بـــلا حـــــدود ,،,،,

[عبدالله المرشدي]

السلام عليكم ورحمة الله وبركاته

هذا شي من بنات افكاري اضعه امامكم راجيا من الله ان ينال استحسانكم

وعلى بركة الله ابدا


بسم رب البيت خلاق العباد=ابتدي نظم البيوت بلا حدود


الخوه اللي تضيع بوجه ناكرها =ماتنومن لاغزاك الوقت والوابك
والخوه اللي تبين بوجه شاكرها =احرص عليها وكن الود لاصحابك
رفقة هل المصلحه ماكثر مخاسرها=حتى ولو كان راعيها من اقرابك
النفس ماني بدرب الضيق حاشرها=لوكان ماكان ماني طارقٍ بابك
مقرد الخلق تبغى من يقاشرها=تبلش بها كل يوم تشيل مشعابك



تجولي في داخلي لادخلتي =اهم شي اليا دخلتي تسمين
اخاف لامنك بقلبي حللتي=تستعمرينه مثل دولة فلسطين
استمتعي بالوقت لامن وصلتي=وترفقي بالاورده والشرايين
حتى لوانتي عابره مانزلتي =القي فقط نظره على ماتشوفين
وان كان مما صار مني جفلتي=تذكري ماقلت لك قبل يومين
اقدرك وارتاح لك لازعلتي = واشوف بعيونك رماح وسكاكنن
اعرفك لارقتي ولامن قفلتي =واقول ياشين الزعل للمزايين
اعطيك دامك تطلبي مامملتي=ماهو خساره كابته فالدواوين
انا ادري اني لو طلبتك بخلتي=حتى ولو كنتي كريمه وتعطين
كانك على ماقالو الناس قلتي=وش فايدتك مميزه بالعناوين
خلي شعورك يفضح اللي عملتي=قولي ترا الشعار فيهم مجانين
واقول بالله عاد دامك دخلتي =داوي جروحي قبل عني تروحين



الهرج واجد والفوايد قليله =عند الصمايل تختلف بعض الاقوال
قولٍ بليا فعل وش ترتجي له =ضربٍ من التظليل وازعاج واجدال
اللي يبا العليا يروم الطويله=يسعى لها ويثبت اقوال بفعال
واللي يبي درب الخنا والرذيله =يطلق عنان النفس ويعاشر انذال

همسة وفاء للاخ والصديق الغالي ناصر بن سعدي


اشهد ان الطيب في ناصر وراثه= وراثه عن جد جده من قديم

[عبدالله المرشدي]

بالشعر اسجل ذكرياتي ليا غبت=ومن مر عقبي يقطف اثمار قولي


كل مابالكون عده للزوالي=غير وجه الله تعالي مايزول



حي الذي في حينا حي حيه=يامرحبا به عد ودان الامطار
الصاحب اللي عاد مافيه زيه=ماله وصيف ولا شبيه بالاذكار


البخل رسم بالوجيه البخيله=يبين لاجا صاحبه يدفع ريال
بين النساء بالشكل تلقى بديله =فرقٍ بسيط وجوهر الشكل لازال


والله لتبطين وانتي في خفوقي=جالسه باقصى الضلوع متكيه
ادفعي قيمة وجودك بمعلوقي=كان للمال الحلال مزكيه


اللي جرحني يوم ناظرت قدري=على انتظارك يوم صديت مهدور
هزتني العبره وضيقت صدري=وامسيت ليلي من تجافيك مخطور


ماني بنا اللي لاقلط ياكل السور=ولاني بنا اللي لجل غيره يمرا

[عبدالله المرشدي]

لي رفيقٍ ماحفظ غيبـة رفيقـه=يـوم قفـى بالعراقيـب شذبـه
الصديق اللي تردا في صديقـه=ماستحى من كبردقنه وشنبـه
ماترك خطه ولا سار بطريقـه=يـوم روح بالمشاهيـب عقبـه
والله ان القلب في وسطه حريقه=والصحيب يزيد فيهـا بحطبـه

[عبدالله المرشدي]

الصاحب اللي في خيالي مصور=لو غاب عن عيني بقى منه صوره
حبه مع الايام زاد وتطور =باقصى الضماير قايم يبني قصوره
غلاه بعروقي مع الدم فور=وشوقه بقلبي زاد حالي خطوره
اللي بطوق الحسن كنه مسور=ياقوتةٍ بالزين جات مغموره
راع العيون اللي طرفها محور=كن المنايا في هدبها محصوره
زودٍ على سحر المفاتن تصور متواضعه جدا ماهي بمغروره

[عبدالله المرشدي]

النجمه اللي في سمايه تضوي=مامثلها بين النجـوم بسمايـه
لاشفتها ناديـت ياليـل تـوي=لاني اشوف بتالي الليـل آيـه
كني على الجنبين منها متكوي=تدري بلاش تقول هذي دعايه
ماحبها الا حبها صـار جـوي=لا والله اغليها فقط دون غايه
ياصاحبي ليتك ثواني تخـوي=ممكن تصير اجمل واعز خويايه


ليته يمر اللي كتبته ويقراه=من شان يسمع صوت شعري يناديه
اي والله اعزه واحبه واهواه=وارهن حياتي كلها بين اياديه


روحن جات الاميره روحن=فضن القلب المعنى للملاك
طوحن من فوق ضلعي طوحن =كان تبغن النجاه من الهلاك
ارفعٍ بيض الكفوف ولوحن=لالفت قولٍ لها روحي هناك


اليوم قررت ابتعد عـن حراويـك=من عقب مادورت لك بالحـراوي
ماقول اببعد عنك وارجع واراضيك=اقول انا فعلا على البعـد نـاوي
فيما مضى لاقفيت ملزوم اناديـك=واليوم قربك والبعـاد متسـاوي
بغيت قربك يوم انا كنت شاريـك=لكن وصالـك مايجـي بالمنـاوي
تعبت واتعبت القدم في مماشيـك=والنفس طابت من حياة الشقاوي

[عبدالله المرشدي]

كان جـت للجـد مافيهـا كـلام=ضاع وقت الناس في طرد السراب
البروق اللـي تكاشـف بالظـلام=هما التجريح فـي خـد السحـاب
مادرت عن دمعة مـزون الغمـام=ولا درت عن حال مضمين الركاب

[عبدالله المرشدي]

انا وين ابلقالي رفيق على مبغاه=معي معي لا من قلت يالله توكلنا
صديقٍ صدوق بكل ماتطلبه تلقاه=على الدين والمله ليامن تقبلنا

[عبدالله المرشدي]

اهلا هلا فيك لو انك سبب جرحي=وشلون اهلي وارحب وانت نهابي
سرقت قلب العنا واقفيت بالفرحي=وانا اتحراك كاني فاقد اعصابـي

[عبدالله المرشدي]

بالنهايه مايصح الا الصحيح= تسقط القوات لاطاح العلم

[عبدالله المرشدي]

رفقة هل المصلحه ماكثر مخاسرها=حتى ولو كان راعيها من اقرابك

[عبدالله المرشدي]

هيه انتي هيه انتي هيه هيه=والله انك في خفوقي تاكيه

[عبدالله المرشدي]

(الخيل والليل والبيداء تعرفني)=ماني بحاجتك ياللي تجحد اصحابك
منته بمشغول لاتقعد تصرفني=ماجيتك اطلبك تصرف لي من حسابك
ماتدري ان اتصالك مايشرفني =لابوك من جد لابو واحدٍ جابك
خلاص روّح كفايه لاتناقشني=مليت هرجك ولاني طايق عتابك

[عبدالله المرشدي]

مادام غيري يعجبك وش تبي في=خلك مع اللي معجبـك لاتجينـي
اي والله اني معجبٍ فيك ياوخي=بس انت شكلك بايـنٍ ماتبينـي

[عبدالله المرشدي]

اغليك واحبك واعزك واهواك=واموت في ريحتك واعشق ثراكا

[عبدالله المرشدي]

ياشينها لاصرت واقف لحالك=على طريقٍ مايمره ولا زول
تقول هالك وانت منته بهالك=مالك جدى ياكود ترديد يحول

[عبدالله المرشدي]

من لاعرف قدرك ليا غبت يفقدك=ويبكيك لاصكت عليه النوايب
ولاذاع صيتك قاصر الباع يحسدك=ويفرح بصيتك عزوتك والقرايب
وان فاض مالك نايد الخلق تاردك=وان قل مالك قالو الناس عايب

[عبدالله المرشدي]

المصيبه لاطعنك اللي توده في ظهرك=وانت غافل مادريت الا بعد رمحه طعنك

[عبدالله المرشدي]

لعنبو بليسك مابي غير انت بس=اي واحد غيرك من البيض لا



ياربعنا يامنجميـن القصايـد=ياليتكم عن مثل هذا تكفـون
ماينفع الهزله ثميـن القلايـد=لو كان خلق الله عليها يمرون
ترا كلامي فيه عـدة فوايـد=اقلها بالحكم ماعـاد تخطـون

[عبدالله المرشدي]

السوق دولي والبضاعه محلي=سعرك يجي من يخفظه لارفعتيه
مادام راسي للمتون متعلـي=ماطا برجلي في ترابٍ وطيتيه

[عبدالله المرشدي]

كلمة احبـك مالهـا اي تبريـر=الا الغلا والا التلاعب بالاعصاب

[عبدالله المرشدي]

يكرم رسول الله عن اللي سخربه=يكرم شفيع الخلق عن كل سباب


لي مهرةٍ تجمح ماهي بمعسوفه=عزة على الفرسان محدٍ عسفها


لاتقطع المشتاق نفحة عطورك=لو كان مره بس من يوم لايوم


الهافي اللي دايم يطيح ويقوم=اذا رفعته للسما جاك هافي


ياصاحبي للحب شرعه وقانون=ماهو على ماقيل كلمه بلا روح


نفسي لها عن ماكر العز تنبيش=وعيني سما لو كنت جالس على فراش

[عبدالله المرشدي]

ياليتني في حيهـم مابعـد جيـت=ولا صدفت الجادل اللـي تمشـى
ضاق الخفوق وقمت اجر التناهيت=باسباب منهو بالمفاتـن تغشـى
الجادل اللي فتت القلـب تفتيـت=حبه تغـدى بالخفـوق وتعشـى
قد قيل لي عن حيهم بس ماوحيت=قالو ترى فيه الضبـى ماتهشـى

[عبدالله المرشدي]

ماقلت بدي شين والامابديش=كلمة بدت من خاطري قلتها كاش
ياصاحبي لاصار بالفكر تشويش=يسج من كيفه ويضرب على ماش

[عبدالله المرشدي]

يازينها لالقيـت الفاهـم الواعـي=اللي على طول يلقطها على الطاير
ماتبتلش بالكلام اللي بـلا داعـي=امر تدلل وتلقـى مركبـك سايـر
والله مايدبلـك ياكـود فـزاعـي=واليا بدا العلم ماتلقى معـه ثايـر
ترى قناع الكرامه دايـم قناعـي=والحمد لله مانـي بالوعـد بايـر
احفظ حقوق العرب واكرم الساعي=واناصر اللي يجيني زابنـن نايـر
اكتم وادري ولو زادت بي اوجاعي=من وقتي اللي غباره بالقشر طاير
اعز نفسي بفعلي واونس اصداعي=لاشفت خبلٍ متكي في طرف عاير

[عبدالله المرشدي]

السابقه عنـد الرجـال المياميـن=ايحشمون الخبـل لجـل السنافـي
لاصار بيتك خاوي الساس من طين=يطيح لو تـذري عليـه السوافـي


ياناصر اثر الغضي ممنوع=ممنوع من طب حارتنا
يمرنا لا مشى مفزوع =ويروح لاعند جارتنا
الخط عن دارنا مقطوع=ماغير انا وانت سكتنا
اكثر هل الحي فيهم جوع=مافادهم جمع قطتنا
مادام مابالخفى ممنوع=لابد نقطع علاقتنا
الكهربا سعرها مرفوع=يمكن تقفل بقالتنا


زودٍ على سحر المفاتن تصور=متواضعه جدا ماهي بمغروره
مالوم قلبي بالهوى لو تهور=خليه يغوص الحب لاقصى بحوره
حبٍ على وضح النقى مايزور=علاقته بوضوح ماهي محضوره


قرب الرحيل ولابقى كثر ماراح=اللي مضى يكفي دروس وتجاريب
احٍ على آحين وآحٍ على اح=ياكثر ماضاعت حقوق ومطاليب

[عبدالله المرشدي]

اسمع كلامي لاتقول انت فاهم=ترى الحياه دروس واحزان وافراح
حافظ على دينك وبالخير ساهم=خلك لدرب الخير مرشد ونصاح
والوالدين احرص ودور رضاهم=لاتنتظر تبر احدهم ليا طاح
وابعد عن اللي قاصرات يداهم=خويهم مايسمعونه ليا صاح
الرفقه اللي ماتجي بالتفاهم =الا على مبدا المصالح والارباح
لاصار عندك مال تكسب رضاهم=وان قل مالك مالقو فيك مصلاح

[عبدالله المرشدي]

دام زرعك غيرك اللي يزرعه=لاتعجب وين محصوله يروح
كل شبكٍ قدم عينك تدرعه=ماتشوفه لين توجعك الجروح

[عبدالله المرشدي]

مافيه علم ولاخبر لـو تمقلـت=ماهي بنجـد ولا تعـدت لحايـل
انا الهـا مـادام فيهـا تزهلـت=انـا لهـا لاعـودت للصمايـل
لاجاتني فيها على طـول كملـت=بالليل والا عز حـر القوايـل
انت الرفيق اللي معي دوم مازلت=تضرب لماضين الفعايل مثايـل
والخاتمه لو جاتنـي ماتكاسلـت=مادمـت انـا وكيلهـا بالفعايـل

[عبدالله المرشدي]

اعتبرني نجم في جوك لمعت=لاعتذرت وقلت انا عابر سبيل


والله ان النفس طابت من دهاليز المكان=وامتلى الخاطر من الضيقه وصدر مرتوي



الحقيقه آآه يامر الحقيقه=لو يبين اللي خفى تلقى بلاوي

[عبدالله المرشدي]

نبحث ملفاتك ونقرا دفاترك=ونطلع اللي تدفنه من بلاويك

فاصله


احفظ لسانك وثمن ماتقول=قبل ماتنطق ويكتبها الملك
راقب الله في سكونك والفعول=زين الاعمال في مستقبلك
كل شيٍ من على الدنيا يزول =ينتهي في حين ويزول الفلك
من يطيع النفس في غير الاصول =اقدتا ببليس يسلك ماسلك
ومن يطيع الله ويطيع الرسول =بشره بالجنه اثمن ماملك
لا الاه الا الله اثمن مانقول=ترجح الميزان ويطيب عملك

[عبدالله المرشدي]

احسن بلاش مقاطعه لاتكلمت=اسمع كلامي ثم بعدها تكلم
ان كان توك جاهلٍ ماتعلمت=من كثرت الغلطات يمكن تعلم
حتى لو انك فالبدايه تالمت=اصبر وصابر لاتصيح وتالم

[عبدالله المرشدي]

لاتحسبني ميـتٍ فيـك ياهـن=واللي خلقنـي ماتلفـت يمـك
اشوفلي غربان فوقك يحومـن=وريحك يفوح وكل من جا يشمك
لو راحن ابياتي وزانك ولو جن=تخطيك لامن صار غيري يخمك
تطير من وكـرٍ لوكـرٍ مزيـن=وتلقى طيورن في كنفها تضمك

