ممنوع الدخول إلا.......

[راعي الطيبه]

وين كـــــــم ياشعار القاف والمعنى


تحت عنوان (لا. .لا.. للمجاملات وفي حدود الأدب )


سلام الله على المنتدى والموقع المرموق=عدد ذعذاع لفح النود.. يا دنيا من نتيله

تهيض ياهجوسي وبدع القيفان والطاروق=ترى الدنيا سهود مهود.. يا دنيا من نتيله


دمتم بود راعي الطيبه

[شاعر روق]

اهلا وسهلا براعي الطيبه وترى شطرك الاول من البيت
الاول نسيت تحط كلمة اهل للتنويه لبعض الناس واستلم


هلا يامرحبا ترحيب عن برقا وربعي روق=تراحيب الكرم والجود يادنيا من انتي له
تهيض ياهجوسه وارفع المعنى بعرفك فوق=وكل اللي تبا موجود يادنيا من انتي له

[راعي الطيبه]

الأخ / شاعر روق مرحبا ومسهلا وشكرا على التوضيح

ومدام إنك مشرف القسم الله يجملنا معك



تفضل والله ايحيك في سوق الغلا والـذ ّوق=سلمت وطافك المنقود يادنيا من انتي له


ما دام انك تمثل لك قبيله فالخيال ابروق=تبا محامي ومعك شهود يا دنيا من انتي له



دمت بود راع الطيبه

[شاعر روق]

الله يجمل الجميع واستلم لاهنت


تسلم ثم تحيي ماتجي ياللي هبطت السوق=تحسب ان العباد رقود يادنيا من انتي له
على ماذا نجيب شهود جعلك مايجيك العوق=تفضل عطني المقصود يادنيا من انتي له

[راعي الطيبه]

صح لسانك ياشاعر روق


أستــــــــــلم لا هنـــــــــــــت




أنا حييت في سوقي ولا زليت في المنطوق=ترى كل الديار حدود يا دنيا من انتي له



أثرك اللي يدور للخطاء ويهزفيه الشوق=تخيربيض والاّ سود يا دنيا من انتي له


دمت بود راع الطيبه

[شاعر روق]

لابالله ماسبقك بها من العالم ولا مخلوق=ولا تصرى من المنقود يادنيا من انتي له
تحرج في الحراج وتنقل الخزنه مع الصندوق=واثر مافي الخزينه فود يادنيا من انتي له

[راعي الطيبه]

استلم لاهنت



هذي وجهت نظرك ولا نرقع بالي الخملوق=سرت منقود يابوسعود يادنيا من انتي له



عرفنا ارض الزبيدي يوم شفنا نبتت الرقروق=تبا ترعد عليك ارعود يادنيا من انتي له

[شاعر روق]

ومن قال سالم ولا يهون

سرت يوم الجمل جاني مافي ظهره ولا معلوق=سوات الحاشي المفرود يادنيا من انتي له
سحاب الصيف ما يسقي ولو جاله رعد وبروق=عوايد يومه الموعود يادنيا من انتي له

[متعب العتيبي]

راعي الطيبه وابو سعود

مبدعين وشعار لكم وزنكم

واصلوا لاهنتوا

اخوكم ومغليكم

[الزير سالم]

شاعر روق وراعي الطيبه

لله دركم اجبرتوني على المتابعه

تحياتي لكم

[شاعر روق]

ابو رشيد

ياهلا وغلا

سعداء بتواصلك لاعدمناك

تقديري

[شاعر روق]

الزيز سالم

متابعتك تهمنا ووجودك مكسب

تقديري

[راعي الطيبه]

استلم لاهنت



ياشاعر روق صحصح قبل اجيب الطاق والمطبوق=تعيد ابروق يا مقرود يا دنيا من انتي له



يا كيف تمثل الهيلا ومثلك ياولد مسبوق=ترى دنياك نقص وزود يا دنيا من انتي له





دمت بود راع الطيبه

[شاعر روق]

بعد ماضاق بك ثوبك بديت تصيح يامخنوق=وذقت الملح والبارود يادنيا من انتي له
امثلهم مدام اللي سواتك في البلد مفهوق=واقض حيود فوق حيود يادنيا من انتي له

[ناصر بن سعدي]

راعي الطيبه

و


شاعر روق


ثنائي ممتع..ورائع


متابع للفائده

[الجافي]

