يا هل المحل !

[ساحوق]

السلام عليكم ورحمة الله وبركاته .. ومسيكم بالخير


أنا عضو جديد بالمنتدى وحبيت أشارك معكم بالقسم المدّهر :)







يالربع أنا جيتكم زاير وطرقي وضيف = مشتاق لاهل الشكاله وأعرف أصحابها
إن كان قلتوا هلا هذا كلام(ن) لطيف = وإن كان شفت الزعل عليّ مجنابها

[مرضي القيفان]

استلم لاهنت 0

ابد بسلامك هلا بك وانت جاين لريف "="
ياللي تعرف الشكاله وانته اولابها 0

حييت وانته لحالك وان لفيت برديف "="
في عالم النت محدن يشعب إركابها

[ساحوق]

مرحبا يا مرضي القيفان .. وآسف للـتأخير .. واستلم لا هنت



الله يسقيك يا ريف العرب كل صيف = وتربّع الديرة اللي يبست شعابها
في عالم النت يا رجال كذب(ن) وزيف = والكلمة الطيبة من حظ من جابها

[مرضي القيفان]

ينبت ورق من مزون الصيف عقب الخريف"="
والخيمه ليا انبنت توثق لها اطنابها 0

في عالم النت سج إركاب مامن نكيف"="
وترى البضايع تسام بحلف جلابها

[ساحوق]

صح لسانك .... واستلم



يا مرضي القاف أنا جيتك بخنجر وسيف = آطا دروب الخطر يا خوك ما هابها
لن كان جد النخل ماباقي إلا الصريف = والتمره اللي بها سوسه ماأرضا بها

[مرضي القيفان]

الله الله استلم لاهنت

ياراعي السيف هود ماتشوف الرصيف ؟ "="
والكلمه العايله ماينفتح بابها 0

حنا بموقع عتابه برقنا له رفيف "="
ياذيب بعض الدعاوي جنب اناشبها 0

[ساحوق]

التأخير وارد مار المعذرة ..... واستلم


ما جيت غازي عليكم لا ولاني حليف = أنا عتيبي وأعرف الدار وذيابها
وش راي مرضي يخاويني لدار الشريف = يمناي أحطك على العدوان وأسطابها

[مرضي القيفان]

التاخير منا كلنا لاهنت مار استلم

الله يحيي العتيبي يوم جا للمضيف"="
في ساحةالمنتدى للنار شبابها 0

ياذيب ياذيب شايب والسفر لي كليف"="
وسود الليالي لك الله دار دولابها 0

[ساحوق]

شايب تجاربك تنفع فالزمان المخيف = واللي تعود على الطالات يضرا بها
يالضابط اللي تجامل بالكلام العريف = خلك معه كان ودك يقدر أصعابها




يا مرضي لا تكون الملعبة بارده . أشوف ماش صفوف :D

[مرضي القيفان]

:D والله انك صادق الصفوف ماش0:D
هاليومين اللى راحت طلال الثعلى مابيّن
الله يرده بالسلامه وعسى المانع يكون خير 0
والصفوف مضربين عن التشجيع احتجاج يوم
طلال ماهوب فيه 0 مار يجيب الله مطر :D


واستلم لاهنت 0

بعض التجارب لك الله ماتوكـّـل رغيف "="
كم حسبتن ضاع بالارقام حسـّـابها 0

وابشر بعزك على وضح النقا يامنيف "="
خلك معه واستعد لنار حرّابها

[ساحوق]

وجودك يا اخوي مرضي القيفان يكفي طال عمرك ....

واستلم ،،،،


أنا حسابي صحيح ولا يجيه اتحريف = يوم إن بعض الأوادم تجهل أنسابها
أنا إشهد إنك رفيقن ماش مثلك وصيف = دايم على الطيبة تسعى وتشقا بها

[مرضي القيفان]

تسلم يا ساحوق ماعليك انت والجمع زود0


ياراعي الحسبه. الفنجال والبن كيف "="
بنشدك عن بنت عيــّـت تضفي ثيابها 0

ولقيت فالسوق ناس(ن) يتبعون الكفيف"="
وام الكباير بيدها تنقش خضابها

[طلال الثعلي]

ساحوق.....

بدايه موفقه.....

تدل على انك تحمل موهبه.....

واصل ونحن معك....


تحياتي

[طلال الثعلي]

مرضي القيفان


محاوره رائعه .......


تحياتي

[مرضي القيفان]

الاخ طلال الثعلي
اولا الحمد لله على السلامه
ومن طول الغيبات جاب الغنايم

ثانيا0 تسلم على التشجيع والمرور

تقبل تحياتي وتقديري

[إبن ثعلي]

والله ما نعرف للصفوف عبر النت ولكن تابعنا محاورتكما الرائعه جدا والممتعه وباين عليكما انكما محترفين ولستما من الهواه والله يعطيكما العافيه وابالتوفيق انشاء الله والى الامام
اخوكم بن ثعلي

[مرضي القيفان]

هلابك يا ابن ثعلي ومشكور
على مرورك وتشجيع وان كان متأخر:)

اما بالنسبه للاحتراف فارجو ان تقبل مني
بيتين شعر هديه:D


يامستشار المنتدى قلت واحسنت= تشجيعكم واضح وعلمك وكادي0
ولو باحترف فالشعر ماجيت للنت = هذي مكاتبهم لك الله تنادي 0
وان شاقني قاف(ن) من الشعر هيجنت= والا على الطاروق صغت المبادي :D


تقبل تحياتي وتقديري