بندر بن سرور

[التركي]

قصيدة : الله من عين
اللــه مــن عيــن تزايــد تلــفــها
بـيَــن كــدها بالعــروق السـخيـفــه

كــم واحــدٍ لــه حــاجـةٍ مـاصرفها
يـصــد عن صـرافــها لايضيــــفــه

يخــاف لايقــضب نــديـــم طــرفها
قـلبــه صـدأ وأطـــراف جسـمه نظـيفه

لــو كـان مـاهـا مايـلـيَـن ليــفــها
سـيَـل بـها القــتــات وادي حنيــفـه

واللـه خـلق بيــد الـذلول وعســـفـها
للـي يـبي المنــهاج مــثـل القــطيفــه

والفـضـل للـي مـدها مــا قصــفــها
وأنـهـج من الــدار المحيــلـه للمــريفه

وانصحــك ياللي غــرتــه مــاعرفــها
شيــبٍ تشـيــب مـا يحـــول رديفــه

رديفــها يركـض ويــركـــز هــدفها
وقــتٍ يـقــص العـظم من حــدَ سيفـه

وجـت بك الـدنـيا وجـــابك صــدفـها
لاتـعـتـز بأهـل النفــــوس الضعيــفـه

أنصـحــك نفســك لاتســقــط شرفها
تـرى بعـض بيـض المجــالس أمجيفـه


قصـيدة : يأهل الونـيــت
يأهــل الونـيـــت اللي تزايـد عويـلــه
مكينتـــه ذيــب النصـارى شغلـهـــا

حــده وقود النـار وأبعــد مقيـــــلـه
شاقـــه بعيــد العيـــن وادنـى جبلـها

إليـــا لفـيـــت العيـن اخـذ لك دليلـه
لاتبــدي الشكــوى على غيــر أهلـــها

وأحــذر يغــرك من بســط لك شليلـــه
كم واحــدٍ يبـي العــلا مـــاوصلــها

علـيــك باللـي بالقـسى ينعـني لــــه
اللي ليـا قــاد السفيــنـه عـــدلــها

السـالميـــن اللي خطــاهم طــويــلـه
وسعيــد زيـزوم البــلاوي فحـــلـهـا

قـــل حـاجتـي يـابو مبارك ثقيـــــله
ما كــل رجلٍ ينتــخي لـي حمــــلهـا

وابــغــاك تــدركهــا بحــالٍ وحيلـه
عســاك تـاجــد عند ربــك بـدلـــها

و لا تـرى الدنـيا قــريــبٍ رحــيــله
كــلٍ تـبي نفــســـه تلاقــي عمـلها


قصيــدة : بحـر تسـعيـن
يـارب انـا لـي حــاجــةٍ صـكة القـوع
بـقـصى بحــر تسـعيـن صكــة نـحـرها

أصـعـب على المخـلـوق من عضـة الكـوع
ولا على الخـالق بســـيــطٍ بــحــرها

كـم واحـدٍ جــت لــه بسـاتيـن وأزروع
تــراه مـايـدري مــن اللـي بــذرهــا

أبن الـلـئـيم أمـشـارك الـكلـب بطبـوع
عــيـنـه على حــرمـة قصــيره دورهـا

مـادارهــا خــوف علـيـها مـن الجـوع
خــوف تفــوتـه غـــرةٍ مــاسـبـرها


قصيــدة : ثقـيـل التـرس
اللـه عـلى اللي يــوم يفــتل عمــــوده
يطـلع ثـرى ارضٍ بعَــد القـيـض مــاهـا

ليــونـس ثقـيل التـرس يرخـي عضــوده
شـيـهـانـةٍ تــرخ المــتــون العشاهـا

عَـده عـلى اللي مــا يـدرهــم قعــوده
مــن صــار زيـزوم المـشاكـل حمــاهـا

ثـم قــل لابن دهــره يـحضـر شهــوده
للـرفـقــه اللـي بـاعـها مـا شـراهــا

وقــتٍ ركــض كلـبـه ونـامت فهــوده
مـمـا تشــوف العيـن طــوَل عـمـاهـا

المــال ســالم والـوجيــه أمـعـبــوده
بـرق التـيـــوس اللـي تـوامــا لحـاها

راعـي صـلاة الفـرض بـيَــن سجـــوده
وراعـي غــرابيــل النـمايــم لـقــاها


قصــيدة : خـطـو الـولد
اللـه من عيــنٍ لـيا عـسـعـس اللـيــل
عـافــت لـذيــذ الـنـوم مـاتـهـتني به