[عبدالله المرشدي]

بعض المواضيع ماودك تناقشها=مع جاهلٍ لاتحرك قال وش جابك
سوالف الخبل ماتعنيك طنشها=لو حزت بخاطرك لاتفور اعصابك


اسمعيني بس لحظه لو سمحتي=ودي اشرح لك واشخص حالتك
والله لتبطين وانتي ماسترحتي=دام فنجالك بجنب دلالتك
ادري انه مازعلك بس انجرحتي=تحسبيني معجبن في شالتك
اسبحي فالغي دام انك سبحتي=التعب ليديتك ورجالتك


اوعدك بالحقران يامنبع السو=اوعدك لاشفتك ماشوفك ولاشي


مايفيد الهرج من غير الدليل= خص لا من صار فيه مراقبه

[عبدالله المرشدي]

كتبت لك من صافي الشعر بيتين=فيها كتبت اللي ابيه واريده
كلمة احبك حطها بين قوسين=تبقى على اللي مثلك انته بعيده


حالتي وياك حاله مستحيله=لانت حاسمها ولاني مقتنع

[عبدالله المرشدي]

صوتك يسبب مشكله صدقيني=حتى ولو بين القلوب الولايف
اقولها من قلب بينك وبيني=ياهو مصيبه همس ذيك الشفايف
لو تنطقي حرفين تسحر فطيني=اشلون عاد اهل العقول الخفايف
الزين لفك من شمال ويميني=قليل في حقك حسين الوصايف

[عبدالله المرشدي]

اصيع مثل الغير لايمكن اصيـع=ابحث عن المخرج وادور نجاتـي
بعض المناظر كلها زيف تلميـع=لو تعترض لك من جميع الجهاتي
واقف محلى دوم لاشري ولابيـع=وانته بعد ظني تسـوي سواتـي
لولا الذي فجـر بقلبـي ينابـع=اللي معي من قبل جالس يحاتـي
كان انفتنت بصوت طق الاصابيع=واهتزت ايديني وطاحت عصاتـي
لكن انا ياخوك مالـي مراميـع=لوكان قيفانـي تجـي مقبلاتـي
حسبتها ضربتها عقـب تجميـع=لقيت خانـات الهـوا فاضياتـي
لو زودوهن بالذهب زود ترصيع=عيني تشوف ولاتميل شهواتـي
ياناصر القيفـان تلمـع تلاميـع=وبطونهـا بالغايبـه حامـلاتـي
نبغى نروح نقطع الخـط تقطيـع=يم العليـا بايسـر المرسلاتـي
دايم انا ويـاك نبنـي مشاريـع=ونجني ثمرها صـح بالمقبلاتـي
مقصودنا للشعر مزحه وترفيـع=على ظهور الخيـل والا مشاتـي

[عبدالله المرشدي]

لاجيت اسجل في غيابي حضوري=اخاف اسجل شي ماهو على الكيف
لاني اسجل مابدا مـن شعـوري=واقدر اهل الدار والجار والضيف
احيان يطري بيت وضعه ضروري=مايحتمل تاخير ماخالطـه زيف
اما ذكرته مـن قدايـم عصـوري=والاطرالي وامتثـل دون تسويـف

[عبدالله المرشدي]

الحمول ثقال والدعي ملبي= ان سرحنا الصبح والا قد سرينا
ناصر الحربي على الشعر متنبي=وان لقينا معمعه فيه اهدينا
يوم انا وياه سيرتنا تحبي=فالدروب الواطيه ماقد وطينا
اول المشوار صدفه ماتكبي=اجتمعنا فالمرابع مادرينا
في سهول وفي فياض وفي مطبي=طامنٍ عالي وجيانه تبينا
كل خرجٍ بالمواجيب متعبي=ماحسبنا حساب من طاح بيدينا
وحين قام غرابها فيها يهبي=عن حراوي شوفته شرق انتحينا

[عبدالله المرشدي]

ياحسين الدل يافـرخ الحمـام=ليـه دايم بالوعود تركني
في مواعيدك احضر بنتظام=خوف راسي من غلاك يصكني
لا لقيتك صارت احوالي تمام=ولافقدتك وسط صدري تكني
منك ماتحظى وعودك باهتمام=غير صدفه والصدف ماتمكني
سحرك اللي بان من تحت اللثام=لاذكرته في خفوقي دكني
وخدك اللي كنه بروق الظلام=سكني برقه ثواني سكني
لاتكاشف وانكشف حد الحسام=بان جمرٍ لانظرته شكني
يابديع الوصف يابدر التمام=ذبت من هرجتك يوم تلكني
اطرب لذكرك ليا مر الكلام=وغيرك ليا مر جلدي حكني
دام حكم الضرب فالميت حرام=طالبك هالحين تكفى فكني

[عبدالله المرشدي]

بعض البني تهدي ورود ورياحين=للي يجي ياخذ من الورد ورده
ماكنها الا وسط روض وبساتين =تاخذ وتعطي جوز واحيان فرده
خيالها به مسرحٍ للشياطين=تلعب على الحبلين ماهيب شرده
الها تجارب سابقتها تمارين=لين اصبحت بمزاول الشين مرده
انتاجها معروض وسط الدكاكين=باطرف محل تلقاه في سوق خرده

[عبدالله المرشدي]

الى متى يازين وانته تغلى =قلي امانه لامتى وانت قاسي
قلبي على نار الموده تصلى =وقلبك على ماظن داله وناسي
ماهو صحيح اللي تغلى يخلى=حقك حبيبي فوق راسك تباسي

[عبدالله المرشدي]

العاقله لاجات حلوه تكفي=تخفي بوادر زينها ماتنادي
فيها الحلا والحسن بس متخفي=تخاف تفتن لانظرها البعادي
منها نسيم الورد ذعذع يهفي=ينعش مرابع شوقها والبوادي
هي غاية المطلوب هي شف شفي=ان كان تبغين الكلام الوكادي

[عبدالله المرشدي]

بين النساء بالشكل تلقى بديله=فرقٍ بسيط وجوهر الشكل لازال
احرص على بنت الرجال الاصيله=السالمه من هرجةٍ القيل والقال
ابحث عن المنزال قبل تعنيله=ماكل شجره ينوجد تحتها ظلال
ماكل وادي لو تسايل مسيله =تطلع بوادر بذرته عقب ماسال
الطيب ميزه والفعول تهديله=ماكل من يلبس من الشمغ رجال

[عبدالله المرشدي]

دنياك هذي تراها ماشيه دونك=ان قمت وان نمت ماهي واقفه لجلك
دنياك تصفي معك يومين وتخونك=وانته تمنى على ماتشتهي تسلك
تشوفها ساميه في نظرة عيونك=حتى ولو لزمت من شانها تهلك

[عبدالله المرشدي]

يسليها التلاعب في مشاعر غيرها وتطيش=تقول ان البشـر بيدنهـا لعبـه تلاعبهـا


تدري باني صابرٍ ومتحمل=والا ترا مثلك فعوله كباير
ان كان تبغاني اكمل اكمل=لكن اخاف انك تهل العباير


توك تجيني عقب قضيت ليلك=وش حاجتي بك عقب مافاتنا الليل
كنت اتمنى واجدٍ من قليلك=كلمة هلا تشف القلوب المعاليل
خلاص انا قررت ادور بديلك=ابتركك والقى العوض بالمقابيل


التجريح مع التلميح=زي الدقه من بعيد
وضعك يبي له تصحيح=ليتك تفهم يابليد


لو تقول الصدق تاخذ ماتريد=التلاعب مايفيدك يانما
ادري انك مثل شيطانٍ مريد=مايهمك لا حدود ولاحما
فاكر انك صدق باسلوبك فريد=تحسب ان الناس بالوضع غشما
تاخذ من اللي يجونك بالبريد=تحسبٍ قدرك يبا يطلع سما
والله لتبطي وتبطي ياقريد=ماتناظر صح لو مانت بعما

[عبدالله المرشدي]

مايسر البال ويزيد انشراحه= غير طاعة من خلق فالجسم روح
لايغرك ضحك من يكثر مزاحه=يمكن انه لاختلى يقعد ينوح
شوف صدري فيه للضيقات واحه=رسمها بالعين ياضح لك وضوح
مابقى للهم في قلبي مساحه=كل جزٍ فيه بهمومي يفوح
اكثر العالم تضيق من الصراحه=بس ضيقة وقت ماتبطي تروح
لاجلس وحده صفق راحه براحه=وايقن ان العلم مايبغى شروح
في بحور الشعر يازين السباحه=ومن خيوله ماحلى عسف الجموح
لاكتبت الشعر ودي بالفصاحه=لان شعري دايما قافه يلوح

[عبدالله المرشدي]

بعض العرب يفرض عليك احترامه=حتى ولو ماقد تعاملت وياه
في مظهره في سيرته في كلامه=ودك ليا شفته على طول تنصاه

[عبدالله المرشدي]

ياغصين البان فيني ماستمعت =يوم انادي هيه يالطرف الكحيل
تحسبني في بحر حبك وقعت=لاحبيبي ماسبحت الا قليل
لو وصلت لقعر حبك مارجعت =ولو رجعت ابقى من افراقك عليل
غرك اني بالقصايد لك رفعت=يوم وادي حسنك بشعري يسيل
اعتبرني نجم في جوك لمعت=لاعتذرت وقلت انا عابر سبيل
اعتبرتك غصن يابس وانخلعت=عقب مادورت في ظلك مقيل

[عبدالله المرشدي]

مانـي بيمـك ياعشيـق المرابيـش=اشوم بعيونـي وفكـري ليـا طـاش
اقلط على الواجب واكـب العراميـش=ولاصدت صيد اترك على دربي عراش
نفسي لها عن ماكـر العـز تنبيـش=وعيني سما لو كنت جالس على فراش
طبعي وفـا مافيـه كـذبٍ وتغشيـش=قرمٍ شجيع وقلبي ابيض من الشـاش
يشدنـي بـرق المـزون المراهيـش=اطرب ليا من شفت جايٍ له رعـاش
ماتهت مـع راع الكفـوف المناقيـش=حب البني ماحط في قلبـي عشـاش
الا التـي ماعـرضـت للطـواريـش=ريمٍ هواها صـار فـي مهجتـي داش
بدرٍ ملكته في طـرف نـوره اعيـش=وانسى النجوم اللي لها لمعـة فـلاش



عزي لحالي كان مانته معايـه=وانا معاك ولا معي غيرك انسان
ياصاحبي مادمت سبة عنايه=حرام تتركني وانا اروح زعلان
انته مثل نجمٍ لمع في سمايه=حتى ولو ماني بوياك خلان


تعيش السعوديه ويبقى العلم خفاق=تمر الليالي والغلا وسط خفاقي
الا يالله المعبود يالباري الخلاق=انا عبدك اللي يطلبك وانت خلاقي
عساها تزين وتنطلق ضيقة الاخلاق=ليا من لفا من يلعب الدور باخلاقي


اقسم بعزة من خلقـك وخلقنـي=محدٍ ملك روحي من الله خلقهـا
الا انت بس اللي غرامه حرقنـي=جمّع معاليق الحشا ثـم حرقهـا
حبك فرق حدب الضلوع وسرقني=فتش مخابي مهجتي ثم سرقهـا
رمح الهوا في ظرف ساعه زرقني=فتت سويداء القلب لحظة زرقهـا
ياطرق حالي من غـرامٍ طرقنـي=طرق الزوالي في يد اللي طرقهـا
قلبي ليا من جيت يمـك سبقنـي=كنه على شوفك عيونـي سبقهـا


اسمعيني زين لحظه بس روقي=لاتيجيني ظالمه متشكيه
ركب وصلك لانصاني لاتعوقي=خلي افكارك معي متركيه
ابك حبك منذ مبطي في عروقي=والنواظر من سببك مبكيه
ذقت حبك قبل حبي ماتذوقي=وانفتنت وجيت عند مذكيه
مادريت انك على القطعه سبوقي=كنت احسبك للصميل موكيه
والله لتبطين وانتي في خفوقي=جالسه باقصى الضلوع متكيه

[عبدالله المرشدي]

يابنات اليوم وش لون العبـاه=هي عباة الستـر والا ضدهـا
الحجاب السَتر للعوره غطـاه=في شرع ربـي يبيّـن حدهـا
واسعٍ ظافي على الجسم احتواه=تاج فوق الراس لاسفل قدهـا
ناظري بالعقل لحظـة يافتـاه=في عباة الكتف واللـي مدهـا
تظهر اوصاف الجسد للي يراه=والمفاتن فيـه يكثـر عدهـا
يافتاة اليوم عندي لك وصـاه=كان مـا قبلـت عليّـه ردهـا
قلدي جدتك في لبـس العبـاه=جدتـك ماكـان تظهـر يدهـا
اتركي لبس السفور لمن بغـاه=لايغـرك مـن عباتـه شدهـا
انتي ساس المجتمع وانتي بناه=احفظ السيسان لاحـد يهدهـا

[عبدالله المرشدي]

فيك الحلا والدلع فيك الغنـج كلـه=يامصدر الشعـر ياسبـة معاناتـي
فيك الهـوا والـدوا ياسبـة العلـه=يامهجة الـروح ياسـت البنياتـي
الجرح من سبتـك لـو زاد ماملـه=زيدي جروحك وهاتي غيرها هاتـي
ياقبلة البيض ياقسى من جرح خلـه=يانشـوة بالخفـوق تفجـر اهاتـي
ياكاملـه بالبهـا يـاورده وفـلـه=يانور عيني علـى كـل اتجاهاتـي
لو شفت غيرك من الزينات مفطن له=ماشوف غيرك ولو عرض لنظراتي
اغليك واهواك انـا ياباهـي الطلـه=اهواك فـي سكنتـي والا حركاتـي
القلب مفتـوح بابـه طيفـك يدلـه=مايدهله غير طيفـك انـت بالذاتـي
جيش الغلا في خفوقي صار محتلـه=في ثومة القلـب حبـك رز راياتـي
طيفك رتع بالخفوق وصار مدهلـه=لو غاب عني صباحي بالمساء ياتي
صوتك يصب الغلا بالقلـب ويزلـه=مع جاري الدم يجري مـع كرياتـي
من شان حبك جميل الصبـر باذلـه=حتى ولـو فاتنـي بقـول مافاتـي

[عبدالله المرشدي]

البارحه من هيض شبيت ضوي =في وسط روضٍ من سنى الضو ضوى
بارضٍ خلى ماطبها احدٍ مهوي= يرتادها اللي من عناه يتهوى


لاتحسبني يوم اقفي نسيتك=واللي خلقني ياهوا البال منساك
اقول ابسلى واثرني ماسليتك=احاول انسى واذكرك قبل لاسلاك
حبك بلاني واشهد اني بليتك=عسى الولي باللي بلا القلب يبلاك
في كل بيتٍ من قصيدي لقيتك=بعتاب والا وصف نادر حلاياك
بالحب والشعر المجزل جزيتك= دايم قصيدي باعذب القيل يجزاك
حتى القصايد تمتنع لاهجيتك=لاجيت اباسبك عصى القاف ثم جاك
امحي بيوتي بالجفا مامحيتك=واقرا التجافي من فعولك ولا محاك
قلبي وروحي والمشاعر عطيتك=احساس شاعر صدق حبك وهاواك
بعت العذارا كلهن واشتريتك= صارن جميع البيض فدوه لماطاك
ليتك تحس بحرقة الشوق ليتك=كان اكتويت بنار بعدك وفرقاك
جننتي ياهوووه يكفي رجيتك=لاتحرق اللي باقيٍ من بقاياك
لوكان لاهل العشق حاكم شكيتك=واثبتّ فعلك في باصغر كواياك


