مختارات من قصائد الشاعر/ بندر بن سرور (رحمه الله

[رائد الشيباني]

قصائد أعجبتني للشاعر بندر بن سرور (رحمه الله)..

أتمنى أن تحوز على استحسانكم....

حكم نجد بالسيف


الله من عين طرقها صواديف ... عميت ويبسن بالعروق الصخافي
شفت الوزا بالعين من عرض ماشيف ... شفته وغيري من فطن له وشافي
وقت تغير فيه حتى العواصيف ... جا في عواصيف الرياح أختلافي
شره قناطير وخيره مقاطيف ... يفطن له اللي يرضع الديد غافي
كم واحد جاله زمانه على الكيف ... واغترته نفسه يبا الجود وافي
يطلع مطاليع العلا بالسواليف ... بين العذارى عد روحه سنافي
يفرح بهرج بالقفى يكره الضيف ... قتات والقتات بالنار هافي
يعلق قصيره علقة النار بالليف ... عي ولد عي زنوده ضعافي
ان رخصت الحذوه توفي عن الحيف ... وان غليت الحذوه مشى اللاش حافي
يرقد ويلحق والدينه تخاليف ... دايم ومرقد ميت النار دافي
هو مادرى ان الجود يبغى تكاليف ... سهر الليالي مقبلات مقافي
يبغى يدين للعطايا مغاريف ... ويبغى رجول ماتمل الوقافي
والصبر بنحور السنين الشواحيف ... اللي قساها مثل حد الرهافي
مايقدرون الجود سود الأطاريف ... مشاركة بيض النسا باللحافي
يقدر عليه اللي حكم نجد بالسيف ... واودع مباغيض القبايل ولافي
عبد العزيز اللي يبث المصاريف ... يجدع قناطير الذهب بالفيافي
يمشي على دربه جموع مراديف ... نو تحدر ماه والجو صافي
يشدي لواقيط الزبيدي بعد ريف ... ومما كسى البيدا تفيد الضعافي

انحاس بالي




انحاس بالي يامحمد وصديت ... من كثر الصدات قلت شطونه
ماني وانا بندر بهيت ولد هيت ... هيت يجامل خمة يكرهونه
من كثر ماجربت واقبلت واقفيت ... قولة هلا لمن لايودك مهونه
سلط على النصراني اللي لقا الزيت ... لعل نبع الزيت يعمي عيونه
لاشك تحتاج المراجل شفاليت ... تحتاج شي يقصر النذل دونه
عزم على الفرجه وقطع الخلا الميت ... حتى عيال البوم مايقطعونه
ثلاث*من كل المعاني تنقيت ... واللي بقى كل الملا يقدرونه
مابغى جزاهن غير من خالق البيت ... عمالهن للناس ماينفعونه

عجل على المسجد


ياكثر يافيحان صبر صبرناه ... امس الشهر عديت باقي اسبوعه
لاتغبط اللي صار زوده بدنياه ... يتبع هوى نفسه وغير طبوعه
مخطي طريق الحق غاد بعمياه ... يجمع وصخ مال زوال نفوعه
اغبط تقي صار زوده بتقواه ... عبد لصوت العبد يرخي سموعه
يفرح بصوت منادي الحق ناداه ... عجل على المسجد بطيْ ركوعه
والا ترى الدنيا حدود مسماه ... لابد مايقفي وتقفي زروعه

سر ياقلم


سر ياقلم مالي على الصبر طاقه ... صبري تعدى الحد ماعاد ينطاق
أكتب لمثلي قصته واشتياقه ... في خطك الواضح على بيض الأوراق
قصة حزين صافي الحر ذاقه ... انا بذكره ماصله خاطري ضاق
باقو به الأصحاب والوقت باقه ... وصار الضحيه بين باير وبواق
يمشي وهو ماحس في كسر ساقه ... امسى على ساقين واصبح على ساق
مهذي سواة الوقت شين اصطفاقه ... الوقت لو يصفى لك ايام دراق
لاشك يامن معك عقل ولباقه ... بنصحك كان انك للأمثال تشتاق
صادق رجال يعرفون الصداقه ... يقفون صفك يوم يبسات الأرياق
ومن يرغب فراقك فعجل فراقه ... جاز الذي يجزيك أفراق بفراق
يقوله اللي جاير الوقت عاقه ... ولازال في غيبوبة الهم مافاق
حظه على اقشر شي للنفس ساقه ... بقبور الاحياء ينتظر يوم الأطلاق

[أبوسفرالدهاسي]

أبوسفر الدهاسي يحيك على القصايد ويعطيك الف عافية والله لا يهينك يا ذيبان








تحياتي

[سلطان بن دحيم العطاوي]

رائـــــــــــــــــــد



شكرا على اهتمامك احييك لين ترضى لا هنت.

[ذيب الينوفي]

رائد شكراً لاهتمامك بالشعر الاصيل ونقله لنا

[العتيبية]

صح السان الشاعر رحمة الله






بنت العتوب

[الرومنسي]

صح لسانك


مشكورع الطرح الرائع ..

وربي لايحرمنـآ من جديدكـ ..

[سيف العطاوي]

رايد الشيباني



الله لايهينكـ ويكثر من أمثالكـ


تقبل تحياتي

[رائد الشيباني]

العفـــو

[إبن ثعلي]

مشكور يااخ رائد على هذه المختارات
تحياتي لك

[بدوي متعلم]

تسلم أناملك التي كتبت بها هذه الروائع

[رائد الشيباني]

العـــــــــــــفو