فوضوية .........

[ناصر الحربي]

من هنا تصريح لأفكاري وحروفي بفعل ماتريد ..


قالو ان الهرج هو سم الكبود= اشهد اني اللي نطق هذي صدق

[ناصر الحربي]

علموه اني بعد فتره بسافر= وعلموه ايزيد في هجره وصده
دام مالي عند بعض الناس خاطر= وكل ماسويت بيت الشعر هده
لعنبوه اكتب وعبيت الدفاتر= وادري انه بالشعر بيتين حده
صاحبي معجب بترديد الخواطر= ماعرف بالشعر في جزره ومده

[ناصر الحربي]

الطريق اللي مشيته يوم سبت= سقت به رجلي وانا ماني مريح
والله اني والمشاعر كبت كبت= مانويته بس بقول الصحيح
رحت لكني صراحه ماكسبت= جيت من دربي وانا عاشق جريح
جيت اشيل الهم يعني ماطربت= وصرت اغني شعر شعبي مع فصيح

[ناصر الحربي]

الله من ليلةً كثرت طواريها= يشتالني هم نوب ونوبً اشتاله
ان شلتها صعب مدري وين اوديها= وان قلت اجنب اصير بوضع يرثاله
والناس فالناس لاخابت هقاويها=كلاً يعدل مساره وبخص بحاله
يمكن حكاية غلى بالقلب نخفيها= ويمكن رواية وفاء ماهي على باله
ياكتب الشعر بالله اعتني فيها= خل القصيد تجي من فكر خياله
ان جات من قلب ضني يبتلش فيها= ويجر صوته على الطاروق مواله
والديره اللي كثيراتً حواريها= لو صاحبي ماسكنها يمكن اشواله

[ناصر الحربي]

هذيك والله لو بغت عين ناصر=لاقول تستاهل وحاضر ومنون
فيها وفا واخلاص بنت الاكابر=ولاتستمع في هرج ناسً يهرجون

[ناصر الحربي]

ودي اسولف معك .بس اتصالك والظروف= ماتساعد وانت تدري لاتجيب الغايبه
قلت اطوفها واعدي بس صارت ماتطوف= وانت كانك مافهمت الروح عندك ذايبه

[ناصر الحربي]

تقول ولا ماتقول انتهى الوقت= خلاص مايمديك والوقت خانك
يوم وشهر ساعه دقايق واحرقت= حتى الثواني خلصت من زمانك
ياصاحبي بدري ترى تو مافقت= الحين لاتعرض علينا حنانك
اقول تدري تو هالحين روقت= لكن فمان الله وانت بمكانك

[ناصر الحربي]

سم يابعد القوافي والقصيد
........................ امر امر انت تامر يابعدي

[ناصر الحربي]

مدري ولكن صرت احاسب حروفي=اخاف حرف يكدرك وانت رايق
ياسيدي بالله قدر ظروفي=وترى الجفا بالحيل ماهو بلايق

[ناصر الحربي]

تطنيش لكنه ماهو بأي تطنيش= تقول مايدري بحبً كتمته
عادي ولكني مع الناس باعيش= ىالقلب وش يعني اذا اني حرمته

[ناصر الحربي]

بين الغلا ومزراق الرمح والشلف= شبرين مدري قول شبراً وقفله
وانا مادام اني معه ذابح الحلف= لاوالله الا ماحصل منه غفله
عادي ترى لو كان بعض الهوى صلف= مادامها فعيون الاجواد طفله
مدري ولكن ياعسى ربك ايخلف= مدام لافرحه ولا عاد حفله
انا اشهد ان بعض الغلا ياعرب كلف= يعني على ماقيل ما ينعرفله
امشي بها قدام وتعود للخلف = معروف حضي دايماً ينوسفله
وبعض البشر حظه على دقة السلف = يعني لوانه دون/ حظه خطفله
اقسم قسم بالله ولا بلا حلف= ان القوافي من حلا الزين جفله

[ناصر الحربي]

ياشينها لاجتك تزحف على جنب= من ناس تبلش كيف تفهم خطاهم
لو كان مالي في مطاليبهم ذنب= غالين اشيمهم واقدر الحاهم
هذا وانا ماودي اكرب على الطنب= اخاف اقطع مابقى من غلاهم

