السلام عليكم ورحمة الله وبركاته { نبي الجواب}

[المغيبي]

السلام عليكم ورحمة الله وبركاته
مساكم الله بالخير
عندي كلمات وابي استفسر عن معناها من قصيدة عبدالمعين الثعلي

والكلمات التاليه :
سهــــاف الشـــول :
نـــــــاجول:
جهـــجول:
قــارع الحـــول:
مـــع تحــيات؟
العتـــــــــــــــــــــــــــــيبي

[إبن ثعلي]

هلابك يالمغيبي ومرحبا ومثلك بفترض انه يفهم لغة قومه

سهــــاف الشـــول :-الإبل الجميله ذات الحليب الوافر
نـــــــاجول:-وسيع حدقة العين حديد النظر
جهـــجول:-طابور وفي مقدمتهن واحده يقال لها قائدة الريم او الصيد
قــارع الحـــول:-اول ايام السنه اي ان المرسول اكمل سنه لم ياتي بخبر

وتحياتي لك

[نسمة غلا]

الله يعطيك العافيه يابن ثعلي

اول مرة اسمع هالكلمات وبنفس الوقت اعجبتني ترجمتها


الله لايحرمنا منك اخوي

[إبن ثعلي]

الكلمات التي يسأل عنها المغيبي موجوده في هذه القصيده لشاعر النظم الأول في الجزيره العربيه عبدالمعين بن ثعلي


يامل قلبن من هوى العذب متلول = تلت رشا ملحا طويلن قليبه

تلة رشا ملحا على السيم مفتول = تقفي وتقبل به تروح وتجيبه

عليك ياللي حط بالقلب نشبول = شبيت لك بأقصى الضماير لهيبه

روحي بروحه طول الايام مشغول = وأرخ بقلبي شي ماينحكي به

غروٍ تفاصيله على كل مجمول = شره الحلايا بالعذارا غريبه

مربوع في قيماه بالقصر والطول = هافي حشا كل المناظر عجيبه

مافطّروه خبوز حظرٍ على فول = يتلي سهاف الشول يشرب حليبه

مايشرب الاّ من لبن عطّف الشول = عليه من شبّت شبابه غذيبه

وصدر وخصر بيّن الوسط مفصول = وإن هب ذعذاع النسيم يغديبه

وعنقٍ طويل وقرن أشقر ومجدول = ذيل أشقر يكسو الحوافر سبيبه

وليا تبسّم عن ثمانٍ كما اللول = يودع صناديق الظماير حطيبه

والعين ياعين أشقر الريش ناجول = حرٍ علي برق الحباري مصيبه

خفاق صفاق خطيرٍ على الجول = أهواي مخلابه جروحه عطيبه

جاني يتهذلف له بمقطع وبلبول = مقطع حرير وشيلته يغتطي به

تهذلف اللي وخرها الريم جهجول = مع غبّة الربه مسيبه مغيبه

يرعى طرف خدٍ من الوسم مسيول = مجهول من غب المطر ماوطيبه

خزّت وفزّت شافت الخد منزول = خافت وشافت واستذارت رعيبه

حازت مع الحزم البراحه عن الغول = تعطي مصاقيل البراح وجذيبه

هذي تفاصيله على كل ماقول = يفرق على غيره عنا من بليبه

قالوا لي أنسه قلت ماهوب معقول = قالوا نسيك وقلت له مايعيبه

الحب من بين المحبين بوصول = مارضى ولا يرضى علي الغليبه

لاسلت عن غيره ولاني بمسيول = دايه دوايه طب روحي طبيبه

ان عالج الدا بالدوا منه مكفول = وليا تحمّل ذنبي الله حسيبه

علاه باب القلب مغلق ومقفول = ومفتاح باب القلب لامى حبيبه

ارسلت لي يمه ثلاثين مرسول = مامنهم اللي راح ماقال اجيبه

اول مراسيلي لهم قارع الحول = واتلااهم امس وكلهم في المغيبه

لاشك مايقض الغرض كل مبدول = ابطوا ومرسول البطى منه ريبه

والا الرجال اللي صناديد وزحول = عيّوا وخطوتهم عليّه صعيبه

وأنا تعرض لي نشابيل وشتول = مدري نصيبي فيه ولانصيبه
تحياتي

[ذيب الينوفي]

الله ينصرك يابن ثعلي

ويرحم هالعود

[عبدالله المرشدي]

ترجمه راااائعه


وفي محلها

زين صار عندنا معجم للكلمات القديمه لاخلينا ولاعدمناك يابن ثعلي

والله يرحم الشاعر الكبير عبدالمعين رحمة واسعه

[إبن ثعلي]

الله يجزاك خير ياكنز المشاعر ويقبل دعوتك
تحياتي لك

[المـاشي]

إبن ثعلي

علم لايختلف عليه إثنان

كامل والكمال لله سبحانه وتعالى

ترجمة رائعه

الله يسر امره ويوفقه دنيا وأخرة

دمت بود

[ناصر بن سعدي]

لاهنت..


أخي

المغيبي ..
على الإستفسار ..الرائع ...


وبيض الله وجه أبن ثعلي...على الإجابه الوافيه ..ونقل القصيده الرائعه ...


لـ شاعر عتيبه رحمه الله ...


ودام الجميع بخير...

[المغيبي]

مشور اخي ابن ثعلي على رد سريع وماهي غريبه عليك