شاعر روق وراعي الطيبه

لله دركم اجبرتوني على المتابعه
// وبصراحة كنت أبي أطلب واحدآ ألعب معه بس والله خوفتوني منكم محد يتعرضلكم //
تحياتي لكم
الجافي

[راعي الطيبه]

صح لسانك ياشاعر روق


(منقود - بروق) سرت من عندي والشاعر اللي مثلك بدون مجامله محسوبه عليه

على العموم استلم لاهنت



عطوك الرخصه الأخوان وانته ماتعرف تسوق=طريقك ياولد مسدو يادنيا من انتي له




تقــادي فالقوافي والمعاني بابها مصفوق= ماهي بمجاملة مردود يادنيا من انتي له




دمت بود راع الطيبه

[ناصر بن سعدي]

راع الطيبه


و


شاعر روق

والمباره على أشدها...ومن يظفر..باللقب..والبطوله...


ومتابع...والصفوف إزهلوها عندي أبا أطامر لين الله يفرجها...



ودمتم....

[شاعر روق]

النسيان افة الانسان وفيه اكبر مني تحصل معهم مار لاتكبرها
ومفروض تنبه للشي هذا على طول ماهوب ليا عجزت وشارفت المحاوره على النهايه حطيتها عذر هههههههههههه عموما استلم وتكبر وتنسى

عطونيها بعد ماصار حبك في الرحا مسحوق=ياصفرٍ ماانته بمعدود يادنيا من انتي له
اقف عاجز وقوم وحوقها في وسط حثلك حوق=وحنا وسط حلقك عود يادنيا من انتي له

[الجافي]

وأنا موجود ياراعي الجود

[راعي الطيبه]

الأخ / شاعر روق


أولا وضحتها لك وأنا خوك في نهايه ردي عليك والبيوت موجوده ومكتوبه وهي

سرت منقود يابوسعود يادنيا من انتي له

تجيب ابروق يامقرود يادنيا من انتي له

يجب ان تقراء ردي عليك أكثر من مره واتحدى إذا فيه شاعر محاوره نفسه طويل يجيبها أكثر من مره!!!!!

وبعدين من قالك أن المحاوره شارفت على الأنتهاء إلا إذا ترغب ذلك فأنت المشرف ( وبتاع كلششششششش)


ترى مازملتني واللي سواتك ياولد ملحوق=جديد مع الشعر مولود يادنيا منانتي له


لكن اشهد يبن سعدي ويالجافي وبن مرزوق=حسبت انه قوي ازنود يادنيا من انتي له

أبن مرزوق ( عبدالله المرشدي) التوضيح للذي لايعرف وليس لشاعر روق محشوم

[شاعر روق]

هذا والله البلشه من هالماقف اللي تكرر وسويت فيه خطبه
اللي في ضميرك سخره في بيتك بدون خطب ومانيب قايل صح لسانك لان تقول خلاص بنفسك استلم


وانا خابرك قدامي قديم ولك زمن مشنوق=ومني في الحشا ملهود يادنيا من انتي له
تعالو واشهدوا للصقر يوم اهوى على الغرنوق=وصار بمخلبي مصيود يادنيا من انتي له

[ناصر بن سعدي]

راعي الطيبه


صح لسانك....




ترى مازملتني واللي سواتك ياولد ملحـوق=جديد مع الشعر مولود يادنيا منانتـي لـه


لكن اشهد يبن سعدي ويالجافي وبن مرزوق=حسبت انه قوي ازنود يادنيا من انتـي لـه




والليل ............الليل



واللعب حامي....

[شاعر روق]

الجافي سعداء بتواصلك وبوجودك لاعدمناك
تقديري

[متعب العتيبي]

وانا خابرك قدامي قديم ولك زمن مشنوق=ومني في الحشا ملهود يادنيا من انتي له
تعالو واشهدوا للصقر يوم اهوى على الغرنوق=وصار بمخلبي مصيود يادنيا من انتي له



وانا خابرك قدامي قديم ولك زمن مشنوق=ومني في الحشا ملهود يادنيا من انتي له
تعالو واشهدوا للصقر يوم اهوى على الغرنوق=وصار بمخلبي مصيود يادنيا من انتي له

الله الله اشهد بالله انك مبدع يابو سعود وانا الليله في صفك
معكم معكم

اخوكم ومغليكم

[ابن مسلم]

أبن روق مساك الله بالخير

صح لسانك
وتحياتي

[راعي الطيبه]

أستلم ياشاعر روق... هههههههههههه

من برك للحمل يشتاله وانا أحترم لآخرين وأقول لك صح لسانك وستمر......