يـاويـن أبـلقـى مـن يحــب الـتـعـاليل
يـبـدي بـزيـن القــول ولا ابـتـدي بـه

خـطـو الـولد يـامـال قصـف الـتمـاهيل
يـشــرح عيــوب النـاس مـاشاف عيـبـه

يفـرح لـيـا شـاف المــجالس هــراميـل
يــكـره لـيـا شـاف الـمـجالس أمـنيبـه

مـاشـوقــنـه طيـبـات الـتـمـاثــيل
مــع شـايـبٍ قــد بـيَـن الـوقت شيبـه

مـاهـوب شـايب ، شيـبـنَـه غــرابيــل
عـيـدٍ يـقـفـي بــه وعـيـدٍ يـجيــبه

أنـا الذي شـفـت الـــوزا يـاسـماعيـل
طـاوعــت نـفـسي لـيـن شـفت الغليبـه

النـفـس طـير والـخـطايـا محــابيـــل
والنــاس روَاي الحـــديــث أتـحـكيبـه


قصيدة : دواليـــب الــدهر
يالله يـاجــال الامـور المهمــــــــه
تجلا وهـج قلب بـرا حـال راعيــــــه

البـر دجـتــه والبحـر رحـت يـمــــه
اسعـى ورى رزق عســى اللـه يهـيـــه

يــوم ان ولــد اللاش رزقـه على أمـــه
رزقــي على اللي ميـــت القشـع يحيـيـه

يــامل قـلــب كــل مـا مـات همـــه
دارت دواليــــب الدهــر ليـن تحـيـيـه

فـرَاق شــمـل النـاس عيَــا يلـمَـــه
وقــتٍ يشــيـب الرأس من شـايـةٍ فـيـه

أحــدٍ يــنام وحـط رأســــه بكمـــه
وأحـدٍ يخـــم النـوم عيــنـه وتخـطيـه

أحـدٍ يحـاول بالــردا بنـــــت عـمه
وأحـدٍ يحاول سـتـر عـذراء عـوانيــه

مـانـي وأنا بنـدر ببيــاع دمــــــه
يقطعـــك يا بيــاع دمـه ومهـفـيـه

الـلي يبـيــع لابـســـات الأزمــــه
ثـورٍ يــبا بيــض الرعـابيـب تغـنـيـه

يـزعـل ليا جــــت ليلــة الـدور يمـه
يرضـى بسـوق المـال فخـره وفـــا بيـه

خطــو البخــيـل اللـي يكبــــر معمـه
يقـرأ الكتــاب وواجـــب اللــه يخـليـه

امـــا هـــرج لـك في رفيقــه بنمــه
ولا عــطا وأمـــــه أتضيـع هقـاويـه

أنشـــدك ياللـي كــل فـرض تـتـمـه
تقـرأ الكــتاب وكل فـرض تصــليـــه

ويـش القليـب اللــي غميـــق مجمــه
مـا فـاد غـرسـه مـاه عـطـش سوانيـه

تخــالف الانظــار شـــرق ويمـــه
وكـل هـدف رآيـه مـن النـاس مرضيـه

ســمَ الســبب ياعـــارفٍ عنـه سـمـه
ســمَ الســبب ياعــارفـه قبــل أسمـه


قصيــدة : ذبـاحة الـتـيس
يـاعنـك ماتشفيــك ذبـاحـة الـتيـــس
ربــع السـلق مـادام حـمـلـك خفيـفـي

وأخــيـر من هـاك الوجيــه المــفـاليس
البــعـد عــن معـروفهـم لــو تضيـفي

يلـحقــك منهـم بعـض الايـام تنـجـيس
ثــوب النـجـس لـو كان ثـوبك نـظيـفي

مـالي ومـال أمجـالســة كــل بـليــس
سـلقـان نـجــد اللي وحيــها صـليـفي


قصيــدة : مخرجيــن الطوابير
يابـدر ابن سلطان مايــبـــرد الجـــاش
الاَ نــهارٍ فيــــه للجـــــر تشهيـر

يفـرح بــه الطـيــب ويكره بـه الــلاش
ويقـــوم عجـــه من قــرى عنـز للنـير

يغـلـق مجــال مربطــة خضـر الاجـحاش
ويفــتح مجــال مخــرجيـــن الطوابيـر

يـزيــغ بـه قلــب المنـافــق وينـحاش
ويصــبر به المـؤمـن ويـرضى المـقـادير

ماقـصــدنا يابــدر في نــجد نعـتــاش
الـرزق عنــد مـدبــر الخـلق تـدبـيـر

أبـغي الذي بيــن المضـيـع وعــكـاش
روقيـــةٍ تـزهى يــديـــها الخـواصير

تتــبع لهــا نمــرأ له المـوت رشـراش
حـتى تــعـاف أمـقطـعيــن المسامـيـر


قصــيدة : مـشــتل البـيب
ياهـل الــونــيت اللي يـبا مـشتل البـيب
مــادق صــدره بالخــطوط الغــزيــره

