بعد صحبة الرجال حرمة تصاحبها ،، محلول من وجودك يكفي صح لسانه

[سعود بن فيصل]

السلام عليكم

وطيب الله حظكم .. لغز يقول راعيه

تحيرت باسمه بنت ولا اسمها رجال ............. لكنه تقوم بمهنة تعــذبهـــــــــــــــا
تغير عليها الوقت مع طيبين الفــال ............... بعد صحبة الرجال حرمة تصاحبها

[وجودك يكفي]

السلام عليكم

وطيب الله حظكم .. لغز يقول راعيه

تحيرت باسمه بنت ولا اسمها رجال ............. لكنه تقوم بمهنة تعــذبهـــــــــــــــا
تغير عليها الوقت مع طيبين الفــال ............... بعد صحبة الرجال حرمة تصاحبها

عليكم السلام

وبيض الله وجهك يابوفيصل على النقل والنشاط المميز
وبصراحه جميع الألغاز المنقوله التي تطرح في القسم يتم البحث عنها في قوقل وإذا كانت محلوله ماتثبت وأنت ماشاء الله عليك كل الالغاز إللي تطرحها مانلقاها في قوقل ماعدا اللغز هذا لقيته في قوقل وحاولت اشوف موضوعه وقالوا لازم تسجل ونرسلك كود وسالفه طويله عريضه وبعد سجلت وشفت الموضوع طلع اللغز غير محلول ومافيه غير رمعه وحده وكانت عام 2008م وبعدها جيت أثبته واشوف له رمعه تناسبه


وش تقول في القهوة واسمها رجال إذا قلنا البن
كانت مع المحماس وهالوقت صارت مع الطاحونه الصفراء مدري البرتقاليه

[فهيد مقعد الرويس]

صح لسان راع الغز

انا مابحثت في قوقل ياولد ثابت ولكن اللغز عجز البيت الاول فيه ماكتمل يجوز مانقل صح

واما عن الرمعه انا اقول اذا كانت البن وهو حل وارد وبدل ماكان الرجل هو اللي يديره الان اللي تتديره مره

واما الطاحونه مالها علاقه الا اذا كانت بديله لاالنجر والمحماس مايقضي الغرض في الطحن

والاقرب انها بدل مخاوات النجر خاوت الطاحونه

ولك ولصاحب الغز اطيب تحيه

[وجودك يكفي]

صدقت يابومقعد

إذا كان المقصود بالحرمه الطاحونة فالمحماس ماله علاقة لأن النجر هو إللي استبدلوه بالطاحونه

ولكن أنا قبل أرمع دوخني هاللغز ولحس مخي ومعاد اجمع

[سعود بن فيصل]

هلابك ياولد ثابت

شكراً على الإطراء .. وماتميزنا الا بوجود المشجعين شرواك

وإن ماحرصنا على التجديد والتميز بمتندى قبيلة عتيبه .. وش له مسجلين؟

عموماً .. بالنسبه للرمعة

انت تقول البن او القهوة

وانا اقول رمعة طيبه وتركب مع الابيات .. لكن والله ياخوك عندي حل غير اللي تقول

والا انت على حده ... لاعدمتك

[سعود بن فيصل]

مرحبا ومسهلا يابو مقعد

بالنسبه للأبيات فهي منقولة من صاحبها حرفياً .. وملاحظه في محلها
لكن نطقها يعتمد على التنوين والتشكيل

شكرا على المداخلة ياعزيزي

[{ أبوفيصل }]

لاهنت ياسعود على اللغز الكايف واقول صح لسان راعيه
بالرغم من عدم اكمال عجز البيت الأّ أنه لايعيب جمال اللغز وفكرته

جاااري التفكير

[شيخ الشيوخـ]

لاهنت على النقل ياسعود بن فيصل وصح لسانك صاحب اللغز

ولنا عودة بعد التفكير ,,,

[مرزوق فلاح]

صح لسانك يا خوي سعود على طرح الغز الجميل ورمعتي با الكفاله والسواقه

[وجودك يكفي]

وش تقول يابوفيصل في المحماس وفيه ناس يسمونه مقلاه
وكان يستخدمه الرجال في صنع القهوه والآن تستخدمه المرأه

[سعود بن فيصل]

^

هذا الحل الصحيح

كفوووووو كفوووو كفوووو


والف شكر لمن مر هنا شرفتوني في متصفحي

لاعدمتكم يالغوالي

[وجودك يكفي]

ماعليك زود يابوفيصل وبيض الله وجهك وانا اخوك ولآ عدمنا تواجدك يالغالي

احترامي

[{ أبوفيصل }]

صح لسانك ياوجودك ريحتنا يارجال
جاي طاير ابا ارمع اللغز ومبسوط تقول اني جايكم بالغنيمه هههه

( الزند والصوان من اول يشبون به النار ومع تطور الوسايل صارت قدّاحه )
ومن كثر ماتقدح تعذبت بشبّة النار

وفالأخير طلع المحماس والمقلاه ههه وينه لايذن عنا

صح لسانكم جميعاً

[وجودك يكفي]

صح بدنك يالعطاوي ولآهنت يالغالي