بعد الفقر حطت شريحـه وجـوال

[الذيب العتيبي]

بعد الفقر حطت شريحـه وجـوال=يسعد مسـاء جوالهـا والشريحـه
كانت تجيني تشتكـي قلـة المـال=وتصيح لا جاء طاري الفقر صيحه
تقول أبويـه دايـم الـدوم رحـال=وامي كبيرة سـن دايـم طريحـه
وانت الوحيد اللي لك القلب ميـال=دايم يصارحني وانا لـه صريحـه
طفله وانا معشوقها بيـن الاطفـال=جريح حب وطاح له في جريحـه
كنا سوى نرسم على التربه أمـال=واحلام تقتلهـا الحيـاه الشحيحـه
كم دمعة كانت على الخـد تنهـال=واذا انزلت ضاقت علي الفسيحـه
الله كم صرخـه وهمسـه ومـوال=الله كـم جـادت علينـا القريحـه
الله كم بيـت(ن) كتبنـاه يختـال=واقول انا ضيدان وانتـي المليحـه
نخيل لو ما بالسماء برق وخيـال=وانكذب الايام لو هـي صحيحـه
وتقول لا حطيت لك بشت وعقـال=وسخر لك الرحمن عيشه مريحـه
أخاف تتركني على عثـرة الفـال=للفقـر ووجيـه الحيـاه القبيحـه
وحبيتها بيـن الخلايـق والازوال=حب يطول الوقـت محـدٍ يزيحـه
وسلمتها قلـبٍ تباريـه الاهـوال=وطاح الخفوق وطيحة القلب طيحه
راحت وخلتني مع القيـل والقـال=شاعر صواديف الدهـر تستبيحـه
ودار الزمان وغير الحال بالحـال=وجاها الزمان بكل ورده وشيحـه
فلـه وخدامـه ولكـزس وجـوال=وانا عجزت ادفع رسوم الشريحـه
للشاعر ضيدان بن قضعان