يـــوم ايــتـخـثع في محــير الاداعـيب
يـشـتي تخـثـع جــادل فـي حــريــره

لاتــجـربـونـه مـايـبا الفـرت تـجريب
قــد جــربه فالبيــت الابيـــض خبـيره

عــدَوه لابـن حـزام سيـــد اللــواعيب
لـعاب زيــنات البـيـــوت العـســيره

ثـم قــل قـاعــد مـانـبي مـنـه تدريب
الوقـت درَبـنـا على كــــل ســيــره

لـو كــل مـــن قـاد السبب يعلم الغيـب
يـامـا كــرهـت النـفـس مـن باب خيره

ان قـفـت الايـام مـاهـا مــغـاريـــب
والـيـا اقـبلـت يـازيــن صـافي غــديره

القصيدة : الله عليكي انتي من أيا عتيبه

يابنت ياللـي حـول فلـة خبيـان
الله عليك أنتـي مـن أيـا عتيبـه

لا ياعيون اللي على الطرد ولهان
حـرٍ قطامـي فعولـه عطيـبـه

والقرن ذيل اللي تشعشع للأكـوان
بنت الأصيل اللي طويـلٍ سبيبـه

والردف يطوي الثوب والعود ريان
والخـد بـارق مزنـةٍ مستجيبـه

القصيدة: يابنت عيفي واحدٍ مايصلي

واقلبى اللي تله الــود تـلـي
تل الرشا من فـوق ملحـا جلالـه

في غربها تسعين فـري ومشلـي
وتجفل اليا سمعت ضريس المحاله

من واحـدٍ طـرق عليـه يهلـي
جدد جروح القلب مع ما جرى لـه

برمش العيون اللي هدبهن مظلـي
ضافٍ على بيض المحاجر ضلاله

يابنت كــبـي واحــــدٍ ما يصلي
تارك عمود الديـن مالـك ومالـه

عيفيه لو يفرش لك البيـت زلـي
من لا يخـاف الله حـرامٍ حلالـه

خلـي ملعـن والديـنـه يـولـي
تلقين فـي نجـد المسمـى بدالـه

وعليـك باللـي للجماعـه يهلـي
اللي كمـا النبـوة منـارة دلالـه

بالرجـل ثنتيـنٍ حداهـن يدلـي
من كبهن ماهـوب ويـا الرجالـه

وان كان مابه دين مع زيـن دلـي
جعله مـن الدنيـا تقطـع حبالـه

القصيدة: يلعب هوى

راكب اللي مخ ساقـه خنازيـر وهـوى
أشهبٍ في مقدمه بارقيـن وعكـس تـاج

متر فـي متريـن مستبـرمٍ كلـه ســوى
حايفـه حطـاب ماسمكـره راع الكـراج

منوة الـي لأهلـه مشفـقٍ وألهـم نـوى
يوم يفتح خط بيـن أربعـه ثـور عجـاج

يوم يفتل للحرق والورق وسـط إنـزوى
ضد حرب وغرب والجمع ورجوم الحجاج

يـوم أحـده بالثلاثـة مـع اللفـة عـوى
عـوي ذيـبٍ محتدينـه مربيـة النعـاج

ثابت ما يحتـرك مرسـيٍ يلعـب هـوى
ارتفع جب ارتخى مثـل طايـرة المـراج

يرتفـع حطـاب بعصيـر لبنيـه رمــى
شرق غرب شمال بيمين الأبتل يـوم راج

عنبره والمسك سلطان من نـور السمـاء
والذهب خوذه وماء العود الأصلي يوم فاج

القصيدة: ذوق الحنيـة
آه يافيحـان مـن بعـد المسافـة
بين نجد وبيـن ريعـان الحوّيـة

راكب اللي يعجب اللي يوم حافه
زين صوته بالسيـور المعدنيـة

زيـن الصنـاع شغلـه بالكيافـه
ناسجٍ حوضه على ذوق الحنيـة

يوصل الي بان بالقلب اختلافـه
عيت الأيام تسمـح لـي بمجيـه

شبه وضحى قيضت فوق اللصافه
ربعت بطبيـق وفيـاض الثنيـة

ماتلت راع الغنم مجيـف لحافـه
ثانية طق العصـى بـارد حتيـة

مع بلاوي زينهـا زود النظافـه
ماتمشـت بالرفـايـع ……..

القصيدة: رستم قليبه
عز الله أني جزت على كل ما قول
لاشك ردتني على القول ضيحـه

لا ياعيون اللي لياصـك بالجـول
منه أبرق الجنحان عجلٍ مطيحـه

ياعود ريحانٍ رفع غصنه الطـول
رستـم قليبـه مايهـون ضبيحـه

يوم استوى عوده على داير الحول
هجوا به التجار من زين ريحـه

ياشيخة الخفرات بالزين ودلـول
من مات من سبتك ربـه يبيحـه

القصيدة: شاي قبل أمس - غزل
ياعبيد يا وجدي على شاي قبل أمس
شاي مزج ياعبيد بالزعــفــراني

امصلحه مركوز الأنهـاد بالخمـس
راعــي ثمانٍ كأنها القحــوياني

وجدي عليها وجد من حمل الجمس
في حملته ياعبيد سبـــع المعاني

يوم الطرد عدت ثلاثٍ بعد خمـس
قامت تقطع قربته جــدعــاني

مدوله الدربيل مع مطلع الشمـس
وجاه العريف وحدره لسفــواني

[التركي]

