لغــز...الذخايـر.. والسلاح

[وجودك يكفي]

هذا لغز كتبته وحبيت اطرحه في هذا القسم والحقوق محفوظه لمنتدى عتيبه

يقول اللغز:

ياويش رجلن قوته في سلاحه
لو كان مايملك ذخاير فشق حي

يطلق...ويرمي ثم يقتل براحه
ولايعرف اسيوف ورماح وعصي






ولــد ثــابت

[شيخ الشيوخـ]

النيص ياولد ثابت

[وجودك يكفي]

مالك لوا... ياشيخ الشيوخ

[شيخ الشيوخـ]

ملك الموت

[وجودك يكفي]

مالك لوا... ياشيخ الشيوخ

[شيخ الشيوخـ]

النوم

[وجودك يكفي]

مالك لوا ... ياشيخ الشيوخ

[شيخ الشيوخـ]

هو كائن حي ياولد ثابت ؟

[وجودك يكفي]

لو احدد بيكون تحديدي نصف الإجابه


آسف ياشيخ الشيوخ على التأخير ولكن كنت ابدع لغز جديد وانتهيت منه وإذا طرحته في المستقبل إنشاء الله بقول هذا اللغز إللي كان سبب تأخير ردي على سؤال شيخ الشيوخ

[شيخ الشيوخـ]

لاتنسى تكتب هذا اللغز سبب تأخيري على شيخ الشيوخ


عطنا اي توضيح منا والا منا

[شيخ الشيوخـ]

الداب ؟

[وجودك يكفي]

مالك لوا...

والله إنك تامر على الروح ياشيخ الشيوخ ولكن من عاتدي ما أقرب شي ولا أوضح إلآ بعد ماتاصل صفحات اللغز 5 صفحات ذيك الساعة اوضح لأني ماودي يطول اللغز

ولكن ابشر وانا اخوك انا البارح نايم ليلي كله وشبعان نوم وفاضي... انت ارمع وانا برد لين توصل الصفحه رقم 5 وبعدها لك علي أزيد بيت واخليك تحله في دقيقة واحده<<والله الفاضي صدق




ترى الشبكه عندي مدري وش فيها أو البلا في جهازي وصارت معي البارح بعد ومن الضغط دقيتها نومه<<ليتك دايم تنظغط عشان ترقد

[وجودك يكفي]

على فكره ياشيخ الشيوخ قبل لا أنسى ترى اللغز إللي بدعته الحين وأنا واياك مجتمعين في هالصفحه خليته بعنوان
لغز الصباح وانشاء الله تحله أول ما أطرحه

[شيخ الشيوخـ]

خلني احل هذا الحين ولغز الصباح نحله بعد الفطور

[وجودك يكفي]

انشاء الله تحله

وترى يوم اقول يطلق ويرمي .. حقيقة ما هو وصف مجازي.. والسلاح إللي يرميه الرجال محسوس وملموس

[وجودك يكفي]

توضيح بسيط مع إن اللغز واضح

ترى السلاح رماه الرجل و صاب الإنسان يموت الإنسان

والرمي مثل ماقلت رمي صريح ولا عليه غبار

[إبن ثعلي]

كنت ياجودك يكفي ابي اقول الرجل النضول اللي تنضل عينه الناس لكن انت تقول السلاح محسوس وملموس ونبي نفكر شوي

[إبن ثعلي]

اعتقد انه الصقر يايكفي وجودك واذا لم يكن ارجو ايضاح كلمة يطلق هل اللام في يطلق مفتوحه والا مكسوره وشكرا

[بنت شمرالطنايا]

هقوه زينه يابن ثعلي وجاري التفكير

متى حطيتو هاللغز توي اجي وما شاء الله صفحتين

[بنت شمرالطنايا]

انا في بالي رمعه بس جيت اكتب اللغز ونتشاور انا وعمي اغدي نقدر نحلوه

بس سؤال هالرجل رجل حقيقي ولا شي ذكر

[وجودك يكفي]

هلا فيك يابن ثعلي
وهلا فيتس يابنت شمر الطنايا

اخوي إبن ثعلي
الرجل النضول ماهو في كل الاحوال يقتل ويذبح الإنسان.. وإللي أنا أسأل عنه يذبح قوام


سألتني ياإبن ثعلي عن اللام في كلمة يطلق هل هي مفتوحه أو مكسوره وانا أقول اللام مكسوره.. يعني يطلق شي اويحذف شي... ويطلق مرادفه لكلمة يرمي ومعناهن واحد



اختي بنت شمر الطنايا سالتيني هل هو رجل فعلآ أو رجل يعني اسم لشي مذكر

وانا أقول المقصود بكلمة رجل أسم لشي مذكر

وعلى فكره يابنت شمر الطنايا مايحتاج مساعدة عمتس لأن الجواب والحل تعرفينه مثل ماتعرفين عمتس عسى ربي يطول بعمره على طاعته ويخليه لكم يارب


شدوا حيلكم وترى اللغز بسيط جدآ جدآ

وإذا أنا شفت شيخ الشيوخ متواجد في صفحات اللغز بكتب بيت زيادة عشان اوضح لكم واقدم لكم الحل بطبق من ذهب

خلوكم قريب وانتظروا البيت الثالث والإضافي وانا بإنتظار شيخ الشيوخ عشان تتم الإضافه

[وجودك يكفي]

الصقر يا إبن ثعلي مالك لوا...

