سلام الله عليكم ياعتيبه

[لطّام العدى]

اخواني شعراء المنتدى انا لا ادعي الشعر ولكن انا متعلم
والعليمي لازم انكم تتحملونه ومع هذا وذاك انا احب التحدي
واللي يتنازل لي يتقدم والوعد قدام




سلام الله عليكم والوعد قدام ياعتبان ...... انا معكم عتيبي والعتيبي يحتمي قوله
انا ترى لطام لطام العدى من الشجعان..... وادوّر شاعر يبدع ولا يهرج بمنقوله

[إبن ثعلي]

هلا يامرحبا ردية من خاطر نشطان =هلا يا مرحبا عداد وبل الصيف وثعوله
لكن الصقر لو هو جاع ماياكل من الذرعان = حقيقه واضحه ما هيب مكنيه ومجهوله

[لطّام العدى]

حياك الله يا ابن ثعلي والف شكر لك على تواضعك الكبير
واستلم لاهنت


يدوم الك البقا يالشاعر اللي تخلف القيفان..... عدد ماهل وبلٍ فالربيع وزان مفعوله
يقولون الزمن ياصاحبي ماينعرف بامان ...... ومن يدري يجي وقتٍ يهرش الصقر من زوله

[إبن ثعلي]

استلم يالطام العدى

انا ترحيبتي لك يالعتيبي كلها من شان = اناأول من لقاك وقدمك الابواب مقفوله
سلوم اجدادنا مخبورة من ماضي الازمان = وعسى ربي يكافينا صروف الدهر وافعوله

[لطّام العدى]

استلم يا ابن ثعلي لا هنت
انا خابرك فارس ياعميلي داخل الميدان...... ليا حمي الوطيس ودق حرب القاف لطبوله
وبيبانك ترى عندي خبرها تجذب الضيفان.....ولك يمناً جزيله بالعطى ماهيب مشلوله

[إبن ثعلي]

استلم يالطام العدى لاهنت

يالطام العدى توي عرفتك فار س الفرسان = ومنزالك على يمناي يوم الدار منزوله
وحنا في هدف واحد سوات الراس والعينان = ولا زدنا عليك بشي كثرالهرج وش هو له

[لطّام العدى]

ههههه
يا ابن ثعلي انت دايم كبير

على هونك معك بندقك ياللي تحفظ النيشان ..... بغيتك للهدف لكنّك انته منته بحوله
انا بنشدك ويش اللي حصل في ديرة القيعان..... وعن فعلك بخصمك عقب مادارت لكم جوله

[** راس حربه **]

ياسلام ياسلام

<<<<>>>>ماسك الصفوف

[لطّام العدى]

حياك الله ياراس حربه وجعلك على القوه

[إبن ثعلي]

استلم يالطام العدى

علامك ياعميل الخير تصغي شوكة الميزان = اظنك من ديار مسنيه ما هيب ماهوله
علوم روحت من عام الاول كان ياماكان = نسيناها وندعو الله يحفظ حاكم الدوله

[لطّام العدى]

على ظهر البحر تمشي سفينتكم بلا ربان...ولو يعرض لها موجٍِ غشاها الموج من هوله

لكنّ ارسوا على بر البحور وعوّذ الشيطان.... واذا شفتوا بروقٍ خيّلوها واتبع سيوله

[إبن ثعلي]

استلم يالطام لاهنت

عبرنا البحر وارسينا السفينه فوق بر آمان =وثبتنا حدود الكسب والاسناد محموله
عباد الله تشهد بالحقيقه كل شي بان = لكن عن الحقيقه بان لي في عينك الحوله

[لطّام العدى]

ههههه
ابقى دائما واقول كبير يا ابن ثعلي
استلم لاهنت

زعرّك ياعميلي ترفع الاعلام بالعمدان ..... ولك شلفاً تقصّ حبالكم لو كان مفتوله


وابا اختمها واقول الله يخلي طير ابن برمان ..... عليكم بالمحاني كثّروا خبزه على فوله

[إبن ثعلي]

الكبير الله يالطام واستلم

رفعناها وشافوها العمي وسمعوا الصقهان=وبعض عدواننا ما همنا فعله ولا قوله
وانا كنت احسب انك ياعميلي طير حوران=لكنك رحت تختار الوطا وتبات بسهوله

وما قصرت لطام العدى واجبرتني على مجاراتك في محاوره ما كانت في الحسبان حيث كان هدفي الترحيب بك ببيت واحد
صح السانك ولك جزيل الشكر
تحياتي

[لطّام العدى]

استاذي ومعلمي ابن ثعلي الف شكر لك على تواضعك
ومجاراتي في هذه المحاوره التي افتخر بها لانها
كانت مع استاذ من اساتذة المنتدي وارجو ان
تسامحني ان كان هناك اي خطأ غير مقصود
ولا تنسى انني مازلت عليمي
تلميذك
لطام العدى

[** راس حربه **]

صح السااااااااااانك يابن ثعلي


وصح السااااااان يالطام العدى



ولاهنتي ياشعااااار وبيض الله وجيهكم

[إبن ثعلي]

مشكور يالطام العدى على سمو اخلاقك
ولو تابعت المنتدى فلن تجدلي قبل هذه المحاوره اكثر من بيت اوبيتين
شكرا لحضورك وتحياتي لك

[إبن ثعلي]

اخوي راس الحربه
مشكور على تواجدك وتشجيعك الحار
تحياتي

[عبدالله المطيري]

الله الله محاوره قويه

من الوزن الثقيل

صح السانك ابن ثعلي

وصح السانك لطام العدا

[عبدالله الرويبخ]

يسلام ابيت مليانه ومعانيها جميله بين اطرفين لطام العدى انت شاعر ولا عليك كلام وبن اثعلي كذالك مع خبرته والله يوفكم :)

[إبن ثعلي]

اخوي عبدالله المطيري
صح بدنك ومشكور على تواجدك
تحياتي

[إبن ثعلي]

اخوي عبدالله الرويبخ
مشكور على تشجيعك وتواجدك
تحياتي

[لطّام العدى]

اخواني

راس حربه

عبدالله المطيري

عبدالله الرويبخ

الف شكر لكم على مروركم الجميل والرائع والمشجع لي

تقبلوا تحياتي واحترامي

اخوكم

لطام العدى