قصيدةالا وهنى اللى تمرجل بصك تــراب
لو لا لجنة الترسيم ماعاش مع غيرة

انا كل ديرة جيتها وادرك الاسباب
ادور نصيب بــذ رجلى بتدويرة

الا يا وجودى وجد من صك دونة باب
بقفل اعجمى(ن) مغلقـات مساميـرة

معة فرت خمسة طن ينقل مية ركاب
من المال عيا ينقلـنـة تغايـيـرة

على اللى كوانى كية العظم بالمشـهاب
على اقصى عراوى القلب محم مناشيرة

عشيري ورى الكودة وانا من ورى مشعاب
بعيـد قريـب تعـيـب ياهـون تيـسيرة

ولا ياصلة ياكود فرت علية اصطاب
ليا حاسـب السـواق تشر مواخيرة

صنايع بياطير الكفـر لابسين الكاب
عصاة اليهود اللى مشاريبها البيرة

ولاوهنى اللى من الـود ماقد تاب
وانا تبت عنة وعدتلة ياللة الخيرة

القصيدة: علق حبالي
ياسخيف الذرعان مافي وسـواس
لي حاجة بالعرض وأسعى وراها

وأسجد لقادرها على غفلة الناس
وأسألـه الجنـة يكمـل عطاهـا

أسعى ورى حد مهاويـه دراس
زيـزوم نمـراً قادهـا ماتلاهـا

علق حبالي فرخ واليوم قرنـاس
واللي بحالـي للولـي مشتكاهـا

أعوذ بك يارب من سعي الإفلاس
وأنته رقيب النفس تعلـم خفاهـا

يابنت أنا هـذي شفايـاي يبـاس
أطابق الوجبات ما أشفق علاهـا

ماني وانا بندر بتبـاع الأنجـاس
اللي قريبٍ تفلهـا مـن لحاهـا

أنا بدرب الصيرمي عدم الاجناس
زعيم روق اليا تنصـت عداهـا

قصيدة : الــدوج
الا يا نديبي فوق دوج عليه شراع
ما قال انفخ التشريق جا في مواصيره

ليا هبّت العليا و قام العجاج و راع
يهيضك مع السكة تثاوع معاصيره

صنايع يهودٍ لا يبدّل ولا ينباع
يقربك من دار و يقلعك عن ديرة

بعد طلّعوه مجَيّكٍ ما يبى المرجاع
سمع من وراه الفوج غنّت مواطيره

ليا دق سلفه قام حسّه يرجّ القاع
ما جاه المعاون يشتغل في مساميره

عطاه الثنين و زاد له بالأبنص و فاع
رزيمه رعد مزنٍ تهلّع دناقيره

خرط له بثالث عقب نشّه بعزم و زاع
و شتل له برابع ما يضيّع تغاييره

ليا شال عزمه ريّحه وامنٍ مارتاع
مسك مع يمين الخط و يلدّ لانبيره


قصيدة : سر ياقلم
ســر ياقــلم مالي على الصبر طاقه
صـــبري تـعـدا الـحـد مـاعــاد ينطاق

أكـــتب لمــــثلي قصــته واشـتياقه
في خطك الواضح على بيض الاوراق

قصة حـــزينن صـــافي الـحر ذاقه
انــا بــذكــره مــاصــله خاطري ضاق

بــــاقوبه الاصــــحاب والوقت باقه
وصــــار الضــحيه بـين بـايـر وبواق

يمشي وهو ماحس في كسـر ساقه
أمسى على ساقين وأصبح على ساق

وهذي سواة الوقت شين أصطفاقه
الـــوقــت لــو يصــفى لك أيــام درّاق

لاشـــك يامن معــك عـــقـل ولـباقه
بنصـــحك كـــان أنــك للأمــثال تشتاق

صــادق رجـــالن يعرفون الصداقه
يقــفون صـــفك يــوم يبســات الأرياق

ومن يرغــــب فراقك فعجّـل فراقه
جـــاز الـــذي يجـزيــك أفـراق بـافـراق

يقولــــه اللي جــــاير الوقت عـاقه
ولازال فـــي غيـــبوبة الـهــم مــافــاق

حـظه على أقشر شي للنفس ساقه
بـــقبور الأحـــياء ينـتظر يــوم الأطلاق

قصيدة: ياعبيد يوم انك
يا عبيد يوم إنك تبي الـدرب عجـلان
رد النقـي يا عبيـد حـالٍ وحيـلـه

