مجموعه من قصائد الشاعر المرحوم:بندر بن سرور !!

[عيضه العيسي]

يالله يا جال الأمور المهمة =تجلى وهق قلب برى حال راعيه
البر دجته و البحر رحت يمّه = أدرج سبب حظ على الله مساعيه
يوم إن ولد اللاش رزقه على أمه =رزقي على اللي ميّت القشع يحييه
ماني وانا بندر ببياع دمه = يقطعك يا بيّاع دمّه وشاريه
اللي يبيّع لابسات الأزمه = ثور يبي بيض العماهيج تغنيه
يزعل ليا جت ليلة الدول يمّه = يرضى بسوق المال بأخيه و أبيه
خطو البخيل اللي يكبّر معمه = يقرا الكتاب و واجب الله مخليه
أما هرج له في رفيقه بنمّه = والا عطا و أمه تضيّع هقاويه
يا مل قلب كل ما مات همّه = دارت دواليب الدهر لين تحييه
فرّاق شمل الناس عيّا يلمه = وقتن يشيب الراس من شاية فيه
أحدن ينام و حط راسه بكمه =و أحد تخم النوم عينه و تخطيه
و أحدن يحاول بالردى بنت عمه =و أحدن يحاول ستر عذرا عوانيه
تخالف الأنظار شرقن و يمّه = كلٍ هدف رايه من الناس مرضيه
أنشدك ياللي كل شي تتمه= تقرا الكتاب كل فرض تصليّه
ويش القليب اللي عميق مجمّه = ما سرّ غرسه ماه عطشى سوانيه
سم السبب يا عارفن عنه سمه = سم السبب يا عارفه قبل اسميه

[عيضه العيسي]

يا رشيد يوم أتعبتني بالتناشيد = خذ لك من الدرويش زبدة قصيده
ليا عبدت الله ولا أشركت تعبيد = ترى محمد صفوة الخلق سيده
و ترى أبرك الحاجات يوم صدف عيد =جمعة اسبوع و صادفت يوم عيده
و اذكر لك الاجواد صد و صواميد = و ؟؟؟؟؟ لا صدت ولا من صميده
و اذكر لك اقشر ما على السيد و البيد = اللي طمع بنت القصير الحديده
فضح قصيره عنده انه كسب فيد =سولف بها للناس خطو البليدة
سولف بجرحٍ ما لجرحه تضاميد = زوّد لجرحه جرح ينزف صديده
ليا وطاك اللي وطاني تراديد = رد السؤال ولا تخبر بريده
اضرب ثلاث بعشر و اجمع تفاريد = و فرق على العشر القليد بقليده
واللي بقى لو تفرقه للمواديد =كم تفرقه بين الوديد و وديده
أنا الذي قد مرني سلك تجنيد = سلكت به خدمة سنين عديده
مرحول هم و كل شي له أجيد = اجيد زين و شين و الهم اصيده
اسمع صرير القلب بين الجواريد = حدّنه الاضلاع و اسمع صريده
صرير فرخ حده اقطم صواريد = اول طرد قرناس ثاني حريده
هذا و انا شفت الوزا و التزاهيد = لا اقول حي ولا تحت قبر ريده
والله ما أهني قاضي العمر ترغيد = ابن اللئيم اللي حياته رغيده
أهنّي القلب الخطا بالمراقيد = و ضب الخلا لو ياكل رديده
ما يطلع القرناس من عش بطّه = و الجبو ما يحيي النوامي شفيطه
ليا صار من ربعك اقيشر و نِطّة= هزّ المحالة لين يفرط شريطه
تراه ما ينفع عساها تلطّه = خيال دجل و مثل عنزٍ ربيطة

[عيضه العيسي]