ترى محدن على يمناك جرك جيتني مطفوق=تبا تشتال عشر ردود يادنيا من انتي له


عواري والعواري بينه من شوفة السمحوق=اظنك علة النمرود يادنيا من انتي له


دمت بود راع الطيبه

[شاعر روق]

ههههههه
وانا احترام للاخرين اقول صح بدنك



نعم جيتك وضديتك وقلبك بسببي محروق=كسرنا الكتف والعمرود يادنيا من انتي له
عسى الله يقطعك يامنتجٍ تارد من الزقزوق=يابندق مالها عبرود يادنيا من انتي له

[ابن مسلم]

ههههههه
وانا احترام للاخرين اقول صح بدنك



نعم جيتك وضديتك وقلبك بسببي محروق=كسرنا الكتف والعمرود يادنيا من انتي له
عسى الله يقطعك يامنتجٍ تارد من الزقزوق=يابندق تاكل العبرود يادنيا من انتي له


أبن روق
سرى الليل سرى

أنابصفك
لاتهمك الصفوف وأنا ابن عمك
عانهم جنبي محضرلك خمسين ولد كلهم بالصف

ههههههههههههههه

[راعي الطيبه]

استلم لاهنــــــــــــــــــت




تحلم مير صح النوم ولبس ثوبك المشقوق=وفي جده تخاو زيود يادنيا من انتي له


انا اقطف لك ورود الشعروقطعها مع الزملوق=مثل هداج عد ورود يادنيا من انتي له

دمت بود راع الطيبة

[راعي الطيبه]

يابن مسلم محفوظه لك


ادري ان مافي صفي الا أبن سعدي طول الله عمره مير عليكم معونة بالله

( ولله مافيا المنتدى)

شكرا على مرورك ومتابعة الأحداث

[شاعر روق]

بعد جينا على راسك فقشنا بيضك المسلوق=وباذنك قمت اقودك قود يادنيا من انتي له
تميدح وانت ماانته بالوليد ولا انت بالفاروق=جنازه قبرها ملحود يادنيا من انتي له

[شاعر روق]

ابو ررشيد
مرورك يهمنا ووجودك في صفي مكسب

تقديري

[شاعر روق]

ابن مسلم
وجودك في صفي مكسب ونوماس
ياعصابة راسي

تقديري لك

[راعي الطيبه]

علامة ضعف الشاعر إذا ضاق عليه الخناق جاب الخزى

ولن اسبك ياشاعر روق بل اترفع عن الكلام النابي


وراك اتردها يم الخزى والشين والخازوق=ترى خصمك قوي اعضود يادنيا من انتي له


عطاوي (ن) لياحمي الوطيس ابدن ترى مابوق=على وضح النقا المجرود يادنيا من انتي له


مع فائق احترامي وتقديري

[شاعر روق]

الخزى تفسيرك وودك بالمخرج
واما الضعف مااعتقد مايحتاج تقوله ان كنت طيب فالرجال تراك والميدان ياحميدان


هذا عذرك بعد ماصرت وسط الملعبه مزنوق=كمنك ماتشيل نقود يادنيا من انتي له
عطاوي والنعم ودك نقول مسامح ومعتوق=لكن حاشا وكلا (عود)يادنيا من انتي له

[ناصر بن سعدي]

راعي الطيبه...


صفك شعله....وصح لسانك..

من هنا...لين نصلي الفجر....!!



وراك اتردها يم الخزى والشيـن والخـازوق=ترى خصمك قوي اعضود يادنيا من انتي لـه


عطاوي (ن) لياحمي الوطيس ابدن ترى مابوق=على وضح النقا المجرود يادنيا من انتـي لـه



وتقبل تقديري

[متعب العتيبي]

هذا عذرك بعد ماصرت وسط الملعبه مزنوق=كمنك ماتشيل نقود يادنيا من انتي له
عطاوي والنعم ودك نقول مسامح ومعنوق=لكن حاشا وكلا (عود)يادنيا من انتي له

ياسلاااااااااام يابو سعود
والميل عليهم
وصفك عامر

الليل الليل

[ابن مسلم]

تصبحون على خير يالربع أنا أبي أنام

لاكن لاتنسون بالله صحوني للفجر

وعقب الصلاه إن شاء الله نكمل
باي باي

[راعي الطيبه]

كمنك كمنك هههههههه ههههههههه ههههههه

صح لسانك ياولد وق


انا ادرّسك درس الذوق فالطاروق حتى تروق=وشرطي فيه خمس بنود يادنيا من انتي له


تثقف واحترس واحذر وميز واعرف الزّاروق=نصيحه لا بيح اسدود يادنيا من انتي له



دمت بود راع الطيبه!!!!!!!!!!!!

