يابـوي بــنتـك لاعــوى الذيـــب ذيبــــه ...!

[بلسم الجروح]

السلام عليكم ورحمة الله وبركاته



يسرني أن انقل لكم هذه القصيده الذي حازة على إعجابي وأتمنى أن تحوز على رضاكم




يابـوي جعلـك للبقـا والمكاسـيـب=عمري بدونك يالذَرا ويش أبـي بـه
يابوي تسأل عـن شفـاك المراقيـب=طلعـة سواتـك للنّوايـف غريـبـه
ليه المرض مايعرف الزّين والعيـب ؟=مايـدري انـك للمخاليـق هيبـه !!
أبسألك وش به غزا وجهـك الشيـب=والقلـب لايـع والنواظـر شحيـبـه
وش بك تحاتي لانوى الموت تغريـب=تخشـى علينـا بالليّـالـي الكئيـبـه
خذ دلّتك واركى على مسنـد الجيـب=وعطني شماغك بلثمه وأحتمـي بـه
ونروّح لأرض ٍ بها العشـب والطيـب=وتسمـع كـلام ٍ يالغـلا تحتفـي بـه
يابـوي بنتـك لاانحكـى بالتّجاريـب=كـل ٍ يشـق لهيبـه الصّيـت جيبـه
وماني من اللّي لامشت حفّها الرّيـب=أنـا مـن اللّـي مايدنّـس حليـبـه
مرفوع شاني عـن غـرام المكاتيـب=وأكبر من انّنـي أرتضـي بالحبيبـه
أنـا غرامـي لاابتـدوا بالتّراحـيـب=نفوس الأوادم فـي وجـودي رحيبـه
وان كان زينـي فتنـة ٍ للمصاويـب=أحـط وجهـي بالحريـق ولهيـبـه
زيني أبيعه وأشتري سمعـه الطّيـب=اسم ٍ ينومس بالصّـروح الـذ ّهيبـه
وان كان عندي ( بالحلا) شي ٍ اصعيب=عنـدي جـدود ٍ مارضـت بالغليبـه
دموع القبايـل فـي لقانـا مساكيـب=كـن المقابـر لاحضـرنـا قريـبـه
خضّبت لك كفّي مـن العـز تخضيـب=ورفعـت راسـي للنّجـوم الصّعيبـه
والله لأسـدّك بالفعـول المصالـيـب=والله لأشيلـك بالرخـا والمصيـبـه
طلـع المعالـي ماانحكـم للشّواريـب=بنت ٍ وأناطـح فـارس القـوم طيبـه
وياشيخي إبشـر لوتـدور الدّواليـب=بنتك إلا منّه عـوى الذّيـب ( ذيبـه)