نداء عاجل من سجين لقبيلة عتيبه

[ابوبتـــال]

اخواني المسئولين في منتدى عتيبه واعضائه ومشاهدينه هذه قصيده محمد خالد القسامي وفيه يطلب من الله ثم من فبيلته مساعدتها

بسـم الله الرحمـن رب البريـه =المحيـي الـرزاق رب البـرايـا
الواحـد الغفـار جـزل العطيـه=المعطي اللـي مـا يمـن العطايـا
اللي رفع سبع إسمـوات" سويـه=وسبع الاراضي مدهـا بالسوايـا
ومن بعد ذكر الله عنـدي قضيـه=قضيـة" ماهيـب مثـل القضايـا
الله يكتبـلـي حـيـاة" هنـيـه=وإليا كتب لـي عمـر لا واهنايـا
الالف* لاف الحال شـي" وشيـه=انجض عروقي مثل نجض الشوايا
ذقت الهموم وذقت منهـا الاذيـه=واللي بجسمي ذقت منـه الوذايـا
والقلب مابيـن الضلـوع الحنيـه=وسط الضلوع الناحفـات الحنايـا
يومي ولا ادري وين وجه نويـه=الله يقدينـا حسـيـن النـوايـا
وقـول ياربـي عليـك الشكيـه=يا معتلي بامـرك تحـل الشكايـا
والبا* بلانـا الله بهـاك العشيـه=بلوى ومنهـا ماهتنيـت بعشايـا
بلوى خوي" موتتـه مـن خويـه=ومن موتته جا وسط قلبي خوايـا
محمد عسى روحه بجنـه هنيـه=في جنة الفردوس وارقـا الرقايـا
والله مابـه بالمخالـيـق زيــه=وافي ومن نـاس" تحـب الوفايـا
والتا* ترى حالـي رديـه رديـه=وما زادلي يـوم" يـزود بردايـا
انـا الـذي بـي علـة" داخليـه=ومما بصدري صـار كلـه خبايـا
وانا السجين اللي علـي وعليـه=وانا الذي انخى ربوعـي ذرايـا
تاقـف مواقـف مانبـا الجاهليـه=مواقـف" بالحـق اخـذ وعطايـا
بالجاه عند اللـي لهـم مقدريـه=اللي لهـم مقـدار بيـن النحايـا
انخى بني عمـي ربوعـن دنيـه=ومن يستمع لـي لا يبقـي بقايـا
قسامـي وينخـا رجـال الحميـه=ينخـا رجـال" بالمواقـف طنايـا
والثا* ثلـم قلبـي ثلـوم" قويـه=وحكم القصاص اصدر والابه خفايا
تكفـون ياشجعـان ذوي عطيـه=اهل المواقف في نهـار الحمايـا
في وسط سجن وعسكري" بزيـه=حدتنـي الاقـدار لاربـع زوايـا
والجيم* جلجلت الحديـدي بديـه=واللي جرالي من كبـار الجرايـا
كني قريص" مونس" قرص حيـه=تقول فـي جنبـي تطـرق حيايـا
جفيت مما فـي ثـم صـار فيـه=واصبحت مما في مونـس جفايـا
والحا* حزامي روق دايـم عليـه=منزالهـم دايـم بـروس العلايـا
يذوقون الخصـم قـاص القصيـه=واللي يعاديهـم يـذوق القصايـا
ورفيقهـم يعيـش عيشـه هنيـه=بامر الولي ويـذوق كـل الهنايـا
والخا* خلايا المخ ماهـي خليـه=برقا سوات الراس مخ او خلايـا
روس" لهم وقفات ماهـي غبيـه=واللي جهلهم مـن كبـار الغبايـا
يثنون لا جـت سربـة" سرمديـه=بامر الولـي ويفرقـون السرايـا
اقفـو وجيبولـي علـوم" طريـه=ياروس واقفو ليـن تـال النهايـا
والدال* دارت فوق راسي رحيـه=رحيـة" ماهيـب مثـل الرحايـا
دار الفلك والعين صـارت عميـه=واللي جرالي من يدينـي عمايـا
