((الكلمـــــــــه الأخيـــــــــــــــره)) [الأرشيف]

حنين الماضي

02-14-2007, 07:55 PM

أخواني شعراء وشاعرات عتيبه

أحييكم بتحية الإسلام

السلام عليكم ورحمة الله وبركاته وبعد

هذا موضوع حبيت إنكم تشاركوني

فيه وأتمنى أن ينال على إعجابكم وهو

((الكلمه الأخيره ))

الفكره تتلخص بما يأتي يكتب الشاعر بيت واحد فقط من بدعه

وهذا البيت شرطه أن يبدا بالكلمة الأخيرة من البيت الذي قبله

ولا يحكم البيت لا بحر ولا قافية ولا فكرة .

أهم إشئ إن البيت من نظم الشاعر وليس منقول

أنا أبداء بسم الله

سافرت وأطوي همي بكم الأيام =مدري وش اللي مقبلاًً بالليالي

اللي بعدي يبدأ بيته بأخركلمه أنتهيت فيها

((بالليالي ))

وهكذا

أمل تنال استحسانكم

تحيااااااااتي

إبن ثعلي

02-14-2007, 08:48 PM

الليال السود ميعاد قلبينٍ سوى000في دجاهن يامنون الثنين من الحسد
تحياتي

المحقنيه

02-15-2007, 03:10 AM

لكم ها البيت وانشاء الله يعجبكم ..سويت جهدي
دخل قلبي من دون استئذان....قلب ماله في الحب طاري

ناصر بن سعدي

02-15-2007, 03:11 AM

الحسد يقضي على الحسنات لو كانت كثيره=ثابتٍ عن سيْد الأمه وماجاء في حديثه

المحقنيه

02-15-2007, 03:44 AM

كلامك اخوي ناصر ماطلع حابه اشوفه

حنين الماضي

02-15-2007, 07:31 AM

ابن ثعلي
ابن سعدي شاكره حسن مروركم
المحقنيه ,سداح لا هنتم على مشاركتكم لكن لابد نبداء بأخر كلمه انتهى فيها الشاعر اللي قبلك
تحياتي للجميع

غالي وحال الوقت بيني وبينه =أمشي مع الأيام لكن عصني
اللي بعدي يبدأ بكلمة ((عصني)) وهكذا
أرجو ان الفكره وضحت تحياتي للجميع

إبن ثعلي

02-15-2007, 08:50 AM

الاخوان لابد من الالتزام بالشرط وهو البدء باخر كلمة بيت الشاعر الذي قبلك ونبدأ بالكلمه التي وقف عليها ابن سعدي وهي:- حديثه

حديثه حليب ابكار في واديٍ موسوم 000تعاقب نواويره على اشكال والواني
تحياتي

حنين الماضي

02-15-2007, 11:29 AM

تسلم يا ابن ثعلي

الواني اللي بلون الورد ممزوجه =ماطالها كل رساماً وفناني

إبن ثعلي

02-15-2007, 01:15 PM

فنان ياللي تدق العود واوتاره 0000يهنيكم بالجمال اللي تشوفونه
تحياتي

حنين الماضي

02-15-2007, 03:46 PM

مشكور يا ابن ثعلي ولا هان رأسك يا بعدي

تشوفونه قريب وقربه أبعد من جبال طويق =يخم المرجله ما حاشها من فزعة إفلاني

ناصر بن سعدي

02-16-2007, 04:43 AM

موضوع جميل وشيق وفكره رائعه

فلا ني عاجزٍ لا ..أشكرك يالغالي ونور الحـي=ما دام إن الجمايل كاسيتني وأنت صاحبها

إبن ثعلي

02-16-2007, 08:45 AM

خطأ يابن سعدي لازم تبدا بكلمة فلان الاسم لأنك بديت بلا النافيه للجنس
تحياتي

ناصر بن سعدي

02-16-2007, 11:21 AM

يابن ثعلي لاهنت وبإمكاني إستخدام الشقر لأنه يضيف نوعاً من التجديد..!!