[ناصر الحربي]

انا كيف ابنسى من نحت بالضلوع اسطور= ما كفاه قلبي قام ينحت على اعضامي

[ناصر الحربي]

كني لقيتك في متهات الزمن رغم الضياع= ورده ولكن ذابله تشكي من ايام الجفاف
ماكنت اصدق هالزمن يبخل عليكي فالمتاع= لكنني بالعين شفت اشلون بالوقت اختلاف

[ناصر الحربي]

والله انه مايعكر فالمزاج= غير لاجتك المطمه من حبيب

[ناصر الحربي]

يابو اسامه كان ماجت على الكيف= واختلفت الايام بينك وبيني
ولا حصلي خوتك بأول الصيف= عزاه ياحالي وياشيب عيني

[ناصر الحربي]

منهو يقول ان العتب يشيل وقفه بالصدور=الا ترى كثرالعتب ينهي علاقه قايمه

ياصاحبي مادمت واضح دائما وسط الحضور=حاول تخف شوي لاتقعد عباداً نايمه

[ناصر الحربي]

كني اللي واقفً وسط الطريق=لاقدر يمشي ولا يرجـع ورا

من يشوف الدمع بعيون الغريق=ياترى منهـو يشوفـه ياتـرى

[ناصر الحربي]

الحقيقه لو حسبناها حساب= ماتغير شي في نفس العدد
وضعها ثابت مايقبل اقتراب= مستحيل تظيف ارقامن جدد

[ناصر الحربي]

للادمي في بعض الأحيان سجه= ياخذ مع الأفكار صوله وجوله
حتى لو ان المجتمع فيه لجه= يسج تقل الناس ماهي بحوله

[ناصر الحربي]

كنت اذكرك متغطرسه ماتقبلين الأنصياع=والدمع فعيونك كذا ماتقبلين انه يٌشاف
واليا طلبك ايات شخص بحق حٌسن الأستماع=سقتي عليه من الهبل مايجبر العاقل يخاف

[ناصر الحربي]

شاعر ولكني مصنف من هل الوزن الثقيل=والشمس لاغابت لزوم يبين لك مشراقها




ياهل البيوت النادره والشعر والقول الجزيل=اعتب عليكم والروايه لاتضيع اوراقها




رسالتي مدام واصلت مايكثرها القليل=ولا يقللها الكثير اليا كربت اوساقها

[ناصر الحربي]

مريت ضيف اشعب ذلولي لكن اني من غلاك

خليتها تبرك غلا حرام ماهي طهبله


ولاهو غلا عشق او غزل لا والذي بأمره عطاك
من البيوت الكايفات المبهمات المقفله


لكنها حشمة قبيله وادري انك ماعلاك
بنت الرجال ودون حقك ماتضيع الأسأله

[ناصر الحربي]

ياصاحبي يالمرشدي تعال عندي لك سؤال=ابغا الاجابه وافيه من راس والطيب محجوز
هل هو يجوز ارضي حبيبً مايعرف الا المحال=بالله قلي يارفيقي هل يجوزاو لا يجوز
ياصاحبي والموت خلي تب بأوصاف الجمال=لكن عليه الله دايم يلتمس عنده فيوز

[ناصر الحربي]

وصلت تراها كامله مابها نقص=وانا شرحت السالفه كلها لك
ابيوتي شعري ماتغنا على الرقص=لامن كتبت القافيه من خلالك
حسب اختلاف الناس والوضع والطقص=اسوقها لاشين الله فالك

[ناصر الحربي]

يابو بدر بالله طالع بالرصيف اللي هناك
بالله طالع شوف يعني كيف وقفتها دلع


يالله وانا ماني بلا قدمك ولا ماشي وراك
ياصاحبي عجل ترى ها الزين مبطي ماطلع

[ناصر الحربي]

سلام الله سلام الله سلام الله على الغالين
سلام الله على خلاً ماندري وين مسكانه

اليها كٌل تقديري مدام بكل يوم تبين
بعين انسان يرسمها على بيته وجدرانه

ايلملم كل لحظة وصل تقل اعيشها هالحين
بصمتً يكتم انفاسه وياخذ باقي اشجانه

ويفرح بس في لحظة هدوء من الزمان الشين
يصارع همه بنفسه ولاشارك به انسانه

[ناصر الحربي]