كانك على هذا الكلام متعود=انا ترا للحين ماقد تعودت
حرام حرم اني بعدها معود=مادام من وضعك معايه تاكدت
تحسبني اني زيهم يامعود=لا لا حرام انته فقط من تعمدت
تراي من كاسة غرامك مزود=لين انصدمت ومن كلامك تعقدت


ياسهيل تل القلب من بين الاضلاع=تل الرشا للدلو من قاع جمه
عدٍ عليه من الخلايق تجماع=دايم عيون اللي رعى الطرش يمه
ياسهيل ماهو من خبيثين الاطماع=ولاهو من اللي يستحق المذمه
ربي عطاله من حسينات الاطباع=اعطاه من كل الصفات المهمه
غصبٍ عليه صرت للزين مطواع=وانا منول كل طيبٍ اخمه
القلب من نار الغلا بالهوى ماع=وان راح خله مالقى من يلمه
انا اشهد اني من هوى الزين ملتاع=كني غريرٍ فاقدٍ شوفة امه
قله ليا شفته ترى شاعرك ضاع=فاقد حنانك غارقٍ في معمه
ضامي لشوفك والمعاليق جياع=حبك سطابه وانتشر وسط دمه
رجع له اللي فات هالساع هالساع=لاتتركه مادم سببت همه
ياسهيل داري عنك ياوافي الباع=لانته بخالٍ له ولانته بعمه

[عبدالله المرشدي]

ان كان تنشد عن علومـي تسـرك=ماغير انـا ويـا خيالـك لحالـي
لله يـاسـيـد الغـنـاديـر درك=وشلون تسلى وانت طيفـك ابّالـي
اعلن خضوعي واعترف لك واطرك=ليتك تحاول تجتهد فـي وصالـي
جوي تقلب بيـن بـردك وحـرك=وجوك براد وعايشٍ فـي ظلالـي
زود الجمال وفاره الحسـن غـرك=ماعدت في حـال المولـع تبالـي
طال انتظاري والمشاعـر تحـرك=فاحت بنار الشوق فـارغ دلالـي


اطلقي عفوا كريم وهاتـي انـواع الحلولـي=دام لي نفـس اتقبـل مايجنـي مـن حلـولا
اسرعي مادام لي عندك غـرام ولـك قبولـي=قبل قلبي يسدل ستـاره علـى بـاب القبـولا


الصاحب اللي في خيالي مصور=لو غاب عن عيني بقى منه صوره
اللي بطوق الحسن كنه مسور=ياقوتةٍ بالزين جات مغموره
زودٍ على سحر المفاتن تصور=متواضعه جدا ماهي بمغروره
وش لون اصور شي ماينتصور=مادام فيه الصوف يبدي قصوره
مالوم قلبي بالهوى لو تهور=خله يغوص الحب لاقصى بحوره
حبٍ على ضوح النقى مايزور=علاقته بوضوح ماهي محضوره

[عبدالله المرشدي]

في مواعيدك احضر باهتمام=خوف راسي من غلاك يصكني
لالقيتك صارت احوالي تمام=وان فقدتك جوف صدري تكني
دام حكم الضرب فالميت حرام=فكني هالحين تكفى فكني

[عبدالله المرشدي]

يازين احبك بس ماقدر اعلمك=اخاف تثقل لادريت بغرامي
كم مرة بالحب حاولت افهمك=لكن يضيع الهرج واقطع كلامي
اي والله احبك واعزك واحشمك=واهديك شعري مع وفير احترامي


ياناس محلى طلته واعجابه=الا بعد محلى كلامه كله
ياليتني واحد من اي احبابه=ياليت لو ينقال عني خله


هذي هي الدنيا وهذى حياتـك=لابد تقضيها على كيف ماجات
اليوم بكره بعد بكره مماتـك=يجيك يوم يقال مرحوم قد مات

[عبدالله المرشدي]

روحن جات الاميره روحن=فضن القلب المعنى للملاك
طوحن من فوق ضلعي طوحن=كان تبغن النجاة من الهلاك
ارفعن بيض الكفوف ولوحن=قولن انه باع غيرك واشتراك
من قراح الشعر دوكن فوحن=جزل قافٍ باجمل طروقه يحاك
اسمعن جزل القصيد ونوحن=جرٍٍ الموال قولن من غلاك

[عبدالله المرشدي]

ياحسرتي كيف اشوفك ماقدر اوصلك=قدام عيني تمشى ياهوى بالي

[عبدالله المرشدي]

حبيبي هويتك ورحي فداك=بقلبي لحالك ولا لك خشير
جرحني ذبحني فضحني غلاك=وصرت البصير الضرير الكسير
سلكني ملكني هلكنـي حـلاك=عيونك ظنونك فنونـك تجيـر
كلامك سلامك غرامـك جفـاك=يحيـر يغيـر كبيـر وصغيـر
سليتك نسيتك رجعـت لـولاك=اسيرٍ كسيـر بجرحـه يسيـر
كاني كأني وانا اركـض وراك=ضريرٍ تبصر ببصـرة بصيـر
افكـر اقـدر افسـر هــواك=يصير الجفا منـك لامايصيـر

[عبدالله المرشدي]

ياصاحبي ماعاد فيها مكاتيب=قرب الرحيل وماحصل منك كافي
اجيك في دارك وعن داري تغيب=يالله عسى ماصار مني خلافي
الشاهد الله عاد مابك عذاريب=سالم ومن كل الطقوق متعافي
جيتك وقلبي شب وسطه لواهيب=وعودت من عندك وقلبي خلافي
الي عليك احقوق واليه مطاليب=اوف الحقوق ان كنت صادق ووافي
ارجوك لاتلحق علي المشهايب=ابحث وتلقى في ملفي مرافي
اصعد شوي شوي باعلى المراقيب=تلقى صدوق الود عندي يشافي

[عبدالله المرشدي]

رمش العيون السود هو سبة الجرح=خل الخدود وخل عنك الشفايف
مفروض يكتب في جبين الضبى شرح=تعريف بالاخطار قبل الكلايف


كلٍ يبي عرفك ويبغى وصالك=من جاك روح ياهوى البال مشغول
وانا بفكري مايفارق خيالك=لنك بعقلي دايم تصول وتجول
ماقول الا جمل الله حالك=خل الذي فالقلب ماودي اقول
ولاودي اوصف ماخفى من جمالك=اخاف وصفك لابدا يسلب عقول

[عبدالله المرشدي]

ياسابقي يم العلا والمعالي=حثي خطاك ولاتوانين بالسير
الاولي مايستوي بالتوالي=الامع اللي يبتديها بالاخير
والمنتهي بدايته للزوالي=نهاية المشوار مافيه تخيير
الكلمه اللي ماتكف الجدالي=تفتح نوافذ للحكي دون تبرير
خل الاجابه منك قد السوالي=لاتفسر الا شي يحتاج تفسير

[عبدالله المرشدي]

جاك خفّاقي على المطلوب جاك=طير يكفخ بالصباح وبالمسـا
تجرحه . تدميه . ماهمه جفاك=المهم انه علـى حبـك رسـا
الك بس القلب وعيوني فـداك=غيرك من البيض تقطع وتخسا
انت وحدك بس ماعندي سواك=ياعسا تفهـم كلامـي ياعسـا
لاتزيد الجرح ويغـرك غـلاك=التعالـي بالمحبـه بربـسـا
انحني لك لجل ارضي مبتغـاك=وان عجبك الوضع تبشر بالاسا
لارحـم حـبٍ يـودي للهلاك=ولارحم قلبٍ من الذل احتسـا
كان تبغى العلم جاك اللي كفاك=فصل من احلى القصايد والبسا

[عبدالله المرشدي]

قالت عزيز وقلت مابغـى معـزه=ابغى الغلا اللي داخل الروح للروح
قالت يجي له يبن الاجواد حـزه=يمكن يكون الحين ماهوب مسموح
مع هرجها المعسول فزيـت فـزه=من زود فرحي بالغلط كنت ابا نوح
قلت الذي يمك طيوفك توزه= تراه من سبة تجافيك مفضوح
الشوق لجلك ثاير الشعر دزه=في خافقٍ ينزف من الوقت مجروح
حسنك غلاك بوسط قلبي يكزه=كز الهوا والموج للي على لوح
ياصاحبي سببت فالوضع هزه=اخاف منها اغلط بطاريك وابوح
احرص على اللي عن سواك يتنزه=قبل يتعقد من تغليك ويروح
يشفي غليله من شفاياك مزه= وتنعش خفوقٍ بالغلا وسطه جروح
من عين قلبك صدق محتاج قزه= نظره من الاعماق تشفى بها قروح

[عبدالله المرشدي]

يامرحبا ترحيبةٍ من وريدي=بالصاحب الوافي كريم السبالي
انا اشهدني ياجماعه سعيدي=من يوم جا من كان بالحيل غالي
الصاحب اللي في وصوفه فريدي=عساه يسلم من صدوف الليالي


ياللي على روس المراقيـب وقتـي=نجمك بدا يشـع فـي كـل الافـاق
عندي نصيحة حق لو كـان ضقتـي=مستقبلك والطهـر والغـي بسبـاق
شومي عن اللي يتبعك كـان فقتـي=من بهرجة عاشق وخايـن ولفـاق
تـراك دره نـادره لـو صدقـتـي=مع هاجسٍ ياتيك من بين الاعمـاق
جوزي عن اللي يطـردك لاسبقتـي=وارضى صدوق الود من كل الاذواق
ريع الذيـاب يلوثـك لـو مرقتـي=للرجل في تالـي مهاويـه مـزلاق
كثر المعـارف ترشحـك لاعرقتـي=وترميك في داخـل ملفـات وانفـاق
ارقي على راس الجبـل لاشرقتـي=كبي عديميـن المبـادي والاخـلاق
بكره يجيـك العلـم لامـن غرقتـي=في وحل من زيف المشاعر والاشواق
ذكـرك يملونـه ليامـن فرقـتـي=عن الطريق اللي له العقـل يشتـاق
عطرك يفـوح وينتشـر لا برقتـي=وتطلع بصامات الفشل فوق الاوراق
الـدرب قدمـك فكـري لازرقـتـي=امشي بجنب الحيط لاترفعـي سـاق
سبقـك تعـدا كـل سابـق وفقتـي=من كان قبلك سيرته تبنـي اطبـاق
هذي شهـادة حـق كانـك وثقتـي=في قول من حده على القول ميثـاق
انتـي لحالـك بالتمـيـز لحقـتـي=اللي سبق قبلك ومـن جـاك لحـاق
كل الكروت اللـي لغيـرك حرقتـي=سلبتي الموضات من وسط الاسـواق
اقسم قسم مـن جـد بنـك طرقتـي=كل الخيول اللي على الزيـن سبـاق
لاتهميلـن الـراي مـادام ذقـتـي=طعم الغدر لاجاك في شكـل تريـاق
اصلك عريب ومابعـد يـوم بقتـي=يابنت من صيته مع النـاس بـراق
ربعك شرفهم يعجبـك يـوم حقتـي=في تالي اسمك للمناعيـر مشـراق
انتي لحالـك بـس للجـزل رقتـي=مافيه غيرك قـط فـي نظرتـي راق
في عين من عزك على طـول لقتـي=جبتي مزاج الشاعر اللـي ماينطـاق
اعلن خضوعي كان للشـوق طقتـي=وانا منول ماطرد اللـي نـوا فـراق
تم الكـلام وكـان غيـري عشقتـي=قولي وخلي جـاري الدمـع دفـاق
وان كان هرجي ماعجبك وانحرقتـي=قولـي جـزاه الله بالخيـر مابـاق


يامهدي الورد هذا الورد وشهوله=الورد في خدك احسن منه في يدينك


جيت لك فاضي ولا عندي مشاغل= ياعسا تفضين لي لو ربع ساعه

[عبدالله المرشدي]

استبيحك عذر ياجزل القصايد=كان قافك ماعجب اللي يسمعه
آه من كثر السوالف والعصايد=تدخل اللي يستمعها معمعه
القصيد الهزل مامنه فوايد =ضايعٍ خسران منهو يجمعه


ياشينها لاصرت واقف لحالك =على طريقٍ مايمره ولا زول
تقول هالك وانت منته بهالك=مالك جدى ياكود ترديد يحول
هذا ترا حالي ولا هوب حالك=لنك من الاحباب منته بمعزول

[عبدالله المرشدي]

بين مبدا العقل واحساسي فرعت=هو يصير الصد والا مايصير
قال عقلي إنتبه شكلك وقعت=قلت انا قد رحت فيها للاخير
قال قد قلت الك لكن ماسمعت=تحسبنك في هوى خلك خبير
قلت اباصبر توني ماقد قنعت=عل خلي يرحم القلب الكسير


القلـب للغانمـه مـيـلاف=لـوزاد جرحـه وتحطيمـه
اوضـح الحـق للـعـراف=والجاهـل اعيـد تعليمـه
والعذر لو كان فيه اجحـاف=او بيت ماعـدت ترميمـه
احاول ارضى هواء الاطراف=مع قـل وقتـي وتقسيمـه
ارضى البشر زين ماينعاف=بس الرضى صعب تقييمه
الحق يظهر على المشراف=والنـور ياشيـن تعتيمـه
مالي مقاصـد ولا اهـداف=مير الغبي كيـف تفهيمـه
كلٍ يبـي ياصـل الميقـاف=والمـوج زادت تلاطيـمـه

[عبدالله المرشدي]

كل ماقلت وش بك قال مافي شي=واثر صدره سطى فيه البلا والجلا
هاجسي في خفوقي مابعد مات حي=وعقلي امبرمجه يكشف خيوط البلا
والله انه كبير الهم طاويك طي=وان صدرك من الضيقه خلاص امتلا
دامني صاحبك وش فيك تكنى علي=اظهر اللي خفى ماني من اي الملا
اخذ فرحة سنيني وارم همك الي=دامني جيت يمك لا تلقى الخلا

[عبدالله المرشدي]

كانك تبي تعرف غلاتك معي خص=لازم تشوف بعين قلبـك شويـه
باللهجه المصري بقولك تعال بص=بعيون ألبك بـص بصـه عليـه
واذا بغيت اقنعك باقول لك اص=واسمع صدى صوت المشاعر خفيه
في نظرتي ابحر وفي بحرها غص=وان خفت تغرق ناد وامسك يديه
وان كان بي ششكت يافاتني حص=وابعتبر ما صار منك هديه

[عبدالله المرشدي]

سلام الله على اللي هون واللي ماهو هنيا =سلامٍ من جزيل القاف لجل اللي يمرونه
بغيت اكتب كلام غير لكن خافقي عيا=وقلت اصبر عسى قافي من قيوده يحلونه
جزيل الشعر قيفانه تكن لبعضها حميا=ولاترضى كلامٍ ماش لا مروا يقولونه
انا ماجيت عن حر القوايل قصدي اتفيا= ولاقصدي مقاصد ماقصد قافي يصيدونه
قصدت الدار يوم اني لمحت بوسطها ضيا =عسى الديره واهلها عن جيمع النقص مصيونه

[عبدالله المرشدي]

