ودّوه دكتور المحاني ولاطاب !!!

[ابـو سعـود]

السلام عليكم

يقول منصور الدجيما الروقي






البارحه عدّيت في راس مرقاب = قعدت به لين النجوم أكهبنّي

قعدت أخيل النجم والدمع سكّاب = لين الجفون من السهر حمّرني

وليا نشدني واحدٍ ويش الاسباب = قلت السبب غروٍ صوابه مكنّي

غروٍ صغير مستذيرٍ ولعّاب = لعب بقلبي ثم راح ونطلني

واونّتي ونّة قريصٍ كله داب = كله صلاة الصبح وأصبح يونّي

ودّوه دكتور المحاني ولاطاب = والقلب من دكتورهم مرجهنّي

تكفى يابو متعب ترى القلب منصاب = صابه دقاق العود ومافيه ظّي

مير ارحموني ياعريبين الأنساب = عطوني اللّي بالمحبّه قتلني

حبّ الفضيحه حطني وسط الانشاب = مالي جدا كود البكا والتمنّي

أبكي طوال الليل وأكظم على الناب = وادموع عيني بالخدود اجرحنّي

أنا أشهد أن الحب ياناس جذّاب = قبلي قتن جدّي وعقبه قتنّي

ومن لامني في الحب عساه ينصاب = يبلى ويصبح بالدميّ متجنّي

وإن جوّزوني تبت من عرض من تاب = وأبقا سعيد وفي الحياه متهنّي

[ابـو سعـود]

وهذا رد الشاعر حسن بن مقيبل الدجيما الثعلي


واعذورني اذا سقطت بعض الابيات لان القصيده لم تصلني كامله




أوصل جوابٍ يم منصور بكتاب = وقلّه جوابك في كتابك وصلني

وإن كان مشتاقٍ لتلعات الارقاب = ضم ّ المراجل والمراجل تدنّي

والود قبلك بذّ ابو زيد وذياب = وعقب الدجيما مات وهوه يغني

وكثر التمني مادركه كل نصاب = ولاينفع المخلوق كثر التمني

ماخاب من يكظم على الغيظ ماخاب = وبعض العلوم ابدايهنّه يعنّي

إن كان يامنصور مشفق وطلاّب = ماني مخلّي واحدٍ صار منّي

أبذل له المجهود في كل الاطلاب = وليا زبنّي دون من يزتبني

وان شفت في الماء زول ماني بشرّاب = ماني بشرّاب لمن ماه يهنّي

أعنز على مولاي حلال الاصعاب = اللي ليا منّه عطا مايمنّي

وإن شفت لي هسه من الربع الاقراب = ماني بسايل كان ماسيل عنّي

منصور يامنصور موقفك غصّاب = يوم اللّحي بأنيابها يظرسنّي

منصور يامورد هيوبٍ ورهاب = ياوافي الاخصال من كل فنّي

غصبن على الحاسد ولاهو برغّاب = من لابتن افعولها بينّني

راعٍ الهوى خسران ماهو بكسّاب = ترى البني خسران تبّاعهني

والود درب الطيب في كل هنداب = منها الدلال ونجرهنّه يدنّي

وذبح الغنم حيلٍ كبيرات الاذناب = وصينيتن فيها العصيب متثنّي

وبنتن عفيفه تمشط الراس بخضاب = من خصلتن افعولهم يعجبني

ومصونةٍ تشفيك في كل هنداب = لاصار ماعنها العيون ارمشني

ودروب الشجاعه مالها عد وحساب = عرف وظفر وأفعال ماهو تمني

[النـايــــــف]

صح لسان الشاعر منصور والشاعر حسين


ولا هنت أخوي ابو سعود


ومشكور على هذا الإختيار


تحياتي لك

أخوك النايف

[جرير]

مشكوور اخوي ابو سعود الله يعطيك العافيه
بس انا اظن انك غفلت عن الشطر الاول من قصيدة حسن واظن الماقف الاول
فيها بكتاب

[الحصان]

الله يعطيك العافية يابوسعود والشاعرحسن من الشعار المخضرمين وكذلك من الرواة المحسوبين وياليت تحطله ديوان في قسم الدواوين

اخي جرير شكراً لك على الملا حضة حيث قمنا بتعديلها

[ذياب المرشدي]

مشكور والله يابو سعود

والله يبارك فيك ويعطيك العافيه

وتقبل تحياتي

[ابـو سعـود]

النايف - جرير - الحصان - ذياب

أشكركم على مروركم الكريم ولكم مني خالص التحيات ومبروك

حلول شهر رمضان المبارك ...


الحصان ابشر طال عمرك راح نحط له ديوان بس اعذرني هاليومين

كنت مشغول شويتين :D

[الحصان]

الله يبارك لنا ولك ولجميع المسلمين بالاعمال الصالحه

[ابـو سعـود]

تم إضافة ديوان الشاعر حسن بن مقيبل الدجيما

http://www.otaiby.com/dewan/index.php?order=1&limit=9


وسنضيف قصائده إن شاءالله في القريب العاجل

[alwasal]

مشكور والله يابو سعود

والله يبارك فيك ويعطيك العافيه

وتقبل تحياتي

[ابـو سعـود]

العفو أخي alwasal


وحياك في منتدى عتابه