قالت وقلت..... موضوع قد يرد بعض الشي على موضوع هداج التيما

[عطيب الظرايب]

بسم الله الرحمن الرحيم
اخواني الأعزاء اليكم هذه القصيده وهي منقوله وليست لي وهي كالاتي:


قالت ترا منته حلو قلت رجال = الزين ماهو من شروط الرجوله
الزين تلقاه بلباست الشال = والرجل زين كان زانت فعوله
قالت علامك تلبس شماغ وعقال = انت بدوي قلت بدوي من حموله
ماهو ملبس بناطيل لها الوان واشكال = وتمتر الشارع بعرضه وطوله
قالت اجل راعي معاميل ودلال = شرب القهاوي تحسبونه بطوله
قلت اسمعي وافهمي كل الاقوال = وتمعني في كل حرف اقوله
كيفي يابنت الحضر دله وفنجال = وحليب خلفه فالمراح معقوله
وحب الكرم والجود وفعول الابطال = مغروس فينا من زمان الطفوله
قالت شف حظ بنت البدو مال = قلت احذري حذرا تكوني جهوله
بنت البدو يا بنت مضرب للامثال = غير الجمال وطاعة الله خجوله
ريميه ما صادها كل ختال = حتى من انساس الهبايب جفوله
هي مهرة تصعب على كل خيال وانتي مثل متعسف بالسهوله
قالت تغزل بي وشف حبة الخال = ناظر عيوني والرموش الكسوله
ناظر جديل فوق الامتان ميال = ومبيسم يعجبك تنظيم لوله
قلت العفو مايستوي زين وهبال = واللي تبينه شي يصعب حصوله
قالت وقلت وكلمة الحق تنقال = الزين ماهو من شروط الرجوله

[°• قرنقش •°]

العطيب ..

أنت كاتب هالشعر خياااال خطييير ..

ماشالله تبارك الله ..

[إبن ثعلي]

قصيده رائعه يالعطيب وشكرا على حسن الاختيار
تحياتي

[النـايــــــف]

مشكور اخوي عطيب


على هذا الاختيار


بس القصيده منهي له

[عطيب الظرايب]

شكرا لمرورك ياقرنفش
ونرا كل مهرة لها خيال وانا خيال عاشقة الفروسية
وصح لسان قائلها
تقبل تحياتي اخوك// عطيب الظرايب

[عطيب الظرايب]

شكرا لمرورك الرائع يا بن ثعلي الذي سعدت جدا لرؤيته
اخوك// عطيب الظرايب

[عطيب الظرايب]

اخي النايف شرف كبير لي ان ارى اطرائك الجميل الذي اثلج صدري واجج مشاعر الفرح لدي. والقصيدة لشاعر من مطير وهو حديث بالشعر وهو // تركي بن نايف المطيري.
اخوك // عطيب الظرايب

[طالع]

لله درك ياعطيب الظرايب على هذا النقل المميز