ما عاد لي في سوق الاسهم تجاره

[سلطان القثامي]

السلام عليكم

هذه القصيدة للشاعر فهد جازي القثامي

وقد شارك بها في برنامج شاعر المليون

قفل حسـاب المحفظـه بعـد صفيـت****معاد لي فـي سـوق الأسهـم تجـاره

ياليتنـي فــي سوقـهـا ماتعنـيـت****ما أخذت منهـا إلا الفلـس والخسـاره

أمسيت فيهـا مغتنـي ليلـة أمسيـت****واصبحت ضيف الفقـر نـازل بـداره

وش عـاد يا سـوق الهواميرخلـيـت****مـن لـؤلـؤ البـحـار ولا مـحـاره

كنـت اتحلـم اغتنـي وابتنـي بيـت****والجيب ياقـف فـي كـراج العمـاره

واسلـف المحتـاج حسـب الثوابيـت****وافزع لابـن عمـي وضيفـه وجـاره

وفجأه على الواقع مـن الحلـم فزيـت****الله ولا حـلـمٍٍ كـوانــي بـنــاره

(من كثر ما من بعض الأحـلام عانيت****خط اتصال الهاتـف بـلا حـراره)!!

بالله عليكـم ياهـل الجـاه والصيـت****أحـدٍ تجـرع مثـل هـذا الـمـراره

مرة سنـه مـا فـي الليالـي تهنيـت****مـره يميـن الـدرب ومـره يسـاره

في الليـل اسامـر منتديـات وصيـت****والسوق من بـدري اتحـرى اخبـاره

أقرا البلونجر كل ما اصبحت وأمسيـت****واتبـع الشـارات شــاره بـشـاره

مافيه عصر مـع الجماعـه تقهويـت****ولافيـه يـومٍ نمـت بـأول نـهـاره

(ولا عـاد عنـدي للمواعيـد توقيـت****إلا صـلاة الـفـرض والإستـخـاره)

وعلى اجتهادي وكثر ما اقبلت واقفيـت****عيـت تفيـد المعـرفـه والشـطـاره

((واصبحت من كثر الضغوطات كبريت****من يـوم تشخطبـه يولـع شـراره))

احيان يضرب هـا المؤشـر دناميـت****ويصفـق بالأحمـر ويتبـدل مسـاره

ولاعادتسمع غير وش بعـت وابقيـت****والنـاس واجـد يقطعـون الإشــاره

ياطول ساعـات الحـزن والتناهيـت****وياقصـر ساعـات الفـرح والبشـاره

رحنا ضحايا الحرب بيـن الطواغيـت****كـلٍ علـى الثانـي يسنـد بـغـاره!!

والسوق كله اصبـح بكـف عفريـت****الله يدمـر مـن سعـى فـي دمــاره



وسلامتكم

[مستر عتيبي]

صح لسانك و صح لسان الشاعر فهد جازي
مع تحياتي

[سلطان القثامي]

صح بدنك مستر

[ساحر الكلمه]

مشكور يالغالي

الساحر

[سلطان القثامي]

تسلم يالساحر

[سلمان]

سلطان صح لسانك يا غالي


وبيض الله وجهك

وصح لسان شاعرها


لا هنت يا غالي

[بنت* عتيبة]

احيان يضرب هـا المؤشـر دناميـت**ويصفـق بالأحمـر ويتبـدل مسـاره


وصف جيد يا سلطان:(:(

[سلطان القثامي]

وجهك ابيض سلمان

[سلطان القثامي]

مشكوره يا بنت العم

الله الله بالتصويت

[بنت* عتيبة]

وش هو تصويته؟

فهمني يا سلطان.


انا اشارك بمليون صوت للعتبان

[حسام هوازن]

مشكور على القصيدة يسلطان

بس يسلطان فهد القثامي طلع من المسابقة

ولا الى الحين هو موجود بالمسابقة؟؟؟؟

[بنت* عتيبة]

اي مسابقة ؟

[سلطان القثامي]

لا لا حسام

الرجال باقي فيها....بس ما جت حلقته الى الحين

[محمد العتيبي]

صح لسانك ولسان الشاعر فهد جازي القثامي ولاهنت على النقل الرائع
وانشاء يصوتون له ويفوز

تحياتي

[محمد العتيبي]

صح لسانك ولسان الشاعر فهد جازي القثامي ولاهنت على النقل الرائع
وانشاء الل يصوتون له ويفوز

تحياتي

[سلطان القثامي]

صح بدنك محمد