والذال* ذقت الهـم والهـم فيـه=هم" جبرنـي مـا يـدور رضايـا
محتـار ممـا فـي ذقـت الاذيـه=يالله تكفينـا الـبـلا والبـلايـا
والرا* بقلبي رمح وايضا شظيـه =شظيـة" ماهيـب مثـل الشظايـا
تواردتنـي مـثـل وارد طمـيـه=اللي وردها ما لقـى الا الصفايـا
والزاي* زجتني سهـوم المنيـه=زج الذي جـاه القضـا والمنايـا
زادن عليـه بيـن هـاذي وذيـه=والسجـن عنانـي وزود عنايـا
والسين* بالي ما سلا لو شويـه=والسيف في بالي يجيلـه طرايـا
افز مـن نومـي وعينـي شقيـه=يالله يالله لا تــزود شـقـايـا
والشين* شيب العين كل ضحويه =لاقرقـع البيبـان جانـي بـلايـا
اشكي على الحلال منجـي نبيـه=من بطن حوت وباعثـه بالهديـا
والصاد* صاف الدم مابـه بقيـه=يالله يالمعبـود تـاقـف معـايـا
صابر وصبري بس افـرك ايديـه=وطلب فرج ربـي ورفـع ايدايـا
والضاد* كبدي ياجماعـه ظميـه=الله يسقيـنـا بـيـوم الظمـايـا
ضاق الفضا والضيم يضوي ضويه=لقبل ظـلام اليـل جنـي ضوايـا
والطا* طواني مثل طوي الطويـه=خلا عظامي مـع لحمهـا طوايـا
تطري طواري مع همـوم" هميـه=وامسيت ما رد للهمـوم الهمايـا
والظيم* ضيم" بـان فيـه ظريـه=كني فريسه تنهش ابهـا الظرايـا
اظروف صارت مابهـا مجزعيـه=تعلـم بحكـم الله عـدل وكفايـا
والعين* كن العين عينـي عميـه=مما حداني صـار شوفـي قدايـا
والعين منها الدمع يجـري جريـه=دايم ادموعي من عيونـي جرايـا
والغين* وقت" ما اكثر اليوم غيـه=واكثر عباد الله تشوف او غوايـا
والغين من غيري ظروفـه هذيـه=انا الذي نومي احلـوم او هذايـا
والفاء* فؤادي فيه مثـل الفريـه=والجسم كله شفـت فيـه الفرايـا
فرتنـي الاقـدار فــره قـويـه=ومن فرها ياناس خـارت قوايـا
والقاف* قافينـي ومقبـل رميـه=وانا الهـدف قـدام راع الرمايـا
هذا قدر مكتـوب ياهـل القريـه=مامنه مجزع لـو تنـوح القرايـا
والكاف* كيه ياعرب فـوق كيـه=ياعزوتـي والجسـم كلـه كوايـا
تثنى على قلبـي وقصـت عريـه=والقلب يومي مـا بقابـه عرايـا
ياعزوتـي هليتـهـا هاشمـيـه=قومـو ولا يحتـاج نذكـر كنايـا
والام* لا لا ثــم لا لا ولـويـه=لويـة" نشبـت بداخـل جمـايـا
واللي لوانـي قرصـة" عقربيـه=شلت لساني مع يدي مـع هوايـا
مسجـون ومـزع شليـه شليـه=بين العنابـر راح لحمـي شلايـا
والميم* مدولـي حبـال النجيـه=انكـان ربـي كاتبـلـي نجـايـا
اطيبك اللـي يرسـل لنـا دليـه=عسى الولي ايوفق اهـل الدلايـا
والنون* نار" وسط قلبـي لظيـه=والراس مع جسمي تلظـا لظايـا
والها* هموم الناس هيـه وهيـه=علـي دايـم وارداتـن هـدايـا
والواو* ويش الراي ويش الحسيه=من حسبي يحتس قبـل الحسايـا
واليا* ياربي هي عليـك الشكيـه=ما غيرك احد" نرسل له الشكايـا

