يا شاعر روق ولا يهون الباقين قرب شوي لاهنت

[سيف قحطان]

السلام عليكم

ابو سعود اتشرف بالعب معك طال عمرك



سلام ياعتيبه الهيلا رجال الظفر=من هاجس اللي على الطالات يبديبها

يالشاعر الروقي المسرى لسطح القمر=وانته من اللي علوم الطيب يحريبها

[شاعر روق]

وعليكم السلام ورحمة الله وبركاته
وانا كذلك اتشرف باللعب مع مثلك وشرواك

يامرحبا ياقحطاني عد وبل المطر=من هاجس يطلب الجزلات ويجيبها
واركب على المركبه واطلع وهات الخبر=وافرق لنا مخطي الاخبار ومصيبها

[الطوفان]

ياســـــــــــــــلام ياســـــــــــــــلام

سيف قحطان.........وابو سعود

هنا الابداع وهنا الفتل والنقض

متابعين بشغف

صحت السنتكما من شاعرين

تحياتي

[شاعر روق]

ابو عبد الرحمن مرحبا بك
نسعد دائما بتواجدك وبتواصلك
تقديري

[سيف قحطان]

الله الله

استلم



وابك البقا يا المرحب وانت وافي شبر=ترحيبتك وافيه والطيب من طيبها

الناس قامت تهاجر يم دولة قطر=هجره غريبه ولا ادري ويش اسابيبها

[سيف قحطان]

ارحب يا بو عبدالرحمن

الابداع هو وجودك الذي اعتبره شرف لي طال عمرك


تقبل وافرتحياتي

[فواز الشيباني]

الله الله الله

سيف قحطان.........وابو سعود

الله يبيض وجيهكم على الطاروووووووووووووووووووووووووووووووووق

الرائع

[سيف قحطان]

ارررررررررحب يا فواز


ووجهك ابيض

تشرفنا بحضورك


تقبل وافر تحياتي

[شاعر روق]

تسلم ومدحك وسامٍ للرجال وفخر=من روس قومِ يسر الضيف ترحيبها
دولة قطر ماوراها الا القشر والفقر=والمملكه دولةِالعزه لصاحيبها

[متعب العتيبي]

الله الله

سيف قحطان

شاعر روق

وليله غير

صح السنتكم واصلوا متابعين

[شاعر روق]

ووجهك ابيض يابو مشاري
والا بداع بحضورك ياغالي

تقديري

[أبوزيد الهلالي]

سيف قحطان وشاعر روق
متابعتكم واجبه وحتميه
واصلوا
تحياتي

[سيف قحطان]

الله الله


استلم



وانتم هل الغانمه من ماضيات الدهر=ما ذم ربع (ن) تحزم في مواجيبها

ادريبها مابها غير الهنود الحمر=مير الحرامي خذا الجعبه ويسريبها

[شاعر روق]

ابو رشيد
وجودك شرف ووسام للجيع
لك من الود كله

[سيف قحطان]

ارحب يا بو زيد


متابعتك شرف

تقبل وافرتحياتي

[سيف قحطان]

اررررررررحب يا متعب


اعذرني ما انتبهت


وجودك يشرفنا وحضروك يحمسنا

تقبل وافر تحياتي

[شاعر روق]

الله الله


وانتم كذلك رجال الطيب واهل الظفر=وعتيبه اللي عطيباتٍ مضاريبها
االسارق اللي سرق في المحكمه ماحضر=غايب ولايعرف الدنيا ولا غيبها

[شاعر روق]

ابو زيد
لنا الشرف بتواجد معنا
تقديري

[سيف قحطان]

الله الله



ونعمين يا عتيبه وقحطان ساس الفخر=في كل وقت غصب تصفي مشاريبها


السارق اللي غدى مايسلم من الخطر=من فوق راسه نولع في مشاهيبها

[شاعر روق]

الله يديم الامن ياسيف بين البشر=يوم ان سود الليالي عاويِ ذيبها
والله يقويك شد الحيل واعزم واغر=واذبح لنا الحيه اللي يزحف جنيبها

[سيف قحطان]

الله الله



الله يديم الرخا للبدو واهل الحضر=وكل من الناس له وقفه يماريبها

ويش عذركم يوم تبغينا نشد الظهر=سم الحيايا ترى في راس وذنيبها

[فواز الشيباني]

صح السانك ياسيف قحطان

نبي العني مدفون وقوي

وينك يابو سعود

[سيف قحطان]

ارحب يا فواز


الجود من الموجود طال عمرك


والله يعيني على بو سعود

تقبل وافرتحياتي

[شاعر روق]

بعض المواقف تراها في الزمن ماتسر=والا بعضها تعز النفس وتهيبها
قدامك امشي بسيفي والحصان الاغر=ماغبت عنها بعد شانت هناديبها

[شاعر روق]

ابو مشاري
المعنى كما تحب
واناموجود والعب على ثلاث جهات
الله يعين وانا اخوك
وسعداء بتواصلك

دمت بخير

[سيف قحطان]

الله الله



وبعض السوالف تراها تزيد بالكبد مر=وبعض السوالف تنومس من يغني بها


نبغي على السارق الملعون يوم غبر=والسف والرمح ما تخطي مضاريبها



ابو سعود صح لسانك وتشرفت باللعب معك

الختم عندك وتقبل وافر تحياتي



الله يعينك على تعديلاتي

[شاعر روق]

وانا كذلك تشرفت بمجاراتك واللعب معك
واخذ راحتك البساط حنبلي



صادق وشوفك حديد ولا تلد النظر=فالجابه اللي تنقص من يهذريبها
ماتدرك اللي تريد الا بجهد وصبر=والناس من هرجنا هذا كثر ريبها


تصبح على خير

[فواز الشيباني]

بيض الله وجيهكم
والحقيقه امتعتونا بالطارووووق

الرائع

[سيف قحطان]

صح لسانك


وتصبحون على خير جميع


الى اللقاء

[فتى العتبان]

شاعر روق 00سيف قحطان

لاهنتم

[الشبح]

الله الله الله

سيف قحطان.........وابو سعود


شعار كبار وأنا في صف العتيبي ولا يهون سيف قحطان

وش اسوي عنصري ههههههه