الظاهر اني كنت من جد غلطان = ماكنت حاسبها كذا فالبدايه
الزود يصبح بعض الاحيان نقصان =والنقص تطلع ريحته فالنهايه
تدري ترى مايلحق الرجل حقران=الا تتبع مااعترض من دعايه
يعني بلاش اقول هيه انت يافلان=لاحد هذا نتعبرها كفايه

[عبدالله المرشدي]

قبل الرحيل وقبل حمل الحقايب =ردي عليه قلبي اللي خذيتيه
تراي عقبك عن هوا البيض تايب=ماعاد لي في حبهنه مشاريه

[عبدالله المرشدي]

لا باس ياتاج الفخر والمهابه=لاباس يابويه عسى الله يرعاك
والله ماتاصف شعوري كتابه=لكن عسى المولى من الشر ياقاك

[عبدالله المرشدي]

رفقة هل المصلحه ماكثر مخاسرها=حتى ولو كان راعيها من اقرابك
الخوه اللي تضيع بوجه ناكرها =ماتنومن لاغزاك الوقت والوابك
والخوه اللي تبين بوجه شاكرها=احرص عليها وكن الود لاصحابك
امقرد الخلق تبغى من يقاشرها=تبلش بها كل يوم تشيل مشعابك
العمر كله سويعاتٍ نقزرها=لابد يومٍ يجي وتوادع احبابك

[عبدالله المرشدي]

ياللـي بوقفـات المراجـل تحلـى=عينه سما ماينظر إلدون فـي دون
اللي بوجه الضيف رحـب وهـلا=لاجاه ضيفه ياجد الجـود مرهـون
قرمٍ على الطـالات طـال وتولـى=حرٍ على كسب النواميس مفتـون

[عبدالله المرشدي]

لاتحرق الاوراق مازلت غالي =الك المعزه والوفا دون تقصير
اسف اذا ازعجتك بكثرة سوالي=ودي عن اسباب الجفا منك تبرير
اي والله انك ساكنن في خيالي=مانته بطالع منه لو انك تطير
شف لك طريقه ياحسين الدلالي=وانا تراني معك ماشي للاخير

[عبدالله المرشدي]

يابدر مادمت بحروف الهجا تقرا=جاني جوابن من المجمول واعطبني
ابنشدك عن حروفه بس لاتزرا=احس فيها الجفا باسلوب مرعبني

[عبدالله المرشدي]

لو قلت جبلي من عنادك لبن بـط=جبت الك مايسعد بشوفـه نظيـرك
ارسلت قيفاني بوصفك توسط= وجتني عليها من بقايا عبيرك
بعض الحروف اشوف من تحتها خط=والبعض الاخر مايحدد مصيرك
تدري باني عاد من خلقتي قط=محدٍ اسرني لكن اصبحت اسيرك
بقول لك خلاص في نومتك غط=واذا صحيت الشوق يمي يديرك
اببتعد وانته على ماتبي حط= ماني بجايك بالفراق استشيرك
حتى لو الاخلاق لارحت تشتط=اصبر وصلفات الليالي تثيرك

[عبدالله المرشدي]

من لا عرف قدرك ليا غبت يفقدك=ويبكيك لا صكت عليه النوايب
لا ذاع صيتك قاصر الباع يحسدك=ويفرح بذكرك عزوتك والقرايب
وان فاض مالك نايد الخلق تاردك=وان قل مالك قالو الناس عايب

[عبدالله المرشدي]

يعني كذيا صار من اولتها=جبت الذي قد قلت لك وش تبي فيه
ليتك صبرت شوي لاتاليتها=لين ابتعد واقفي بليا مشاريه
فعايلك صدق المشاعر محتها=وحبك بدت تطيح عالي مبانيه

[عبدالله المرشدي]

الحقير ابن الحقير اللي دخل باسم البنيه=لو براسه خير رده ماقرب نك البنات
قاصر الهقوات جيده بالتحايل والخفيه=عايشٍ عمره يفكر كيف يصتاد القطاة
له مقاصد دانيه وافكار مخ الفار سيه=بالقوارض تجتمع شين الروايح والصفات
همته دنيا وراس المال قمرا مع سميه=مايكفنه ثلاث اربع نجوم موشمات
يتبع القصيا وعينه تلتفت يم الدنيه=لادخل وسط المعارض مد يدّه قال هات
ناسيٍ اصله وفصله ماتحلى بالحميه=غارقن طايح بجمع اللي يبيهن معجبات
تاجده في كل سوقٍ قام له روحه وجيه=مايغايب عن عيونه غير راعية الثبات
يظهر الطيبه وطبعه بالخفا من طبع حيه=كنه الخفاش ليله ليل والصبح بسبات
فاقد الجنحان ماعنده عزوم ومقدريه=مايسير ولا يحير الا تقنه بالعصات
فوق هذا لا لقا اللي بالعطا كفه نديه=لف كنه ثعلبٍ مكار يسعى بالوشاة
ياجماعه كيف ترضون الظليمه والخطيه=مثل هذا ينرمي باقصى سلال المهملات
ماقصد التشهير بل تحذير من ضربة يديه=لو مسكته في يديني والله انه مايبات
اعرفه من سو طبعه مامشى لعبه عليه=بس بعطيه الاشاره قبل اسوي به سوات
اعذروني يالنشاما لاتقولوا عنجهيه=شي في نفسي كتبته يوم شفت الخافيات

[عبدالله المرشدي]

لاتحسبنـي يـوم اقفـي نسيتـك=واللي خلقني ياهوا البال منسـاك
اقول ابسلـى واثرنـي ماسليتـك=احاول انسى واذكرك قبل لاسـلاك

حبك بلاني واشهـد انـي بليتـك= عسى الولي باللي بلا القلب يبلاك
في كل بيتٍ مـن قصيـدي لقيتـك=بعتاب والا وصف نـادر حلايـاك
بالحب والشعر المجـزل جزيتـك=دايم قصيدي باعذب القيل يجـزاك
كـن القصايـد تمتنـع لاهجيتـك=لاجيت اباسبك عصى القاف ثم جاك
امحي بيوتـي بالجفـا مامحيتـك= واقرا التجافي من فعولك ولا محاك
قلبي وروحي والمشاعـر عطيتـك= احساس شاعر صدق حبك وهاواك
بعت العـذارا كلهـن واشتريتـك=عندي جميع البيض فدوه لماطـاك
ليتك تحس بحرقة الشـوق ليتـك=كان اكتويت بنار بعـدك وفرقـاك
ذقت الشقا والهم ساعـة هويتـك=ماكنت اعرف الحب والشوق لولاك
جننتي ياهـوووه يكفـي رجيتـك=لاتحرق اللي باقـيٍ مـن بقايـاك
مافـاد بـك ودٍ قـراحٍ سقيـتـك=ولا فاد بك صبـرٍ تذلـه خطايـاك
اعليت شانك بالهـوى واعتليتـك=ولاشفت منـك الا خفايـا نوايـاك
لوكان لاهل العشق حاكم شكيتـك=واثبتّ فعلك في باصغـر كوايـاك
لكن هذا شرع الهوى لـو جفيتـك= تزعل وتتغلي واجيك اطلب رضاك
لك حق بامر الحب ماقد عصيتـك= لكن ترى ماني من اطرف رعايـاك
ذليت نفسي لجـل قربـك وجيتـك= وش تنتظر يافاتني جعلـي فـداك
ان كان تبغاني فنـا اللـي بغيتـك=اللعب عندك والهدف وسط مرمـاك

[عبدالله المرشدي]

وداعة الله ياعتيبه على خير=حان الرحيل وحان حمل الحقايب
الشاهد الله مابدى اي تقصير=لكن ظروفي في غيابي سبايب
العذر منكم يالرجال المناعير=تبقون عندي من خيار الحبايب

[عبدالله المرشدي]

بالشعر اسجل ذكرياتي ليا غبت=ومن مر عقبي يقطف اثمار قولي

[عبدالله المرشدي]

والله ان القلب في وسطه حريقه=والصحيب يزيـد فيهـا بحطبـه
الحقيقه مـر وجـروحٍ عميقـه=اسئل اللي صافي المـر شربـه
كم طلبت الصدق من ناس صديقه=مثل من يطلـب لثـاره برقبـه
كم عطيت الصبر فوق اللي يطيقه=لين وفى جايـر الوقـت طلبـه
وقتنا يهدي وسيع البال ضيقـه=لابدا فرحه علـى طـول كربـه
صادق الاشواق فالواقع غريقـه=وسط وحلٍ يغرق اللي طاح ابـه
مايفيد الصدق لا ضيـع بريقـه=لا لقـاه الكـذب صـده وسلبـه
دنيةٍ فـي حالنـا تلعـب طليقـه=لين حطت من ورا الباب عتبـه
كم بدا التقصير في روسٍ حليقه=وكم وفيٍ مـادرا باللـي نهبـه
آه ياوجدي على شمس الحقيقـه=في زمانٍ يجرح اللي عاش ابـه

[عبدالله المرشدي]

فز قلبي وارتجف لحظة فراقه=والعيون ارخت وهلت دمعها
بين مستقبل بعاده واشتياقه=ثاير الاشواق يصعب قمعها
موقفٍ وصفه دقيق الوصف فاقه=فاق تطريز الحروف وجمعها
يوم قفى ماثنى للشوق ساقه=مادرى انه في حياتي شمعها

[عبدالله المرشدي]

كنت اشوفك حلم عمري وارتجيك=كنت اشوفك نجم عن كل النجوم

[عبدالله المرشدي]

اهتلت من همة صغير امنياتي=اللي بعضها من خيالي محيته
غدت بي امواج الحياه لشتاتي=وزهدت في حلمٍ بفكري بنيته
رضيت بالواقع وضاعت عصاتي=وعجزت اكمل في طريقٍ بديته
بين الامل والصبر والجهد تاتي=نتايج المجهود لا من جنيته
والحمد لله طاعة الله غناتي=هي بالنهايه حلمي اللي بغيته

[عبدالله المرشدي]

مستحيل انساك لو كلٍ نسـاااك=كيف ابنسى نور عيني لو نسا
الوفاوالود من قلبـي نصـاك=لوجزيتـه بالتعالـي ماقسـا
الله اللي قمة احساسي عطـاك=لين حبي لاكبر عيوبـك كسـا
جاك خفّاقي على المطلوب جاك=طير يكفخ بالصباح وبالمسـا
تجرحه . تدميه . ماهمه جفاك=المهم انه علـى حبـك رسـا
الك بس القلب وعيوني فـداك=غيرك من البيض تقطع وتخسا
انت وحدك بس ماعندي سواك=ياعسا تفهـم كلامـي ياعسـا
لاتزيد الجرح ويغـرك غـلاك=التعالـي بالمحبـه بربـسـا
انحني لك لجل ارضي مبتغـاك= وان عجبك الوضع تبشر بالاسا
لارحـم حـبٍ يـودي للهلاك=ولارحم قلبٍ من الذل احتسـا
كان تبغى العلم جاك اللي كفاك=فصل من احلى القصايد والبسا

[عبدالله المرشدي]

الخطا من صاحبي مدموح كله=لنه اصلا مايجي منه خطا

[عبدالله المرشدي]

انت الذي علمتني كيف الاحباب=يوفون كيل الحب من دون تقصير
وانت الصحيب ان كان باروبي اصحاب=يامنيتي ياسيد سيد الغنادير

[عبدالله المرشدي]

شكواك عندي في برووج عاليـات محصنـات=اجلهـا واحلهـا لـو دربهـا ماقـد مشيـت
الحـظ بالدنيـا يديـر اكثـر علـومٍ دايـرات=حظك نصيبك مايصيبك شي حاصل لو عديـت
الهمه العليـا تحطـك فـوق روس النايفـات=والهمه الدنيا قعدت ابهـا ليـا منـك رضيـت
سدد وقارب للهدف لاتقول ماقـد فـات فـات=اضبط عيارك وانتبه ترمش ليا منـك رميـت
كل اختبار لو فشل غيـره مـع الايـام يـات=كرس جهودك زين واخلص بالعمل لامن سعيت
برقٍ تعـدا بالمـزون الساريـات المردمـات=لاتلتفت له لو على وبلـه تحسـرت وبكيـت
من صارع الدنيا يشوف الغايبـات المبهمـات=تبدي لك اللي مختفي وقت الصباح وبالمبيـت
جمع بقايـا مابقـا وارق الرجـوم العاليـات=شد الحزام ولو بدا حالك مـن ايامـك شتيـت
لاتستمع لاهل العقول الصاغـرات الخاويـات=سكر سموعك عن هروج النذل كنك مادريـت
طرد الهروج تحاربه كـلّ العقـول الراجحـات=مافيه فود من الملاسن هج لـو فيـه ابتليـت

[عبدالله المرشدي]

لا تنظرون الزين لامـن تسـوَح=خلوه يشفي علة القلـب ويـروح

يرتع قدم عيني واذا صحت روّح= وان راح تلقاني من الوجد مطروح

مادام حبه من ورى الحدب طوَح=اكيد باني له بقلب العنا صروح

ماني بقايـل فيـه مثـل الملـوح=حتى لو اكتب حرف قافي على لوح

لن الحروف لعطر وصفه تروَح=واخاف اذيع بخافي السر وابوح

من كثر ماغلي صاحبي قمت ابوّح=ببيات شعر قافها ينعش الروح

الشاهد الله بالمفاتن تشوّح=تقدر تقول بزايد الحسن مفضوح

فيه الوصوف بكف حسنه تلوّح=للطهر والعفه على هامته ضـوح

قلبي بحبه ياهـل العـرف فـوّح=فوح الدلال الصفر لا جالها فوح

مالي جدا ياكود اهوجس وانوّح=واجاوب القمري على عالي الدوح

صحيح من زايد غلاه آتآوِّح=لكن اقول انه بلا شـك مسمـوح

تميت قافٍ جزل صدره على أوّح=من شان عينه صار عجزه على اوح

[عبدالله المرشدي]

كان الغلا من داخل الروح للروح=اجل وش اللي باقيٍ للجوارح
ياصاحبي لا رحت منته بمسموح=الا ليا من صرت للوضع شارح
اعطيتك اللي في يدي قبل لاروح=وانته ولا همك مع الغير سارح
ياصاحبي ماهي حركات ومزوح=ولا ني على ماصر وياك فارح

[عبدالله المرشدي]

مادام قلبك بابسط الحق وفى=الحق عليه عذبني طيوفك
مشيك سليم ولاحصل فيه لفا=لاتستحي من شوف عينٍ تلوفك
الطير طار وسايل الدمع جفا=ماباقي الا ماذكره من وصوفك

[عبدالله المرشدي]

ياناس انا عندي سوال من الراس =ودي بحله كان له حل هاتوه

ياويش ياهل العرف مجموعة اقواس=واللي وسطها كنكم ماقريتوه

لا يجلب النفعه ولا يذهب الباس=افضل منه لو كان كتبه محيتوه

فيه الرجا مقطوع من جملة الناس=لكن خساره عاد لو ماعرفتوه

وصفه يخلي صافي الفكر يحتاس=لاقبلها يذكر ولا قد سمعتوه

على الطبيعه للبشر منه وسواس=حتى ولو شفتوه قلتو لمحتوه

يعني كذا مخفي وظاهر وينداس=لو تاجدونه كنكم مالقيتوه

تقول مدسوسٍ ورى حمر الاطعاس=على مزاجه لابغاكم طرحتوه

من يملكه ظنه ملك قطعت الماس=من يملكه من جد مبلي ومعتوه

[عبدالله المرشدي]