[شاعر روق]

الزارزق ههههههه صح بدنك استلم


لا بالله طالبٍ عقلك بليد وبالعصا مطقوق=وقدام العرب مجلود يادنيا من انتي له
تثقفنا وشفنا حضرتك تضحك بدون شدوق=حشف يابس على العنقود يادنيا من انتي له

[راعي الطيبه]

استلم يالمثقف لاهنت



يشيب القاف عندك مير جيب القاف لو مسروق=أبا أدّبك يامسعود يادنيا من انتي له

ابطبخ شاعر(ن) مثلك مثل مايطبخ المرقوق=وقصر حبلك الممدود يادنيامن انتي له


دمت بود خوك راع الطيبه

الليل ياعياااااااااااااااااااااااااال

[شاعر روق]

استلم استلم ياشاعر


كسرت القاف يوم ان المعاني بابها مغلوق=وقل البصر والمجهود يادنيا من انتي له
ياطباخٍ فصدنا غاربك باقي ثلاث عروق=ويصبح غاربك مفصود يادنيا من انتي له

[راعي الطيبه]

أستلم لاهنت ياشاعر روق[/align][/color]



كفانى الله شرك يازمان(ن) صار فيك عقوق=تساوى السيّد والمسيود يادنيا من انتي له


وابوك امرح ياجيل الببس والسن توب والملفوق=اثعال طامعه بفهود يا دنيا من انتي له

دمت بود راع الطيبه

[شاعر روق]

ولا تهون واستلم


تشكوى من زمانك يوم سقتك مثل سوق النوق=وبركتك بدون قيود يادنيا من انتي له
فهود اذنابها في ضهورها ومربطه في ربوق=يذكيها الكريم حمود يادنيا من انتي له

[راعي الطيبه]

الأخ العزيز/ شاعر روق


فرصه طيبه أني لعبت معك
والعذر والسموحه إذا اخطاءنا عليك وثق تمام الثقه اني لااحمل على اي شخص العب معه مهما وصلت اليه المحاوره

تقبل تحياتي والى لقاء آخر إنشاء الله

[شاعر روق]

اخي وعزيزي راعي الطيبه
وانا كذلك سعدت باللعب معك
وثق ايضا اني لااحمل في قلبي شيء وخصوصا المحاوره لان مافي الصفحه لايعبر عن مافي القلب
وقلبي لايحمل لك الا الود والمحبه والمحاوره جميع مافيها يجب ان نلقيه خلف ضهورنا

وتقبل خالص تقديري

[ناصر بن سعدي]

راع الطيبه


و


شاعر روق


ماقصرتوا....


وتقبلوا تحياتي

[إبن ثعلي]

اطلعت على المحاوره ولاناسبتني لمافيها من الخزا الغير مبرر وان كان من بدأ بالهجوم هو راعي الطيبه وشاعر روق كان مدافعا
تحياتي

[راعي الطيبه]

الأخ أبن ثعلي


مرورك أسعدنا وإن كان متأخر جدا جدا جدا جدا

حيث مضى عليها أكثر من شهر ونصف وعلى تأخر مرورك إلا أنك أتهمتني بالهجوم على أخي شاعر روق
ارجو مراجعة الصفحة الأولى والثانيه أكثر من مرة وتمعن في البيوت واحد تلو الآخر حتى تتضح الحقيقه لديك إن لم يكن لك هدف في بحث الأمور الفايته وأنت رجل محسوب في المنتدى!!!!!!!

[إبن ثعلي]

هلابك ياراعي الطيبه
ويمكن حصل تاخير لكن هذا راجع للوقت لدي والحقيقه انكما شاعرين محترفين ولكن اللي ابغاه ان مايجي بين شعار القبيلة خزا والمعاني كثيره وباستطاعة الشاعر ان يظهر مواهبه بدون ان يسئ لزميله وقبيلته ومافي قلبي ابديته لكم وليس هناك اي هدف ثاني ولكن خيرها في غيرها ان شاء الله تمتعوننا في المقبلات
تحياتي

[راعي الطيبه]

والله ونعم يابن ثعلي نصيحه محل التقدير والأحترام

[جبل القحطاني]

صحت السنتكم