ولك ماطلبت ياعزيزي ..!!

فلان الفلاني قاصراتٍ شبوره=ولا ..له مع أهل الخير والطيب قسمه

ســــMـــــدااح

02-16-2007, 12:26 PM

اااالسلااااااام عليكم

حنين ممكن اعرف ليش الاخ ناصر يحذف مشاركتي

واناااااا ماغلطت على احد والبيت واضح

ردودك تحذف لـ سببين

الأول:. موضوعنا تبداء بيتك بآخر كلمه من بيت اللي قبلك .
الثاني:.الإستهيال وتبغى تنام وتبغى وتبغى .

للموضوع إحترام

الإداره

ســــMـــــدااح

02-16-2007, 02:55 PM

لاهنت يابن سعدي
وانا على النيه ابوي لاهنت وخذ

وقسمه لا قسم ربي تروح الواحدن ثاني

عسى من قسمه خيره ونا نفسي بجاهدها

عبدالله فيحان السميري

02-18-2007, 10:05 AM

اجاهدها اليال السود يامشعل واقوامه

عسى ربي يساعدني يبو نايف على ايامي

ســــMـــــدااح

02-18-2007, 10:26 AM

اياامي الي مرها من كثرها صرت حلاااا

ماعاد انا اذكر من حلاها غير من بعض الخيال

عبدالله المرشدي

02-18-2007, 10:27 AM

ايامي اللي مضت وش لون ارجعها=واحاسب النفس باللي صار واقنعها

احترامي

ســــMـــــدااح

02-18-2007, 10:33 AM

اقنعهاوتئمل ابكره يكون احسن
فجئه انا اصحا وثر متئمل البارح

ناصر بن سعدي

02-18-2007, 10:58 AM

البارح الهاجس اللي زارني قاسي=من شدته صرت لا مجنون لا صاحي

ســــMـــــدااح

02-18-2007, 11:04 AM

صاحي مع الهاجس اللي مابعد نامي

لامن طراله بلاه ايسج ويغني

ســــMـــــدااح

02-18-2007, 11:08 AM

نااااصر بيتك مغطي وتحياتي لك
اخوك سداح

عتيبي والفخر

02-18-2007, 11:14 AM

صـاحي من صباح نور العباد

نوراً منور بوجيه الرجال

تراهـا اول مرهـ اكتب أبيـات شعر :)

ســــMـــــدااح

02-18-2007, 11:18 AM

النور ابوجهك عتيبي

بس لازم تبد من اخر كلمه بالبيت اللي هي )ويغني(تبد فيها ابتك

وتحياتي لك اخوك سدااح

المكافح

02-18-2007, 11:39 AM

بارك الله فيـك

حنين الماضي

02-18-2007, 09:17 PM

يغني والليالي يطربنّه =هجوس الشاعر اللي ماتونا

يغني والمراجل يزبننّه=عن إعلوم المراجل ماتثنا

ســــMـــــدااح

02-18-2007, 09:36 PM

ماتثنا بهرجتي ولاخلف وعد=ومن بغاني بمطلبن ماقول ليه

قبلي ابويه على العلي صعد= ماسكن طبعه انا ودربه انا ماشي عليه

حنين الماضي

02-19-2007, 11:50 AM

عليه الله واكبر وش يفيده = دلع ولا ولع ولا بعادي

نقول القول ثم نرجع نعيده = تغلا والغلا زاد بعنادي

سيف قحطان

02-19-2007, 04:40 PM

بعنادي يا بنت العرب لا تمارين=العند انا عمه وجده وخاله

شاعر وقاسي من سلايل سلاطين=كسابت النوماس لا جا مجاله

حنين الماضي

02-20-2007, 10:04 PM

مجاله والمجال اللي مقابل = درسناها وتعّبنا يدينا
نطول الصعب ونخم السنابل =طنايا يا ولد والله علينا