ياصاحبي ماهي كذيا على طول=تقفي وكنك مادريت بعلومي
انا صراحه من تجافيك مذهول=وش لون تتركني بهمي اعومي
ابيك حولي دايم تصول وتجول=ومنزلك عندي فوق ذيك النجومي

[عبدالله المرشدي]

الله اكبر كيف عجلات الليالي =في رحها بالخوافي تستدير

الله اكبر قلتها باول وتالي=جل سبحانه عليم ٍ بالمصير

ياظروف الوقت لازنتي تعالي=لا تخليني ترا وضعي خطير

ودي احقق بعض ماجا ببالي=وان كسبت الطيب ماصرت الاخير

[عبدالله المرشدي]

اخ ياراسي وش اللي صار فيه=قمت احسب وانتبه عقب الفوات

كم عرضلي واحدٍ قدمه وابيه=بس هذا ياترى ويش السوات

ايه لا والله هذا ماهوب ايه=ماعرفته قبل ترويه الروات

[عبدالله المرشدي]

ياهلا يامرحبابك ياهلا يامرحبا=اقلط اقلط في خفوقي دام مفتاحه معك
اعتبر قلبي حلالك سو فيه اللي تبا=مابه احدٍ في حلالك باي حجه يمنعك
ماحدٍ ياصل مكانك لو برك والا حبا=انت من قدك مادام ان المحاني مربعك
ابرك الحزات عندي يوم اشوف احلى الضبا=راتعٍ باقصى الخفوق اللي على نبضه دعك
يانسيم الورد لاهبت ذعاذيع الصبا =ياشبيه البدر في ليلٍ كشف به مطلعك

[عبدالله المرشدي]

اذا السالفه ياصاحبي بـس نظـرة مـوق=ترى اللي حصل مايلحقه حكـمٍ اجبـاري
تبعد عن المجمول ليـن المـزاج يـروق=واذا صادفـك لاتنظـره واطـب البـاري
واذا صار له عندك من اول قديم حقـوق=تحمل علـى شانـه ولاتستمـع غـاري
ترى الموت لا من صار بين القلوب فروق=وراع العيون السود عـن حالتـك داري
بسوق الهوى مافيه سارق ولا مسـروق=ولاتفرق السومات مـع بايـع وشـاري

[عبدالله المرشدي]

سر ياقلم واكتب على شانها هي=من شان لا مرت منى الروح تقرا
لامقصدي هذي ولا مقصدي ذي=هذيك منهي عن عنا حالي ادرا
الجادل اللي حبها ساطيٍ في=ماظنتي من حبها الحال يبرا
اللي لها صرح الغلا بالحشا بني=بالمرشدي وبحبه اجدر واحرا
ام العيون السود لو ناظرت بي=اضيع كني ماشيٍ وسط غدرا

[عبدالله المرشدي]

ماكتبت الشعر لجل مقيمينـه=كاتبه من واهجٍ بالقلب شبـا
القصايد عند راعيهـا ثمينـه=ماتجي في كل من هبا ودبـا
لاعرض له موقفٍ بيح كنينه=صب قيفانه على ماراد صبـا
كل شاعر لابدت تكتب يمينـه=جاله الطاروق من حينه ولبا
مايجيب من الجزال الا الثمينه=يجمع من احلى النوادر مايحبا

[عبدالله المرشدي]

ياصاحبي والغلا بالقب وش طبـه=عكر مزاجي وانا رايق وطفشنـي
قلبي مع اللي خذا عقلي تلاعبـه=الجادل اللي عليها الشوق ينهشني

[عبدالله المرشدي]

حتيش لو بان الحلا في علوك=يمكن يصير اللي خفى منك مغشوش
باكر يطيح قناع حضرة سموك=وتلبس على راسك من الذل طربوش
ياصاحبي توك لها الحين توك=لاتصير عجل وكل مافيك مربوش

[عبدالله المرشدي]

تدرون وش تالي سوايا المحبين=يرقون في روس النوايف يغنون
ماهمهم نظرة بعيد وقريبين=ولاهمهم لو كانو الناس يدرون

[عبدالله المرشدي]

عادتك دايم لامشى الخط لفيت=تقول كن الموت قدام عينك
الشاهد الله معك ماعمري اخطيت=ولااذكر قفلت الباب بيني وبينك
غير العلوم الغانمه ماتهقويت=ولا حسبت حساب زينك وشينك
وش عاد لو نك تكابرت واقفيت=ماني بقايل ياهوى البال وينك
اعطيتك اللي تطلبه وانت ماعطيت=الا قيودٍ كبلتها يدينك
الله حسيبك كان عني تخليت=الله حسيبك كان ماوفيت دينك
عزاي عقبك كل ماصبحت وامسيت=ابدع بيوتٍ شدها وصف زينك

[عبدالله المرشدي]

هو يحسبني ميتٍ فيه وابغاه=مايدري اني من فراقه معافا
ماجيت ابي قربه ولا جيت لرضاه=قلبي ليا من عاف معناه عافا
كلٍ على دربه يدرج مطاياه=ماعد به بين القلوب التئافا
فالاخره بعدين يلقا سواياه=والا لقاها عقب طول اختلافا
يمكن يجي مردود طارف خطاياه=فايات لحظه قدم عينه تهافا

[عبدالله المرشدي]

الشعر في راسي توقع طيوره=غطا سما فكري وهاضت شجوني
كنه ملك في وسط جوفي قصوره=حراسه افكاري ونظرة عيوني
ماهوب توه من قدايم عصوره=من صغر سني كان عندي زبوني

[عبدالله المرشدي]

اشهد ان الوقت من مبطي يدور=بس انا توي دريت بدورته
اطرد الدنيا وتاليها دبور=كنني عودٍ على باكورته
الحياه دروس والدنيا عبور=سنة الخلاق في معمورته

[عبدالله المرشدي]

تدرين وش معنى حياتي بدونك= معناه اعيش العمر جسمٍ بلا روح
معقوول اخونك لا وربي ماخونك=وانا بحبك عند الاجناب مفضوح
خدك نهاري والمسا في عيونك=ليلي وصبحي معي من وين ماروح

[عبدالله المرشدي]

الى متى يازين وانته تغلى =قلي امانه لامتى وانت قاسي
قلبي على نار الموده تصلى =وقلبك على ماظن داله وناسي

[عبدالله المرشدي]

ياعنود الصيد ماشفتي فـوادي=عقب خليته معك وش صار فيه
تدري ان الجفن ماطبه رقـادي=من رحلتي والكرا مايهتنيه

[عبدالله المرشدي]

بعض العرب يفرض عليك احترامه=حتى ولـو ماقـد تعاملـت ويـاه
في مظهره في سيرته في كلامـه=يجبرك لاشفته على طول تنصـاه

[عبدالله المرشدي]

الصاحب اللي في خيالي مصـور=لاغاب عن عيني بقى منه صوره
حبـه مـع الايـام زاد وتطـور=باقصى الضماير قام يبني قصوره
غلاه بعروقي مـع الـدم فـور=وشوقه بقلبي زاد حالي خطـوره

[عبدالله المرشدي]

مادام تذكرني ليا صرت ضايق =وشلون تنساني ليا صرت مبسوط
هذا الكلام مخالفٍ للحقايق=وقت الغلا والود ماهوب مشروط
عطي على صادق غرامك وثايق=ترا فوادي من تجافيك مضغوط
تعال دام البال مازال رايق=وكف الرضى من شان عيناك مبسوط

[عبدالله المرشدي]

ياصاحبي ماعاد فيها مواعيـد=اما تجـي والا ترانـا مشينـا
الخط زحمه والعساكر ملابيـد=اكثر من اللي في عددهم هقينا
حتيش ياشهرة نجاح المساعيد=شهرتك غطتها وبانت علينـا
الصبر طال وخضرنٍ العناقيـد=متى نكمل دربنا اللي بدينا

[عبدالله المرشدي]

قلي وش المطلوب ياطيب الفال=وابشر بعزك كان لك حق دوكيه
لاتلبس الغتره تحت ناعم الشال=لازم صميلك يابن الاجواد توكيه
لا صرت من بين المزايين تجتال=تكفيك ورده عن غثى حمل بوكيه

[عبدالله المرشدي]

على ماجات نمشيها ولا ندري عن المكتوب=تجي بايت حاله من ولـي الكـون واليهـا
انا خابرك لا مراوغ ولانته بالخفا لاعـوب=ولكن لـك حراكـاتٍ كـذا دايـم تسويهـا

[عبدالله المرشدي]

انت الذي ياملتلف الروح لولاك=ماكان حالي قد لحقها تلفها

[عبدالله المرشدي]

الله عليها كيف جات الله عليها كيف جات=وش لون ربي جابها وش لون ربي جابها
عذب اللما دمث الصفات عذب اللما ست البنات=ياحظها باحبابها ياحظها باحبابها
ياحلوها سكر نبات اللا وش السكر نبات=تفوح ريح اطيابها والموت ريح اطيابها

[عبدالله المرشدي]

الشحن جاري كان مانته بداري=من كم سنه والناس تاكل بعضها
لحظه معي بالله وين انت ساري=نفسك دواها من سبايب مرضها
ماعاد هي بانفاق والا كبـاري=طارت سما وش لون تاتعترضهـا
سلعه لها تسعين بايع وشـاري=لا فاتتك ياتي من الله عوضهـا

[عبدالله المرشدي]

لو كان للخاطر مقام ومقادير = ماكان وضعه زي للحين باقي
ادخل على الله يازعيم الغنادير=لاتحرق اضلوعي بنار الفراقي
متى على الله نبتدي بالمسايير=واسعد بلحظات الفرح والتلاقي

[عبدالله المرشدي]

الله اقوى كيف رمحك صابني =يالعيون الخادرات الناعسات
كيف حظي قدم رمشك جابني =مانتبهت الا بعد مالقطر فات
هالني رمش العيون وهابني =وانذهلت وقلت يالله الثبات
والله اني عن سواده زابني =بس هالمره وقعت بلا شمات

[عبدالله المرشدي]

بعض الدروس الواضحه والمهمه=عرفتها من كثر مامشي على الشوك
لاخطيت فالتقدير جبت المطمه=ولارخيت جنبك للرياجيل حدوك
وشمل الرفيق ان كان تقدر تلمه=لمه وخله في عيونك وانا اخوك
القدر عالي والفضا مدلهمه=والمعمعه من خلفها باب مصكوك

[عبدالله المرشدي]

سلام ياروضٍ جمعنا خضاره=بالديره اللي كبر اللهٍ بختهـا
سلام يامسك الختام اووقاره=سلام ياعينٍ فدى سلهمتهـا
فيها الوفا والود ماهو خساره=من مبتدا اولها ليـا تاليتهـا

[عبدالله المرشدي]

ياصاحبي بعد الغلا كيف حالك= عساك من كثر الديايين سالم
بشر عسى راتبك يكفي عيالك = والا على ماكنت بالستر حالم
وش كثر قسم اللي بقى من حلالك =خبري حصيلك للفواتير والم
كانك على خبري فلا شك هالك=وعليك تبدي من ظروفك مثالم
عزاك مني قول مانته لحالك=غيرك كثير اللي شكا ظلم ظالم
لاطاح حظك بالهنا ماسعى لك =حتى ولو حطيت قدمه معالم
ذنبك على اللي شد وارخى حبالك= وانته دخل محدود دايم مسالم
اللي رفع سعر الطلب عن ريالك= اشكه لاجيت الشيخ حق المظالم
وان كان صكت من جميع المسالك= انص الذي عن خافي الحال عالم

[عبدالله المرشدي]

جيت من باب الموده والسلام= جيت اسلم وانقلب مع جرتي

[عبدالله المرشدي]

كنت احسبنك ياهوى البال رحتي =واثرك قريب ماتروحين ديره
يمكن على ماقيل بالحب طحتي=والا نويتي تخلفين الوتيره

[عبدالله المرشدي]

اليوم قلبي من هوى البيض طايب= ماعاد لي في حبهنه مشاريه
رمش العيون السود راعي حرايب= ياكثر من بانت بوجهه مواريه

[عبدالله المرشدي]

دنياك لو تصفي تثـور غبرتهـا=مضرابها لاركت على الكبد قاسي
خلـقٍ تعمرهـا وخلـقٍ محتهـا=والها على كل المواني مراسـي
تزول ماكـن الخلايـق حيتهـا=تسكن وتهدا عقب ذيك الحساسي
الله يكافينـا خـفـي حركتـهـا=لاجالها بين الخطـوط التماسـي

[عبدالله المرشدي]

يالايمي في خشيف الريم وش تبغى=غزالتي واتغزل في محاسنها

[عبدالله المرشدي]

ياصاح تنسى ماشكيته اليا رقت=مادمت متعافي وتشرب وتاكل
اصبر وتلقى بالنهايه اليافقت=ان ابن آدم عرضة للمشاكل

[عبدالله المرشدي]

المصيبه لاطعنك اللي تعزه في ظهرك=وانت غافل مادريت الا بعد رمحه طعنك

[عبدالله المرشدي]

تراي مازلت انتظر واتحراك=علك تجي في تالي الليل غادي
لو ماتجي طرياك فالبـال طريـاك=تغدي بفكري معك في كـل وادي
اراجع الماضي واحسـب نوايـاك=واقول ماعينت علـم وكـادي
ترضى وتزعلني وانا ادور رضاك=وامشي واقول بسلم الاحباب عادي
يابري حالي يوم اناظـر سوايـاك=تضحك وتغرس حربتك بالفـوادي
ياللي شبيه البـدر طلـة محيـاك=والليل عن غرتك جالـه سـوادي
ياجامع انواع الحلا فـي حلايـاك=وش لون تقتل نظرتك وانت هادي

[عبدالله المرشدي]

الرفقه اللي تضيع بحزة الحاجه=أخير من ذكرها نسيان ماضيها
اللي بها يذكر المحتاج محتاجه=علاقة ماتبيض وجه راعيها
سكة هل المصلحه للضيق منعاجه=ليتك تشوف السلامه من اتواليها
اللي بوقت المسره يضحك حجاجه=ليته نهار الصمايل مايخليها
كلٍ على نيته ينهج بمنهاجه=من حيث ماشالته رجله يوطيها
لكن عرق الرخامه وشهو علاجه=من شان بعض الاوادم به نداويها

[عبدالله المرشدي]

العلم ياتي وراه علوم =تلقى الخبر من مصادرها
البيع حده تعدا السوم=ماهي على مانت خابرها
تغيرت حالها في يوم =رجيلينها عند صابرها
باقي بها من رسوم القوم= ماضن تشوفه بحاضرها
اللي خلقها من المعدوم =بامره ليا راد يسرها
كله ولا عيشة المحروم = اللي على الضيق عاسرها

[عبدالله المرشدي]

امن وآمان وخير من فضل ربي=في ظل حكم اللي بحبه ملكنا
خادم بيوت الله ومن جاملبي= عبدالله اللي نفتخربه ملكنا

[عبدالله المرشدي]

ياصاحبي هالحين توك تذكر=رسالةٍ مرسولة قبل يومين
ليتك تركت الباب عقبك مسكر=من شان ماتدخل عليك الشياطين
قيفان شعري سيلها لاتحدر=ينبت على دربه رياض وبساتين
والصاحب اللي بالمهمات يذكر=نحط مقداره على الراس والعين

[عبدالله المرشدي]

خليتني ياناعم العود وش جاك=ولعتني واقفيت بالود عني
لاني بمع ذولا ولا مع هذولاك=ماغير اسوهج من خلايه واغني
والله مابذ الخفا غير ذكراك=ياللي جروحك في ضميري لجني

