيصل }]

اذاً هو طال عمرك ، حد السرقه ، قطع اليد من حد المفصل
والجزاء الرادع عدو السارق ( الحد )

[ابوخديجة]

اللغز جدا محير وهذة مشاركة متواضعة
اقول ** الصواعق **

[وجودك يكفي]

اذاً هو طال عمرك ، حد السرقه ، قطع اليد من حد المفصل
والجزاء الرادع عدو السارق ( الحد )


مامالك لوا ياخليجي

[وجودك يكفي]

اللغز جدا محير وهذة مشاركة متواضعة
اقول ** الصواعق **

حياك الله يابوخديجه
مالك لوا بالصواعق

[{ أبوفيصل }]

ههههه دامك قلت
ما مالك لوا وكررت الما

الظاهر الظاهر قريّب الحروه

(الصعق الكهربائي)

ياوجودك كل شيٍ فيه صعق ترى انا وابوخديجه خشرا فيه
هو من بدا بالصواعق هههه

[وجودك يكفي]

هههههههه الما الزايده جت خطأ مطبعي


مالك لوا بالصعق الكهربائي ياخليجي

[مهـرة مـطير]

هلابك وحياك الله يامهرة مطير

مالك لوا في رصاص المسدس يامهره<<رصاص حرف الصاد هههههههه

الله يحييك ياوجودك يكفي

هههههههه حتى حرف الصاد لاحقنا هنيه

وضح شوي

[الأدميرال]

الحكم عليه او القلم

[وجودك يكفي]

مالك لوا يالادميرال

ههههههه أشوفكم بعد ردي على الأخت مهرة مطير ركزتوا على حرف الصاد وتعليقي على حرف الصاد ماله علاقه بالجواب
ضحكت من حرف الصاد لأن الأخت مهرة مطير متعقده من حرف الصاد في موضوع كلمه بدون نقاط

[مهـرة مـطير]

طيب وين التوضيح يا اخوي وجودك

بس لحظه لا توضح الا وانا متواجده

[الأدميرال]

اتعبني لغزك ياوجودك

ينطلق مثل السهم ؟؟؟؟؟ هذالو بس تنفك شفرته انتهى موضوعه

[وجودك يكفي]

طيب وين التوضيح يا اخوي وجودك

بس لحظه لا توضح الا وانا متواجده

اللغز يسأل عن شي مذكر وعدو لسارق وبأسه شديد وينطلق بسرعه هائله وهو عبارة عن جماد وإذا أنتهت مهمته يصير معدوم وماله وجود

[وجودك يكفي]

اتعبني لغزك ياوجودك

ينطلق مثل السهم ؟؟؟؟؟ هذالو بس تنفك شفرته انتهى موضوعه

سلامة تفكيرك يالذيب وفالك التوفيق

[وجودك يكفي]

ياويش رجالٍ عدو(ن)لسروق = شديد باس وينطلق مثل السهم
جماد مايشعر ولايملك عروق = بعد المهمه صار من ضمن العدم
مشهود في حد السماء والحل فوق = مكتوب فالمصحف ومخطوط بقلم



لتوضيح تم إضافة البيت الأخير ‏

[{ أبوفيصل }]

ايييه الله يبيض وجهك يابييه

كذا نمخمخ به شوي

خروج وجاي ياوجودك

[وجودك يكفي]

وجهك ابيض وانا اخوك وبإنتظارك

[{ أبوفيصل }]

الحل بعد هذه الأضافه المبروكه أتضح جليّاً بأنه الشهاب اللي يهوي على كل شيطان مسترق للسمع
قال ، صلى الله عليه وسلم : فيسمعها مسترق السمع المسترق هو: الذي يأخذ الشيء بسرعة وخفية ،
ومنه سمي السارق الذي يأخذ المال خفية وبسرعة حيث لا يراه أحد ،
ومسترق السمع هو الشيطان الذي يخطف الكلمة من الوحي الذي تتكلم به الملائكة في السماء
قال تعالى ( الاّ من استرق السمْعَ فأتبعَه شهابٌ مبين ). سورة الحجر الآية 18

[وجودك يكفي]

صح لسانك ياخليجي وبيض الله وجهك يالذيب

الجواب هو الشهاب الثاقب

::: شرح لتوضيح والفائدة :::

ياويش رجال عدو(ن)لسروق<<قال تعالى : (( إلا من استرق السمع فأتبعه شهاب مبين )) الحجر 18
وقال تعالى : (( إلا من خطف الخطفة فأتبعه شهاب ثاقب )) الصافات 10
شديد باس..وينطلق مثل السهم<< شديد باس لأنه يحرس السماء ويحرق الشياطين قال تعالى في سورة الجن(( وأنا لمسنا السماء فوجدناها ملئت حرسا شديدا وشهبا ¤ وأنا كنا نقعد منها مقاعد للسمع فمن يستمع الأن يجد له شهابا رصدا)) آيه ‏8،9 وينطلق مثل السهمكما هو واضحه في سرعته عندما يلمع ويضيئ في السماء
جماد مايشعر ولايملك عروق<< الشهاب عباره عن نيزك وهو حجر كبير الحجم
بعد المهمه صار من ضمن العدم<< مهمة الشهاب احراق الشيطان الذي يسترق السمع و عند اختراق الشهاب للغلاف الجوي يحترق ويتفتت ويذوب وذلك بسبب سرعته الهائله التي تزيد حرارة الهواء من حوله وتكون هذه الحرارة كافيه على إحراقه... والمعنى أنه يحرق الشيطان ومن ثم يذوب وينعدم

الصورة الأولى: صورة الشهاب وهو يسبح في الفضاء الخارجي
http://www.dohaup.com/up/2010-12-30/admin1785910771.jpg (http://www.dohaup.com/)


الصورة الثانيه: صورة الشهاب عند اختراقه للغلاف الجوي المحيط بالأرض ولهذا سمي بالثاقب لأنه يثقب ويخرق الغلاف الجوي ولكنه يحترق وينعدم قبل وصوله للأرض كما هو واضح في الصوره
http://www.dohaup.com/up/2010-12-30/admin1788822886.jpg (http://www.dohaup.com/)

مشهود في حد السماء والحل فوق<< المعنى واضح
مكتوب فالمصحف ومخطوط بقلم<< اسم الشهاب مكتوب في المصحف الشريف ‏



أشكر جميع من شارك والله يعطيكم العافية

[الأدميرال]

ياسلااام عليك ياخليجي حليته يالذيب

وجودك ماشالله عليك وعلى افكارك بصراحه اللغز كان صعب
ولاهنت

[{ أبوفيصل }]

صح بدنك ولسانك ياوجودك عزالله لغز تمويهي رائع
لنا ايام ندور فالأرض وهو في حد السماء

يسلم فكرك ياولد ثابت فانت دوماً رائع ،، وتسلم يالأدميرال على مشاركاتك المميزه
تحيتي

[مهـرة مـطير]

والله كان التفكير بعيد عن الحل

بس ماشاء الله عليه خليجي جاب الحل

يعطيك العافيه ياوجودك يكفي على هاللغز

وبانتظار ألغازك المميزه والمحيره

[وجودك يكفي]

الادميرال ،، خليجي ،، مهرة مطير

الله يعطيكم العافيه ولآهنتوا