القصيد اليوم مدري وش علامه ويش فيه=كل ماسويت بيت البيت الاخر يتبعه
حضرت يالعن ابيها لاحشى يالعن ابيه=قاف شعراً واعترضني ياعسى الله يقلعه
يوم جمعه كل مسلم يطلب الله ايهديه=لكن ان القاف حول غصب وازريت امنعه
والله ان الشعر بلشه والقصيد اللي نبيه=حاضراً في كل لحظه مايبانا نجمعه
لكن ان العذر عندي كل بيتً يحتويه=فلسفة شاعر يعيش الشعر رغم المعمعه
بكتب اللي ماطرا واجيب شيً يعتريه=من احاسيسي بحاول فيه وارجع وطبعه
الحقيقه نور لكن قلت والله ما رتجيه=ان رحل يرحل بكيفه وان رجعلي بقنعه

[ناصر الحربي]

القيض جانا والعرب تبا تعود للمقيل= ويارعي الفاطر خلاص اقرب على ميرادها
لاعاد تبعد بالحلال ولا تفكر بالرحيل= اقرب ترى فاتورة الماء زايداً عدادها
واليا طفشت من البلد عود وقل صبرً جميل= واعرف بأن لكل نفس من البشر ميعادها
واترك كلامٍ نسمعه عديت بالرجم الطويل= الرجم ولا والعرب بلشانةً في زادها
حنا دخلنا في زمن ماعاد يكفي به قليل= صارت نفوس الناس قشرا والقشر مافادها
كلن يناظر صاحبه وش عاد عنده من حصيل= ولازم نجاري هالبشر بقيامها وقعادها
كنا نسينا ها العمر لو طال لابده يزيل= وان القبور بكل يوم تزيد في روادها
يالله يالفرد الصمد عبدك وزابن لك دخيل= اغفر ذنوبه ياكريم ولا تزيد اعدادها

[ناصر الحربي]

اطيع بعض احيان واحيان ماطيع = يعني على حسب الطلب ياغناتي
تدرين وش معنى بني ومفاريع= الموت يعني من جميع الجهاتي

[ناصر الحربي]

تعال ياقافي انوزع وحسب حساب الدبل=وترى الحكم ياقاف شعري مايصير بلا ولد
العب معي صح انتبه مافيه داعي للغلط= وان صحت لك قلت اربعه اطلع سنود مع الجلد
شاعرك شاعر لالعب يلعب على كل الورق= يمكن يخلد قاف شاعر بس شاعر ماخلد
نظم البيوت الكايافات المبهمات الها عدد= والا البيوت التايه تحسب للشاعر من ملد

[ناصر الحربي]

..

..

..



عندي على بعض القصايد تحفظ= اقصد قصيدي مالي بشعر غيري

[ناصر الحربي]

يا سعود غازي تراني شفت= بعض البشر لاحقه شكه
ان قلت كيفك ياجاوب زفت= دنياها ياسعود منظكه
والله يالولا من الله خفت = والله والله مافكه
ومدامني بالحرم قد طفت= ماني مكلف بأهل مكه

[ناصر الحربي]

.
.
.


خلوني ابرقد واباغط ورتاح= ماعاد لي بمطارد العشق حاجه
اخذت حقي منه والجراح ذباح= ولا عندي استعداد ارجع وواجه
لو كان برق العشق في ناظري لاح= ياقلب شف عقلي يناجيك ناجه

[ناصر الحربي]

اذا كان القصيد اللي نقوله للرفيق ازعاج= بلاش من القصيد اللي يغث بنظم قيفانه
مدام الشعر سبب لي مع اقراب من عرفة احراج=ونا ماني بلا عاني ولاطقيت بيبانه
ابيوتي دوم من شانه تجي وسط الظلام اسراج= اعزه _ وحشمه _ عندي رجح بالكل ميزانه
ترى نقدر نقفلها على الطاروق بالمزلاج= ولا ناخذ ولا نعطي ونترك كلن وشانه
لكني وان خسرتك وش يفيد الشعر ياهداج= اذا كان القصيد الناس تاخذ بس عنوانه
اعذر الناس لكن انت عندي للهموم اعلاج= بمعنى اوضح ترى الغالي يهز القلب وركانه
ترفق يارفيق الدرب قبل الحبس والأفراج= تجيني منك توجعني .وغيرك مالها خانه
اجل وشولن تحسبني نويت القصف بالميراج= وانا اللي ساكنً بالبيت واعرف كيف بنيانه