[عبدالله المرشدي]

العلوم الغانمه والطيبات =للرجال اللي يعرفون السلوم
الثنا رده وجب علمٍ ثبات=ماعي من الدوادي والعلوم
حي ضيفٍ زارني عقب الصلات=شاعرٍ موهوب ويسد اللزوم
مايجيب الا البيوت النادرات=شرد القيفان في راسه تحوم

[عبدالله المرشدي]

العمل مايستقيم الا بتنظيم الاداره=والاداره ماتسنع غير من طيب المدير

[عبدالله المرشدي]

مرت سنه واللي على البال لازال =يطري عليه واذكره كل حزه
اصير في حالي عن الناس في حال=ولاحدٍ زهمني قلت حاضر بفزه

[عبدالله المرشدي]

شوري عليك ان كنت فاضي ترشح =ترا الوظيفه شاغره في فوادي
افتح ملفـات الجـروح وتصفـح=تلقابهـا تاثيـر رمشـك ينـادي
خل المشاعر مع بعضهـا تفسـح=ماهوب شرط ملامـسٍ بالايـادي
بل العروق اللي لوصلـك تشفـح=لاتستحي لاهزك الشـوق عـادي

[عبدالله المرشدي]

الصبر مفتاح الفرج والله يعين الصابرين=اللي على حد الامل يبنون صرحٍ من خيال
مناظر الاحلام في نظرة عيون الحالمين=يشقابها اللي واقعه محدود ماعنده مجال
رغم التغير والتطور في نظام الحاسبين=تبقى القواعد ثابته والوضع نفسه لايزال
بذر السنين الجرد طلعه مايثيب الزارعين=تنداه شمس القايله والبرد جاله من شمال

[عبدالله المرشدي]

اللي مضى ياصاحبي في خبر كان=حنا عيال اليوم واللي تبيعه

[عبدالله المرشدي]

(الحقيقه حلم والواقع خيال )=كيف تلمس واقعٍ في وسط حلم
كل ماتنظر عيونك للزوال =شاشةٍ تعرض من الاحداث فلم
ماعلى قول الصحيح من الجدال =ولا على علم اليقين من اي علم
بين حد العقل واحدود الهبال=ماتغير نظرة اللي في حلم

[عبدالله المرشدي]

طول برج المملكه والفيصليه =من بعيد يذكرك طول رقبتها
وان نظرت بدق مثنى الشاذليه=شفت ناحل خصرها فوق حجبتها
مالها بالزين والكشخه حليه=ليتني سلسالها اللي برقبتها

[عبدالله المرشدي]

وراك يازين الحلايا تعدا =ماكن عيني يوم تقفي تشوفك
انت الذي قدام غيرك مبدا=وش لون بالله عاد هذي تطوفك

[عبدالله المرشدي]

يانفس ياللي بالملـذه غارقـه=عن مرتع اللذات شومي وارتقي
صدي عن مزون الذنوب البارقه=عوذي من الشيطان بالله واتقي
النشوة اللي تعتريـك مفارقـه=يبقى اثرها بالضميـر المتقـي

[عبدالله المرشدي]

مابعد كيل المديح الا الشتايم= خص لامن صرت ماتمدح كفو
لاغلطت بمدح مرديً العزايم=لاتفكه لين يطلبك العفو
لاتخلي مدحة الرديان دايم =مرةٍ وحده وقل هذي طفو

[عبدالله المرشدي]

الظاهر انك يابنت الناس مشغوله=وانا ماحب اشغل المشغول باشغالي
شريحتك ياعلى الصامت ومقفوله= والا بها علةٍ ماجت على بالي
غيبتك عني ثلاث ليال معقوله=اسبابها ماحفظتي رقم جوالي

[عبدالله المرشدي]

مازلت يالغالي على البال طاري =حتى ولو حالت ظروفك ولاجيت
فكري معك يازين سارح وساري=ولا ارتحت من ساعة عن العين قفيت
انت الذي بالحسن مالك مجاري =وانت الذي في داخل القلب لك بيت
والله والله ياغزال البراري=منسى غرامك كل ماصبحت وامسيت
اكن لك ودٍ ذرته الذواري=واشيل حبك داخلي ماتناسيت
يامن بعد فرقاه شفت العزاري=واعرضت عن حب العذار وصديت
اكبر مصيبه كان منته بداري=تراك غالي يالغلا لو تغليت

[عبدالله المرشدي]

ان كان ماشدك من القاف قافي =خلة لياشفته ولا تلتفت فيه
خله ولو تذري عليه السوافي=يلقا الذي حرفه من القلب يغليه
قافي ليا سقته من الراس صافي=احرص عليه من العتب والمشاريه

[عبدالله المرشدي]

اهتلت من همة صغير امنياتي=اللي بعضها من خيالي محيته
غدت بي امواج الحياه لشتاتي=وزهدت في حلمٍ بفكري بنيته
رضيت بالواقع وضاعت عصاتي=وعجزت اكمل في طريقٍ بديته
بين الامل والصبر والجهد تاتي=نتايج المجهود لا من جنيته
والحمد لله طاعة الله غناتي=هي بالنهايه حلمي اللي بغيته

[عبدالله المرشدي]

السلام عليكم ورحمة الله وبركاته

ابيات على عجل كتبتها بعد الاعلان عن روية هلال الشهر الكريم امل انت تنال رضاكم
وكل عام وانتم بخير



ياهجوس الفكر من جزل القصيد=سطري حرفين للربع الكرام
للصديق وللقريب وللبعيد=باركي باحلى عبارات الكلام
الف مبروك الشهر جعله يعيد=جعله يعاود علينا كل عام
شهر رحمه فيه كلٍ مستفيد=لاتوفق في صيامه والقيام
صاحب الحظ الموفق والسعيد=يقبل الله منه لاصلى وصام
شهر رحمه تقتفيه ايام عيد=جايزه للي حفظ قدر الصيام

[عبدالله المرشدي]

يقول عبدالله بعد شاف ماعاف=دنياه فيها اظنونه البيض خابت
صامد ولايشكي بها خلف واخلاف=يقول باكر زرع الامال نابت
لولا لامل في بعض الاحيان ينشاف=كان النفوس من المقابيل طابت

[عبدالله المرشدي]

سلط على خدمة الجوال =لولاه ضاعت رعيتنا
لوكان فالحل والترحال =موجود من شان خدمتنا
حتى وبرجه ضعيف ارسال=احيان يوفي بحاجتنا
لكن ليا منّ برجه زال =كنه يقّطع علاقتنا
نبطى عن العم ويا الخال =ماعاد نعرف قرابتنا
به نعرف الحال والاحوال=من حط برجه بديرتنا
يقصر عنانا بليا جدال =مع بعضنا لو تفاختنا
دقيقته حول نص ريال=ونقول يازين شركتنا
والموت في حزة التجوال =تدبل بالاضعاف لاجتنا
دفع الفواتير صرف اموال=نشتالها فوق طاقتنا
نبغى نغير عنه بالحال =لكن الاقساط حدتنا

[عبدالله المرشدي]

هالحين ياخيبان طالت حبالك =تبغى توردها على حد قولك
انا تراني مثل نجمن بدالك =وقف وناظر زين ماني بحولك
حاولت بالقيفان اواري خمالك=عن عين من شافك ليا شاف زولك

[عبدالله المرشدي]

لاتحسبني ياريش العين كارهك =بالعكس اقدر جيتك واحترمها
تبغى الصراحه كان ودك نصارحك=جيتك تفرق عندنا من عدمها
ماني بوالله يابيض الوجه سافهك=ارفع لك البيضا بعالي علمها
ان جيت والا رحت عني مسماحك=لنك من اللي زاكيات ذممها

[عبدالله المرشدي]

اثرك يازين الحلايا محنك=تلعب على الحبلين مع كل ومن جاك
تمشي على رايك والى خاب ظنك=تلقى البدايل جاهزه من نوايك

[عبدالله المرشدي]

لاسرجت خيول فكري بالجزايل=قدم عيني قامت الجزله تنوز
عن جزيل القاف مارضى بالبدايل =مايجوز بنظرتي مالايجوز
يوم غيري فكرته شابت تمايل=بنت فكري ناضجه ماهي عجوز
لاكتبت اكتب من احساسي مثايل=تعجب اللي يهتوي فك الرموز
من قصيد اليوم دم الشعر سايل=ليت بعض الناس عن نظمه يجوز

[عبدالله المرشدي]

يكفي مرورك لاتسجل حضورك=يكفي ولايحتاج تكتب لنا رد
ادري بما قلته يناسب غرورك=ولاني بقايل ليه لامن قرا صد
تبغى الصراحه ودي اعرف شعورك=لكن ليا قفيت ماودي ترد

[عبدالله المرشدي]

ياللي على روس المراقيب وقتي=نجمك بدا يشع في كل الافاق
عندي نصيحة حق لو كان ضقتي=مستقبلك والطهر والغي بسباق
شومي عن اللي يتبعك كان فقتي= من بهرجة عاشق وخاين ولفاق
تراك دره نادره لو صدقتي=مع هاجسٍ ياتيك من بين الاعماق
جوزي عن اللي يطردك لاسبقتي=وارضى صدوق الود من كل الاذواق
ريع الذياب يلوثك لو مرقتي=للرجل في تالي مهاويه مزلاق
كثر المعارف ترشحك لاعرقتي=وترميك في داخل ملفات وانفاق
ارقي على ظهر الجبل لاشرقتي=كبي عديمين المبادي والاخلاق
بكره يجيك العلم لامن غرقتي=في وحل من زيف المشاعر والاشواق
ذكرك يملونه ليامن فرقتي=عن الطريق اللي له العقل يشتاق
عطرك يفوح وينتشر لا برقتي=وتطلع بصامات الفشل فوق الاوراق
الدرب قدمك فكري لازرقتي =امشي بجنب الحيط لاترفعي ساق

[عبدالله المرشدي]

ياغراب البين تنعق بالقوايل=مع صلاة الظهر صوتك به نشوز

[عبدالله المرشدي]

عاد عيدك يامقـر الزيـن كلـه=عاد عيدك بالمسـره والفـروح
ياسمو الحسـن يـاورده وفلـه=ياعيون الحور يالصوت البحوح
يانعيـم العـود يادقـه وجلـه=ياهوى المشتاق ياطب الجـروح
ياجنون الشوق ياشوق المولـه=ياغرامٍ فـي خفوقـي مايـروح
جيت اعايد واعتذر عن كل زله=اطلق عنان الرضا خلك سمـوح
كل عام بخير وانتـي مسفهلـه=ياوصوف الزين في عال السفوح

[عبدالله المرشدي]

البارحه فكري براسي تضارب=مامرحت لين الصبح بانت مواريه
هواجسي من كل فجٍ تقارب=غرايبٍ فيها عتاب ومشاريه

[عبدالله المرشدي]

اروح وارجع لك وادورك والقاك=لو رحت مهما رحت يمك معود
انا على عهدك كما كنت وياك=لاتحسبني ماذكرك يامعود

[عبدالله المرشدي]

ياصاحبي لو لامعزتك ماجتك=شرد البيوت اللي على شان عينك
زرعت بستان الورود لسعادتك=ولا قلت عن ورد البساتين وينك

[عبدالله المرشدي]

هل الهلال وفرحو الناس بالعيد=تباشرو به عقب شهر الصيامي
نرجي ثوابه من صدوق المواعيد=عساه يقبل صوما والقيامي

[عبدالله المرشدي]

ياصاحبي ماقلت شكرا لماذا=وش فيك كنك من محاكيك زعلان
ماقلت حتى ليه وش بك ياهذا=يابدولي انك منشغل حيل يافلان

[عبدالله المرشدي]

واذا اجعمت غبر الهوم وتولتك=مافيه داعي تنعقد حاجبينك
كلمتك لا خليتهاعند حاجتك=اقلها كفيت زينك وشينك

[عبدالله المرشدي]

تجولي في داخلي لادخلتي =اهم شي اليا دخلتي تسمين
استمتعي بالوقت لامن وصلتي=شوفي حصيل الاورده والشرايين
اقدرك وارتاح لك لازعلتي = واشوف بعيونك رماح وسكاكنن
اعطيك دامك تطلبي مامملتي=ماهو خساره كابته فالدواوين
انا ادري اني لو طلبتك بخلتي=حتى ولو كنتي كريمه وتعطين
كانك على ماقالو الناس قلتي=وش فايدتك مميزه بالعناوين

[عبدالله المرشدي]

اما طلعتي فوق والا نزلتي=هذا مكانك وسط قلبي من سنين

[عبدالله المرشدي]

زارني ضيف على قلبي عزيز=شاعرٍ موهوب واحساسه رهيف

[عبدالله المرشدي]

هل الهلال وفرحو الناس بالعيد=تباشرو به عقب شهر الصيامي
كلٍ يقول لصاحبه عيدك سعيد=والله يقبل صومكم والقيامي
اقولها من قلب واعيد وازيد =الله يعيده للوطن كل عامي

[عبدالله المرشدي]

شوري عليك ان كنت فاضي ترشح=ترى الوظيفه شاغره في فوادي
افتح ملفات الجروح وتصفح =تلقابها تاثير حرفك ينادي
خل المشاعر مع بعضها تفسح=ماهوب شرط ملامسٍ بالايادي
بل العروق اللي لوصلك تشفح=لاتستحي لاهزك الشوق عادي

[عبدالله المرشدي]

يامرحبا واهلين باللي قراني =من قبل لاكتب حرف باسمه تهجاه
يمرني لا مر ماقد نساني=وانا ليا مريت امره ولا انساه

[عبدالله المرشدي]

ياصاحبي وش لون قلبك يطاوعك=تمر بستان الورود وتعداه
هذا وانا صوتي تعدا مسامعك=حتى ضعيف السمع يمكن توحاه

[عبدالله المرشدي]

انا على خبرك تراني كما كنت =جايك على وضح النقا ماتخفيت
اقدرك تقدير لاغير لاهنت=والعذر كانني تماديت واخطيت

[عبدالله المرشدي]

هل الهلال وفرحو الناس بالعيد=تباشرو به عقب شهر الصيامي
شهرٍ مضى جعله على الامه يعيد=واحوالها من فضل ربي تمامي
نرجي ثوابه من صدوق المواعيد=عساه يقبل صومنا والقيامي
كلٍ يقول لصاحبه عيدك سعيد=مبروك عيد الفطر قبل الزحامي
واقولها من قلب واعيد وازيد=للعسكري بالذات زود احترامي
للجنودنا عيدين عيدٍ على عيد=عيد الزياده والفطر ياسلامي
ياجعلها مبروك جمله وتفريد=والله يبارك عيدنا كل عامي

[عبدالله المرشدي]

ودي اهني باشة الغيد بالعيد=واخاف تفهمني خطا ثم تعيد
لو قلت عاد العيد ياباشة الغيد=ماخطيت لاني في هواها معيد

[عبدالله المرشدي]

اعايدك مخصوص يايابس الراس=اعايدك بالذات لاهان راسك
انته لحالك خص من جملة الناس=خصيتك انته بس من بد ناسك
اداعب احساسك اذا عندك حساس=كم لي وانا ماذقت من حلو كاسك
ماتجتمع فيك المفاتن مع الباس=ليتك تخفف عاد من قو باسك
صاحبك عاقل لايجي فيك وسواس=ماله مقاصد غير يرضي حماسك
لاتكثر التفكير تتعب وتنحاس=خابرك عاقل وش طرالك وحاسك
رد الثنا واجب ترا مابها باس=طاح الحطب مافيه داعي لفاسك
فصلت من ثوب القصايد لك لباس=عسى مقاس الثوب يطلع مقاسك

