عنصرية

[سمران القثامي]

يالله المعبود غياث الحزوم الجرهدية=يامغيث الأرض من برق تلاعب في مخيلة
ياكريمِ لاعطيت النفس تجزل فالعطية=رحمتك يوم يتبرا كل خلِِ من خليلة
هاض هوجاس المثايل والطروق السامرية=من ضمير لادعا عذب القوافي طاب ليلة
ابدع البيت ويجي لي فوق بدعه معنويه=واعسف مهار المعاني مثل ركاب الأصيلة
شاعرِ ماجابها فزعه وتجميع وهميه=لادعا شرد المعاني جات حتى تستوي له
كل بيتِ فيه من ريح النفل والجاونيه=والشمطري لاتلاعب ذاري الغرب بخميله
ناصي بالشعر زيزوم الرجوله والحميه=كاسبِ علم الشرف والطيب شيال الثقيلة
وان مدحت معرب الجدين ماني في خطيه=الخطية مدحة اللي لاوقار ولافضيلة
مامدحت الا الرجال اهل الوفاء والمكرمية=الرجال الي مواقفهم تنومس فالقيبلة
الرجال اللي على الشدات وقفتهم قويه=مثل ابوسطام راع الطيب كساب الجميلة
ان نصيته مالقيت الا الشحم والشاذليه=وانشراحة خاطرِ يفرح بضيفان تجي له
مسنده شيخِ يعادل بالغلا هذي وذيه=من رجال فالمواقف لاتهاب ولاذليلة
ماذكرعنه التغطرس والتردي في خويه =نادرِمثل الحرار اللي تميز فالفصيلة
قلتها مازدت فيها لاكثير ولاشويه=كل خصلة من خصال الطيب طبع وتنتمي له
مثل عبدالله ينومسني وعندي عنصرية =للرجال اللي لهم مفعول في وقت الصميله
ان دعاني جيت اسابق خطوتي..حقِ عليه=من دعاني في محله بالوفاء والله لااجيله[/poem]

[الشـامخ]

صح لسانك

[مرودع الوشام]

ياكريمِ لاعطيت النفـس تجـزل فالعطيـة=رحمتـك يـوم يتبـرا كـل خـلِِ من خليلـة


صح لسانك والله لا يهينك.....

قصيدة رائعه..


تحياتــــــي



مرودع

[طالع]

صح لسانك ياسمران

وبانتظار تواصلك معنا يالغالي

تحياتي لك

[الركــن]

الاح سمران
صح لسانك وبيض الله وجهك على هذه القصيده الرائعه


أخيك : الركن

[النـايــــــف]

صح لسانك اخوي الغالي سمران


وبيض الله وجهك يا الغالي


تحياتي لك ،،،،


اخوك النـايــــــــــــــف

[إبن ثعلي]

صح السانك ياسمران بالعون انها تجيلك مفردات القصيده طائعه مطيعه
تحياتي