ما ينرمي قـولٍ علـى غيـر نيشـان
ومن لا يثبت حجته ويش هـي لـه

صوتي وأنـا بنـدر طويـلٍ ليابـان
وان ما خشيت الرب ويش اختشي لـه

وان عودت للنـاس قـومٍ وصدقـان
ما احد بما نعنـي لأعـدي الطويلـه

وأن جيت أغني البيت وافي ومليـان
ولولا معانـي بالغنـا مـا اشتقيلـه

ما أحب ترديـد الغناميـر مشحـان
ما أدمح خطا اللي شاهده رأس ذيلـه

والا خطا الطيـب زبـادٍ وريحـان
لـو يدعـي لـي بالفنـا وادعيـلـه

إن ضاق صدري شفي أمزح بالالحان
والا عـن الـزلات رجلـي ثقيلـه

دنيا نبي تقزيرهـا ضحـك حجـان
وألا تـرى صيـورهـا مستقيـلـه

والرجل غاية ملحتـه قلـب ولسـان
وألا أن باقـي جثـتـه حنضليـلـه

يارب تجعل لي من الذنـب غفـران
يافـارج لأيـوب عـقـب تهليـلـه



قصيدة : تمر الفؤادي
والله لو أني بعض الأحيان أكنـي
نارٍ من الجمـرة تمـر الفـؤادي

لأغدى كما فرتٍ بقيـره يحنـي
حمله ثقيل ولا حصل له بـرادي

عليـك ياللـي بالمـودة شطنـي
ما شفت شكله مع جميع البـوادي

راعي جديـلٍ يمشطـه ومتثنـي
والعين عين اللي طلق في الهدادي



قصيدة : سرى البارق
سرى البارق اللي رؤوس مزنه تنصت غال
على هجرة بن سنـون وأدنـى الشبيكيـة

على شان خلـي جعـل يسقيهـم الوبـال
وإليـا عـودت مالـي ومـال الحبرديـة

ألا ياعيـون اللـي مواكيرهـا بالـخـال
توالـي رقايـب نجـد ماهيـب بحـريـة

إليا نقضـت شقـرٍ علـى ردفهـا ميـال
تخابـط سبلهـنـه مـطـارق شريطـيـة

كما ذيل شقراً شعشعت فـي يـد الزمـال
تغانـم ملـز الشـوخ تبغـى الكرامـيـة

جوابه لبن عربٍ بعد ما أطرحـن أهجـال
تدلـن علـى حليـت مـع درب وسميـة

يتل الضمايـر تـل غـربٍ علـى محـال
تصافـق بـه الجيـلان ملحـاً جمالـيـة

يرفع لها صوتـه صبـيٍ خبيـث أعمـال
تسقـي وديٍ فـيـه تسعـيـن برحـيـة

وترى تبعة المقفين عيـبٍ علـى الرجـال
لكـن أوســع خـاطـرٍ بــد خافـيـه



قصيدة : ازرق الدخان
شـي بقلبـي واهجـه مستمـري
لولا أرزق الدخان يطفـي لهيبـه

سلط على الدخان لو هو مضـري
له حـزةٍ عنـد إحتكـام المصبـه

وأنا الذي ما أبدي على الناس سري
من خوف سودان الوجيه تحكيبـه

أصبر على ضيم الدهر والتعـزي
من شان من يرضى على الغليبه

وأبعد مجالى عن عيـال التـزري
من لاهـوى قلبـي دواه المغيبـه

أخاف لي مـن مجلـس مايـذري
في جانبه بـوم حساسـه صليبـه

و سوالفن ما بين بحث و تحــرّي
يجـرح فـؤادي عيـةٍ وأبتلي بـه

والله خلق بالكون لي ثلـث بـري
يكفـن ثلثيـن البحر ويـش ليـبـه

وإليا بغيت الدرب مانيـب اطـري
أمـس للفرجـة حبـال النجيـبـه

وأقطـع تهاتيـه الخـلا بالتجـري
والله يجيبه والـى أمـري يجيبـه

يرضيني المقسوم خيـر وشـري
سبحان من لا تعلـم النـاس غيبـه

أحدٍ على ربعـه يحـب التحـري
للشـر بـلاسٍ وخيـره بجيـبـه

هذاك أنـا يالربـع منـه متبـري
لو عظني ناب الدهر مـا انتخيبـه

من خوف يضحك لي وهو يستغري
يفتل حبـال السـوء مـا يندريبـه

يفـرح علـي بكـل شـرٍ يمـري
وأنا شاف يمي خير عنـي انهيبـه



قصيدة : يامل قلبٍ
يامل قلـبٍ مـن معاليقـه أوجـف
أوجاف فوق الهجن كـور النجيـره

واصلـك ياعمـي جـواب مـزرف
مع واحـدن نبـدي عليـه السريـره

ينسى عضـوده كـل ثـورٍ معلـف
مرغبـه زال الـمـوارد قصـيـرة

قلبه مع الضحكات يسعـد ويخـرف
أخـراف أهـل وادٍ تعاقـب ثميـره

الماكـر اللـي فيـه تبـعٍ تخـلـف
ليافاض مـن عشـه تفـرق مطيـره

وخطوا البخيل اللي على السد يقصف
وان مـد لـه مـده لياهـي حقيـره

هو مادري ان الرزق للحي يصـرف
يعطيه من يعطـي العطايـا الكبيـره

المال مثـل الفـي يرجـح وينكـف
واللـي يجيبـه لأبـن آدم دبـيـره

أمـا أنتبـه قلبـه وتـاب وتحسـف
وإلا لعلـه فـي عمـاة البصـيـره



قصيدة : يا راكب اللي
ياراكب اللي جديـد ويشتغـل تـوه
ماقط علي الثوينـي فـك ماطـوره