[عبدالله المرشدي]

بعض الردود العوج تزعل خاطري واكنها=لو كان صدري مايضيق الا بعد شين قوي
ياصاحبي مالك عليّه سنةٍ وتسنها=مالك على غيري عليّه يختلف مايستوي

[عبدالله المرشدي]

ياشينها لاصار في ليلة العيد=مقطوع جوالك بلا سابق انذار
ودك تهني بالفرح باشة الغيد=وتشوف عن بعض العرب ويش الاخبار

[عبدالله المرشدي]

بيتن طرالي واحسب اني كتبته=دورت له بالذاكره مالقيته
الظاهر اني لجل عينك شطبته=وانا احسب اني حافظه مانسيته
شيطان فكري من عنادك ركبته=لين استوى لي قافي اللي بغيته
قاف القصيد الجزل باسمك طلبته=ياعز واغلا من بقلبي هويته

[عبدالله المرشدي]

راح رمضان الله يعيده على خير=ويغفر لنا تقصيرنا فالعباده

[عبدالله المرشدي]

لي رفيقٍ ماحفظ غيبة رفيقه=يوم قفى بالعراقيب شذبه
الصديق اللي تردا في صديقه=ماستحى من كبر دقنه وشنبه
ماترك خطه ولا سار بطريقه=يوم روح بالمشاهيب عقبه
والله ان القلب في وسطه حريقه=والصحيب يزيد فيها بحطبه
الحقيقه مر وجروحٍ عميقه=اسئل اللي صافي المر شربه
كم طلبت الصدق من ناس صديقه=مثل من يطلب لثاره برقبه
كم عطيت الصبر فوق اللي يطيقه=لين وفى جاير الوقت طلبه
وقتنا يهدي وسيع البال ضيقه=لابدا فرحه على طول كربه
صادق الاشواق فالواقع غريقه=وسط وحلٍ يغرق اللي طاح ابه
مايفيد الصدق لا ضيع بريقه=لا لقاه الكذب صده وسلبه
دنيةٍ في حالنا تلعب طليقه=لين حطت من ورا الباب عتبه
كم بدا التقصير في روسٍ حليقه=وكم وفيٍ مادرا باللي نهبه
آه ياوجدي على شمس الحقيقه=في زمانٍ يجرح اللي عاش ابه

[عبدالله المرشدي]

البارحه مابين هذي وهذي =قامت علي افكار مخي تضارب
اذكر بها ورعان بدون مواذي=تلعب على عد القطين وتضارب
هواجسٍ مافيه عنها ملاذي=مع كل فجٍ في خيالي تسارب
من دون لاشعر بالخلا قمت اهاذي=كني على قولة هل الكيف شارب
تاثير هاجوسي سريع النفاذي=بين الضلوع تقول ضربة محارب

[عبدالله المرشدي]

دخلتلي بستان ضمن البساتين =ولقيت فيه من الورد الغرايب
وردٍ طبيعي مايجي فالدكاكين=عليه من بصمات شقر الذوايب

[عبدالله المرشدي]

تسلم عيونك يامضنة عيوني=وتسلم عيون اللي على الطيب ربوك
ياعالي الهمه بديع الفنوني=يالجادل اللي كل ربعك تمنوك

[عبدالله المرشدي]

الله يعيد العيد ياباشة الغيد=عليك وانتي في حياتك سعيده
للعيد فرحه تبتدي ليلة العيد=واللي يشوفك يبتدي معك عيده
مبروك عيدك ياعسى عيدك سعيد=الله عليك بكل عام يعيده

[عبدالله المرشدي]

اني ارى مالا ترون بحالكم واحوالكم=والعلم عند الله كذا والا كذا فيكم خلل
في عمكم في خالكم في مالكم وعيالكم=رجل التواصل بينكم تقول صايبها شلل
اليا اجتمعتو ماجعتو شملكم باقوالكم =كلٍ يناظر في جليسه وين سقطات الزلل

[عبدالله المرشدي]

اشوف ذنبي في عيوني اليا اذنبت=ينشر ظلامه في مسالك دوربي
يضيق صدري لاتفكرت واسهبت=واندم على مافات واعزم واتوبي
تكبر ذنوبي لاحسبت وتحسبت=واصغر بعيني يوم اناظر ذنوبي

[عبدالله المرشدي]

يحكى ان هناك غزاله = دخلت قلبي باحسن حاله
قامت تلعب في خفاقي=لعب الجاهل في جواله
من بطينه لا اذينه=تبغى تعرف وش مدخاله
كان مروق يومه هادي=قبل الحلوه تدخل باله
صار يهوجس مايتهنى=في ممساه وفي مقياله
صار يسج وصار يفكر=رمش الفاتن وش سواله
عقله يرسم نبض احساسه=باحسن صوره في مواله
جات الحلوه تقرا خطه=قالت هذا من غناله
فجئه شافت بعض جروحه=تنزف دمه ياعزاله
شافت نظرة رمش الجادل=تكتب خطه فيما قاله
قالت الله وش ذا الشاعر=والله ماجاني مرساله
ماكنت ادري توي ادري=ان النظره له قتاله
وقفت لحظه بي تتامل=قالت يعني هذي رساله
قلت ايوالله ثم ايوالله=هذا حالي من كم لاله
راحت تضحك من كلامي=وانا افكر ويش القاله
اثر الدعوى كانت قصه =قصة شاعر من خياله

[عبدالله المرشدي]

عيني تخيل ابروق مزنن تلاوح=على الخليج مزونها مستهله

[عبدالله المرشدي]

تدري وش اللي يزعج الشاعر الجزل=ويشين اخلاقه اليا صار رايق
اليا اختلط نظم الجزيلات بالهزل=في نظرة اللي مايحق الحقايق
ودك تعزل الهزل عن مسمعك عزل=وتحط مابينه وبينك عوايق

[عبدالله المرشدي]

لا والله الا راح بيتي وانا اشوف =قدام عيني راح واعزتالي
معقول بالسرعه كذا واحد يطوف=وين انت ياساهر من اول وتالي

[عبدالله المرشدي]

لي مهرةٍ تجمح ماهيب معسوفه=عزة على الفرسان محدٍ عسفها
من رادها نال التعب والكلوفه=يرجع ونفسه تشتكي من كلفها
من صغرها بستانها به قطوفه=تزهر وتبقى فيه محدٍ قطفها

[عبدالله المرشدي]

ياحي من زارني في وسط بستاني =والله لاذبح له الطيب من افكاري
الجادل اللي ليا من جا تعداني=ياكبر حظي مدامه مرني ساري

[عبدالله المرشدي]

تصدق انك كل ماجيت ثم رحت=راحت عيوني تتبعك يامقفي
تبي الصراحه جد من يمك ارتحت=ليتك عن عيوني قبل ماتظفي
ماتدري اني كل ماغبت لك صحت=وماتدري انك انت بالذات شفي

[عبدالله المرشدي]

اشوف لي خلجٍ ترازم على الجم=في صحصحٍ ماداجو الناس حوله
سعر المشاعر عندكم ينصرف كم=ودي تقوله كان تقدر قوله

[عبدالله المرشدي]

ماهي بهي ياصاحبي ليه وش جاك=قدرك رفيع ولاتنزل مكانك
دايم قصيدي باعذب القاف ينصاك= وانته بليا اسباب تطلق لسانك
ماقول احبك لا ولاقلت بهواك=لكن مكانك غير محدن وزانك

[عبدالله المرشدي]

السهارى بعد نص الليل يرقون الرصيف=لابدا التركيز يضعف في مسارات الخطا
وانت عاقل لك عيونٍ مبصره مانت بكفيف=كيف في عز القوايل جيت عايم بالخطا
لاتحط اللوم من فعلك على ظهر العسيف=وانت تركب لك جوادٍ طول عمره مامتطا
عمر خيل الكذب يذبل كنه اوراق الخريف=باطل ماكان باطل لو على غيره سطا
الظروف الها صحيح احيان تيارٍ عصيف=تجبر الرجال ينزل من بروجه للوطا
بس يبقى الحق حق وسيف مامثله وصيف=لاتدنى بالسفايف ثم بها تتورطا
العتب واللوم للي مقصد افعاله نضيف=واضح مبداه راسه مايدسه بالغطا
مانلوم اللي من اصله لو كبر عقله خفيف=لو يشوف النار قدمه وسط جمرتها وطا
مشكله لاصرت صاحي بس تفكيرك ضعيف=ماتعرف ان التعامل فن فيه اخذ وعطا
الحياه دروس فيها موقف صعب وظريف=والمواقف تفهم الجهال مع طول البطا

[عبدالله المرشدي]

ياصاحبي بانشدك عن حاجتيني=والثالثه ماني بناشدك عنها
الاولى ميزانها في يديني =والثانيه يشتالها من وزنها
الطيبه فيهن لها فرصتيني =غنيمة اللي لاغتنمها مكنها
والثانيه يرقص لها حاجبيني=ياقربها من لدغة اللي ومنها

[عبدالله المرشدي]

(http://www.alriyadh.com/2006/08/04/article176675.html)

سامحينـي لاتركتـك وانقطـعـت=ماقدر امشي في طريـقٍٍ مستحيـل
دام انا فـي نـار حبـك ماوقعـت=احسن احفظ عزتي وابـدا الرحيـل
دام في قربـي زهـدت ولا طمعـت=بوعدك لانساك يالطـرف الكحيـل
اتعـوذ مـن رموشـك لاركعـت=ومايخيـب اللـي تعـوذ بالجلـيـل
ياغصين البـان فينـي ماستمعـت=يوم انادي هيه يالرمـش الطويـل

[عبدالله المرشدي]

حياك ياسيد الغنادير حياك =تعال في قلبي ترا الجو هادي
من امس مازلت انتظر واتحراك =علك تجي في تالي الليل غادي
استقبل طيوفك وانا اقول حياك=مثل الكريم اللي لضيفه ينادي
لو ماتجي طرياك فالبال طرياك=تغدي بفكري معك في كل وادي
ياويل قلبي يوم اناظر سواياك=تضحك وتغرس خنجرك بالفوادي

[عبدالله المرشدي]

ان عودة لسيف ومزارق الشلف =ولا زمنها مالحقنا زمنها
حنا بعصر العولمه مع بعض ولف=علاقةٍ بالذل ندفع ثمنها
عدوانا واصحابنا مع بعض حلف=واحلافنا مايندرا ويش عنها

[عبدالله المرشدي]

نظام ساهر وسط قلبي يصيدك=حتى ولو تمشي على بيض صادك
تلقطك كامه وانت ماشي بسيدك=ممداك ترجع فالشرايين عادك
ياصاحبي ماهي بايدي وايدك=قلبي عطاك مخالفه يوم رادك

[عبدالله المرشدي]

قالت امون وقلت فعلا تمونين=هو ماذبحني غير زود الميانه
تعلب بقلبي مثل لعب المجانين=واقول عادي دام مابه خيانه
استوقفك لحظه قبل ماتروحين=للعم يوجد داخل القلب خانه
ماقول وحدك فيه غيرك كثيرين=ياكثر من روح وخلى مكانه
ياكثر منهم داخل القلب غالين=تذكار ناسن مرته في زمانه
اليوم مابه غير ذكرى مقفين=ماحل به من يستحقه وصانه
الا الذي قد زار قلبي من سنين=باقي مكانه كان تبغى وزانه
ان جازلك قلبي ترا فيه جرحين=لاتلمسي جرحه يزود جنانه
انتي تراك الفارقه بالبراهين=لك في خفايا الروح قدر ومكانه
انتي عزيزه بايد ناسٍ عزيزين=استمتعي واركي علي الميانه

[عبدالله المرشدي]

الصبر مفتاح الفرج والله يعين الصابرين=اللي على حد الامل يبنون صرحٍ من خيال
بذر السنين الجرد طلعه مايثيب الزارعين=تنداه شمس القايله والبرد جاله من شمال
السابق اللي مالقوها من حصيل السابقين=والتاليه يشتالها من لايطيق الاحتمال

[عبدالله المرشدي]

يالرافضي لاتكلم فمنا عايشه=السيده عايشه بقلوبنا عايشه
زوجة شفيع الخلايق خاتم الانبيا=عفيفةٍ ماتجي للمعصيه حايشه
الطاهره عن حديث الافك من ربها=جتها البرآءة ولاقد ناشها نايشه
صديقةٍ بنت صديق وخليفة نبي=الها المشاعر بصدق احساسنا جايشه
غادي ومثلك كثير اللي غدى وافترا=روافضٍ من سقيم عقولها طايشه
من كرههم للخليفه وابنته لفقو=دسايسٍ ماتجي مع بعض متعايشه
اللي تطاول على ام المومنين وحكى=عساه يلدغ بناب الحيه الكايشه
مايحمد الله ويخشى لايجيه العذاب=بيدن ناسٍ تذود عن امها شايشه
اللي روت من حديث المصطفى ماروت=ياميت القلب وسط قلوبنا عايشه

[عبدالله المرشدي]

امس العصر عديت رجم الجودي=ضايق واوسع خاطري مع نوده
بيحت في راس الطويل اسدودي=مافيه فج الا فتحت سدوده
سجيت مع فكري بليا حدودي=والفكر من يقدر يشوف حدوده
قافي تهيض مع هبوب النودي=والقاف جاد ولاذخر ماجوده

[عبدالله المرشدي]

الحمد لله مرشدي وسعودي=من لابةٍ تاطى الخطر وتذوده
اعتيبة اللي فعلها مشهودي=والشاهد الله والعباد شهوده

[عبدالله المرشدي]

عجزت احدد موقفي من زماني=اروح وارجع وين مارحت رديت
حظي على سود الليالي رماني=قامات تحداني وانا ماتحديت
المشكله ماهي باول وثاني=المشكله في سالفتها تماديت

[عبدالله المرشدي]

البارحه في لون واليوم في لون =يعني على حسب الطلب لونوني
وانا على ماراد لي خالق الكون=ماني على تفكيرهم لو بغوني
ماني بحي الله على مايريدون=شاعر واصور ماتشوفه عيوني
ياليتهم تشاورو قبل يخطون=والا بعد صار الخطا علموني
بسكات ماكن الخلايق يشوفون=مافكرو في موقفي وش يكوني
لو علموني قلت حاضر تمونون=انا لكم جاهز على ماتبوني
من حقهم بافكارهم مايظنون=ومن حقي انسى رفقة سيبوني
ماجيتهم داين ولا جيت مديون=لبيت دعوتهم على مادعوني
على النقا والعز ماهو على دون=والحر مايرضى مقامه يهوني
اشره على اللي بالمواجيب يوفون=واكتب شعوري لاتهيض شجوني

[عبدالله المرشدي]

وقت الرخا يطلع لـك الفيـن حيلـه=تلقى الخوي والجار والعـم والخـال
ووقت الشدايـد تنصـدم بالحصيلـه=يطلع لك النصـاب والنـذل والـذال

[عبدالله المرشدي]

ياصاحبي بيني وبينك مسافه=ماتنقطع بالسهل في تالي الليل
انا اشهد انك تستحق الكلافه=مير البلا ياصاح ماعاد بي حيل
ودي اجيك الحين لكن حسافه=تعبت ذلولي وابعدن عني الخيل