أنا الذي ما ابدي على الناس سرّي =من خوف سودان الوجيه تحكي به
أصبر على ظيم الدهر و التعرّي = من شان من يرضى عليّ الغليبة
و ابعد مجالي عن عيال التزرّي = من لا هوى قلبي دواه المغيبة
واخاف لي من مجلسٍ ما يذرّي= في جانبه بومٍ حساسه صليبه
و سوالفٍ مابين بحث و تحرّي =يجرح فؤادي عيّه و ابتلي به
يرضيني المقسوم خيري و شري =سبحان من لا تعلم الناس غيبه
أحدٍ على ربعه يحب التحري = للشر بلاس و خيره بجيبه
هذاك يالربع انا منه متبرّي = لو عضّني ناب الدهر ما انتخي به
من خوف يضحك لي و هو يستغرّي= يفتل حبال السّوْ ما يندري به
يفرح عليّ بكل شيٍّ يمرّي =و ان شاف يمّي خير عنّي نهيبه

[عيضه العيسي]

من بلاد الشام جينا بالمكينة =فوق فرتٍ ما تخثع بالطماني
يحتدي مثل الجمل تسمع رطينه =مع طمان القاع مثل الثعلباني
والشـُفير من المدارس مطلعينه =عن ظلام الليل شب الكهرباني
كل ما جاه تل يلعن والدينه= باليمين اللي على كل اليماني
ما تجيه يسار رجله شوف عينه =غير يسرى الطار شيٍّ بالاماني
يوم قال له الخوي عاشت يدينه = شد رجله للكمك واحد و ثاني
يالله انك تنصره من نصر دينه = إن عطى له مع غبا ولا بياني
قلت يالمطنوخ أنا عيني حزينه= من شراب اللف أبيه و عنك كاني
قد رمى بالكيس قدمي قال وينه = دوك ما بالجيب عن شيٍ لهاني
قلت ثالث قال يالله لا تهينه =قلت خامس قال يطلب نقل ثاني
قال واحد و الكمك واسمع حنينه = كيف ما ترضى عليّه بالهواني
قلت واحد و الكمك ضام المكينة =قال لي من يرحم القاسي لياني
قلت والله يرحمونه صانعينه =قد زعلت من اللهيب اللي حداني
قال ما ناثق بمن هم متقنينه =عن مشاور غير عرفي قد كفاني

[عيضه العيسي]

الا وا وجودي وجد من صك دونه باب = بقفل اعجمي مغلقات مساميره
عَدَو به على اللي كنه النسر بالمرقاب= على الجمس الأصفر كاملات شراشيره
معه فرت خمسة طن ياخذ مية ركاب =من المال عيّن ينقلنّه تغاييره
دخل هو و حِمله للحكومة بغير حساب =و راعيه عشر سنين و يعاد تقريره
على اللي كواني كيّة العظم بالمشهاب = على أقصى عراوِ القلب محمي مناشيره
عشيري ورا الكوده وانا من ورا مشعاب =بعيد قريب تعيب يا هون تيسيره
ولا يوصله كود " فرت " عليه اسطاب = ليا حاسب السوّاق تقدح مواخيره
صنايع بياطير الكفر لابسين الكاب = عصاة اليهود اللي مشاريبها البيرة

[عيضه العيسي]

راكب اللي مخ رجليه خنزير و هوا = أشهب في مقدمه باقين و عكس تاج
متر في مترين مستبرم كله سوا = حايفه حطاب ما سمكره راعي الكراج
إن نعشته بالثلاثة مع اللفة عوا = عوي ذيب محتدينه مربية النعاج
ثابت ما يختلف كلما لف إنزوا = و ارتفع ثم ارتخى مثل طايرة المراج
كن ضرب المرو في الويل قدام و ورا = ضرب هملول البرد و ان تقفاه العجاج
منوة اللي مشفقن لهله و لهم نوا = من بعد طول المسافة يبي فلّة الحجاج

[النـايــــــف]

يعطيك العافيه اخوي عيضه


على هذا الموضوع الرائع


ينقل إلى منتدى الشعر الشعبي


تحياتي لك ،،،،

[مستر عتيبي]

يعطيك العافيه اخوي عيضه على هذا الموضوع الرائع
و مشكور

[بنت* عتيبة]

صح لسانك

[وحش عتيبه]

يعطيك العافيه يا عيضه


معـ تحياتيـ