سبع ساعات اسولف واتكلم واستخف دمي

[الـسليفي]

قصيـــده للشاعر جابر العتيبي...



سبع ساعات اسولف واتكلم واستخف دمي
وهي تسمعني وتضحك ومبسوطه على الآخر

::

سبع ساعات اعلمها عن احزاني وعن همي
واسولف عن حكايا الطفل كان وصار هالشاعر

سبع ساعات تتساقط حروف الصدق من فمّي
على صحرا مسامعها سحاب العشق متناثر

::

سبع ساعات وتحلف لي براس العشق وتسمي
تقول انت الوحيد اللي ملكني حبك الساحر

::

سبع ساعات ونادتني بأسمه ما هو بأسمي
تناديني "هتان"واسمي انا ياللاسف جابر

::

تشنج كل شيٍ كان حولي ومسمعي يدمي
ركز خنجر فهد في مسمعي من صوتها الخادر

::

تخدر فكري وجسمي وذاب بداخلي عظمي
وصرت اسمع صدى صوتٍ يردد غلطة الشاطر

::

يردد غلطة الشاطر بعشرة واقعي وحلمي
وترددها زوايا غرفتي والواقع الغادر

::

كثير اصوات شقت جلدي اللي يحتضن عظمي
وصراخ الباب والدولاب والشباك والساتر

::

وونات القلم والدفتر اللي يلتفت يمي
وخايف وش ابي اكتب بوسطه من هنا لـ باكر

::

وكانت ساكته وصوت النفس من خشمه و خشمي
ربع ساعه وبحة صوت قالت خير وش صاير

::

وطرا في بالي عبدالله وخالد واحمد ونشمي
ولآخرهم فهد تسعه وانا مدموغه العاشر

::

وقلت ابداً مغير الخير ولكن امسحي رقمي
اكيد انه فهد جالس سبع ساعات وهو ناطر

::


وقالت لي رجاءً او اقولك طير ياعمي
مسوي حضرتك في هالزمان العاشق الطاهر

::

وقالت لي اقول وقلت انا بقول وذا علمي
عجب هالناس وش هالناس تخطي وبالخطى تكابر

::

انا يابنت بنثر لك حياتي واجمعي لمي
بعضه بنثره في مسمعك هالحين ومن خاطر

::

ترا عمري انا تسعه وعشرين وكذا رسمي
ولكن عشت ايامي دبلها مقبل وعابر

::

اصيل وكل اصيل مايبي مدحي ولا ذمي
وسبع انعام في هالناس اخص الحامد الشاكر

::

انا من نجد وربعي هم "عتيـــبه" وخالي الدحمي
"وبرقـــا" هم لحمي ودمي وانا من"روق" ومع ناصر

::

انا جابر ولد هايف وسلم الطيب هو سلمي
ابوي اللي مربيني على الجزلات واتفاخر

::

انا راعي مجاهيم يشع بفخذها وسمي
وراعي خيل وراعي بير وبيتٍ مبغضه كافر

::

على الرمضى ابت رجلي بأرضٍ عاشقه ضمي
وشمسٍ تشرق وتوقف على راسي وانا صابر

::

عرق وجهي يصب وامسحه بشماغي وكمي
وألد عيوني عن ناسٍ سرقني يمها الناظر

::

وانا شاعر ولو اكتب عجز كل فكر في نظمي
ولاني بالغرور احكي ولكن واثق وقادر

::

وانا رجال هاوي للقمم ويقودني عزمي
وابي ارقى على راس الجيل وانتي مع الحادر

::

عرفتي ليه انا طاهر لانك همي وغمي
ولان الدنيا في عيني جبل نرقاه ونغامر

::

يابنت الناس شفتي كيف بليّا سلاح مانرمي
ولانوقف بوجهه البندق المليان ونخاطر

::

خلقنا الله بشر بعقول وذا واقع وذا وهمي
وكلٍ يتبع مراده وفينا رابح وخاسر

::

وقالت لي فمان الله شعلت النار في جسمي
فمان الله يالطاهر ومثلك قله ونادر

::

ورحت اخذ كتاب الله واحلف بالكتاب امي
لو ان اسمي فهد بالله ماكان احلى من جابر..؟!

[** راس حربه **]

السليفي صح السان شاعرهااا

ولاهنت وتسلم يمينك

وكأني رأيتهاا من قبل في هذا المنتدى

دمت كما تحب

[الـسليفي]

راس حربه

شرفنى حضورك ولا يوجد لدى علم ان كان سبق وطرحت هالقصيده بالمنتدى ..


ولكنها رائعه ..


السليفي

[السميري]

يعطيك العااافيه اخوي السليفي

[الـسليفي]

السميري


الله يعافيك وتسلملى على الاطلاع


السليفي