[ناصر الحربي]

كنت ارسم الحب وامآلي هي الرسمه=لكن دنياي ماجتلي على كيفي
ياللأسف حب عابر كنه النسمه=يعني دقايق كذا ثم ارتحل ضيفي
يالله د خيلك من المكتوب والقسمه=ان كان بعض الغلى مافيه تصريفي
ياقلب حاول على الموضوع بنحسمه=بلاش ندخل متهات المواليفي
تدري بصاحبك من فعل الهوى جسمه=ماعاد ينطح ولابه حيل وضعيفي
وتدري بصاحبك كل المرجله باسمه=اليا اكترب حبلها مامن تكاليفي
بس الهوى لارحم جده ترى وسمه=يضهر على الرجل ما يحتاج توصيفي
ويالله دخيلك من المكتوب والقسمه=ان كان بعض الغلا ماهو على كيفي

[ناصر الحربي]

.
.
.

ماعاد لي قدره ولا عاد بي حيل= مليت من حال الشقا والتجافي
مليت من وضع العنا والبهاذيل= الي هنا وارجوك يازين كافي
مانته بفاهمني وانا ماقبل الميل= وصعبه نعيش ايامنا بأختلافي
رح في طريقك ياعساها تساهيل= وانا اوعدك يازين مانظر خلافي

[ناصر الحربي]

الرجل لاماجات فيه الحميا= يالعنبو مجناه وشهو يجيبه
مدام عن ربعه جلس ماتهيا= لابوه لابو عيشته ويش ابيبه

[ناصر الحربي]

.



.


.


عبث جينا /تعب جينا / مزارق طيب/ مدري ويش=حضرنا هاهنا والله مع العالم يجملنا


مراهق لاحشى لله مابقي براسي طيش=واليا ضاقت عباد الله بالطاروق كملنا


رجاء لاحداً يتعب ولا يسأل حضرت إلاويش=ومن لزم يبي يعرف يحاول ويتأملنا


انا ياكثر ماكره من يكثر دايم التفتيش=واحب اللي تعاملهم يناسب مع تعاملنا


وكل انسان لو يولد بها الدنيا لزوم يعيش=تظيق الأرض بالعالم ولا تقدر تحملنا


الا ياصاحبي والعلم مايصل مع التغشيش=ولا نقدر نعيد الشرح تعبانه اناملنا
شرحنا لك كتبنا لك وقلنا هاكذا بشويش=ولو ندري بتفكيرك قسم بالله هملنا

اجل وشلون تبغنا نطير طيرماله ريش=بلادت فكرك الظيق تعارض مع عواملنا
بيوت الشعر لو جتنا تعادل في عددها جيش=ابقصرها عسى ربي مع اربوعك يجملنا

.
.

[ناصر الحربي]

هل تقبلون بشاعرً يكتب قصيده بأحترام= قصده يشاركم فقط وده يفيد ويستفيد
ان كان قلتولي نعم فا ياسلام وياسلام=لعيونكم بكتب هنا طاروق من راسي جديد
رغم اختلاف القافيه والشعر واسلوب الكلام=الا ان بعض الشعر يسبح في مجرات القصيد
عندي قناعه كامله والشعر له عندي مقام= ويعجبني اللي لانظم يحرص على العقد الفريد
الله يابيوتً تجيني مع بعضها بأنتظام=على هدف قافي كذا مافيه نقص ولا تزيد
من كثر شعار البلد ماعاد بالشعر اهتمام= حالة تشبع صايره من كثر مالشاعر يعيد
ياكثر ماحصلت قاف وقلت للشاعر تمام= ويكثر ماحصلت قاف اقدر اقول انه عصيد

[ناصر الحربي]