[عبدالله المرشدي]

ذاب قلبي بانتظارك واحترق=لعبنوك شوي رقي وارحمي

[عبدالله المرشدي]

اماتعالي ياهوا البال كلك=والا بلاش تعذبين المشاعر
اقدرك من كل قلبي واجلك=واصير لعيونك عن الفين شاعر

[عبدالله المرشدي]

يشدني لك شي من دون لاشي=واقول سمي ياحياتي فديتك

[عبدالله المرشدي]

مشها بشويش مع جنب الرصيف=لين تدرج بك شوي و تلها
خدمة الجندي تحت رتبة عريف= ماتوقي زلته لازلها

[عبدالله المرشدي]

مانت بالاول والانته بالوصيف=واجد اللي تشتكي من غلها
كل عوجا طبعها ماهو عسيف= من ركبها هقوتي يفطن لها
من بغى المرباع يحسب للمصيف=لايقدم دقها مع جلها

[عبدالله المرشدي]

يامشرف الجوال لاهنت لحظات=اسمع كلام المشترك ثم تكلم
فاتورتي سدتها عشر مرات=مابين قسط ورسم خدمة معلم
والحين لي يومين ماكل ولابات=احاول اكلم ولاقدر اكلم

[عبدالعزيز الفرج]

يامشرف الجوال لاهنت لحظات=اسمع كلام المشترك ثم تكلم
فاتورتي سدتها عشر مرات=مابين قسط ورسم خدمة معلم
والحين لي يومين ماكل ولابات=احاول اكلم ولاقدر اكلم



ههههههههههه


والله المشكلة ياعبدالله


ع العموم صح لسانك مليون


كلي فخر بمروري من خلال متصفحك الكريم

[عبدالله المرشدي]

ههههههههههه


والله المشكلة ياعبدالله


ع العموم صح لسانك مليون


كلي فخر بمروري من خلال متصفحك الكريم



هلا بالغالي عبدالعزيز الفرج

مرورك فخر لاعدمتك

وراح انزلها كلها دامها اعجبتك

[عبدالله المرشدي]

يامشرف النقال لاهنت لحظات=اسمع كلام المشترك ثم تكلم
ابشرح اللي صار في عدة ابيات=واشكي على الله حالتي واتظلم
عميلٍ اميز ويشحن بطاقات=يظيف نجمه كل ماجا يكلم
فاتورتي سددتها عشر مرات=مابين قسط ورسم خدمة معلم
والحين لي يومين ماكل ولابات=احاول أكلم ولأقدر أكلم
ودي اكلم ناعم العود بالذات=اللي غلاها في خفوقي معلم
اسئل عن الاحوال لاغبت ساعات = واخذ علوم صغيرٍ ماتعلم
اوله عليهم ماكتفي بالمسيجات=ادق لو مالي حاجةٍ بس اسلم
وماموركم موجود في كل الاوقات=كنه لجل قطع الوصال متولم
وعذره ليا من قلت الفواتير ماجات=قال المفوتر عندنا مايسلم
والرد بالآلي يبث الدعايات=يعرض عروضٍ من سمعها تألم
اخذ معه في بعض الاحيان سجات=وانا احسبني فالمنام اتحلم
اقيّم الخدمه بواحد ونجمات=واقول ياربي من الفصل سلم

[عبدالله المرشدي]

البارحه لين اصبح الصبح مانمت=سبة هواجيس ضوت في مراحي

[عبدالله المرشدي]

بيت القصيد الجزل ولع سراجه=تشوف نوره لاتعديت رضوان
الشايب اللي دوم يضحك حجاجه=ولاضاق صدره جره من عذب لالحان
وسط الحويه مايسكر كراجه=يستقبل الزوار من كل الاوطان

[عبدالله المرشدي]

مشدٍ برجٍ من ابشر بالسعد فوق الصخور=واليا اختفى برجٍ من ابشر طق راسك في صخر
لاخورو منك العدا ومن العدا ماجبت خور=اقلب ثيابك واستغيث وقل يجيب الله مطر


الشاعر الكبير
دسمان السبيعي

[otaebi]

اسمح لي ابدي اعجابي بقلمك وتميزك واسلوبك الراقي وتالقك

[عبدالله المرشدي]

اسمح لي ابدي اعجابي بقلمك وتميزك واسلوبك الراقي وتالقك


عتيبي

حياك الله ولاهنت

تحيتي لك

[عبدالله المرشدي]

شفتك بعيني ماسكن خط الاصحاب =اللي عليه انهيت وصل العلاقه
يازين مالك حق تلعب بالاعصاب=احفظ بقايا المعرفه والصداقه

[عبدالله المرشدي]

يابدر دور في قنوات الاخبار=حطه على اللي مايكذب خبرها
تقلى ترددها على بث الاقمار=صافٍ خبرها مايشوش قمرها
سيفن والنخله له رمز وشعار=وسمٍ يميزها ويبرز صورها
هات الخبر لابوك في مصر وش صار=بشر عسى ربي بنصره نصرها
مصر الحبيبه دمها بالغضب فار=ماعاد تعرف وجهها من ظهرها
ميدان تحرير العروبه ولع نار=بين المويد والمعارض شررها
ناتج ثلاث عقود بعناد واصرار=ثار الشباب لحالته وافتكرها
تجمع الرايات من كل الاقطار=لو يختلف مفهوم وجهة نظرها
اللي يبا الحياه واللي يبي ثار=واللي يبي له حاجةٍ ماذكرها
واندس راس البلطجي واطلق النار=على جموعٍ بالملوتف حشرها
وحسني ثلاث عقود كم دق مسمار=في كبد عدوان البلاد ودحرها
مواقفه ماتنجحد سر وجهار=والشعب له فيما مضى قد شكرها
ياقو باسه كيف للحين مانهار=رغم الظروف اللي تفاقم خطرها
لو كان له زلات للذنب غفار=ربي عباده بالتسامح ومرها
اعطوه فرصه واقبلو منه الاعذار=دام الحواجز للتفاهم كسرها


لم تكتمل بعد

[عبدالله المرشدي]

ياليتهم قبل الخطا علموني =او ليتهم تشاورو قبل يخطون
الربعه اللي جنبو واتركوني=مصيرهم بكره عليه يعودون

[عبدالله المرشدي]

يابدر دور في قنوات الاخبار =حطه على اللي مايشوش خبرها
تلقى ترددها على بث الاقمار=صافٍ خبرها مايشوش قمرها
سيفين والنخله لها رمز وشعار=وسمٍ يميزها ويبرز صورها
هات الخبر لبوك عن مصر وش صار=بشر عسى ربي بنصره نصرها
مصر الحبيبه دمها بالعضب فار=ماعاد تعرف وجهها من ظهرها
ميدان تحرير العروبه ولع نار=بين المعارض والموالي شررها
ناتج ثلاث عقود بعناد واصرار=ثار الشباب لحالته وافتكرها
تجمع الرايات من كل الاقطار=لو يختلف مفهوم وجهة نظرها
احدٍ بغى التغيير واحدٍ بغى الثار=واحدٍ بغاله حاجةٍ ماذكرها
واندس راس البلطجي واطلق النار=على جموعٍ بالقنابل حشرها
وحسني ثلاث عقود كم طق مسمار=في كيد عدوان البلاد ودحرها
مواقفه ماتنجحد سر وجهار=والشعب له فيما مضى قد شكرها
ياقو باسة كيف للحين منهار =رغم الظروف اللي تفاقم خطرها
لو كان له زلات للذنب غفار=ربي عباده بالتسامح ومرها
اعطوه فرصه واقبلو منه الاعذار=دام الحواجز للتفاهم كسرها
حال العرب يبغالها اصلاح واعمار =وان ماعمرها الله فلاحدٍ عمرها
هبت رياح التفرقه والغطا طار =عن روس قومٍ ماتخلي قشرها
نار الفتن تشتب في كل الامصار=مصرٍ تعداها ومصر تغمرها
الغرب تطحن بالرحا دار مادار=واللي براسه حب يطلع نحرها
تلعب علينا لعبة البس والفار=قدامنا تمشي وتحفر حفرها
الوضع مزري والحدث شد الانظار=مدري متى تركد ويصفي كدرها
والحمد لله دارنا دار الاحرار=من فضل ربي ماشكت من قهرها
مادامها في حكم وافين الاشبار=يحمونها من برها لابحرها
وحنا حماة الدين لاصار ماصار=ناقف سوا بدوانها مع حضرها
الشعب ينبض بالوفا صغار وكبار=لقيادته واله الفخر من فخرها
والله يعز اللي على الحمل صبار=اللي وجوده كل ثغره سترها
خادم بيوت الله وحامي حمى الدار=صقر العرب شمس البلاد وقمرها
يعيش ابو متعب لنا عز وستار=وتعيش دولتنا عزيزٍ ثغرها
وصلاة ربي عد ماتمطر امطار=على شفيع الخلق واطهر بشرها

[عبدالله المرشدي]

جتني بعد غيبه تنشّد عن الحال=ماكنها تدري عن اللي براها

[عبدالله المرشدي]

لا اله الا الله

[عبدالله المرشدي]

الله على بيت القصيد المجزل=اللي تغني معه لاجيت تقراه
فيه المعاني في بعضها تغزل=كلن يقول الزود عندي وانا ابغاه
جيت ولقيته في قطوفك معزل=وحلفت لاقف وامدحه ماتعداه

[عبدالله المرشدي]

صكو عليها الغرب منا ومنا =لين اصبحت نيرانها شبابه

[عبدالله المرشدي]

اليا ذكرني صاحبي لجل حاجه=ماهوب عيب اتذكره كل ماحتجت
مادامنا عند اللزوم نتواجه =اليا تحجج بالمصالح تحججت

[عبدالله المرشدي]

كلن على معمر يهج ركابه=شطرٍ يميز مطلعه كتابه
للشاعر اللي فاز بأول بيرق=لمحمد بن فطيس وهو اولابه
غنى وانا غنيت مع طاروقه =كلن على معمر رفع مشعابه
يالله دخيلك من زوال النعمه=يالله عساها ماتصير نهابه
شعله وشبت فالهشيم اليابس=شبّابها ماينطفي مشهابه
صكو عليها الغرب منا ومنا=لين اصبحت نيرانها شبابه
وحنا نتفرج في سنى شعلتها=لكن حسافه مانقول الجابه
بدال مانرفى خمال الامه=نفتح مجال لشلةٍ مرتابه
نضحك على حال العرب ماندري=باللي حصل من حولنا مانابه
واجب علينا نتعض بالحاصل =ونوحد صفوف العرب ونجابه
الشرق الاوسط في صفيحٍ ساخن=والغرب لترابه يسيل لعابه
ماقلتها راضن بفعل معمر =ولاني براضي عن فعول اقرابه
اقولها للي يبي فرقتنا =مافي حقوق المسلمين طلابه
حنا حماة الدين باسم الدوله=مانلتفت للزمره اللعابه
الله يعافينا ولا يبلانا =والله يعين المبتلى بمصابه
هذا ترا واقع حديث الشارع=ياقع به اللي مايحسب حسابه
قلته وانا من لابةٍ معروفه=شاعر سعودي من شباب عتابه

[عبدالله المرشدي]

الحمد لله الذي بامره تتم الصالحات=الواحد الفرد الصمت خالق جميع الكائنات
اللي جعل هذا البلد امن وشعبه مطمئن=تجبا له من اقصى البلاد ازكى والذ الطيبات
حنا ترا في نعمةٍ من فضل ربي فاكهين=امعززين امكرمين وعايشينٍ في غنات
كل ذي نعم محسود والحساد كثرو حولنا=قامو يبثون الدجل والزيف عبر الشائعات
اما تمسكنا بكتاب الله وشرعه نختلف=ونصير عرضه للتفرق والتمزق والشتات
حكامنا ال سعود ميزان العداله من قدم= رمز الوفا والنبل راعين العلوم الغانمات
نفخر بهم ونجلهم ونحبهم حبٍ نقي=حب من الرحمن خالص مادخلبه مغريات
نقولها مليون مره للصديق وللعدو=في دينا مافيه شي اسمه شغب ومظاهرات
شكرامن الاعماق للشعب السعودي كلهم=شكرا لقادتنا وشكرا للعيون الساهرات

[عبدالله المرشدي]

الصديق اللي معه تحلى الصداقه=غير اطباعه بلا ذنب وخطيه
الله اكبر عقب هذيك العلاقه=عقب ماكنا سوى صبح وعشيه
دارت الايام واعثت فالرفاقه=لين كلٍ صار مايذكر خويه
ودي ارسله مع الاشواق باقه=سبع ورداتٍ حمر في مزهريه

[عبدالله المرشدي]

بنتٍ تفحط على دباب=وسط الثمامه تطعسبه
لاساقته ماتحسب حساب=متعوده ماتغرسبه
تطلع على طعسها ماتهاب=تطلع سما ثم تنكسبه
اليا اقلبت والهوى غلاب=مالت على من تونسبه
ابراي لله عليها ثياب=لكنها تخلف الحسبه
مافيه برقع ولا جلباب=ولا فيه شي تدسسبه
من شفتها ماعليها نقاب= حالي بديت اتحسسبه
ماني معافى ولا منصاب=ولا فيه شيٍ ماهوجسبه
قفيت من وضعها مرتاب=والعيب لله ماوسوسبه

[عبدالله المرشدي]

السابق اللي مالقوها من حصيل السابقين =والتاليه يشتالها من لايطيق الاحتمال
بذر السنين الجرد زرعه مايثيب الزارعين=تنداه شمس القايله والبرد جاله من شمال

[عبدالله المرشدي]

هو مادرا اني ميتٍ فيه وابغاه =يومه يعرض لي على الدرب لاجيت

[عبدالله المرشدي]

ياصاحب لاهنت جهز بطاقتك=يمكن بعد يومين نحتاج صوتك
احتاج صوتك معي واحتاج فزعتك = لاجا نهار فيه شتني وشوتك
سجل بيانتك ومصدر هويتك=عجل قبل ميعادهم لايفوتك
حتى لو التسجيل ماهو بحارتك=لازم هلى شاني تحفى سبوتك
اوعدك لامن فزت لضمن سعدتك=والضامن الي يضمن اسباب قوتك
ابوصل الخدمة اليا باب حضرتك = وهديلك شماغك وثوبك وكوتك
وان كان ماصوت ابقطع علاقتك=مافادني بالعام الاول سكوتك

[عبدالعزيز الفرج]

ياصاحب لاهنت جهز بطاقتك=يمكن بعد يومين نحتاج صوتك
سجل بيانتك ومصدر هويتك=واحرص على تصويتهم لايفوتك
حتى لو التسجيل ماهو بحارتك=لازم هلى شاني تحفى سبوتك
وان كان ماصوت ابقطع علاقتك=مافادني بالعام الاول سكوتك




هههههههههه كأنك تصور حالنا فالتصويت

مدري متى نصوت بدون عنصرية !!!


صح لسانك ياشاعرنا

[العنود البريكي]

صح لسان شاعرنااااااا

[عبدالله المرشدي]

عبدالعزيز الفرج
لاهنت

صوتك وصل

العنود البريكي صح بدنك






غادين لا والله مانتم بغادين=الغادي اللي ينجم فالقوايل
وان قلت لي وش قلت في زارع التين =قلت الدلاليل ماهنا من دلاليل
ماحرك اوباما قضية فلسطين=وعباس عانه مبتلش بالفصايل
ماني موردها بليا براهين=ولاني مدرجها على قول قايل