عصير مر القليـب والتانكـي روه
ملفاك ماجد ربيع لاضيف أبو نـوره

شيخ تبات الظرايـا ماطفـي ضـوه
يوم أقشر الناس حذفه دون حنجوره

قل له تراني نويت الكتيـب بالخـوه
مليت ياشيخ من خوة هـل الكـوره

والله لاجى له من ورى نجد بعنـوه
لاجي بنفسي وأجيب الختم والصورة



قصيدة : طويت حبل
طويت حبل اليأس يابـدر دونـه
وجاني عليه من الأزاء ما كفاني

في الليل جسمي مقلقاته همومـه
والعين تسهر ما تذوق المنامـي

عليه روحـي يابسـات شنونـه
وحره على الضلع القصير كواني

أمشي وقلبي يابسـاتٍ غصونـه
ومني صناديق الضماير حطامي

ابلا مرض حالي تقول مهيومـه
والكبد صامت عن لذي الطعامي

اللي عليه القبر ركزت وسومـه
وجدي على لاماه وجد الضوامي

حره سطا ما عاد تبرا وسومـه
ولا عاد يمحى وسم حزنه دوامي

يابدر متى الوسم تدخـل حتونـه
من نو مـزنٍ مانشـا بالغمامـي

أباه يزي القبر من مـاء مزونـه
يزيه ربان السحـاب الهشامـي



قصيدة : دنقله ميم
يا أهل الونيت اللي على دنقله ميم
نقل الرياض الخـط ما توصلونـه

ما رهمو له في الكراجات ترهيـم
ولا قـط فـك أديتـره ينفخونـه

والله لو أمسك طارتـه يالمغانيـم
ما عـاد أقلـد دولـة يصنعونـه

صناعته مخطيـن ملـة أبراهيـم
حمران روم لونهـم مثـل لونـه



قصيدة : خطاة التماتيك
الله على مركـب خطـاة التماتيـك
اللي يروج اليا أونس الضغط صالي

هذاك يامجول عن الغيض يبريـك
عليـه يالغالـي يوديـك غـالـي

انحر عليه الجـادل اللـي تسليـك
اللـي جوابـه حلـو در المتـالـي

وأن بينت لك شيـن عنهـا يعديـك
تكفي الاشارة عن كثيـر المجالـي

ونوم الخلاء وحدك ولازول يوذيك
أخير من خـوة عفـون الرجالـي



قصيدة : جينا حليت
جينا حليت ولا لقينا أشعـل اللـون
ألا بحـمـرٍ يبهـتـن الحـديـدي

روس الطوال اللي ورى حد طحنون
ياما بهـن عـن عنز ريـم فـريـدي

قم سو فنجالٍ ترى الشـاي لبتـون
والماء الريعة والهـواء مستعيـدي

مقيالنـا فـي طلحـةٍ فيـهـا دون
نوجٍ سموم ونـوج بـرد وجليـدي

يسوى حياة اللـي سـواة التلفـون
من شبتـه بيـن العجايـز بريـدي

راع البلد يا ميـت القلـب مسجـون
أضـرب تهاتيـه الخـلا تستفيـدي

أبطش ديار القوم والرزق مضمـون
تصيـدك الأقـدار وألا تصـيـدي

وأحذر تخاف ألا الذي كون الكـون
رب السماء محيي العظام الهميـدي



قصيدة : نو تحدر
بديت ذكر الله علـى كـل جابـه
يستاهل الذكر العزيـز الجليلـي

وقفت عند اللي زبن مـن لجابـه
وهي وقفت المضيوم عند الاصيلي

ياشيخ أنا وقتـي ضربنـي بنابـه
من واهجٍ بالقلب حالـي نحيلـي

واللهم صلي علـى خيـر مابـه
والا ترى الدنيا جداها الرحيلـي

نـوٍ تحـدرٍ قيـل ويـن تهقابـه
وأظن له من عنـد ربـه دليلـي

جعله على ظفـره ينثـر سحابـه
ينهل من ظفره إلى أطراف هيلـي

يسقى وطن شيـخٍ عزيـزٍ جنابـه
شيخ عدل مجرى الشريعة سبيلـي

أبن الخليج اللي طلـع وأرتكابـه
ورسى كما يرسي حفيت الطويلي

يوحش سلاطين الرجـال أقتلابـه
لاهوب لا يجلس ولا من مقيلـي

يقفي ويقبـل مثـل سبـعٍ بغابـه
حلحيل حيالٍ علـى كـل حيلـي

ياما كسبنا الطايلـه فـي جنابـه
والله يخون اللي يخـون العميلـي



قصيدة: حجى الروحياونةٍ ونيتهـا فـي حجـي الـروح
ونـة جـزع ماهيـب ونـة مـودة

يا جهاد ضاق بي الوطن وين أبا أروح
ولا عاد لي يا جهـاد فالبقـع لـده

لولا طويـل الرجـم يابـدر لأروح
مير أبدي المرقاب والشـوف أمـده

يبدي طويل الرجم من كان مجـروح
لـولاه يبـدي الرجـم ينبـاح سـده

يويق في المرقاب لوماش مصلـوح
ورجله لمبدأ فـي الجبـل مستعـده

ماغير اكابد عبـرة العيـن وتفـوح
والجسم مـن قـو القلـق راح قـده



قصيدة: موميةٍ عراويه
محمد القلب عايني إمجازيـه
حتى يريـح عيونـي لا يشقيهـا

لو كل رجم يهيض القلب أعديـه
يمكن تكسر ظلوعي من مثانيهـا

وألا ترى القلب مومية عراويـه
لا تحسب أنه طروق الود ناسيها

أوماي غـربٍ مثقلـةٍ عراقيـه
على قليـب نواعيـره سوانيهـا

تسناه ملحا هميد الـزرع تحييـه
من كثر ما تزعب الماء قل واليها

تدرج محـالاً يروعهـا غنانيـه
ميرادها ريض لأن الصدر قافيها

[التركي]