[بنت شمرالطنايا]

الله يسلمك ياولد ثابت

انا عندي هقوتين وحده لي وحده لعمي واظن اني بهقوتي مبعده حيل بس حسب فهمي لشخصيتك

ونوعية اللالغاز اللي تحطها توقعت هالحل

حلي ياطويل العمر عصى موسى عليه السلام اللي تحول لحيه وتلقف حبالهم اللي يخيل لهم انها

ثعابين وهي تقتلها ويبطل سحرهم وش رايك بها الحل احس ان رمعتي سماويه على قولتك

اما رمعة عمي يقولك العشق

ومنتظرين بيت التوضيح

اختك بنت شمر الطنايا

[وجودك يكفي]

رمعة عمنا السنعوس يابنت شمر سماوية
وياقلبي قلبه شكل قلبه خضر ويعشق


وانتي تقولين عصى موسى
واقول مالك لوا...
عصى مؤنث يابنت شمر والحل مذكر

ولكن واصلي بنفس الطريقه وانشاء ربي بتحلينه وبصراحه أنتي خطيره جدآ
عسى الله لا يضرتس وانا أخوتس

[بنت شمرالطنايا]

يعني رمعت عمنا السنعوسي غلط

اجل خلاص بفكر يعني انا ماشيه على الطريق الصح

خلاص انتظرني قريب بجيب الرمعه القادمه اذا ما سبقني عليه واحد من اخواني

[وجودك يكفي]

انا بالإنتظار ولي عوده بعد الصلاة إنشاء الله

[بنت شمرالطنايا]

طيب تقبل الله

مو الطوفان هو اللي يقتل وما ينجي منوه احد

اذا كانت رمعاتي بعيدات قولي عشان افكر بمنحى ثاني

[وجودك يكفي]

مالك لوا... يابنت شمر الطنايا

[وجودك يكفي]

بنت شمر الطنايا ركزي شوي ولا تستعجلين وانا متأكد تحلينه في الرمعه القادمة

[بنت شمرالطنايا]

طيب سؤال لو سمحت عشان اركز بالبحث هالشي هو قتل وخلص

ولا للحينه يقتل لان فيه بالي اجابه

[وجودك يكفي]

مدام سألتي كذا يابنت شمر الطنايا
انتظروا الرد إللي بعد هذا لأني بزود بيت على اللغز

والبيت يجاوب على سؤالتس يابنت شمر

[بنت شمرالطنايا]

منتظرين حاسه انوه حول هقوتي

[وجودك يكفي]

هذا اللغز بعد الزيادة وتراه واضح جدا

ياويش رجلن قوته في سلاحه
لو كان مايملك ذخاير فشق حي

يطلق...ويرمي ثم يقتل براحه
ولا يعرف اسيوف وارماح وعصي

وإن كان تبغى العلم وتبغى الصراحه
هو قد قتل باوامر الواحد الحي

[بنت شمرالطنايا]

الطير الابابيل اللي ارسلت على اصحاب الفيل

[وجودك يكفي]

الرجل قتل في الماضي وقتل بأمر من الله

[فهد بن عايض]

ولد ثابت

مساك الله بالخير

هقوتي انه فرعون

يوم غرق في البحر

[بنت شمرالطنايا]

يعني غلط جوابي

خلاص وقفت رمعات احس زودتها برمعاتي

بفكر عدل بعدين ارجع وباذن الله بالاجابه الصح

[وجودك يكفي]

كفو يابنت شمر وبيض الله وجهتس إجابه صحيحه
الرجل هو طير الأبابيل
وسلاحه حجاره من سجيل

انا كنت متأكد إنتس بترمعين وتفقعين عين اللغز
وهذأ أنتي فقعتي عينه

الله لا يضرتس وانا اخوتس ولا تنسين تقولين لعمي السنعوسي الحل

أشكر جميع من شاركنا في اللغز
ودي واحترامي للجميع

[وجودك يكفي]

حياك الله اخوي فهد

بنت شمر مو غلط اجابتك بس أنا كتبت ردي إللي بعد رمعتك وتأخر لأن الشبكه عندي دمار أو البلا في جهازي

[بنت شمرالطنايا]

كفوك الطيب ووجهك ابيض

انا توقعته قبل تحط بيتك بس قلت بتاكد بعد البيت

وابشر بقول لعمي وهو عطاني لغز لكم

وان شاء الله بحطه

[وجودك يكفي]

عسى ربي يطول بعمره وانا بإنتظار لغز العم الغالي

[وجودك يكفي]

عسى ربي يطول بعمره وانا بإنتظار لغز عمنا الغالي

يالربع هل مشكلة البطء والتعثر في صفحات المنتدى عندكم مثل ماهي عندي أو بس انا

[بنت شمرالطنايا]

مشكور تسلم

لا بس عندك المنتدى تمام عندي الظاهر من الشبكه عندك ولا جهازك فيه شي

[فهيد مقعد الرويس]

اشهد بالله

ان لغز محبوك ومسبوك ومليان

صح لسانك وصح لسان بنت شمر خطيره مافيها كلام

تحيتي للجميع

[وجودك يكفي]

صح بدنك وانا اخوك

ومشكور على التقيم إللي اسعدني عسى ربي يسعد ايامك

احترامي