[اشقر السيف]

لاحول ولاقوة الا بالله العلي العضيم

لا إله إلا الله الحليم الكريم لا إله إلا الله العلي العظيم لا إله إلا الله رب السموات السبع رب العرش العظيم

اللهم يا مؤنس كلّ غريب ويا صاحب كلّ وحيد ويا ملجأ كل خائف ويا كاشف كلّ كربة أسألك لأن تقذف رجاءك في قلبه حتى لا يكون له همُ ولا شغلُ غيرك وأسألك أن تجعل له من أمره فرجاً ومخرجاً إنك على كل شيء قدير.

هبه وذويه اللّهم الصبر والقدرة ليرضون بما ليس منه بد وهبهم اللّهم الشجاعة والقوة ليغيروا ما تقوى على تغييره يد

اللهم امين اللهم امين اللهم امين اللهم امين

["بيطـــار نجـد"]

اضم صوتي لصوت ابو بتال
واناشد بتثبيت هذا الموضوع الذي يحمل هذا الموقف الانسني

الله يعينه
امين يا رب العالمين

[ابوبتـــال]

شكراً لكلاً
من
اشقر السيف
و
بيطارنجد
علا مرورهم
ومسانتدي في طلب المسئولين الغالين
باالمنتدى بثبيت النداء الانساني

[ابوبتـــال]

بشراء ساره

ان الشاعر والمنشد / حامد الضبعان

سوف يقوم بنشاد هذه القصيده

وسوف تضهر على قناة الساحه قريباً

[ناصر بن سعدي]

الغالي


ابو بتال

لاهنت على النقل الإنساني المؤثر..

ونسأل العلي القدير أن يفرج كربة السجين...ويخفف همومه...

وأن يكون في عونه في مصيبته...

والله يكون بالعون ..

[عــمـــر]

لاحول ولا قوة إلا بالله

ونسأل الله سبحانه , ان يعينه ويفك قيده ويفرج عنه كربته

ومشكور وجزاك الله الف خير على النقل ونشر القصيده

[ابوبتـــال]

الاخ / ناصر بن سعدي


والاخ / عمر


اشكركم على مروركم وعلى دعاكم الطيب

[عبدالرحمن الحمد]

لا حول ولا قوة الا بالله

اسأل الله العظيم ان يفرج كربت السجين

وشاكر لك اخي الكريم على نقل القصيده

[عوض الرقعي]

الله يفرج همك

[مشاعر حالمه]

الله يفك سجنه

ابو بتال

جزاك الله خير على نقل هالأبيات وصح السان السجين وفرّج الله عنه

تحيتي لك / مشاعر حالمه

[ابوبتـــال]

مشاعر حالمه

يسعدني مرورك

ونسئل الله عز وجل ان يفك اسر السجين
وينزل الرحمه في قلوب اصحاب الحق


تحيــــــاتــــــــــــي

[الذيب العتيبي]

اللهم أنك ماهو فيه من كرب وضيق وهم ففرجه عنه

[ابوبتـــال]

الذيب العتيبي

يسعدني مرورك


وجزاك الله خير على دعك الطيب



ودمت كما تحب

[ركوان الغبيوي]

الله يا رب السموات السبع يا منجي نبيك من الحوت ويمفرج الكرب انك تقرج كربت اخونا وابن عمنا يا رحمان يا رحيم ولا هنت يا ابوبتاال وعلمناا وش يصير الله لا يهينك ويجزيك الف الف خير على جهودك يا الغالي

[ابوبتـــال]

ركوان الغبيوي


يسعدني مرورك

وجزاك الله خير على دعاك الطيب

والوضع الرجال لاحد الان ونسئل الله الفرج من عنده

وباالنسبه للمنشد /لحامد الضبعان جهز القصيده وجزاه الله خير

ولاكن قناة الساحه لاحد الان ماوافقة على نشر القصيده

ونسئل الله عز وجل الفرج من عنده

[ركوان الغبيوي]

الله يعافيك يا ابو بتال وادري ابزعجك لكن علمناا بكل شي جديد الله يجزيك خير

[فهد العصيمي]

السلام عليكم ورحمة الله وبركاته
عندما نبتلى بشدة أو بلاء أو مرض أو هم أو غم أو أي
صارف من صروف الدهر المؤلمة ......
فلم أجد خيرا من ......
قرائة القرآن ففيه الراحة والطمأنينة والسعادة ....
ثم قرائة القصص والأخبار التي تنبئ عن تفضل الله
عز وجل على من حصل لقلبه حصولاً ، ونزل به مثل بلائه ومعضلته
فجائه الفرج والشفاء من مولاه ....
بدموع سكبها في ليلل دامس ...
وركعتين خاشعتين ....
ويدين ممدوتين تسأل الله من فضله .
وأخيراً نقول :
اللهم لك الحمد ولك الشكر ولك المشتكى وبك المستغاث
والله المستعان ،ولاحول ولا قوة إلا بالله العلي العظيم .

مشكور على النقل الانساني اخوي ابو بتال .

[ابوبتـــال]

ركوان الغبيوي

فهد العصيمي



جزاك الله خير

واشكركم على اهتمامكم بالموضوع

ودائماً نسئل الله الفرج من عنده

وسوف اخبركم بكل ماهو جديد عن هذا السجين

ولاكن لاتنسئوه من دعاكم الصالح