مع هاجس الذكرى سريت وطال ليلي وسهره
لابوك ياليل الغرام الله يقلع ساعتك


ان اشهد ان العشق نوب ايصير مافيه ثمره
خصوص لاحبيت شخصً مايحسب الراحتك

[ناصر الحربي]

رغم اختلاف القائمه في كشف الابيات القديم= ورغم انتحار القافيه الا ان هالطاروق غير
ياخذ سواد آخر مراحل ظلمة اليل البهيم = وياخذ شعاع الشمس فاخر حزة غروب العصير

[ناصر الحربي]

توي جديد ولا اقدر ارد يابنت= مالي صلاحية برد الرسايل

حاولت ارد الك الرساله وهونت=وجربت فالموقع جميع الوسايل

[ناصر الحربي]

بعطيك نبذه بأختصار/ عن اسم فارس مفرده= المفرده تعني فرس/ وانا ترى خيالها

[ناصر الحربي]

كتبت الشعر من عادي ابو عشر او ثمان سنين= وغنيته ولحنته وضبطته وجا مضبوط


اضنه موهبه عندي واذا ماهو كذا تدرين= ورثته واعتقد اني بموروثي هذا مبسوووط

[ناصر الحربي]

تقول شنهو جديدك ناصر الحربي= وقول انتي جديدي يانظر عيني
ابيوت شعري اليامن ذعذع الغربي= قامت من الشوق لعيونك تغنيني

[ناصر الحربي]

يارائده تبغيني اكتب في حدود المستحيل= ولا بنظرة ثانيه تبغين تحديد المحال
ومن منطلق فكري انا بجيب جزء من الحصيل= وبدخل مع افكاري وشعري في متهات وجدال

[ناصر الحربي]

بعض الدقايق ليتها عمر كامل= وبعض العمر ليته ثواني ومعدود
اقولها من جد ماني مجامل= وش تنفع الدنيا مع حظ مقرود

[ناصر الحربي]

ياصحابنا من بعد غيبه جيت وحمولي ثقال= اسوقها واقتادها واقتادها وسوقها
اسوقها للشرق مدري غير وجهتها شمال=تقل اعسرتني والعرب بلشانةً بحقوقها
على طريق المعرفه تعبت ادور للسؤال= اجابة تشلع قلوب الذل من معلوقها
رديتها مع دربها لأن فالعلم احتمال =وبعض احتمالات البشر ماينشرا في سوقها
تورد مهالك لاطرت على حدود الا محال= وتشفي قلوب اهل الجزاله لابدا منطوقها
ماهي على نية سوالف يختلط فيهاجدال= ولاهي عباة اللي بلش يرقع كبار فتوقها
من حق باب المعرفه قفلة بيبان الخيال=ولاعشت في زهرة غرام العشق مع معشوقها
مامن كمال بدربها لأن لله الكمال = وسبحان من ينشي مزونً تشتعل ببروقها
لكن تحديد الهدف من زاوية حدالمجال= اعقول تفهمها غلط واعقول تاخذ ذوقها
والشجره اللي ثابته يالله عساه للزوال= عن ديرة الأجواد تقلع من حدود اعروقها
جتني قوافيها كذا يعني تراها ارتجال= حرام ماثنيتها ولا قضبة اسبوقها

[ناصر الحربي]

انا اشهد اني ياهوى البال مغليك= وانته ولا كنك تحس بغلاتي
تخطي واسامح جعل ربي يجازيك= وعزي لمن مثلي سواته سواتي

[ناصر الحربي]

ادري بأني لو كتبت ابتعب حروف القصيد
............. مهما كتبت المفرده تقصر عن حدودالجمال

ياسيدي دامك فريد اشلون بلقالي فريد
.................وقافي رجع لي يعتذر يقول مافيها مجال

[ناصر الحربي]

من شان ناصر تركت الناس بالمره= ماعاد لي شف بالديره واهاليها
ياصاحبي مابقاله بالحشى ذره= امن الغلا لجل افكر في تواليها

[ناصر الحربي]

لا لقيتم صاحبي تكفون امانه بلغوه= الجفا والصد والهجران منه غثني
وكان ماهو مقتنع في قول ناصر ف أسألوه= ليه ينصحني عن المقفي وياما حثني