قصيدة : طولن بالوقوفي
لا والله ألا طولـن بالوقوفـي
عيا يحملهـن خبيـث التجـاره

بفلوسنا يا عبيد ماش معروفـي
متى نجي ياعبيد مع خشم صاره

ياراكبٍ من فوق صاف البلوفي
مقعد أنبير الزيت نيم الحـراره

فراق ما بين القلوب الولوفـي
فرتٍ كما وبل السحايب غبـاره



قصيدة : هال ما طال
عـز الله انه هال ما طال يا سعيد
زل الشـهر والوقت طوال بديده

اللي من اول للخلايق مـواســيد
اسقي غــرير الهم لـو يستفيده

قم يا رشيد الحق واقول يا رشـيد
الله عليك انت من ايا بـديـــده

اما البديده منك عــند المواعيد
ولا همومك من حياتك زهــيده

ابستفيدك كان جــربت افــيد
تنام واسمك حول الاسمر رشـيده

لي قصة يشهد بها راضــع الديد
يعدهـا غـيب السراب الطريــده

طويلة عريضــة بالتماجــيد
يفرح بها الطيب فعول مجــيده

طــويلة عـريضة بالمناقــيد
يفرح بها النمام شين العقـيـده

جار الزمان وعاونوه الحواقــيد
اللي لهم من قبل ذلك حـقيــده

يا رشــيد يوم اتعبتني بالتناشيد
خذلك من الدرويش زبـدة قصيده

واليا ذكرت الله وكثـرت تمجيـد
تـرى محمد صفوة الخلق سيده

ترى ابرك الحزات يوم صدف عيد
جمعة اسبوع وصادفت يوم عيده

أذكر لك الأجواد صد وصـواميد
وانذال لاصدوا ولا من صـميده

واذكر لك اقشر ما على السيد والبيد
اللي طمع بنت القصير الحـديــده

فضحة قصيره عنده انه اكسب فيد
سوالف بهـا للناس خطو البـليده

سوالف بجرح سال جرحه تضاميد
زود لجرح الجـرح ينزف صديده

من لاستر خـلات غـرات اجاويد
هذاك نــقال الخبيثات بــيـده

وليا وطاك اللي وطاني تراديــد
رد السؤال ولا تحـير بريــده

وانا الذي قـد مرني سلك تجنيد
خدمـت بـه عدة سنين مديـده

مر حول هم وكل شـي لـه احيد
احيد زين وشين والهم احــيده

اسمع صريرالقلب بين الحواديـد
حدنه الضلاع واسمع رديـــده

والله ما همني قاضي العمر ترغيد
ابـن اللئيم اللي حياتـه رغيده

اهـني الكلب الحجل بالمراقـيد
وضب الخلا لو كان يأكل رديـده

قصيدة : فرت كلاسيكي
راكب اللي من حفيزه للحدودي
عقّب العشرين طبلون اميتينه

فرت نوع كلاسيكي ماله طرودي
أبيضٍ في البيت الأبيض فارقينه

يرفعنّه نايماتٍ بالعمودي
والهوى والنار يرخنّ المكينه

يوم مرّ خريص مع عرق النفودي
قاومه صوت القيامه في المدينة



قصيدة : يلعب دركسونه
الا يا نديبي فوق من ينطح التهريب
ليا عدّ ميّه قام يلعب دركسونه

أببعد عن الشرطة وأفارق جنود الذيب
لدارٍ يبيدن الونيتات من دونه

وياحن قلبي حن فرت بعد توضيب
تحت خارجيٍ ماطفت نار غليونه



قصيدة : مفجرات السراعه
يا اهل الونيت اللي يشق الدهو شقّ
يصفر صفير مفجرات السراعه

أمّا اركبوني يالنشاما بلا حق
والا أوصلوا مرزوق منّي وداعه


ويذكر ان قصيدته هذه التي قالها في الشيخ زايد , غناها المطرب الاماراتي عيضة المنهالي كأغنية وطنية


يقول بندر بن سرور:-
بديت بذكر اللي بسط سبع بأوتـــاد
واللي رفع سبع بليـــا عمدها

وانكار للي صار غيث للاجــواد
لا قبلها صــــارت ولا من بعدهــــا

زايد على كل العرب بالوفــــــا زاد
زاد المراجل لين وقف عددهـــا

هالحين حلـوٍ مر زراع حصــاد
كبـد يداويهــا وكبد لهدهـــــــــــــا

حتى العجــوز اللي ورا شط بغــداد
سمت على الشبل فلاح ولدهــا

تبغــاه يطلع مثل زايــد ولا فاد
لاكل من هاز الطــويلة صعدهــــــا

ياشيخ انا جيتك على غير ميعاد
من خوف روحي لا يجيها وعدها

[التركي]

