نبغي شاعر من عتيبه يسد النوب

[الميسم الحامي]

تحية و احترام لجميع شعراء عتيبة و غيرهم ..
نريد شاعر من شعراء عتيبة يتفضل

سلام ردة على اهل الدار و المرباع مريــود
ردية وافية تضفــــــي علــى قاصي و دانــي

للسوق جينا نبيع و نشتري والزود مـــردود
و اليا صفق دلوها في الجال قطعنا السواني

[محمد بن نايف]

صح لسانك ميسم حامي وبنتظار شاعر من عتيبه لكن من اي العرب ايها الميسم

[ناصر بن سعدي]

هلابك إخــوي الميسم الحامي ..

ونورت عتيبه ..



والمعذره على التأخيــر ..



وننتظر عودتك .. والتحاور معك ..



يامرحبا ياهلا بك في حلال الطيب والجود=ترحيبة بعدها تستاهل البن اليماني
والسوق سوق المعاني بيننا من زود في زود=حذرى تهور وتخطي فـ (الدقايق ) والثواني

[الميسم الحامي]

الله يبقيك يا ابيض الوجه ..

دام البقا يالعتيبي و المعانــــــــي قدتها قـود
ما نجلب الا السمان و لا نحب الا السماني

بكره يطيح المطر ونشوف وشهي ثمرة العود
يا الله تجيب المنى و العشر ما ترجع ثمــاني

[المرقب]

صحت السنتكم يالشعار الكرام



وانا بصف المدير ابن سعدي,,,,,,,, ولاهان اخوي الميسم الحامي


واصلوا واصلوا

[ناصر بن سعدي]

وافي ولايلحقك من يمنا يالذيب منقود=عادة هل الطيب يالنشمي وذربين اليماني
من لايعرفك يبا يجهلك والمعنى له شهود=ما إحدٍ يلوم المعازيب إن نسو والعمر فاني

[ناصر بن سعدي]

إخــوي الغالي


المرقب ..


صح بدنك.. وتسلم على المتابعه والحضور ..والصف يتشرف بوفقتك ..


وياهلا وغلا ..

[خيّال الهيلا]

صحت ألسنتكم على البدع والرد الجزل ..
ولازم اكون عادل واقف بصف الميسم
:)

بكره يطيح المطر ونشوف وشهي ثمرة العود
يا الله تجيب المنى و العشر ما ترجع ثمــاني

بكره يطيح المطر ونشوف وشهي ثمرة العود
يا الله تجيب المنى و العشر ما ترجع ثمــاني

بكره يطيح المطر ونشوف وشهي ثمرة العود
يا الله تجيب المنى و العشر ما ترجع ثمــاني


الليل يالليل :)

[الميسم الحامي]

تسلم يا خيال الهيلا و لا هانوا بقية الصفوف و المتابعين :

الاخ الشاعر / ابن سعدي خذ ردها

ما عن مطيح المطر يا صاحبي مجناب و صدود
^^^^^^^^^^^^^ خيلتها يم ديرتكم و علم السيــــل جاني

و انا ولد حرب قومٍ في اللقــــا شعله و بــارود
^^^^^^^^^^^^^ منزالنا قمة المرقاب ماهو فـ الطماني

[ناصر بن سعدي]

إن كان يالحربي تشوف السماء به برق ورعود=يبا يسوقه لكم ريح الحيا من هـ (المكاني)
والله ونعمين باللي مجدهم ماعنه منشود=وأسرج حصانك على الوجهه وأنا أبا أسرج حصاني

[ناصر بن سعدي]

إخــوي الغالي

خيال الهيلا ..

متابعتك أهم شي ووجودك يكفي ..


وياهلا وغلا ..

[المرقب]

والله ونعميـن باللـي مجدهـم ماعنـه منـشـود
,,,,وأسرج حصانك على الوجهه وأنا أبا أسرج حصاني


مبدعين يالشعار وواصلوا

ومعاليش عن غيابي الغير مقصود

وبالتوفيق

[محمد بن نايف]

صباح الخير للجميع


وواصلوا والله معاكم واصلوا


والصف عند جسر ام الهيمان يسير ويوقف شوي زامل وشوي قزوعي

[ناصر بن سعدي]

الغالي

المرقب ..


حياك ..

ومعذور ..طال عمرك ..

وحياك مجدداً ..

[ناصر بن سعدي]

هلابك

إخــوي / محمد نايف ..


وماندري إلى الآن من أنت في صفه ..:)

ولكن حياك الله ..

[الميسم الحامي]

بيض الله و جيهكم جميعا ....

يسلم صفي و يعيش ..
و اقول لــ صف ابن سعدي بيض الله و جيهكم

و تحية لشاعر المعنى ابن سعدي....


انتم هل الطايله لكن جاكـم جيــــل مقـــرود
^^^^^^^^^^^^^ ما يحسب حساب للقانون و حقوق العواني
العام وقفــت محــالتـكم عشان الحبل معقود
^^^^^^^^^^^^^ و اللي عقد حبلكم جمـّـــال مجذوذ البطـاني

[محمد بن نايف]

الحربي صح النووم وصح لسانك المحراف برد وعساك سالم وحياك

[الميسم الحامي]

الله يصح بدنك يا محمد بن نايف .........
يا خوي انا في كشته في ذا الخميس و عشان كذا تأخرت في الرد .....

و ان كان ودكم تخلونها مباشر تراه ابرك و ازين بس نبي وقت يناسب الجميع ..

تحياتي و سوف نتحاور معك قريبا في طاروق لا ينسى باذن الله

[كــــآتــم المـــــعنى]

ابن سعدي والميسم


صحة الألسن وبيض الله وجيهكم


وما قصرتوا

[الميسم الحامي]

الله يصح بدنك يالشاعر الغالي / سيف العضياني
مرورك شرّف الصفحة
عساك دايم على العز و القوة
و الله يبيض وجهك و وجه الشاعر ابن سعدي و وجيه الصفوف و المتابعين

مع تحياتي/ الميسم الحامي

[ناصر بن سعدي]

صح لسانك إخــوي الغالي

الميسم الحامي ..


شاعر جزل لك كل الشكر ..


ومجال المحاورات المباشره مفتوح في هذا الموضوع .. تقدر تحدد وقت فراغك .. والشاعر اللي ترغب محاورته ..وزملينا عادل العصيمي يقارب وجهات النظر ومن ثم نضع بنر إعلاني قبل بداية المحاوره ..

هنا (http://www.otaiby.com/vb/showthread.php?t=43951)


وعلى بركة الله ..


وأشكرك وأشكر الصفوف ..

ودمت بخيــر ..

[مدله الضميان]

صحت السنتكم جميعاً وكلكم ابداع