ســــMـــــدااح

02-20-2007, 10:30 PM

علينا وش علينا ماعلينا=ندوس الداب والعقرب ونمشي

ولغير الله حنا ماشكينا=سلاطينن وفينا كل نشمي

نخوض البحر ونرسي كالسفينا=ونجد ابخص وقولو للغشمشي

حنين الماضي

02-24-2007, 09:07 PM

الغشمشي لو تدله ما تدلل =ما عرف يمناه من وجهة يساره

لو نخيته مال ميلاته تسلل =لو مشى بالضؤ ماعنده جساره

ســــMـــــدااح

02-25-2007, 07:19 PM

جساره ابوقنا مامن جساره=وولد عم ايخوف بنت عمه

زمانن ماصفا كاثر غباره=مدام الدام مايامنه دمه

ســــMـــــدااح

03-03-2007, 03:36 AM

دمه نشف من حب ناسن مقفين= ماعاد به دمن ولاعادبه روح

يالله سترك كان ماهم بدارين= من قبل اجر الصوت للناس ونوح

حنين الماضي

03-07-2007, 07:03 PM

أنوح نوح الورق ماعاد فيني = صبرن على ما أشوفه والله غبينه

أقلّب الأفكار جيمن وسيني =وكلن على دربه تقديه عينه

ســــMـــــدااح

03-07-2007, 09:17 PM

عينه على غيري وعيني اابعينه=عيت تلد اعيونه الدعج يمي

حنين الماضي

03-09-2007, 08:56 AM

يمي سراباً حال دوني ودونه =مديت يمنايه ورجلي قصرته

خوفاً من العذال لا يقهرونه = أخفيت حبه للملا ما شهرته

ناصر بن سعدي

03-18-2007, 08:12 AM

شهرته لين في روس المراقيب إعتلى شانه=وقدرته وحشمته وتال الوقت خلاني
عديم الراي ما له في ديار أهل الوفاء خانه=يكيد ويفتل وينقض وينخى كل عدواني

عـايض النفـيعي

03-21-2007, 06:43 AM

عدواني أصحـاب لـو دقـّقت أنـا فيهم = الفضـل يرجـع لهم فـي فـتلت أشنابـي
لـو قـلت يالله ياربـّـي لا تحيّـيـهم = لـكـنـّهم سوّوا الـلي عجـّز أصحـابي

حنين الماضي

03-26-2007, 06:43 PM

أصحابي اللي بوقت الضيق خلوني = مالي بهم يوم زانت لي لياليه

وقت الرخاء بعت من بالضيق باعوني = وشطبتهم من عناوين الشماليه

عـايض النفـيعي

03-28-2007, 07:53 AM

الشمــاليــّه تنسنــس والبــروق تــلـّوح = والعـيون تخـايل البـّراق ممـا فيها
مـانقصـها وبل والمـاطر عليهـا روّح = مـار تـِذكرهـا البـروق بشي من غاليها

حنين الماضي

09-28-2007, 02:11 AM

الشمــاليــّه تنسنــس والبــروق تــلـّوح = والعـيون تخـايل البـّراق ممـا فيها
مـانقصـها وبل والمـاطر عليهـا روّح = مـار تـِذكرهـا البـروق بشي من غاليها

غاليها يواعدها وينسى الموعد وينسى = وتلقا في مواعيده غرامن ما يسليها

عبدالله المرشدي

03-31-2008, 01:41 PM

يسليها التلاعب في مشاعر غيرها وتطيش=تقول ان البشر بيدنها لعبه تلاعبها

ظافر العتيبي

03-31-2008, 02:40 PM

وهقتني بهالكلمه يا ابن عمي بس ابي اللي بعدي يتوهق مثلي

تلاعبها بقلبي يا ابن مرشد = عجزت اصبر على كثرة تلاعبها

عبدالله المرشدي

03-31-2008, 04:43 PM

لاهنت ياظافر وحياك

تلاعبها على الحبلين لكن ماتجاريها=خبيره في نظام اللعب والتلويع والتجريح