عديت عصر ودرج الحجر من ماه _ والقلب عيا يستمع في مشيــــــره
ياونتي يابدر قلت اه ثـــــــــــم اه _ على ثمر قلبِ غدى بـــه دبيـــــــره
وجدي على من راح يابدر وجداه _ وجد الطريح اللي عظامه كسيـــره
خلوه ربعه في نهار المثاراه _ رموه عنهم في نحـــــور المغيــــره
جاين لدمع العين يابدر مسقاه _ يسقي القطيع اللي صفت عنه بيـره
لو ينشرا بالمال برهج ضماياه _ صدر بعد معطان قاضِ صديــــــــره
عيني تهل الدمع من بعد فرقاه _ مثلي جداه الدمع يالله خيـــــــــــــره
واجر قلبي جر غربِ بعرقاه _ من عيلمِ عوهن هماجِ مريـــــــــره
علق سريحه فوق زرقا معفاه _ هزع الوروك اللي متونها مستديره

[طالع]

الله لايهينك على هذا المجهود الكبير اللي سويته يالتركي

[التركي]

هلا
هلاهلا
هلاهلاهلا
هلاهلاهلاهلا
هلاهلاهلاهلاهلا
هلاهلاهلاهلاهلاهلا
هلاهلاهلاهلاهلاهلاهلا
هلاهلاهلاهلاهلاهلاهلاهلا
هلاهلاهلاهلاهلاهلاهلاهلاهلا اخوي عيد الجماعه وغلا
غلاغلا
غلاغلاغلا
غلاغلاغلاغلا
غلاغلاغلاغلاغلا
غلاغلاغلاغلاغلاغلا
غلاغلاغلاغلاغلاغلاغلا
غلاغلاغلاغلاغلاغلاغلاغلا
غلاغلاغلاغلاغلاغلاغلاغلاغلا
غلاغلاغلاغلاغلاغلاغلاغلاغلاغلا مشكور علي المرور يالغالي

[ابن ثريان]

كلمة شكراً قليلة في حقك ولا توفيك

وعندي استفسار عن قصيدة الرثاء التي عنونت لها (مرثية امه حصه بنت غلاب )

اخي الكريم
قبل مدة واعتقد قبل سنة او سنتين او اقل قرأت في احدى مجلات الشعر الشعبي لقاء مع ام بندر بن سرور فهل يعقل هذا ....؟؟!!!

اذاً في من قيلت القصيدة ....؟!

[التركي]

اخوي الغالي بن ثريان يعطيك العافيه علي مرورك طال عمرك وبالنسبه للمقابله انا ماقريتها والاسمعت عنها وقصايدها في بندر واجد منها 13 قصيده انزلت في اخر ديوانه تحياتي لك اخوك تركي

[فهد العايضي]

اخي المبدع والمتميز دائماً تركي

اشكرك كل الشكر ولو اني احس أنها لا تكفي

لما تقوم به من جهد بمواضيعك المتميزه والجميله



تقبل مني كل الشكر والتقدير

اخوك ابـومـشـاري

( الـغـريـب )

[فهد العصيمي]

يعطيك العافيه على المجهود الكبير ولا هنت وموظيعك المميزه يالمميز ماشالله عليك وتقبل فائق احترامي.

[النـايــــــف]

جهد رائع اخوي التركي


بيض الله وجهك يا الذيب



تحياتي لك ،،،،،،


اخوك النـايـــــــف

[إبن ثعلي]

بيض الله وجهك اخوي التركي علىهذا المجهود الرائع
تحياتي

[التركي]

مشكور اخوي ابو مشاري علي المرور ياغالي تحياتي لك اخوك تركي

[التركي]

مشكور اخوي فهد العصيمي علي المرور تحياتي يالذيب اخوك تركي

[التركي]

يعطيك العافيه اخوي النايف ومشكور علي مرورك يالغالي اخوك تركي

[التركي]

اخوي العزيز بن ثعلي مشكور يالذيب علي المرور تحياتي لك اخوك تركي

[الفهد2010]

مشكوووووووووووووووووووووووووووووووووووووووووووور على النقل يالغالي

[التركي]

العفو اخوي الفهد تحياتي يالغالي

[ابوسـعد]

الله يرحمك يابندر وفي الجنه يزلفيك
مثل ما يزلفي اعبادة المصلين
وشكرا يالتركي

[التركي]

العفو يابوسعد تحياتي لك

[ابوسـعد]

ماشاء الله جاهز وعلومك طيبه......ومقبوله التحية واليك افضل منها اومثلها............شكررررررررررررااااااااااااااااا ااااااااااااا

[التركي]

ماشاء الله جاهز وعلومك طيبه......ومقبوله التحية واليك افضل منها اومثلها............شكررررررررررررااااااااااااااااا ااااااااااااا
اعلومك اطيب يابوسعد بس وشنهي اللي لي مثلها او افضل منها وضح يابوسعد